Acts 16

1Pablo Silastumdye dạquique' in mọ' bä'yedye' Derbe. Quivij sacje' in, Listraĉan venjoij in. Yirity mu'ĉan dạquicte muntyi' in anicjetety Jesucristo, Timoteo tịj mu'. Tse' na mu' judío, anicjetes Jesucristo, jen' nam' griego mu'. 2Mu'in na Listraĉantyi' anicjetety Jesucristo in judyeya' Iconioĉantyi' chime' in, räj mu'in chị́yete in, jäm'yity cạvete in mu' Timoteo. 3Pablo mạ'je' cạte mu' Timoteo, mọ'dyes qui mu' tashche' jä'miij ji'sei'bite a' mu' paj qui jam jätäjyi in mu'ĉantyi' judío in cạveteya' in cäc̣hä'-chucsi. Mu'in chịj in jen' mu' griego, jam mu' sei'tactyi' a'. 4Aty me'si' sacti in. Jun' jun' chuc bä'yedye' me' me' ĉọ́que' in, jéyacsi mu'ĉantyi' in anicjetety Jesucristo in mọ' p̂eyacdye' yụ'tyes jiquej in mu'in Jerusalénĉantyi' in jutactyi' Jen'tyi' mu' judyeya' mu'in ĉọjcacsity anicjetety Jen' in. Mu'in jéyacsi paj qui chique' in mọ' p̂eyacdye'. 5Mọ'dyes mu'in anicjetety Jen' in dadam' fer bu'yi anicyedye'ya' mu'in, chime'dye yejĉoij dayi in mu'in jụjjetety Jen' in. 6Pablo pen'dye'tumdye quivij mi'eban in sapa'je' in mọ' jac Frigia judyeya' Galacia. Mu'ĉandyety jam voro'tacsi in Asiaĉan, Jen'si' qui nam' Ạ'edye' mu' nọ́csi' paj qui jam mu'ĉan voro'tacsi in. 7Ventyeque' in mọ' jac Misia, mạ'je' tsan' muju'veya' jịjcaij ĉúti in Bitiniave, mọ' qui nam' Jesússi' Ạ'edye' mu' quivij nọ́csi'. 8Misiaĉan sapa'je' in, dạquique' in mọ' bä'yedye' Troas. 9Mu'ĉan mu' Pablo tsedyedye' mu' Jen' jaji'caviyiti jị'cavacdye' mu', mu'ĉan cạvete yirity Macedoniaĉantyi' muntyi' rụi'cujcuj nạijte, ferche' jacudyiti, yi mu' jajiti: “Atsiva úĉan Macedoniaĉan, ñútyitiĉam' tsun”, yi mu' muntyi' jị'cavacdye'ĉan. 10Aty mọ' jị'cavacdye' cạve', me'dye qui jäm'chubun tsun,113 Macedoniaĉan qui jịjcaij tsun ĉaĉaij na aty ĉúti tsun mu' Jen' aty jin tsun paj qui mu'ĉan voro'tacsi tsun mọ' jäm'si' p̂eyacdye' Jen'si' mu'. 11Troasya' mu'ya' p̂ai'joij tsun marĉantyi'che' covamba. Tacti tsun, mu'ya' venjoij tsun poc̣ho'ya' Samotraciaya'. Nojno qui mạyedye' dạquique' tsun mọ' bä'yedye' Neápolis, mu'ya' qui sojquiti tsun. 12Mu'ya' qui majmiche' je' tsun Filipoĉan jịjcaij tsun. Anic chị́yacsi' bä'yedye' mọ' Filipo, Macedoniaĉansi', mọ' mu'ĉan bä'yi dai' Romaĉantyi' in, Romaĉantyi' ayo' mu' ayo'bu'yi mu'ĉan. Dai' mạyedye' mu'ĉan Filipoĉan bä'yi tsun. 13Mọ' mạyedye' jị'jutyitidyes mu'ĉan shupqui tsun bä'yedye'ĉantyi', cojiroya' qui jịjcaij tsun ĉaĉaij na se've' tsun p̂eyacdye' mu've ca cọdaqui Jen'che' judío in. Mu've dam' p̂utsquen'yi tsun jéyacsi tsun Jen'si' p̂eyacdye' mọ'yas p̂en in tsudyujñitidye'yas in. 14Yiris mọ'yas p̂en Tiatiraĉansi' mọ', Lidia tịj mọ', mọ' ji'mincates quị'si' ya'ijtyi' jäijnäty, mọ' mọ'si' carijtacdye' mọ', tima'quetes Jen' mọ'. Jen' vanacjajibuti' ĉojtyi' mọ' paj qui dadam' jäm' se'vepte Pablos p̂eyacdye' mu', jụjyi' mọ'. 15Chat qui ji'chojti' mọ' judyeya' chime' chätidye' mọ'. Mọ' qui jin tsun, yi': —Jedac mi'in chäyitiĉa' yụ mi'in jụjjetes Ayo' tsun, me' cavitiĉa' yụ mi'in, atsijam' yụ́si'ĉan aca', mu'ĉan ra' dyäqui mi'in —yi' jin tsun. Ferche' jin tsun chijäm' jụj ja'yin tsun. 16Yirisĉan mạyedye' mu've jịjcaij tsun cọdajquiqui Jen'che' tsun, rébe' tsun yiris nanas sọyo'tumsi', mọ' chị' jun' chuc ra' jiyi' jábiya'. Mọ' úñi' mu'inche' in, anic ji'querec̣hayacsi' a'tumtyi' in. Mu'in cọdyetacsi querec̣ha muntyi' in paj qui mọ' jéyacsi' jun' chuc ra' jiyi' jábiya'. 17Täyen' tŝọi' ji'cäc̣hä'ñiti' tsunya', fer p̂ep̂eyacjoi' yi': —Uts nash úñity Jen'tyi' mu', mu' muju'chaty Jen', mu'in ji'chäquiyinac in jun' chuc tupuj c̣hoñi mi'in —yi' mọ' nanas jéyacsi' muntyi' in. 18Dai' mạyedye' yi' mọ'. Chijäm' shọijtye' mu' Pablo, caman'yi, je' mọ'ĉansi' sọyo': —Jesucristosche' tịj mu' yụ jéye: meijyebada ọ́ĉan nanasĉan —je' mu' Pablo. Yédye'ĉandye mọmo' me'ĉandye meijyeban' mọ' sọyo' nanasĉansi'. 19Mu'in na a'tumtyi' nanas ĉọjcai'tyi' in, aty chịj in aty ra' jam quivij querec̣hayeban in mọ'ya' nanasya', mọ'dyes qui mu'in tapjeyacsi in mu' Pablo judyeya' mu' Silas, cạcsi in prasaya' bä'yedyesya', mu'ya' ji'me'tacsi ayo'ya' in, 20Romaĉantyi'ya' ayo'. Ji'me'tacdye'ĉan mu'in jéyacsi in: —Uts judío in úĉantyi' sac ja'yin tsun in bä'yedye'ĉantyi' tsun. 21Anic yocsi' ji'chäyitidye' tui' in. Tsun na Romaĉantyi' mijam cäc̣ha'chucsebija' yicdye' mu'in —yi in. 22Mu'ĉantyi' muntyi' in cächyi mu'in ji'tacsi in. Mu'in na ayo' in coch ji'tacsebi quị'si' in judyeya' qui si'bacdye' so'macsi in. 23Fersi' chum si'bacdye' cại' in, jäqui've qui ĉär'tacsi in. Mu'in ayo' in jéte in mu' ĉọjcacsity ĉär'tactyi' in paj qui jäm' ĉọjcacsi. 24Anicdye me' mu' ji'sitacsi tätscäi'ches ĉär'tacdye', mọ'ĉan qui yocsi' cại' in yujches quepyis. 25Aty menya' mu' Pablo Silastumdye cọdaqui Jen'che' in jimaqui in. Mu'in na yoctyi' ĉär'tactyi' in se'vacva'joij in. 26Me'ĉandye fer bubaqui' jac, anic fer sijsijyi' mọ' aca' ĉär'tacsi'. Ĉụi'dye vatyquej vanacyi' chụi'dye' in, daj vatyquej tyei' cadena sa'bas mu'in ĉär'tactyis in. 27Mu' na ĉọjcacsity mu'ĉantyi' in tsạ'i mu', cạve' acas chụi'dyem' aty mọ'in räj vavancaca' in, jeñej mu' räj jọban ĉọcsi mu'ĉan ĉär'tactyi' in. Yiristum sanjeyaqui coc̣hino mu', mu'ya'dye ra' tsan' ijati. 28Mu' na Pablo fer p̂eyaqui jéte: —Jam ra' me'jiti ĉụi' ijatim, taĉandye nash räj úĉan tsun —yi jéte. 29Mu' na ĉọjcaquity cọdaqui mạijyis paj qui tui' in, chat qui mu'ĉan noc̣ho'c̣hodye'tum siti dyụtsyi mu'insi'ya' vej mu'in Pablosi'ya' judyeya' Silassi'ya'. 30Mu' qui ji'shupcacsi jéyacsi: —Jítiĉam' yụ, ¿jun' buty ra' yụ paj qui c̣hoñi yụ? —jéyacsi. 31Vorjete in: —Anicjeme mu' Jesús Ayo' tsun, chat qui ra' c̣hoñi mi räjtumdye chätidye' mi —jéte in. 32Chat qui jéte in Ayo'si' p̂eyacdye' mu' räjtumdye chätidye' mu'. 33Mọ'dye hora tsedyedye' mu' ĉọjcacsity favacsebiban si'bacdye' mu'in chat qui ji'chojti mu' räjtumdye chätidye' mu'. 34Ji'sitacsi qui ĉụi'si'ĉan aca' mu' judyeya' ji'säcsacsi. Anic där ma'joij mu' räjtumdye chätidye' mu' ĉaĉaij na aty anicjete Jen' in. 35Nojno mạyedye' mu'in bä'yedye'ĉantyi' ayo' in jutaqui in nọ́taquity mu'in, ĉọcte in mu' ĉọjcacsity mu'in ĉär'tactyi' in jéte in: “Ji'c̣honacseva mu'in muntyi' in.” 36Me'dye mu' ĉọjcacsity jéte mu' Pablo: —Ayo' jutiyin yụ in p̂eyacdye' mu'in, yi in paj qui ji'c̣honyac yụ, q̂uin' ra' chat tupuj jọban mi'in, aty pacaj mi'in —jéte. 37Mu' na Pablo jéyacsi mu'in nọ́taquity ayoty in: —Jam ra' me', paj tsan' anictyity Romaĉantyi' tsun, me' tsan' jambi' jin tsun: “¿jedye' ca' juchaj mi'in?” ayo' qui nam' si'bin tsun in muntyisya' vej mu'in judyeya' ĉär'tyin tsun in, mọ' jam tupuj me'tac Roma-ĉantyi' in. ̣Q̂uin' chat ayo' in mạ'je' ji'c̣hoñin tsun in paj qui caminve jọban tsun. Jam me' jụjyi tsun. Jemoñe' mu'indye ayo' atsij in paj qui ji'shupjun tsun in —jéyacsi Pablo mu'in nọ́taquity in. 38Mu'in nọ́taquity ca'ñibun in jéyacseban ayo' in. Aty chị́qui in mu'in na jiquej anictyity Romaĉantyi' in, anic noi'yi mu'in ayo' in, ĉaĉaij na jam chique' in Romaĉantyis yụ'tacdye' mu'in. 39Mu'ya' jịjcaij in ĉọcsequi in mu' Pablo judyeya' mu' Silas, jéyacsi in: “Jäm' otej mi'in, jam ra' dyijtubutiĉa' juchaj mi'in.” Cavintum vatyquej ji'shupcac-seban in ĉär'taquisĉantyi' in, judyeya' qui cọdacsi in paj qui yocve jịjcaij in farajje' in mọ' bä'yedye'. 40Me'dye shuban in ĉär'taquisĉantyi' in, Lidiasĉan qui aca' jịjcaban in, ĉọcseĉan in anicjetety Jen' in. Voro'tacseban quivij in ma'joij yụ'tacsetaqui Jen'dyes in, chat qui q̂uin'dyem' jọban in.

will be added

X\