Acts 18

1Aty me'si' mu' Pablo shupqui Atenasĉantyi', roi'je' Corintoĉan jịjcaij. 2Mu'ĉan dạquicte judío, Aquila tịj mu', Pontoĉan na'ity mu', Priscila tịj p̂en mu'. Jambi' mu' men mu'ĉan bä'yi Corintoĉan in, Romaĉantyi' mu' jiquej, Corintoĉan qui jijtuij in, ĉaĉaij na mu' muju'chaty ayo' Claudio ji'shupcacsi Romaĉantyi' in räjen'dye mu'in judío in. Pablo sóbacsi mu'in in, 3mu'inya' dyäqui judyeya' mu'intum yiri'ya' carijtaqui in, ĉaĉaij na mọ'dye carijtacdye' mu'in, quị'si' aca' jäm'tety in. 4Yósi'dyem' mạyedye' jị'jutyitidyes o, me'si'qui'dye mu' Pablo ĉọ́que' site' vajmu'yaijĉan judío in. Voro'tacsi mu'ĉan mu', vaj meij p̂iyiti mu'intum in, mạ'je' jụj ja'yacsi judío in judyeya' jam judío in. 5Aty venchuijya' in mu' Silas judyeya' Timoteo, Macedoniavety in, Corintoĉan cha'shete Pablo in. Chat qui mu' Pablo farajje' carijtacdye' mu', Jen'si' quim' dyijtupte p̂eyacdyem'. Dyijyi mạ'je' jị'chiqueyacsi judío in, jéyacsi: “Jesús nash Ji'c̣honacsity muntyi'”, yi mu'. 6Mu'in na judío in yacchuti fạ́quete in, ñiñete in. Mọ'dyes qui mu' Pablo chischisjeyactaqui jac quị'si'ches mu', jị'ĉocdyes mu'indyes in anic va'cac bä'yi mu'ĉantyi' in. Jéyacsi: —Ĉụi'si'ya' juchaj mi'in tsäqui'sisĉandyety ra' mi'in, jam yụ́si' juchaj mọ', jam mụi' jéyac. ̣Q̂uin' chat mu'in qui ra' voro'tacsi yụ mu'in jam judío in —jéyacsi mu' Pablo. 7Shuban mu'ĉan vajmu'yaijĉan judío in, yạjquicseban, yoctyi' qui jajbu'yete, Ticio Justo tịj mu'si', mu'si'ĉan qui aca' dyäqui. Mu' dyijyity tsan' Jen'che', cäch bu'yidye bä'yi vajmu'yaijĉan judío in. 8Mu' Crispo tashche' bu'yity mu' vajmu'yaijĉan in, mu' chime' aty anicjete Ayo' räjtumdye chätidye' mu'. Chime'dye dai' Corintoĉantyi' in se'vepte Jen'si' p̂eyacdye' in judyeya' anicjete in judyeya' ji'chojti in. 9Yirisĉan tsedyedyes mu' Ayo' jaji'caviyiti jị'cavacdye' mu' Pablo, jajiti: —Jam ra' noi'yi mi, jam ra' peñi mi voro'tacsim, yejĉovam' jéyacseva, 10ĉaĉaij nash yụ pen'dyetuye mi. Jam ra' tyi tupuj me'tyin mi, úĉan nash bä'yedye'ĉan dai' mu'ya' tsim'tactyi' muntyi' yụ, mu'in ra' chime' anicjin yụ in —jajiti Jen'. 11Me'dyes qui Pablo taĉan Corintoĉan, yiris yómodye' choc mu'ĉan bä'yi, jị'chiyacsi mu'ĉantyi' in Jen'si' p̂eyacdye' mu'. 12A na ayo'bu'yi mu' Galión Acayaĉan, chat mu'in judío in vaj me' dyijyi in tapjete in mu' Pablo judyeya' cạte in ayo'ya' ji'me'te in. 13Jéte in mu' ayo': —Uts nash muntyi' jụj ja'yacsity muntyi' in paj qui yocve cại' cäc̣hä'chucdye' Jen'che' in, mọ' na jam yi' Romaĉantyis yụ'tacdye' mu'in —yi jéte in mu'ĉantyi' ayo'. 14Pablo mạ'je' tsan' p̂eyaqui tyum'chuti qui ĉụi', mu' chum yi p̂eyaqui mu' ayo' Galión jéyacsi judío in: —Mọ'ya' jụijya' juchaj anicsis utssi' muntyis mu', juchatupte ayos yụ'tacdye' jụijya' mu', tupuj ra' yụ dyichyedye'tum se'veyac mi'in judío mi'in. 15Jam nash me', yụ jam tupuj se'vebiyac mi'in ọij ji'me'tacdye' mi'in, ĉaĉaij na ĉụi'si'ya' ji'chäyitidye' ji'me'tinte mi'in, judyeya' yụ'tacdye'ya' mi'in, jo'mesya' ji'me'tinte mi'in uts muntyi'. Mi'indye ra' jị'cäts yụ'bibajtinte mi'in, yụ ra' jam ji'säsdyi mi'insi'ĉan jedye' —jéyacsi mu' ayo'. 16Chat qui mu' ji'shupcacsi jorojya' va'cacsequi. 17Mu'yaty qui tapjete in mu' Sóstenes, mu' tashche' bu'yity vajmu'yaijĉan judío in. Ayosya'dye vej mu' mu'ya'dye chute in, mu' na Galión jam mu' jätäjjeyacsi, mem' cạvacsi. 18Pablo taĉan chum Corintoĉan. Aty me'si' dyijyi Siriaĉan qui ra' jijtuban, pen'dyetucsi mọ' Priscila judyeya' mu' Aquila. Vorjeyacsetaqui in anicjetety Jen' in, chat qui mi'eban in. Cencreaĉan quer ji'tä'tsimcabun mu' Pablo, mọ' ji'tä'tsitidyem' jị'ĉocdyes mu' Pablo aty yụ'tye' p̂eyacdye' Jen'dyes, jun' chuc ra' mu', mọ' yicdye' judíos mu'in. 19Chat qui p̂ai'joij covambache' in Efesoĉan jịjcaban in. Aty mu'ĉan venjoban in yóĉandyem' ji'yajcatiĉan u in mọ' Priscila judyeya' mu' Aquila. Mu'ĉan sitacsi Pablo vajmu'-yaijĉan judío in, p̂eyeyacsi mu'ĉantyi' judío in. 20Mu'in cọdyete in mạ'je' tsan' paj qui mu' Pablo dam' mu'ĉan me' bu'yi, mu' na jam jụjyi. 21Jéyacsetaqui mu': —Jen' yi jụijya' ĉọ́shadyeyac ra' quivij —jéyacsetaqui mu'ĉantyi' in. Efesoĉan qui yacchuti, bijti marĉantyi'che' covamba, nobi mọ' mar, 22Cesareave sojquiti. Mu'ya' qui p̂ai'joij mu' Pablo, Jerusalénĉan tän'yequi, ĉọcsequi mu'ĉantyi' anicjetety Jen' in, Antioquíaĉan qui jịjcaij. 23Men mu'ĉan me' bu'yi. Mu'ĉantyi' cuvij sacjeban', pai' qui ĉọ́que' bä'yedye' in Galaciaĉansi' in judyeya' Frigiaĉansi' in, me' me' jị'chiyacsi judyeya' ji'ma'yacsi mu'in anicjetety Jen' in. 24Me'dye atsij yirity judío Alejandríaĉantyi', Apolos tịj mu', Efesoĉan jijtuij. Anic jäm' chịj mu' voro'yi Jen'si' p̂eyacdye', anic jäm' chị́yepte Jen'si' sánacdye' mu'. 25Anic jäm' jị'chiyactyi' Ayo'si' ji'chäyitidye' mu', mọ' chị́yepte mu'. Anic ferche' voro'tacsi Jen'si' p̂eyacdye' mu', ma'jodye'tum mu', rụij jéyacsi muntyi' in. Me' tsan' me', jayej qui nam' mu', mom' chị́yepte jun' qui' chuc mu' Juansi' ji'chäyitidye' mu', mu' chojtacsity jiquej. 26Mu' anic jäm' voro'tacsi mu'ĉan vajmu'yaijĉan judío in, mijam méqui' noi'yedye'tum jéyacsi mu'insi'ya' vej mu'in. Priscila judyeya' mu' Aquila aty mu' se'vepte p̂eyacdye' Apolossi' mu', chat qui aca'ĉan cạte in, dadam' muju'cha' jị'chiqueyete Jen'si' majmi mu'ĉan in, mọ' p̂eijtes Jesús. 27Aty me'si' mu' Apolos yocsi've qui ra' jịjcaij jac Acayave. Mu'in Efesoĉantyi' anicjetety Jen' in ji'ma'yete in judyeya' so'mete sánacdye' in mu'indyes ra' in anicjetety Jen' in Acayaĉantyi' in, paj qui jäm' tiĉun'te mu'ĉan in. Mu'ĉan qui roi'je'. Mu'ĉan shupquequi, nọ́tacsi mu'in anicjetety Jen' in, mu'in aty ñịbe'jeyacsity Jen'. 28Muntyisya' vej mu'in ferche' mu' Apolos voro'tacsi judío in anic jorojĉan jéyacsi mu', mu' Jesús Ji'c̣honacsity muntyi', yóyi'dyem' sánacdye' Jen'si' u, me' anic jị'chiqueyacsi mu' Apolos. Me' tsan' judío in ferche' vorjete in, jam qui nam' tyi ji'pente in.

will be added

X\