Acts 2

1Cha'she' in feshta Pentecostés. Mu'in anicjetety Jen' in räj tsudyujñiti in yirisĉan aca'. 2Vátyequej se've' in shäjä'jäi' fer, jeñej fertyi' tyi'mu, me' mạ'i', rimaj tŝọi' yóĉandyem' tsudyujñitiĉan u in. 3Ĉụi'dye nạijtye' in méqui' furu'ruyacñi' jo'no'chechej mu'in. 4Jen'si' Ạ'edye' mu' räjdye mu'in tŝọ́tacsi', chat qui tiyacchui' p̂eyaqui in yoctyisĉan p̂eyacdye' mu'in jam chique'si' in, me' me' ji'p̂eyacacsi' Jen'si' Ạ'edye' mu' paj qui me' p̂eyaqui in. 5Chime'dye mu'ĉan Jerusalénĉan pạrej mu'ya' judío in, cại'tyi' in ĉụi'si' ji'chäyitidye' mu'in, pai' pai' jacches bä'yedye' atsij in, cạvete'tyi' feshta in. 6Se'vem' in mạ'edye', sijcajcacsi ĉọcsequi in anicjetety Jesús in. Anic äjyi mu'in in se'vacsi in ĉụi'si'ĉaĉan p̂eyacdye' p̂eyaqui in ĉaĉaij na mu'in anicjetety Jesús in yoctyisĉaĉan p̂eyacdye' p̂eyaqui in. 7Anic äjjeyacsi mu'in in, yi jítidyeij in: —¿Jam adac uts Galileaĉantyi' in me' p̂eyaqui q̂uin' in? 8¿Jun' buty ĉaĉaij me' p̂eyaqui yoctyisĉan p̂eyacdye' in? Me' tsan' yoc yoc muntyi' tsun pai' bä'jaty, ĉụi'si'ĉaĉan qui nam' p̂eyacdye' se'veja' tsun, me' me' p̂eyaqui uts q̂uin' in. 9Chime' q̂uin' úya' tsun atsija'tyi' Partiaĉan, pạrej Mediaĉantyi' tsun, judyeya' Elamĉantyi' tsun, judyeya' Mesopotamiaĉantyi' tsun, judyeya' ọijĉan Judeaĉantyi' tsun, judyeya' Capadociaĉantyi' tsun judyeya' Pontoĉantyi' tsun judyeya' Asiaĉantyi' atsija' tsun, 10judyeya' Frigiaĉantyi' tsun, judyeya' Panfiliaĉantyi' tsun, judyeya' Egiptoĉantyi' tsun, judyeya' Libiaĉantyi' tsun, mọ' c̣hẹi'ya' bu'yis Cirene, judyeya' Romaĉantyi' chime' tsun. 11Pạrej taca' judío na'eja' tsun, judyeya' pạrej jụj ja'yisin'tyi' Judíosya' ji'chäyitidye' mu'in. Chime'dye mu'ya' pạrej Cretaĉantyi' tsun judyeya' Arabiaĉantyi' chime' tsun. Me' tsan' pai' bä'jaty tsun, ĉụi'si'ĉaĉan qui nam' p̂eyacdye' tsun se'veja' tsun Jen'si' p̂eyacdye' mu', p̂eijbiteya' in därsi' ferdye' Jen'si' mu' —yi in. 12Anic där äjyi in, itŝi' dyijyedye' dạque' in, yi jítidyeij vajmun in: —¿Jun' buty me' yi uts in? 13Pạrej dyisa'yi ĉọcsi in, ĉaĉaij na yoctyisĉaĉan p̂eyacdye' p̂eyaqui in, mọ'dyes me' shu'qui ĉọcsi in. 14Chat qui mu' Pedro mu'ya'dye sacyi, yoctyi'tum in, yiri'tac yirity jiyity jutactyi' Jen'tyi' mu'. Fer p̂eyaqui jéyacsi muntyi' in: —Chätidye' judío tsun judyeya' mi'in Jerusalénĉan bä'yity mi'in, se'vibutiĉam' jäm' ọij p̂eyacdye' yụ. 15Uts se'vacsity mi'in jam nash shu'quity in jam jeñej yi mi'in, taca' pam' q̂uin'. 16Ọij se'vacsebi p̂eyacdye' q̂uin' mi'in yoctyisĉaĉan p̂eyacdye' p̂eyaqui in, mọ' aty jị'cätse' sánacdye' Joelsi' mu', mu' jaso'mitity p̂eyacdye' Jen' jiquej. Yi' sánacdye': 17“Yi Jen': Jadyiquisĉan ra' tupudye' yụ ra' jute' Ạ'edye' yụ, mọ' ra' räj tŝọcsi' muntyi' in. Vóshi' ra' mi'in son' in judyeya' p̂en in, yụ ra' so'macsi mu'in in paj qui jị'chiqueyacsi p̂eyacdye' yụs in. Chime'dye ra' nanamuntyi' in yụ ra' jị'caveyacsi jị'cavacdye' mu'in in, judyeya' ra' chime' yụ ra' so'macsi isho'muntyi' in tamin'dyedyes mu'in. 18Mọ'dye ra' tupudye' yụ ra' jute' Ạ'edye' yụ ọ́che', mọ' ra' tŝọcsi' úñity yụ judyeya' úñis yụ, paj qui mu'in jị'chiqueyacsi in p̂eyacdye' yụ. 19Chime'dye yụ ra' jị'cave' jị'ĉocdyes mạyedye'ches, judyeya' ra' chime' jị'cave' yụ jacchedyes ferdye', chäsh judyeya' tŝij judyeya' tyim'dyes jị'sa', me' me' ra' jị'cave' yụ. 20Tyum'joij ra' tsun, ịvaj ra' jeñej chäsh tyei'. Jo'mes chum ra' tashche' räj cạ̈tsi' jambi'dyem' cha'shac mọ' mọjo'chas tupudye' Ayo'si' mu'. 21Chat me'si' qui ra' tyi chuc cọdaquity Ayo'che' jụijya' in, mu'in ra' c̣hoñi in”, yi' sánacdye' —jéyacsi Pedro. 22Yejĉoij p̂eyaqui Pedro jéyacsi: —Se'vibutiĉam' jäm' ọij p̂eyacdye' yụ, mi'in Israeltyi' vóshi' mi'in, mu' Jesús Nazaretĉantyi' anic där so'mac ferdye' mu'. Dai' qui' mu' ji'caviyinac ferdye' mu', Jen'si'tum ferdye' mu' carijtaqui mi'insi'ya' vej, me' mu' ji'caviyinac jun' chuc mu' anictyity jutactyi' Jen'tyi' mu'. 23Mu' na Jen' därsi'ya' dyijyedye' mu' yi paj qui mu' Jesús ji'me'tac mi'inya', chat qui mi'in so'macsi ac̣hi'yity muntyi' in paj qui mu'in pacte croshche' in, mi'in qui me' bu'yi ji'ijatinte mu' Jesús jiquej, me' bu'yi' cạ̈tsi' dyijyedye' Jen'si' mu'. 24Aty me'si' Jen'dye jaji'tsa'ibun paj qui jam sän'dye'ĉan bä'yi, ĉaĉaij na mọ' sän'dye' jam jun' tapjajiti. 25Chimu'dye p̂eijte mu' Davidvun yi' sánacdye': “Räjĉan yụ́ya' bu'yi Ayo' tsun, cạveva'te yụ, mọ'dyes jam ra' jedyeij noi'yi yụ, ĉaĉaij na tacve bu'yi mu' yụ́tum. 26Mọ'dyes ma'joij ĉojtyi'ĉan yụ, ma'jodye'tum p̂eyaqui yụ, räjĉan ra' tsạ' bu'yi' a' yụ. 27Mi ra' jam jun' farajjitim ru'dyei'ya' mi, mijam ra' farajjibuti' a' mi, mijam ra' ji'focoyibutim mu'ĉan, ĉaĉaij nash yụ jutactyi' ĉụi'tyi' mi tsim'tactyi' mi. 28Mi ji'chäyitim jun' chuc ra' míya' bä'yi yụ, mi ra' so'mitim ma'jodye' aty pen'dyetuyeya' yụ”, yi' sánacdye'. 29Chätidye' yụ jéyac, ọij sánacdye' jam David p̂eijte ĉaĉaij na mu' meij mọmo' jịjcaijtyi', mu'ya' nạ́te in, me'dye q̂uin' mu'ya' ru'dyuij mu'. 30Mu' David jaso'mitity p̂eyacdye' Jen' jiquej, mọ'dyes qui jayu'tyiyiti tsäqui'yis fersi' p̂eyacdye' Jen'si' mu', yi' yirity ra' vóshi' mu' ayo'bu'yi ra', yojdyem' ayo'bu'yi David u, me'dye ra' vóshi' mu' chime'. 31Mọ'dyes mu' David jä'mij tashche' chị́yepte Jen'si' dyijyedye' mu', jun' chuc vañinyeban ra' Ji'c̣honacsity muntyi', mọ' sáñe' mu' yi' mijam ca ra' mu' taĉan to'ĉan rudyu' bu'yi, mijam ca ra' jedyei' a' mu' focoi' mu'. 32Me'dye mu' Jen' jị'cätse' ọij aty jị'tsa'ebajteya' mu' Jesús jiquej. Tsun nash nạijbajte mu' Jesús aty vañinyebadaque, mọ'dyes tsun jị'chiqueyacseban muntyi' in. 33̣Q̂uin' qui nam' aty mạyedye'che' jácabun Jen' mu', tacve bu'yi mu' Jen' jayu'ti. Jen' jaso'miti Jen'si' Ạ'edye' yoj jajitidyem' jiquej u, mu' qui Jesús ji'jiyisin' tsun, aty q̂uin' tsunche' tŝọi' mọ'. Mọ' cạvetiñes mi'in judyeya' se'vetiñes. 34Jam nash David mạyedye'che' jịjcaij jam mu' ayo'bu'yi mu'che'. Sánacdye'chem' p̂eijte mu' Ji'c̣honacsity muntyi', yi mu': “Jen' jéte Ayo' yụ: Tacve bu'yi ra' bä'yi yụ́yam 35jun' qui' chuc yụ ji'penbiye fáquintyi' in.” 36Räj mi'in Israeltyi' vóshi' mi'in jemoñe' jäm' chịj mi'in ọij p̂eyacdye': mu' Jesús ji'pactintety croshche' jiquej mi'in, mu'dye nash jayu'ti Jen' paj qui mu' Ji'c̣honsin'tyi' tsun, paj qui ayo'bu'yi tsundyes, mu' nash anictyity ayo' tsun —jéyacsi Pedro. 37Se'vepte in mọ' p̂eyacdye' jäm' are'jajiti ĉojtyi'ĉan mu'in, mọ'dyes qui jéte in mu' Pedro judyeya' yoctyi' jutactyi' Jen'tyi' mu': —Chätidye', ¿jun' qui bu ra' tsun q̂uin'? 38Vorjeyacsi Pedro: —Dyijyejam' juchajche' mi'in, ji'chojtiĉam' mi'in Jesucristosche' tịj mu' chat qui ra' mu' Jen' vayacjibunac juchaj mi'in, judyeya' ra' so'minac Ạ'edye' mu'. 39Mi'indyes nash chime' ọij p̂eyacdye' yụ'tye'si' Jen' jiquej, yi' mu', mu' ca ra' ñịbe'jinac mi'in judyeya' yoctyi'dye muntyi' chime' ñịbe'jeyacsi, me' tsan' moch bu'yity muntyi' in, mu'indyes chime' p̂eyacdye' in, tyijtyi chuc fayactyi' Jen'ya' in —jéyacsi mu' Pedro. 40Dadam' qui mu' cächjeyeyacsi fersi' voro'yedye' mu', jéyacsi: —Jụjyejam' tyä, paj qui jam mi'inmun dam'jetiñe' ac̣hi'yitytum muntyi' q̂uin' in —yi mu' Pedro jéyacsi. 41Anicdye me', mu'in in chiqueptety p̂eyacdye' in, ji'chojti qui in. Mọ'dye mạyedye' anic shach vatyquej jụjjete Jen' in, chibin qui' mir anicyi in. 42Räjĉan mu'in ji'chäyitidye'ĉan ji'chäyiti mu'in jutactyi' Jen'tyi' mu' jị'chiyacsi in. Vaj yiri'ya' cọdaqui Jen'che' in judyeya' chime' yiri'ya'dye säcsi in, judyeya' vaj meij so'mitidyeij jedye' in, tyi chuc jayejjotaquity in mu'in so'macsi in jam quijatutyiti in. 43Mu'in jutactyi' Jen'tyi' in dai' qui' jị'caveyacsi in Jen'si' ferdye' mu', mọ'dyes qui mu'in in räj irijyi in, jorojyatymun chime' in jam anicjetety Jen' in. 44Mu'in anicjetety Jesucristo in vaj cäts dyijyi in ñịbe'jitidyeij jedye' in. 45Me' ji'mincaqui ĉụi'si' jedye' in judyeya' jac mu'in chat qui so'macsi querec̣ha in mu'ĉantyi' in jụ'ñity chuc jayejjotaquity jedye' in. 46Räjĉan mạyedye' vajmu'yaij in Jen'si'ĉan aca' in, judyeya' chime' yiri'ya' säcsi in ĉụi'si'ĉan aca' mu'in, ma'jodye'tum säcsi in. Vaj cäts dyijyi in, jäm'jiti ĉojtyi'ĉan in 47räjĉan tima'quete Jen' in. Mu'in na yoctyi' muntyi' in jorojyaty in jäm'jeĉúnacsi in mu'in anicjetety Jen' in. Räj mạyedye' jịjcaij che'i muntyi' jụjjetety Jen' in, tyijtyi chuc jụj ja'yacsi mu' Jen'.

will be added

X\