Acts 14

1Iconiove venjoij in mu' Pablo judyeya' mu' Bernabé, mu'ĉan qui sitacsi in vajmu'yaijĉan judío in, voro'tacsi mu'ĉantyi' in. Jäm' ji'se'veyacsi mọ' p̂eyacdye' in, mọ'dyes qui dai' anicjete Jesucristo in, judío in judyeya' jam judío in. 2Mu'in judío in jam jụjjetety in, sac ja'yacsi in jam judío in, jị'fajcacsi in mu'in anicjetety Jesucristo in. 3Me' tsan' me' in mu' Pablo judyeya' Bernabé taĉan mọmo' mu'ĉan Iconioĉan in, mijam méqui' noi'yedye'tum voro'tacsi in Jen'si' p̂eyacdye' mu' p̂eijbite in ñịbe'jitidyes mu'. Jen' so'macsi ferdyedyes mu'in paj qui jị'caveyacsi muntyi' in, jorojĉan jéyacsi in mọ' anicsis p̂eyacdye' Jen'si' mu'. 4Mu'in na bä'yedye'ĉantyi' muntyi' in jam mu'insi' cäts dyijyedye' mu'in, pạrej cäc̣hä'chucsebi judíos dyijyedye' mu'in, pạrej na yoctyi' se'vacsi in mu'in Jen'tyi' jutactyi' mu'. 5Chat qui mu'in judío in judyeya' jam judío in, räjtumdye ayo' mu'in dyijyi in mạ'je' tsan' jị'ñibe'cacsi in, mọ'jeyacsi farajnacsi mijya' in. 6Mu' na Pablo judyeya' Bernabé chị́qui mu'in in, chat qui ĉa'joij in, yocsi'ĉan jac jịjcaij in, Licaonia tịj mọ'. Listra judyeya' Derbe me' tịj bä'yedyes mọ'in, yóĉandyem' jịjcaijĉan u in. 7Mu'ĉan chime' voro'tacsi in mọ' jäm'si' p̂eyacdye' Jen'si' mu'. 8Chime'dye mu'ya' yirity Listraĉantyi' muntyi' jam mu' jun' mi'ity, tạ'catydye na'ity. 9Mu'ĉan se'veva'bite p̂eyacdye' Pablos mu'. Mu' Pablo jäm' vatyquej mu'che' cạvi, chị́yepte mu' ĉojtyi'ĉansi' anicyedye' mu', tupuj chäĉän mu'. 10Mọ'dyes mu' Pablo fer p̂eyaqui jajiti: —Sacyebada —jéte. Sac vatyquej mu' tyeban mi'eban vatyquej. 11Mu'in na muntyi' in aty cạvete in jun' chuc mu' Pablo ji'chäĉajte mu' muntyi', äjyi in ĉụi'si'ĉan p̂eyacdye' yi jítidyeij in: —Uts nash jen' in mạyedye'chety jijtuijtyi' in, muntyi' yi in chạij in ĉushsin' tsun in —yi in. Jeñej mu'chety ĉọcsi mu'in in, mọ'dyes qui jäm'tacdye'si' tịj yụ'tyeyacsi in. 12Mu' Bernabé jéte in Zeus, jéte in, mu' na Pablo jéte in Hermes jéte in, ĉaĉaij na mu' Pablo bächäi'tyi' p̂eyacdye'. 13Mọ'ya' sisdye'ya' bä'yedye' Zeussi' aca' mọ' jäm'tacdye'si'. Mu' cudyitity jäm'tacdye'che' atsij mu' cạcsi toro in, sháshatum. Mu' dyijyi tsan' räjtumdye muntyi' in mạ'je' ji'co'shaye' tsan' in Pablodyes judyeya' Bernabédyes. 14Chị́qui mu'in in där tári in, shẹi'jeyaqui quị'si' in, shuj tyeij in ĉọcsequi muntyi' in. Fer p̂eyaqui jéyacsi in: 15—¿Jun' dash me' dyijyi mi'in? Tsun nash muntyi' mọmo' yódyem' mi'in u. Mọ' nash tun tsun úya' Jen'si' p̂eyacdye' mu' paj qui farajjetiñe' fibis dyijyedye' mi'in jäm'tacdye'che' ĉúti mi'in. Ĉútiĉam' tyä Jen'che' mi'in, mu' tsạ'tyi'che', mu' jäm'tyety mạyedye', jac, judyeya' mar, judyeya' räj jedye' chuc mọ'ya' mọ'insi' in. 16Urucya' jiquej mu' Jen' dyichchucsi muntyi' in ĉụi'sim' dyijyedye' cạquity in. 17Me' tsan' me' in, Jen' qui nam' ñịbe'jeyacsi muntyi' in, mọ' jorojĉanjeyacsi' mu'ya' mu'. Mọ'dyes mu' so'minac añej judyeya' jäm'si' sicdye' jibitidyes mi'in, paj qui ma'jodye'tum bä'yi mi'in —yi jéyacsi muntyi' in Pablo judyeya' Bernabé. 18Me' tsan' me' jéyacsi in, anic ñịbe'tum dyäcjeĉunacsebi dyijyedye' mu'in, dam'dyety ra' ji'co'shaye' in Pablodyes judyeya' Bernabédyes. 19Aty me'si' pạrej atsij judío in Antioquíaĉan bä'yity in judyeya' Iconioĉantyi' in. Sac ja'yacsi mu'ĉantyi' in paj qui fạ́quebajte in mu' Pablo, chat qui farajñete mijya' in jeñej aty säñi ĉọ́te in. Soijjete in va'quecte jorojya' bä'yedye' in. 20Mu'in na anicjetety Jesucristo in ñur tyeij ĉọcte in mu' Pablo. Sacyi mu' quivij sisan bä'yedye'ĉan mu'. Nojno mạyedye' mu' Pablo judyeya' Bernabé sacti in Derbeĉan jịjcaij in. 21Mu'ĉan qui voro'tacsi in Jen'si' p̂eyacdye' mu', dai' jụj ja'yacsi in. Aty me'si' ca'ñibun in, Listraĉan qui jịjtuban in judyeya' Iconioĉan chime', dạquishan in Antioquía, Pisidiaĉansi'. 22Pai' ji'ma'yacsi anicjetety Jesucristo in, judyeya' fer bu'yi yụ'tacsi in anicyedye'ya' mu'in. Jéyacsi in: “Dai' chum ra' jị'ĉojtyeja' ñịbedyes tsun, chat q̂uin'dyem' ra' ayo'bu'yedyesĉan Jen'si' mu' bä'ja' tsun.” 23Chime'dye pai' bä'yedye' in mu' Pablo judyeya' mu' Bernabé yụ'tacsi ĉọjcacsity in mu'in anicjetety Jen' in, Ayoty ñuru'tyity mu'. Aty ra' yụ'tac in mu'in yịñij Jen'si'ya' vej in, judyeya' cọdyete Jen' in, mu'che' ĉútity in, paj qui mu' ĉọjcacsi judyeya' nọ́tacsi mu'in in. 24Me'dye mu' Pablo judyeya' mu' Bernabé ca'ñibun cuvij in, Antioquíaĉan roi'jeban' in. Sapa'je' in mọ' jac Pisidia judyeya' Panfilia, 25dạquishan' in mọ' bä'yedye' Perge. Mu'ĉan voro'tacsi in Jen'si' p̂eyacdye' mu' chat qui Ataliaĉan jịjcaij in. 26Mu'ya' p̂ai'joij in marĉan-tyi'che' covamba in, dạquishan' Antioquía in, yóya'dyem' yacchutiya' jiquej u in. Mu'ya' cọdactaquiya' Jen'che' mu'indyes in, sactiya' jiquej in, paj qui mu' Jen' nọ́tacsi judyeya' ĉọjcacsebi mi'edye' mu'in. ̣Q̂uin' chat aty jime'siyaqui in carijtacdye' mu'in mọ' so'macsis Jen' jiquej. 27Venchuban Antioquíaĉan in vajmu'ya'jeyac-seban in mu'ĉantyi' anicjetety Jesucristo in, jéyac-seban in jun' chuc carijtacdye' mu'in voro'tacsedye', Jen'si'tum ferdye' mu' carijtaqui in. Chime'dye jéyacsi in jun' chuc mu'in jam judío yụ'tac Jen'ya' in paj qui jụjjete Jesucristo chime' in, me' yi jéyacseban in Pablo judyeya' Bernabé. 28Mu'ĉan men pen'dyetucsi in mu'in anicjetety Jen' in.

will be added

X\