Acts 17

1Me'dye mu' Pablo judyeya' mu' Silas mi'eban in. Cajñe' in mọ' bä'yedye' Anfípolis judyeya' Apolonia, Tesalónica dạquique' in, yóĉandyem' vajmu'yaijĉan judío u in. 2Yósi'dyem' mạyedye' jị'jutyitidyes o, me'si'qui'dye siti mu'ĉan mu' Pablo ĉaĉaij na me' yicdye' mu'. Chibin qui' mu' Pablo siti mu'ĉan jéyacsi mu'ĉantyi' in Jen'si' p̂eyacdye' mu'. Vorjiti judíotum in, jị'chiqueyacsi jedye' chuc cại' Jen'si' sánacdye' mu'. 3Jéyacsi chime'dye jun' chuc ra' säñi mu' Ji'c̣honacsity muntyi' judyeya' ra' vañinyeban. Jéyacsi: —Mu'dye Jesús p̂eijtety yụ q̂uin', mu'dye nash Ji'c̣honacsity muntyi' —yi jéyacsi mu' Pablo. 4Pạrej judío jụjyi in chat qui mu'in jịjcate Pablo in judyeya' Silas. Mu'in na griego in dyijyity tsan' Jen'che' in dai' mu'in chime' jụjyi in judyeya' dai' chime'dye p̂en jedye'tumsi' jụjyi' in. 5Mu'in na judío jam jụjyity in cạvacsi in anic dai' jịjcate Pablo in, mọ' jị'fajqueyete in mu' Pablo, chat qui quevacsi in pạrej to'oty muntyi' in ac̣hi'yity in paj qui mu'in äjyedye'tum sac ja'yacsi bä'yedye'ĉantyi' muntyi' in. Chụi' bu'yi tŝọ́tyepte in aca' mu' Jasónsi', ñutsjeĉúnacsi mu'ĉantyi' in, mạ'je' tsan' tap tŝọ́tacsi in mu' Pablo judyeya' mu' Silas, mu'in ra' tsan' yụ'tacsi in muntyisya' vej mu'in, 6jam qui nam' dạcacsi in. Mọ'dyes qui Jasónche' tŝọij in, chijäm' tapyejoij pạrej in anicjetetytum Jesucristo in, ayo'ya' qui cạcsi in ji'me'tacsi in. Väñädye'tum ji'me'tacsi jéyacsi in: —Uts atsijtyi' muntyi' in pai' ĉọ́que' bä'yedye' in, pai' sac ja'yacsi muntyi' in, q̂uin' qui úĉan atsij in tsunsi'ĉan bä'yedye'. 7Uts Jasón ji'dyäcacsi ĉụi'si'ĉan aca' mu'. Uts in jam méqui' chiqueptety in ayo'si' yụ'tacdye' muju'chatysi', judyeya' yi in mu'ya' ca yoctyi' ayo' q̂uin', Jesús ca tịj mu' —yi jéyacsi ayo' in. 8P̂eyacdye'ya' mu'in sac ja'yacsi muntyi' in räjtumdye ayo' mu'in. 9Chat qui mu'in ayo' in cọdyetacsi querec̣ha in Jasón judyeya' yoctyi' anicjetety Jesucristo in. Aty so'macsiya' in chat q̂uin'dyem' ji'c̣honacsi in. 10Yómoij in mu'in anicjetety Jen' in jutete in mu' Pablo judyeya' mu' Silas paj qui Bereaĉan jịjcaij in. Venjoij mu'ĉan in, mu'ĉan chime' ĉọcsequi in vajmu'yaijĉan judío in. 11Mu'in Bereaĉantyi' judío in muju'cha' dyijyedye'tumtyi' in, fer mạ'je' se'vepte in p̂eyacdye' mu', jam jeñej mu'in Tesalónicaĉantyi' in. Räjĉan mạyedye' ji'chäyiti in Jen'si' sánacdye' mu', mạ'je' chị́yepte ji'chäyitidye' Pablos in, are' rụijsis mu', are' jam. 12Dai' jụjyi in, chime'dye dai' jedye'tumsi' p̂en griego in jụjyi' in judyeya' dai' son' griego in jụjyi chime' in. 13Mu'in na Tesalónicaĉantyi' judío in chị́qui in jun' chuc mu' Pablo Bereaĉan voro'tacsi Jen'si' p̂eyacdye' mu', mu'ĉan qui jijtuij in sac ja'yacsi mu'ĉantyi' chime' in. 14Mu'in na anicjetety Jen' in mu'ĉantyi' in cavintum jutacsi in paj qui yocve cạte in mu' Pablo, sinve mar jiquicte in. Silasdyety Timoteotum Bereaĉan ji'yajcati in. 15Mu'in muntyi' cạtety Pablo in Atenasĉan jiquicte in. Ca'ñibun mu'in in, tubibajte Pablos p̂eyacdye' mu' Silasdyes judyeya' Timoteodyes, yi' mọ' paj ca cavin cha'shete in Atenasĉan jijtuij in. 16Pablo taĉan Atenasĉan bisacseva'joij. Anic yoqui ĉojtyi'ĉan mu' ĉaĉaij na dai' jäm'tacdye' cạvacsebi, anic dai' jäm'tacdye' me'chui' in bä'yedye'ĉan mu'in. 17Chat qui mu' Pablo ĉọcsequi vajmu'yaijĉan judío in, mu'ĉan mu' Pablo jị'chiyacsi vaj meij jítidyeij in, judíotum in judyeya' mu'intum in jam judío in dyijyity tsan' Jen'che' in. Chime'dye räjĉan mạyedye' prasaya' mu' voro'ti mu'intum in jụ'ñity chuc rébetety in, Jen'si' p̂eyacdye' jéyacsi. 18Chime'dye mu'ya' muntyi' in yoctyis ji'chäyitidye' cại'tyi' in, epicúreo in judyeya' estoico chime' in. Ñiñete mu'in Pablo in, yi in: —¿Jun' buty me' uts yi shapuijtyi' muntyi'? —yi in. Mu'yaty in voryi in: —Anic yocvety p̂eijte jen' in, jam úyaty in —yi in. Me' yi in ĉaĉaij na mu' Pablo voro'tacsi Jesússi' p̂eyacdye' mu', jun' chuc vañinyeban mu', dyisa'yi' ĉọpte p̂eyacdye' in. 19Mu'ĉan qui cạte in tsudyujñitidye'ĉan ayo' in taĉan bä'yedye'ĉantyi' in, “Areópago” je' in. Mu'insi'ya' vej jéte in: —¿Jätäjyi' to' o mụi'sis ji'chäyitidye' tui'si' u mi? 20Ĉaĉaij na anic yocsi' p̂eyacdye' p̂eye' mi, jam tsun jäm'dyeya' mọ' se've'. Jesha' jítiĉam' jätäjyi' to' o —jéte in. 21Mu'in Atenasĉantyi' in judyeya' räjtumdye yocvety in mu'ĉan bä'yity in, mu'in me' cại'tyi' yicdye' in, mọ' mọmo' dyijtui' se've' in judyeya' p̂eye' in mụi'sis ji'chäyitidye'. 22Chat qui mu' Pablo sacyi mu'insi'ya' vej mu'in Areópagoĉantyisya' in, jéyacsi: —Se'vibutiĉam' p̂eyacdye' yụ Atenasĉantyi' mi'in. A nash cạveyac anic irijyi mi'in jäm'tacdye'che' mi'in. 23Anic dai' ọ́ĉan cạvebiyac jäm'tacdye' mi'in. Chime'dye yiris cạvebiyac jäm'tacdye' mi'in sánacdye'tumsi', yi' sánacdye' mọ': “Ọij jäm'tacdye' mu'dyes mu' Jen' jam chị́yejatysi'”, yi'. Yụ ra' jéyac mi'in jun' chuc mu' Jen'. Mu' Jen' jam chị́yetintety mi'in, me' tsan' me', tima'quetinte qui nam' mi'in, mu' nash mu' Jen' yụ ji'jäqueyeyac. 24Mu' Jen' jäm'tyety ọij jac räjtumdye jedye' in, mu' nash anictyity Ayo' tsun ĉọjcai'tyi' ọij jac judyeya' mạyedye'. Mu' jam jo'mesĉan bä'yi aca'ĉan jäm'tyes muntyi' in, 25mijam mu' yiris jedye' jemoñe' paj qui so'meja tsun. Mu' so'misin' jụ́tyes tsun, tsạ'chusin' tsun, me' me' so'misin' tsun jedye' chuc jemonja' tsun. 26Mu' jäm'te tashchety muntyi', mu'ĉantyi'dye shupqui in, dayi räj jacchety muntyi' q̂uin' in, mu'dye yi paj qui pai' bä'yi úche' jacche' in, judyeya' yụ'tyeyeyacsi tsạ'si', juñucsi' chuc ra' yómodye' bä'yi in, chime'dye junanaj chuc ra' bä'yi in, me' me' yụ'tacsi Jen'. 27Mu' yi paj chime' qui muntyi' in quevte in jeñej toco' toco' quevacsi' jedye', vatyquej täjtete jụijya' in. Mu' qui nam' úya' c̣hẹi'ya' tsunya' 28ĉaĉaij na mu'dye yu'sin' paj qui tsạ' bu'ja', mu'tum bä'ja' úche' jacche', so'misin' tsạ'si' tsun. Mọ'dye sáñe' pạrej mi'intyi' chätidye' mi'in, yi' sánacdye' mu': “Tsun nash Jen'tyi' vóshi' mu'”, yi'. 29Anicdye me' Jen'tyi' vóshi' tsun, mọ'dyes jam ra' cäj mu' dyijtuja Jen', mu' jam jeñej jäm'tacdye' mijam mu' oro jämi, mijam plata mijam mij chime'. Muntyi' in ĉụi'si'ya' dyijyedye' mu'in jäm'tye' jäm'tacdye' mu'in, mu' qui nam' Jen' jam mu' jo'mes. 30Jen' jiquej jam va'tacdye' so'macsi muntyi' in, mu'in jam chị́yeptety p̂eyacdye' in, q̂uin' qui nam' jam me', mu' ferche' jéyacsi räj jacchety muntyi' in paj qui caman' dyijyi juchajche' mu'in in, 31ĉaĉaij na mu' aty yụ'tye' tupudye' mu' jun'si' chuc ra' jị'cäts yụ'tacsi juchadye'ya' muntyi' in. Jen' jayu'ti yirity muntyi', mu' ra' jị'cäts yụ'tacsi räj, mijam ra' jun' cäj jéyacsi muntyi' in. Mu' yụ'tactyi' muntyi' Jen'tyi' mu', mu' säñity, Jen' qui nam' jaji'tsa'ibun mu', mọ' jorojĉanjeyacsi' räj muntyi' in mu'dye Jen' me' jayu'ti —yi Pablo jéyacsi mu'ĉantyi' in. 32Mu'in mu'ĉantyi' in se'vepte Pablos p̂eyacdye' in, yi mu' jun' chuc vañinyeban mu' säñity, pạrej dyisacte in, pạrej na yi in: —Cuvij ra' atsijya' mi chat qui ra' se'vebiyac p̂eyacdye' mi —jéte in. 33Me'dye mu' shupqui farajjeyacsetaqui. 34Pạrej cäc̣hä'chupte p̂eyacdye' in, mu'in aty anicjete Jen' in. Yirity Dionicio tịj mu', mu' mu'ĉantyi' ayo' Areópagoĉantyi', yiris chime' p̂en, Dámaris tịj mọ', mọ' chime' aty anicjete Jen', judyeya' yoctyi' chime' in.

will be added

X\