Acts 20

1Aty tyäpiya' Efesoĉantyi' muntyi' in, chat qui mu' Pablo fayacsi mu'in anicjetety Jen' in, voro'tacsi paj qui jiĉun ĉojtyi'ĉan mu'in. Aty me'si' vorjeyacsetaqui mu' Pablo, roi'je' Macedoniaĉan qui jịjcaij. 2Pai' ĉọcsequi mu'ĉantyi' anicjetety Jen' in, dai' ji'chäyitidye' so'macsi paj qui fer bu'yi bä'yi in, chäjäm' venjoij Greciaĉan. 3Chibin ịvaj mu'ĉan mu' Pablo me' bu'yi. Dyijyi qui mạ'je' tsan' Siriaĉan ra' jịjcaij covambache'. A qui nam' chị́qui mu'in judío in, mu'in dyijyi in mạ'je' qui ijate in. Ĉujcati, yocve qui roi'je' mu', quivij Macedonia sapa'je' mu'. 4Dai' pạrej mu'ya' chime' pen'dyetutety Pablo in, yujya' roi'je' Pablotumdye in: mu' Bereaĉantyi' muntyi', Sópater tịj mu', Pirroty ạva' mu', judyeya' mu' Aristarco judyeya' mu' Segundo, Tesalónicaĉantyi' muntyi' mu', judyeya' mu' Gayo, Derbeĉantyi' muntyi', judyeya' mu' Timoteo, judyeya' Tíquico Trófimotumdye, Asiaĉantyi' mu'in in, me' me' mu'in shupquequi in Filiposĉan . 5Mu'in pen'dye' mu' Pablotyi' tashi mu'in in Troasĉan jịjcaij in, mu'ĉan ra' bisin tsun in. 6Tsun na taĉan Filiposĉan, cạve' tsun mọ' feshta jam ji'dujraquistumtyi' pan. Aty me'si' chat jiyi tsun bijti qui tsun marĉantyi'che' covamba, tacti tsun nobi tsun. Aty ĉanam' mạyedye' mi'i tsun chat venjoij mu'ĉan tsun Troasĉan, mu'ĉan cha'shacsi tsun mu'in in Pabloty pen'dye' mu'. Yävätidye' mạyedye' mu'ĉan tsun yiri'ya' Troasĉan. 7Tashches mạyedye' simanas vajmu'yaij tsun paj qui jebei' tsun ji'dyijvitidyes säcsedye'. Pablo jị'chiyacsi mu'ĉantyi' anicjetety Jen' in. Meñi p̂eyaqui, me'dye cha'she' menya' in yejĉoij jị'chiyacsi, ĉaĉaij na ra' nojno aty jọban tsun. 8Che'ves acas vavdye' mu'che' tsudyujñiti tsun, dai' mu'ĉan mạijyity in. 9Mu'ĉan yirity nanaty, Eutico tịj mu', cạvedye'ya' bä'va'joij mu'. Anic qui na men jị'chiyacsi mu' Pablo, chäjäm' mu' Eutico ĉushtyiti, säñejje' ĉọshi, chäjäm' vets tyeij mu'chety chibinyische' cächtacdye' acas mọ', naij tŝọij mụijya'. 10Chạij mu' Pablo c̣hoben'jebajte mu' säñity, jéyacsi mu'in anicjetety Jen' in: —Jam ra' táretinte mi'in uts nanaty, atyu' u tsạ'eban —yi jéyacsi. 11Pablo quivij chimu'che' jịjcaban bojban chat qui säcsi in, ji'dyijvitidyes säcsedye' jebei' in. Ijaij in chat quivij je' mu' Pablo voro'tacsi me'dye nạijjoi', chat q̂uin'dyem' jọban mu' Pablo. 12Mu' na jọ'chaijtyi' nanaty tsạ' mu' cạbajte in aca'ya', me'ĉandye muntyi' ji'jiyaqui táris in. 13Tashi tsun bijbun covambache', Asove roi'je' tsun, ĉaĉaij na me' jin tsun Pablo. Mu' na dyijyi majmiche' tyeij ra', 14cha'shin tsun Asoya', mu'ya' q̂uin'dyem' bijti. Mitileneya' qui jịjcaij tsun, mu'ya' venjoij tsun. 15Quivij mu'ya' tacti tsun, nojno mạyedye' cajñe' tsun mọ' poc̣ho' Quío tịj mọ'. Jẹjcai' mọmo' mi'i tsun, nojno mạyedye' Samosya' sojquiti tsun. Quivij mi'i tsun nojno mạyedye' Miletoya' venjoij tsun, mu'ya' sojquiti tsun. 16Pablo dyijyi ñụi'muñi chum Efesoya' ĉaĉaij na cavinyi mu', jam mạ'je' menyequi Asiaĉan, mạ'je' cavintum Jerusalénĉan jịjcaij mu', mọ'ĉan ra' vatyquej cạve' mọ' feshta Pentecostés tupuj jụijya' mu'. 17Miletoĉan venjoij tsun. Aty mu'ĉan tsun mu' Pablo jute' yiris p̂eyacdye' yi' paj qui atsij in mu'in ĉọjcacsity anicjetety Jen' in Efesoĉantyi' in. 18Me'dye atsij mu'in in, chat qui mu' Pablo so'macsi p̂eyacdye' jéyacsi: —Chätidye', cavitiĉa' yụ mi'in jun' chuc bä'yi yụ mi'intum jiquej atsijya' yụ úĉan Asiaĉan, jun' qui' chuc jọban yụ. 19Räjĉan úñi yụ Ayodyes, mijam va'bunyedye'tum yụ, tári muntyidyes yụ. Judío me'tyin yụ in ñịbedyes so'min yụ in, ac̣hi' dyijyi in mạ'je' jị'ñibe'can yụ in me' ĉúti in. 20Me' tsan' me', yụ qui nam' yejĉoij jị'chiyeyac mi'in Jen'si' p̂eyacdye' mu', jam méqui' jumjetyeyac p̂eyacdye' yódyesdyem' jemontiñes u mi'in. Yụ jị'chiyeyac vajmu'yaijĉan mi'in judyeya' ĉụi'si'ĉan aca' mi'in. 21Voro'tacsi yụ räj muntyi' in, mu'in judío in judyeya' jam judío in, ferche' yụ jéyacsi paj qui caman' dyijyeban in juchajche' mu'in Jen'si'ya' vej mu', paj qui anicjete Jesús in Ayo' tsun. 22̣Q̂uin' chat ra' Jerusalénĉan jịjcaij yụ ĉaĉaij na me' jin yụ Jen'si' Ạ'edye' mu', jam qui nam' chịj yụ jun'jin chuc ra' mu'ĉan yụ in. 23Ọij mọmo' ji'chäquiyin yụ Jen'si' Ạ'edye' mu', pai' juna' chuc bä'yedye' ĉọ́que' yụ, mu'ĉaĉan mu'in jaso'mitity p̂eyacdye' Jen' in jin yụ in yụ ca ra' jị'ĉojtye' ñịbedyes judyeya' ca ra' ĉär'tyin yụ in chime'. 24Yụ na jam méqui' otejjiti paj jun'jin ĉụi' mọmo' yụ in, vátyequej ra' ijan jụijya' yụ in, mọm' dyijtui' yụ mạ'je' ma'jodye'tum chiquepte yụ p̂eyacdye' mu', jun' chuc yu'tyin yụ mu' Jesús Ayo' tsun, yụ mạ'je' ijaij yụ carijtacdye' so'min'si' yụ. Me' yu'tyin yụ paj qui yụ jéyacsi jäm'si' p̂eyacdye', mọ' p̂eijbite ñịbe'jitidyes Jen'si' mu'. 25Pai' voro'tyeyac mi'in Jen'si' p̂eyacdye' mu', p̂eijbite yụ ayo'bu'yidye' ra' Jen'si' mu'. ̣Q̂uin' chat aty chịj yụ jadyic ra' cavibudyiĉa' yụ mi'in, me'qui'dye ra' ca'ñibun yụ. 26Yụ ra' q̂uin' ferche' jéyac mi'in vatyquej mu'ya' taca' tŝijĉandyety jụijya' mi'in, mọ' jam yụ́si' juchaj, 27ĉaĉaij na yụ jị'chiqueyeyac räj Jen'si' dyijyedye' mu', mijam dam' jumjetyeyac mi'in. 28Mi'in qui nam' jemoñe' ĉujcati mi'in, ĉọjcacsejam' chime' mu'in anicjetety Jen' in, ĉaĉaij na Jen'si' Ạ'edye' mu' me' yu'nac paj qui ĉọjcacsi mi'in mu' Jen'tyi' ñuru'tyity mu', mu'in ya'itactyi' mu' ĉụi'si'ya' chäsh mu'. 29Aty chịj yụ, aty ra' yacchuyacya' yụ, jäqui've ra' shupqui in cäjsis p̂eyacdye' tui'tyi' in, mu'in ra' jam ạ̈räjyi anicjetetytum Jen' in, jeñej tsäqui'yis vajedyedye' jam ạ̈räjyi' cu'dye'tum, me' bu'yi ra' shupqui in. 30Chime'dye mu'ĉantyi'dye ra' mi'in pạrej ra' shupqui mi'in, cäjsis qui ra' p̂eyacdye' jị'chiyacseban mi'in, quevacseban ra' mi'in tyi chuc cäc̣hä'chunactyi' in a'c̣hisya' p̂eyacdye'. 31Jemoñe' jäm' ĉujcati mi'in jäm' ra' dyijtubajtiñe' mi'in ji'chäyitidye' yụs jiquej, ĉaĉaij na chibin yómodye', mạij judyeya' tsedyedye', me'qui' jị'chiyeyac yụ räj mi'in jiquej, táristum yụ jị'chiyeyac. 32̣Q̂uin' chätidye', yụ cọdyete Jen' mi'indyes paj qui mu' ĉujcanac mi'in. Mọ' p̂eyacdye' mu'si' p̂eijbites ñịbe'jitidyes mu', mọ' tupuj ĉujcabunac mi'in. Mọ' tupuj so'minac ferdye' ĉojtyi'ĉan mi'in paj qui fer bu'yi bä'yi mi'in judyeya' ra' ñịbe'jinac mi'in mạyedye'ches bijodye', yojdyem' räj ñịbe'jeyaqui u tsim'tactyi' mu'. 33- 34Mi'in jäm' chäyitiĉa' mi'in jun' chuc yụ jam méqui' mạ'jetyeyac jedye' mi'in jiquej, mijam querec̣ha mijam quị'si'. Yụ ĉụi'si'ya' carijtacdye' tsạ' bu'yi yụ räjtumdye pen'dye' yụ, jedye' chuc jemoñe' tsun ĉụi' mọmo' ya'ij yụ. 35Räjĉan me' yi yụ paj qui chịj mi'in chime' jemoñe' me' carijtaĉa' paj qui tupuj nọ́tacseja' mu'in jayejjotaquity jedye' in. Me' ra' dyijtupja Jesússi' p̂eyacdye' mu' Ayo' tsun, yi: “Tyi chuc ñịbe'jeyacsity jedye', mu' ra' muju'cha' ma'jodye'tum, uya'ya' ma'jodye'tum tyi chuc ñịbe'jeyac muntyi'ya' in”, yi Jesús jiquej —jéyacsi mu' Pablo. 36Aty ji'me'siyaqui mu' Pablo, chat qui dyụtsyi mu' räjtumdye ĉọjcacsity anicjetety Jen' in, cọdyete qui Jen' in mu'intum in. 37Räj tári in c̣hoben'jete mu' Pablo in judyeya' pụ'sete in. 38Dadam' tárete in ĉaĉaij na yi jéyacsi: “jadyic ra' cavitiĉa' yụ mi'in”, yi mu'. Chat qui pen'dyetute in sinve jịjcaij in, jị'ĉojcayebajte in.

will be added

X\