Acts 19

1Mu' na Apolos taĉan mu' Corintoĉan mu' na Pablo majmichem' je' sapa'jemcacsi miqui'muntyi' mụcu' in shupque-qui Efesoĉan. Mu'ĉan pạrej dạcacsi anicjetety Jesucristo in, 2jéyacsi: —¿Tŝúnac ca' Jen'si' Ạ'edye' mu', yoqui'dyem' anicjetinteya' Jen'? Vorjete in: —Jam chịj tsun mijam se've' tsun vátyequej ra' mọ'yam', vátyequej ra' itŝim' —jéte in. 3Vorjeyacsi Pablo: —¿Jedye' buty cại' mọ' ji'chojtacdye' mi'in? —jéyacsi. Vorjete in: —Juansi' ji'chäyitidye' mu' cäc̣hä'chupte tsun me'dyes qui me' ji'chojti tsun —jéte in mu' Pablo. 4Pablo qui jéyacsi: —Juan jiquej chojtacsi muntyi' in, mọ' jị'ĉocdyes dyijyedyes juchajche' mu'in, judyeya' jéyacsi chime' paj qui anicjete in mu' atsijtyi' ra' muntyi', mu'dye Jesús —jéyacsi Pablo. 5Aty mọ' se'vepte p̂eyacdye' Pablos in, chat qui ji'chojti in Jesússi'che' tịj mu', Ayos tsun. 6Pablo mu'inche' yụ'taqui un mu' q̂uin'dyem' tŝọcsi' Jen'si' Ạ'edyem'. Tiyacchui' yoctyisĉan p̂eyacdye' p̂eyaqui in, judyeya' voro'tacsi p̂eyacdye' in so'macsis Jen'. 7Räjtum uts in araj jeñej yiri'tac pärä' jiyi rụi'cu' in. 8Pablo voro'tacsi vajmu'yaijĉan judío in, chibin ịvaj jị'chiyacsi mu'ĉan. Jam noi'yedye'tum jéyacsi, voro'ti mu'tum in mạ'je' tsan' jụj ja'yacsi mọ' p̂eyacdye'ya' Jen'si' mu', p̂eyes ayo'bu'yidye' Jen'si' mu'. 9Mu'ya' qui nam' pạrej yäcäjjetyetety ĉojtyi' in, jam mạ'je' anicyi in, muntyisya' vej in ñiñepte in Jesússi' majmi mu'. Me'dyes qui mu' Pablo yacchucsi, farajjeyacsebi vajmu'yadye' mu'in, yocve qui jịjcaij mu', cạcsi anicjetety Jesucristo in. Tiranosĉan qui aca' jị'chiyacsi därsi'ĉan vavdye' acas mọ', yóĉandyem' ji'chäyitidye' u mu'in. Mu'ĉan qui mu' Pablo räjĉan mạyedye' jị'chiyacsi Jen'si' p̂eyacdye' mu'. 10Pablo voro'tacsi mu'ĉan pärä' yómodye', mọ'dyes qui mu'in Asiaĉan bä'yity in räj se'vepte in Ayo'si' p̂eyacdye' mu', judío in judyeya' jam judío in. 11Jen' jaso'miti ferdye' mu' Pablo paj qui tupuj me' jị'caveyacsi muntyi' in, anicsis ferdye' jị'caveyacsi. 12Chime'dye pạrej quị'si' toco'jepte in mu' Pabloty mu', cạbibajte qui in, chat qui ĉọcsequi are'reijtyi' muntyi' in ji'toco'tyeyacsi mu' quị'si' in, chat qui mu'in chäĉän in are'reijtyi' in, judyeya' qui meijyeban' chime' sọyo' in, tyi chuc sọyo'tumtyi' in mu'insi' shuban' sọyo' in. 13Mu'ya' jiquej pạrej judío in, pai' ĉọcsequi in, ĉụi' meijjetyetacsity sọyo' yu'ti in. Mu'in chime' ji'ĉujti in meijjetyetacsi sọyo' in Jesússi'che' tịj mu', Ayo' tsun. Jäm'dyeya' jéyacsi sọyo' in: —Yụ jéyac Jesússi'che' tịj mu', mu' p̂eijtety Pablo, meijyebadac ọ́ĉan mi'in muntyi'ĉansi' —jéyacsi in. 14Chime'dye mu'in me' yi in Escevaty ạva' mu'. Mu' Esceva tashche' cudyitity Jen'che', yävätidye' rụi'cu' ạva' mu'. 15Ĉụi' mu'in Jesússi'che' tịj jéyacsi sọyo' in vatyquej mọ' yiris voryi' sọyo': —Yụ chị́yete Jesús, chime'dye mu' Pablo chị́yeteij, mi'in na jam yụ chị́yeyac, ¿tyi buty mi'in? —jéyacsi' mọ' sọyo'. 16Me'ĉandye mu' sọyo'tumtyi' muntyi' siscajcacsi judyeya' chucsi räj ji'penacsi. Muyayaj tŝọij in jorojya' jịjcaij ĉa'joij cädäjmun in judyeya' räj arere' in, ñịbe'tum c̣hoñi in. 17Räj Efesoĉantyi' muntyi' chị́qui in, judío in judyeya' jam judío in, jäm' mu'in noi'yi in, dadam' qui muju'cha' tima'quete in mu' Jesús Ayo' tsun. 18Chime'dye mu'in anicjetety Jen' in dai' atsij in p̂eye' juchaj mu'in muntyisya' vej mu'in. 19Chime'dye yoctyi' atsij in cọcojsi' jiquej in, tuqui quirca in cọcojsi'nacdyes mu'in, ji'co'shayaqui in muntyisya' vej mu'in. Anic där jiyi' ya'i'si' mọ'in quirca mu'in, ĉanam' qui'tac mir urucyaty querec̣ha, me'si' ya'i' räjtumdye mọ'in in. 20Me' Jen'si'ya' ferdye' mu' dadam' mọjo'cha' ji'tse'e' in Jen'si' p̂eyacdye' mu', pai' se've' in. 21Aty me'si' chat qui dyijyi mu' Pablo ĉọcsequi ra' mu'in Macedoniaĉantyi' in judyeya' Acayaĉantyi' in, chat qui ra' mu've Jerusalénve jịjcaij mu'. Chime'dye dyijyi yi mu': “Aty Jerusalénĉan bu'yiya' yụ, jäqui've ra' jemoñe' Romaĉan jịjcaij yụ.” 22Chat qui mu' Pablo jutacsi Timoteo judyeya' Erasto, nọ́taquity mu', Macedoniaĉan jịjcaij in. Mu' na Pablo taĉan chum Efesoĉan Asiaĉansi' bä'yedye'. 23Efesoĉantyi' in ñur tyeij in, fạ́coij in, fạ́quepte in Jesússi' majmi mu'. 24Yirity muntyi', Demetrio tịj mu', mu' sac ja'yacsi muntyi' in. Mu' ayo' mu'in jäm'tyety jäm'tacdye' in, plata jäm'tye' in. Mọ'in jäm'tacdye' miquis aca' in ji'yetye' in mọ' därsi' aca' Artemisas, jäm'tacdye' muntyis mu'in, me' bu'yi' jäm'tye' in ji'mincacdyes mu'in, me' querec̣haij in mọ'ya' jäm'tacdye'ya' mu'in. 25Me'dyes mu' Demetrio vajmu'ya'jeyacsi räj mu'in carijtyety in mọ' jäm'tacdye', räjtumdye mu'in carijtyety jo'mes in. Jéyacsi mu' Demetrio: —Chätidye', mi'in chịj ọij carijtacdye' tsun mọ' tsạ'chusin' tsun. 26Mi'in aty cạvetinte Pablo, judyeya' se'veptinte p̂eyacdye' mu', mu' yi mọ' jäm'tyes muntyi' in jam nash mọ' jen', jéyacsi muntyi' in. Junanaj ĉụi' jụj ja'yacsi muntyi' in, jam Efesoĉantyi' mọmo' in, räj Asiaĉantyi' jụj ja'yacsi in. 27Anic tsäqui' bu'yi' mọ' tsundyes, mijam ra' méqui' dyijtubusin' in mọ' jäm'tyejas tsun, are'ĉa farajje' in aty qui ra' jam ĉúti in aca'che' mọ'si' Artemisas. ̣Q̂uin' räj Asiaĉantyi' in tima'que' in räj bu'yi' ọij jac me', are'ĉa ac̣hi' bu'yi' shupqui', are'ĉa jam querec̣hayebajsha' tsun —yi mu' Demetrio jéyacsi muntyi' in. 28Mu'in na vajmu'yaijtyi' in, se've' mọ' p̂eyacdye' in, anic fuch tyeij in, uya'qui' äjyi in, yi in: —Tima'queja' mọ' Artemisa, mọ'che' nash ĉútiĉa'che' tsun Efesoĉantyi' tsun —yi in. 29Rärä'ejoij äjnaqui in räj bu'yi mu'ĉantyi' in. Mu'ya' chime' pärä' pen'dye' mu' Pablotyi', Macedoniaĉantyi' mu'in muntyi' in, Gayo judyeya' Aristarco tịj mu'in. Mu'in fạ́coijtyi' muntyi' in ĉọcsequi in, tapyejoij in cạcsi in mu'ĉan tsudyujñitiĉan in. 30Mạ'je' tsan' mu' cäc̣hen'yejoij Pablo sitacsi mu'ĉan, mạ'je' p̂eyeyacsi muntyi' in, mu'in na anicjetety Jen' in ñucjeĉun'te in. 31Chime'dye pạrej mu'ĉantyi' ayo' in pen'dye' mu' Pabloty, mu'in juteyete p̂eyacdye' in, yi' paj qui jam sitacsi. 32Mu'in na tsudyujñitity in yejĉoij äjnaqui in fer p̂eyaqui in, pai' pai' p̂eyaqui in, yocsi' yocsi' p̂eyacdye' ji'jäque' in, yoctyi' na yocsi' jedye' ji'jäque' in, jam cäts dyijyedye' mu'in, araj räj in mijam chịj in jedyedyes chuc vajmu'yaij in. 33Mu'in na judío in jéte in mu' Alejandro jedye'vei' chuc vajmu'yadye' mu'in. Tashche' mu'in yụ'te in paj qui tsan' p̂eyacdye'ya' ñutsjetacsi judío in. Che'jeyaqui tsan' un mu' paj qui c̣hu'c̣huijve in. 34Mu'in na muntyi' in aty chị́yete in judío mu', mọ'dyes qui jam jun' se'vaqui in, yejĉoij mọmo' äjnaqui in fer p̂eyaqui yi in: —Tima'queja' Artemisa, mọ'che' nash ĉútiĉa'che' tsun Efesoĉantyi' tsun —yi in. Mijam yacchui' in mọ' äjnacdye' mu'in, pärä' hora me'qui' yi p̂eyaqui in. 35Mu' nọ́taquity mu'in bä'yedye'ĉantyi' ayo' in, mu' qui chäjäm' tyäpä'teyacsi muntyi' in, chat qui mu' jéyacsi: —Se'vitiĉam' yụ Efesoĉantyi' mi'in. Räj muntyi' chịj in jun' chuc tsun Efesoĉantyi' tsun ĉọjcabija'tyi' aca' mọ'si' Artemisas, mọ'che' ĉútiĉasche' tsun, judyeya' tsun chime' ĉọjcaja mu' mij, jọ'chaijtyi' mạyedye'chety jiquej, mu' a' bu'yi Artemisaty. 36Jam tyi tupuj jumjebi' ọijsi' p̂eyacdye' mọ'. Jemoñe' cam' mi'in, jam ra' fibi'yi mi'in. 37Anic fibim' tucsi mi'in uts muntyi' in, itŝi' juchaj mu'in, mijam ac̣hi'tye' in jäm'tacdyes aca' mọ', mijam a'c̣his p̂eyacdye' mu'in ji'shupqueye' in Artemisa ĉútiĉa'che' tsun. 38Uts na Demetrio yojtumdyem' carijtaquity u in, mọ'ya' jụijya' jime'tacdye' mu'in, aty mọ' mạyedye' carijtacdyedyes tupuj ji'me'tac ayo'ya' in. 39Mọ'ya' yocsi' jedye' mạ'je' yi mi'in, jemoñe' bistiñe' tsudyujñitidye' muntyis in. 40Anic a'c̣his dyijyedye' mụi' mi'in, fibi' mọmo' äjnaqui mi'in. Are'ĉa tsäqui' ji'me'tac tsun Romaĉantyi'ya' ayo'. Cudyityisin' p̂eyacdye' jụijya' in jedye'veyeja' chuc atsija' úĉan tsun, mijam tupuj vorjeyacseja' tsun —jéyacsi mu' nọ́taquity ayoty mu'. 41Aty me' yíya', chat qui jutacseban muntyi' in paj qui jọban in acatuban in.

will be added

X\