Acts 21

1Mu'che' farajjeyacsetaqui tsun mu'in ĉọjcacsity in, bijti tsun marĉantyi'che' covamba, chụi' bu'yi tsun venjoij mu'ya' tsun Cosya'. Nojno mạyedye' Rodasve jịjcaij tsun, yejĉoij mi'i tsun cha'she' yocsi' tsun bä'yedye' Patara, mu'ya' sojquiti tsun. 2Mu'ya' yirity dạcte covamba tsun, Feniciaĉan ra' jịjcaijtyi'. Mu'che' qui bijti tsun, tacti tsun, mi'i tsun. 3Cajñe' tsun mọ' därsi' poc̣ho' Chipre, q̂uimvetaque bu'yi' mọ'. Yejĉoij mi'i tsun dạquique' tsun mọ' jac Siria. Mu' na covamba jemoñe' yạjqui' jedye' Tiroya', mọ'dyes qui sojquiti tsun. 4Mu'ĉan dạcacsi tsun anicjetety Jen' in, mu'inya' dyäqui tsun yävätidye' mạyedye' mu'intum tsun. Jen'si' Ạ'edye' mu' so'macsi' p̂eyacdye', mu'in qui jị'chiqueyete in mu' Pablo. Jéte in paj qui jam Jerusalénĉan jịjcaij mu', ĉaĉaij na mu'ĉan ra' jị'ñibe'cate in. 5Aty yävätidye' mạyedye' jiyi qui tsun. Mu'ĉantyi' anicjetety Jen' in, judyeya' p̂en mu'in judyeya' ạva' mọ'in, mu'in pen'dyetun tsun in jorojya' bä'yedye', me'dye jámanche' venjoij in. Mu'che' qui dyụtsyi tsun yiri'ya' cọdaqui Jen'che' tsun. 6Chat qui vorjeyacsetaqui tsun, bijbun tsun marĉantyi'che' covamba. Mu'ĉantyi' in ca'ñibun qui in aca'ya' jịjcaban in. 7Mu'ya' qui tacti tsun Tiroya' quivij mi'i tsun. Dạquique' tsun Tolemaida, mu'ya' qui sojquiti tsun. Mu'ĉan ĉọcsequi tsun anicjetety Jen' in, yiri' ĉọshi mu'ĉan tsun. 8Nojno mạyedye' quivij sacti tsun, mi'i tsun Cesareaya' venjoij tsun. Mu'ĉan ĉọcte Felipe tsun, mu'si'ĉan aca' dyäqui tsun. Mu' cạyacsity Jen'si' p̂eyacdye' mu', mu' nash chime' yirity mu'in yävätidye'yity nọ́taquity in,114 yụ'tactyi' jiquej mu'in jutactyi' Jen'tyi' mu'. 9Mọ'ya' vạjpedye' ạva' Felipes mu' yedyes p̂en in, muñemunsi'dyem' in, mọ'in jaso'mitis p̂eyacdye' Jen' in. 10Aty juñucsi' mạyedye' mu'ĉan bä'yi tsun, atsij yirity Judeaĉantyi' muntyi', mu' jaso'mitity p̂eyacdye' Jen', Agabo tịj mu'. 11Aty venjoij mu', mu' jäcbite ñutu'tacdye' Pablos, c̣họco'taqui ĉụi'si' un mu' judyeya' yuj mu', chat qui yi mu': —Yi' Jen'si' Ạ'edyem', me' ra' mu'in Jerusalénĉantyi' judío in c̣họco'te in mu' a'tumtyi' ọij ñutu'tacdye', chat qui ra' ji'me'te in ayo'ya' mu'in jam judío in —yi Agabo jéyacsi. 12Se'vepte p̂eyacdye' tsun, chat qui tsun räjtumdye mu'ĉantyi' tsun ferche' tsan' jéte tsun mu' Pablo paj qui jam Jerusalénĉan jịjcaij. 13Mu' na jam méqui' jụjjin tsun, jin mọmo' tsun: —¿Jun' ĉaĉaij yụ táritiĉa' u mi'in? Mạ'je' ji'taritiĉa' ĉojtyi'ĉan yụ mi'in. Me' ra' tsan' Jerusalénĉan ĉär'tyin yụ in Jesúsdyes, me' ra' tsan' ijan yụ in Jesúsdyes Ayo' tsun, jam yụ otejjiti, mu'ĉan ram' jịjcaij yụ —yi mọmo' jin tsun. 14Jam jun' chäquin tsun mọ'dyes qui farajjete tsun, tsun na yi mọmo': —Paj mu'ya', paj Jen' yi jun' chuc mu' —yi tsun. 15Aty me'si' jäm'chuti qui tsun majmiche' qui roi'je' tsun Jerusalénĉan jịjcaij tsun. 16Pạrej pen'dyetun tsun in Cesareaĉantyi' anicjetety Jen' in. Venjoij tsun Jerusalénĉan, ji'dyäquin tsun Masonsi'ĉan aca' mu'. Mu' Mason Chipreĉantyi' muntyi', aty men anicjete Jen' mu'. 17Me' Jerusalénĉan venjoij tsun. Mu'in anicjetety Jen' in anic jäm' tiĉuñin tsun in. 18Nojno mạyedye' chat qui tsun ĉọcte mu' Santiago mu'tumdye Pablotum tsun, mu'ĉan chime' räj mu'in ĉọjcacsity anicjetety Jen' in. 19Mu' Pablo vorjeyacsi chat qui jéyacsi räj jun' chuc Jen'si'ya' ferdye' mu' voro'tacsi mu'in jam judío in, jụj ja'yacsi. 20Se'vepte in Pablos p̂eyacdye' räj tima'-quete Jen' in. Me' tsan' me' jéte qui nam' in mu' Pablo: —Chịj mi vojity, anic aty dai' judío in anicjetety Jesucristo in, chäjäm' jun'tum joij mir in. Me' tsan' me', yejĉoij qui nam' fer dyijtui' in mọ' yụ'tacdye' yódyesdyem' jaso'mitis Moisés jiquej u. 21Mu'in se'vibun in ji'chäyitidye' mi, pạrej yi in: “Uts Pablo anic va've ji'chäyibusin' chätidye' tsun yocve bä'yity judío in. Mu' jéyacsi paj qui farajje' in mọ' yụ'tacdye' sáñe'si' mu' Moisés, judyeya' yicdye' tsun chime'. Chime'dye yi mu' paj qui jam sei'tac a' mu' ạva'si' tsun”, me' yi judío p̂iyin in. 22Mọ'dyes ¿jun' qui bu ra' tsun? Ĉaĉaij na mu'in judío in se've' ra' in aty atsij mi úya', are'ĉa fáquin in. 23Dam'dye jäm' me' ra' mi, paj qui chäyin in mi cäc̣hä'-chuptety yụ'tacdye' sáñe'si' Moisés jiquej. Uya' vạjpedye' muntyi' in aty yụ'tyety p̂eyacdye' Jen'dyes in. 24Aty cha'she' ra' tupudye' mu'in paj qui jị'cäts yụ'taqui p̂eyacdye' mu'in. Tupuj mímun chime' ĉụi' jäm' yu'ti mi judíosya' yicdye' tsun, tupuj mi ya'itye' mu'indyes in, chat qui ra' tä'tsac in, jị'ĉocdyes p̂eyacdye' mu'in. Me'dye ra' se've' mu'in judío in chịj ra' in väñädye'ya' mi p̂iyin in, chịj ra' in mi chime' chique'tyi' mọ' yụ'tacdye'. 25Mu'in na jam judío in anicjetety Jesucristo in, jam mu'in me' in, aty jéyacsi tsun paj qui jam mọ' chique' in. Mọ' mọmo' jéyacsi tsun: “Jam ra' jebetiñe' mi'in säcsedye' jäm'tacdye'ya' jadyiquis, mijam ra' jebetiñe' mi'in chäsh, mijam chäshtumsi' shush chime'.” Chime'dye jéyacsi tsun: “Jam ra' vo'voij mi'in”, me' me' jéyacsi tsun mu'in jam judío in —jéte in mu' Pablo. 26Jụjyi mu' Pablo. Nojno mạyedye' mu' Pablo cạcsi mu'in vạjpedye'yity muntyi' in. Chat qui mu'intum ĉụi' jäm' yu'ti judíosya' yicdye' mu'in. Siti mu' Jen'si'ĉan aca', jecte mu'ĉantyi' cudyitity Jen'che' in jụ'ñis chuc ra' mạyedye' cạ̈tsi' ra' mọ' tupudye' p̂eyacdyedyes yụ'tye' in Jen'dyes jiquej mu'in vạjpedye' muntyi' in. Mọ' ra' mạyedye' cäts mọ'tutum in ji'co'shayac-dyedyes Jen'dyes in. 27Aty ra' c̣hẹi'ya' cha'she' in mọ' yävätidye' mạyedye', pạrej mu'in Asiaĉantyi' judío in mu'ĉan cạvete in mu' Pablo Jen'si'ĉan aca'. Yiristum mu'ĉan sac ja'yacsi muntyi' in, me'ĉandye siscajcate in mu' Pablo, 28äjyedye'tum p̂eyaqui yi in: —Chätidye' tsun Israeltyi' vóshi' mi'in, cavin atsijam', úya' u uts cäj jị'chiyacsity muntyi' in, pai' ĉọ́quety bä'yedye', jị'chiyacsity räj muntyi' in paj qui fáquisin' tsun judío tsun, judyeya' jéyacsi chime' fibis mọ' yụ'tacdye' judyeya' Jen'si' aca' mu'. Dadam' mu' q̂uin' ji'sitacsi úĉan pạrej jam judío in, ac̣hi'bite ọij jäm'si' aca' Jen'si' mu' —yi judío in. 29Me' yi in ĉaĉaij na bä'yedye'ĉan nạijte in mu' Pablo japen'dyetuti mu' Trófimo, mu' Efesoĉantyi' muntyi' jam judío mu'. Jeñej jo'meij ĉọ́te in siti mu' Jen'si'ĉan aca' mu', jeñej ji'siste mu' Pablo ĉọ́te in.115 30Me'dyes rärä'ejoij äjnaqui in räj bu'yi mu'ĉantyi' in, me'ĉandye siscajcapte in Jen'si' aca' mu'. Tap tŝọ́tyete in mu' Pablo soij cạte in, ji'shupjajte in mu'ĉantyi' chat qui ĉär'jetyete chụi'dye' in. 31Me'ĉandye ra' tsan' ijate in mu' Pablo. Cavintum mu' ĉọcte in mu' ayo' väc̣hä'tyitytyi', Romaĉantyi' mu'. Jéte in: “Räjen'dye sacje' äjnaqui in úĉantyi' bä'yedye'ĉantyi' in”, jéte in. 32Mu'ya'dye fayacsi väc̣hä'tyity in, räjtumdye ĉọjcaquity in, shujmun tyeij in yóĉandyem' shach muntyi' in. Aty nạijtacsiya' in mu'in väc̣hä'tyity in ayo'tum mu'in, farajjetacte in mu' Pablo. 33Ayo' mu' ĉọcte Pablo jutacsi qui väc̣hä'tyity in paj qui mu' tapjete in, pärä'ya' sapte cadenaya' in. Yi mu' ayo' jéyacsi muntyi' in: “¿Jụ'ñity ca' uts muntyi'? ¿Jedye' ca' juchaj mu'?” jéyacsi. 34Mu'in na muntyi' in äjnacdye'tum pai' pai' p̂eyaqui in, jam jun' cäts p̂eyacdye' mu'in, mọ'dyes mu' ayo' väc̣hä'tyitytyi' jam jun' chịj mu' jedye' chuc mọ' jiyi' mu'dyes. Chat qui mu' ayo' jutacsi paj qui mu'ĉan cạte in mu' Pablo ji'chäyitidye'ĉan väc̣hä'tyitysi' in. 35Mu'in na muntyi' in cä'c̣häijdye in, yejĉoij mạ'je' tapjete in mu' Pablo, jäm' tsäqui' tyeij fạ́coij mu'in in. Mu'in väc̣hä'tyity in cha'she' in mọ' bojvaquis acas, veme' cạte in bijbiche', me' ñutsjetyete in. 36Muntyi' in fer p̂eyaqui yi in: —¡Ujamac útsi! —yi in. 37Aty ra' tsan' ji'siste in ji'chäyitidye'ĉan väc̣hä'tyitysi' in, chat qui mu' Pablo jéte mu' ayo': —Mạ'je' jéye yiris jedye' —jéte. Väc̣hä'tyitytyi' ayo' vorjete: —¿Chịj adac mi p̂eyaqui griegosĉan p̂eyacdye'? 38¿Jam adac mi Egiptoĉantyi' muntyi' jiquej, mu' sac ja'yacsity muntyi' in paj chuti ayo'tum in? Jun'tum jụj ja'yacsi muntyi' in, vạjpedye' mir in, yedyej mu'in ijacsity in, cäjyasĉan jac cạcsity jiquej. ¿Jam mi u? —jéte mu' ayo'. 39Vorjete Pablo: —Jam u yụ, yụ nash judío, Tarsoĉan na'ityi' yụ, mọ' Ciliciaĉansi' bä'yedye', mọ' anic chị́yac bä'yedye' yụ. Yụ cọdyeye mi mạ'je' yụ voro'tacsi uts muntyi' in —jéte. 40Jụjyi mu'. Me'dye mu' Pablo bojvaquische' bu'yi, che'jeyaqui un mu' paj qui c̣hu'c̣huij muntyi' in. Tyäpä' in chat tiyacchui' p̂eyaqui mu' Pablo, ĉụi'si'ĉan p̂eyacdye' judíosĉan p̂eyaqui hebreosĉan.

will be added

X\