Acts 15

1Pạrej atsij Judeaĉantyi' muntyi' in Antioquíaĉan jijtuij in. Mu'in jụjjeptety tsan' in Jen'si' p̂eyacdye' mu', me' tsan' me' cächjepte qui nam' in ji'chäyitidye' mu'. Yi in: “Jam sei'tactyi' a' jụijya' mi'in, yoj yi'dyem' yụ'tacdye' Moiséssi' jaso'mitis Jen' jiquej u, jam ra' jun' c̣hoñi mi'in,” yi in. 2Mu' na Pablo judyeya' mu' Bernabé cäjsis dạcacsebi ji'chäyitidye' mu'in, mọ'dyes qui fer chuti p̂eyacdye'ya' mu'in. Chäjäm' dyijyi in jutacsi ra' muntyi' in paj qui Jerusalénĉan jịjcaij in, cạvacsequi mu'in mu'ĉantyi' jutactyi' Jen'tyi' mu' judyeya' mu'in ĉọjcacsity in anicjetety Jen' in, paj qui jéyacsequi in jun' chuc mọ' sei'tacdye' p̂eyes yụ'tacdye'. Mu'ĉantyi' anicjetety Jen' in tsim'tacsi in mu' Pablo judyeya' mu' Bernabé judyeya' yoctyi' in, mu'ĉantyi' chime' in paj qui mu'in Jerusalénĉan jịjcaij in. 3Anicdye me' sacti in Jerusalénĉan roi'je' in, Antioquíaĉantyi' anicjetety Jen' in jutacsi in. Sapa'je' in mọ' jac Fenicia judyeya' Samaria, jéyacsi mu'ĉantyi' in anicjetety Jesucristo in jun' chuc mu'in jam judío in chime'dye caman' jụjjete Ayo' in. Mu'in se'vacsebity p̂eyacdye' mu'in anic ma'jotacsebi in. 4Chat qui mu' Pablo judyeya' Bernabé Jerusalénĉan venjoij in, judyeya' mu'in jutactyi' Jen'tyi' mu' judyeya' mu'in anicjetety Jen' in räjtumdye ĉọjcacsity mu'in, anic jäm' tiĉunacsi in mu' Pablo judyeya' mu' Bernabé. Jéyacsi mu'in in jun' chuc voro'tacdye' mu'in Jen'si'ya' ferdye' mu'. 5Mu'in na fariseo in aty jụjjetety tsan' Jesús in, pạrej mu'in yocve dyijyi in, sacyi in chat qui yi jéyacsi in: —Jemoñe' jéyacseja' mu'in anicjetety Jesucristo in jam judío in, paj qui chime' sei'tac a' mu'in judyeya' paj qui chiquepte in räj mọ' Jen'si' yụ'tacdye' mu' jaso'mitis Moisés jiquej —yi mu'in in. 6Mọ'dyes mu'in jutactyi' Jen'tyi' mu' judyeya' mu'in ĉọjcacsity anicjetety Jen' in vajmu'yaij in p̂iyitidyeij in jun' chuc ra' mọ'. 7Men mọ' p̂eijva'que' in chijäm' mu' sacyi Pedro jéyacsi: —Vojity, aty chịj mi'in porojma jiquej mu' Jen' tsim'tyin yụ mi'inĉantyi' judyeya' yu'tyin yụ paj qui yụ voro'tacsity mu'in jam judío in. Jéyacsi ra' yụ mọ' jäm'si' p̂eyacdye' mu' paj qui mu'in chime' anicje' in. 8Mu' na Jen' chị́yacsebity ĉojtyi' muntyity in, mu' jorojĉan jísin' mu' jụjjeyacsi mu'in jam judío in, mọ' aty chị́yeja' tsun ĉaĉaij na mu'in in aty jị'tŝocsi' Jen'si' Ạ'edyem', jeñej tsun tashche' so'misin' jiquej. 9Jen' vaj cäts cavisin' muntyi' tsun, paj tsan' judío tsun, paj tsan' jam judío tsun chime', Jen' c̣hicon'jeyacsebi ĉojtyi' mu'in anicyedye'ya' mu'in. 10¿Jun' me' mạ'je' mi'in jị'ĉojtinte mu' Jen'? Anic cäj cạtiñe' dyijyedye' mi'in jam rụij, mạ'je' jéyacsi mi'in mu'in jam judío in paj qui chique' in mọ' yụ'tacdye' Jen'si' mu', jeñej javquis vemejas, me' bu'yi' mọ', ĉaĉaij na carij chicac mọ'. Me'dye q̂uin' tsun jam jun' tupuj chiqueja' tsun mọ', mijam vóshi'vun tsun tupuj chique' in jiquej. 11Jam ra' me', aty chị́ja' tsun Jesucristosya' ñịbe'jitidyes mu' c̣honja' tsun, me'dye mu'in jam judío chime'dye in —jéyacsi Pedro mu'ĉantyi' in. 12Mu'in tsudyujñitity in tyäpä' ji'tacsi, jäm' se'vaqui in. Mu' qui Pablo judyeya' mu' Bernabé jéyacsi in jun' chuc mu' Jen' so'macsi ferdye' paj qui jị'caveyacsi mu'in jam judío in. 13Aty ijaij p̂eyaqui in, Santiago qui p̂eyaqui jéyacsi: —Chätidye' se'vibutiĉam' jäm' ọij p̂eyacdye' yụ: 14Uts Simón aty jísin' mu' Jen' aty tiyacchui' ñịbe'jeyacsi mu'in jam judío in, tsim'tacsi pạrej mu'in in judyeya' pạrej yụ'tacsi ĉụi'tyidyety muntyi' mu'. 15Mọ'dye p̂eye' sánacdye' jaso'mititysi' p̂eyacdye' Jen' jiquej in, yi': 16“Yi Ayo', jábiya' ra' atsijban yụ cuvij ra' jäm' yụ'bibajte yụ ac̣hi'joi'si' aca' Davidsi' mu'. Me' tsan', aty jọ'chaban'si' mu', yụ ra' cuvij chijo'mejteban' mọ' aca'.112 17Me'dye ra' yoctyi' chime' muntyi' in, jam judío in tupuj ra' yụ́che' cudyiti in, jụ'ñity chuc tsim'tactyi' yụ in. 18Me' yi mu' Ayo', tạ'catydye mu' jị'chicaqui ọij p̂eyacdye'”, yi' sánacdye'. 19Mọ'dyes jäm' ĉúti yụ dam'dye jäm' jam me'tacseja' mu'in jam judío in caman'yity in anicjetety Jen' in, mijam ra' jéyacseja' paj qui chique' in mọ' yụ'tacdye'. 20Dam'dye jäm' jéyacseja' mọmo' paj qui jam jebei' in jäm'tacdye'ya' jadyiquis säcsedye', mọ' ac̣hi'tye' mọ' säcsedye', mijam ra' jebei' in chäsh mijam chäshtumsi' shush chime'. Chime'dye ra' jéyacseja' paj qui jam vo'voij in, mọ' ram' jéyacseja' mu'in jam judío in, 21paj qui jam jị'fajcacsi in mu'in judío in, ĉaĉaij na tạ'catydye mu'in judío in räjĉan p̂eye' in mọ' yụ'tacdye' jaso'mitis Moisés jiquej mu' Jen'. Pai' vajmu'yaijĉan in räjĉan mạyedye' jị'jutyitidyesĉan mọ' p̂eye' in —jéyacsi mu' Santiago. 22Jutactyi' Jen'tyi' mu' judyeya' mu'in anicjetety Jesucristo in räjtumdye ĉọjcacsity mu'in jụjyi in. Mọ'dyes pạrej mu'ĉan tsim'tacsi in paj qui jịjcatacsi in mu' Pablo judyeya' mu' Bernabé, aty ca'ñibunya' Jerusalénĉantyi' in, Antioquíaĉan jijtuban in. Chat qui tsim'tacsi in Judas, Barsabás yocsi' tịj mu', judyeya' Silas. Pären'dye mu'in in anic jäm'yity ĉọcsi in mu'in anicjetety Jen' in. 23Mọ'dyes qui me' sáñe' in, yi' sánacdye': “Vojity, tsun nash jutactyi' Jen'tyi' mu' judyeya' tsun ĉọjcacsity anicjetety Jen' in, tsun vojity bu'yi mi'intum vorjeyac mi'in jam judío mi'in, räj mu'ĉan bä'yity mi'in Antioquíaĉantyi' mi'in judyeya' Siriaĉantyi' mi'in judyeya' Ciliciaĉantyi' chime' mi'in. 24Aty se'vaqui tsun pạrej úĉantyi' chätidye' tsun mu'ĉan jịjcaij in ĉucnac in me'tyinac in. Me' tsan' jam jutacsi tsun mu'in in, ĉụi' qui nam' mu'ĉan jịjcaij in, cäj ji'chäyinac in anic ji'yoquinac in. 25Mọ'dyes tsun vajmu'yaij úya' tsun, vaj cäts dyijyi tsun chat qui ra' jutacsi mi'inya' tsun pạrej muntyi' in, mu'in ra' cavicnac in pen'dyetucsi ra' in mu' Pablo judyeya' mu' Bernabé, mu'in mạ'jeyacsity chätidye' tsun. 26Mu'in carijtaquity Jesucristodyes in mu'dyes Ayodyes tsun, me' tsan' c̣hojvacĉan bä'yi in, jam qui nam' méqui' otejjiti in, jẹjcai' mọmo' carijtaqui Jen'dyes in. 27Tsun ra' jutacsi Judas judyeya' Silas, mu'in ra' jínac in jun' chuc tsunsi' dyijyedye', mọ' sáñes q̂uin' tsun. 28Tsun vaj cäts dyijyi Jen'si'tum Ạ'edye' mu', tsun ra' jéyac mi'in jemoñe' jam chiquetiñe' räj mọ' carijsis yụ'tacdye', ọij ram' chiquetiñe' mi'in: 29jam ra' jebetiñe' mi'in jäm'tacdye'ya' jadyiquis säcsedye', mijam ra' jebetiñe' mi'in mọ' chäsh, mijam chäshtumsi' shush, chime'dye jam ra' vo'voij mi'in, ọij ram' chiquetiñe' mi'in paj qui jäm' bä'yi mi'in. Aty me'qui'dye”, yi' sánacdye'. 30Sacje' in mu'in p̂eyacdye' cại'tyi' in, Antioquíaĉan jịjcaij in. Venjoij in, vajmu'ya'jeyacsi in anicjetety Jen' in judyeya' so'macsi in mọ' sánacdye'. 31Mu'ĉantyi' in p̂eye' in, anic ma'jotye' in mọ' p̂eyacdye' ji'ma'yacsis. 32Chime'dye mu' Judas judyeya' mu' Silas mu'in nash jaso'mitity p̂eyacdye' Jen' chime' in. Mu'in chime' voro'tacsi in, menyaij p̂eyaqui in jiĉun yụ'tacsi in paj qui fer bu'yi bä'yi in. 33- 34Dai' mạyedye' mu'ĉan me' bä'yi in. Aty me'qui' me' bu'yi mu'ĉan in chat qui quivij chimu've jịjcaban in Jerusalénve. Mu'in Antioquía-ĉantyi' in jutacseban in: “Anijyeban ĉa mi'in”, jéyacsi in. Me'dye ca'ñibun in cạvacseti in mu'in jutacsity jiquej in. 35Mu' na Pablo judyeya' Bernabé taĉan mu'in in Antioquíaĉan in. Yejĉoij mu'in voro'tacsi in Ayo'si' p̂eyacdye' mu' judyeya' jị'chiyacsi muntyi' in, pen'dyetucsi dai' yoctyi' voro'tacsity in. 36Aty men yi mu' Pablo jéte Bernabé: —Dam'dye jäm' ca'ñibujsha' quivij ĉọcseĉajsha' yóvevejdyem' jadyiĉa' jiquej u, Jen'si' p̂eyacdye' voro'tacseĉa' jiquej tsun, jesha' cạvacseĉajsha' tsun quivij jun' chuc bä'yi in mu'ĉaĉantyi' in anicjetety Jen' in —yi Pablo jéte Bernabé. 37Mu' Bernabé mạ'je' tsan' cạte mu' Juan, Marcos yocsi' tịj mu'. 38Mu' na Pablo jam mu' jäm' ĉọi' paj qui cạte mu', ĉaĉaij na mu' farajjeyacsetaqui jiquej Panfiliaĉan, jam mu' yejĉoij cäc̣hä'chucsi. 39Jam qui cäts dyijyi in, chuti in p̂eyacdye'ya' mu'in, chat qui me'ĉandye pạrejti in. Bernabé cạte mu' Marcos, Chipreĉan jịjcaij in. 40Mu' na Pablo tsim'te mu' Silas, mu'tum qui mu'. Mu'in Antioquíaĉantyi' anicjetety Jen' in cọdaqui Jen'che' in mu'indyes in, paj qui ñịbe'jitidyesya' mu' nọ́tacsi judyeya' ĉọjcacsebi mi'edye' mu'in. Chat qui sacti in, 41sapa'je' in Siriaĉan judyeya' Ciliciaĉan, pai' jị'chiyacsi mu' Pablo mu'ĉantyi' anicjetety Jen' in paj qui fer bu'yi bä'yi in Jen'dyes.

will be added

X\