Acts 13

1Dai' mu'ĉan Antioquíaĉantyi' anicjetety Jesucristo in. Pạrej mu'ĉantyi'dye in jaso'mitity p̂eyacdye' Jen' in judyeya' jị'chiyacsity p̂eyacdye' chime' in, tịj mu'in: Bernabé, judyeya' Simón, Negro yocsi' tịj mu', judyeya' Lucio, Cireneĉantyi' mu' muntyi', judyeya' Saulo, judyeya' mu' Maneán, yiri'ya' jiquej p̂añity mu'tum Herodes Antipas,111 Galileaĉantyi' ayo', me' me' mu'in jị'chiyacsity in. 2Yirisĉan mạyedye' mu'in tima'queva'te Jen' in, yịñijdye'tum in Jen'si'ya' vej mu'. Vatyquej jéyacsi' Jen'si' Ạ'edye' mu', yi': —Yụ'tacsejam' mi'in Bernabé judyeya' Saulo, yụ́dyety ra' úñity in, ĉaĉaij na yụ aty me' tsim'tacsi —yi'. 3Mọ'dyes qui mu'in chum cọdaqui Jen'che' in yịñijdye'tum in mu'si'ya' vej, chat qui yụ'taqui un in Bernabéche' judyeya' Sauloche', chat qui jutacsi in cạyacsi Jen'si' p̂eyacdye' in. 4Me'dye sacje' in Bernabé judyeya' mu' Saulo, Jen'si' Ạ'edye' jutacsi', Seleuciave jịjcaij in. Mu've p̂ai'te in marĉantyi' covamba, Chipreve qui jịjcaij in, marĉansi' poc̣ho'. 5Salaminaya' mu'ya' sojquiti in, mu'ĉan voro'tacsi in Jen'si' p̂eyacdye' mu' junanaj chuc vajmu'yaijĉan judío in. Chime'dye mu' Juan Marcos cäc̣hä' jịjcacsi nọ́tacsi mu'. 6Sapa'je' in mọ' jac, muvetaque venjoij in, Pafos cha'she' in. Mu'ĉan dạquicte in yirity judío, cọcojsi' bu'yity mu', Barjesús tịj mu', yocsi' tịj mu' Elimas griegosĉan p̂eyacdye'. Väñätucsity mu', jeñej bu'yity jaso'mitity p̂eyacdye' Jen', me' bu'yi yu'ti. 7Pen'dye' na mu' Sergio Paulo tịj mu', mu'ĉantyi'dye ayo'. Mu' na ayo' anic mu' dyijyedye'tumtyi', mọ'dyes qui mu' ji'vorvacsi Bernabé Saulotum, mạ'je' se'vepte Jen'si' p̂eyacdye' mu'. 8Mu' na cọcojsi'naquity muntyi' fạ́quepte Jen'si' p̂eyacdye' mu', jam mu' mạ'je' paj qui anicyi Jen'che' mu' ayo'. 9Mọ' qui Jen'si' Ạ'edye' mu' játŝuti mu' Saulo, Pablo yocsi' tịj mu'. Jäm'tute mu' cạvete Elimas fạra'jeĉun'te jéte: 10—Där ac̣hi'c̣hity mi, väväjñity mi, Sọyoty bu'yi ạva' mi, anic fạ́que' mi räj rụijsis dyijyedye'. Caman' bu'yi' mạ'je' yụ'tyem Jen'si' p̂eyacdye' mu' paj qui väñädye' bu'yi' ji'shupbitem. ¿Jun'si' bu ra' farajjem jo'mes dyijyedye' a'c̣his? 11̣Q̂uin' chat ra' mu' Jen' jäm'si' va'tacdye' ji'tŝuyin mi, tofej ra' jadyiqui mi, mijam ra' méqui' nạijbite mi tsunsi' mạijquedyem' —jajiti Pablo. Me'ĉandye tomaj tyei' vej mu', quevte qui muntyi' tyi chuc ra' yeme' cạbajte ji'mi'ebajte. 12Mu' na ayo' aty mọ' cạve' me' bu'yi', q̂uin'dyem' anicjete Jen', anic där äjjepte Ayo'si' ji'chäyitidye' mu'. 13Aty me'si' mu' Pablo pen'dye'tumdye mu' yoctyi' marĉantyi' covamba p̂ai'te in, mu'che' nobi in, nopej mar jịjcaij in. Pergeya' sojquiti in, Panfiliaĉansi' jac. Mu'ĉan mu' Juan Marcos farajjeyacsetaqui, Jerusalénĉan jijtuban ca'ñibun. 14Pablo judyeya' Bernabé shupqui in Pergeĉantyi' in, yejĉoij mi'i in Antioquíaĉan venjoij in, Pisidia tịj jacsim'. Cha'she' in mọ' mạyedye' jị'jutyitidyes ĉọ́que' in vajmu'yaijĉan judío in, siti in bä'yi in. 15Mu'ĉantyi' in p̂eye' in Jen'si' sánacdye' mu', yụ'tacdye'ĉansi' sánacdye' p̂eye' in, judyeya' mu'insi' in jaso'mititysi' p̂eyacdye' Jen' in. Ji'me'siyaqui in, chat qui mu'ĉantyi' ĉọjcaquity in jutete in yirity mu'ĉantyi' paj qui jéyacsi Pablo judyeya' mu' Bernabé, yi mu': —¿Itŝi' p̂eyacdye' u mi'in ji'ma'yacsis chätidye' tsun? Mọ'ya' jụijya' p̂eyacdye' tutiñe', paj qui voro'yi mi'in jítiĉa' q̂uin'dye mi'in —jéyacsi. 16Sacyi mu' Pablo, che'jeyaqui un mu' paj qui c̣hu'c̣huijve in. Yi jéyacsi: —Chätidye', Israeltyi' vóshi' mi'in, judyeya' yoctyi' muntyi' chime' mi'in irijyity Jen'che' mi'in, se'vaĉam' mi'in. 17Tsuntyi' Jen' Israeltyi' vóshi' tsun, mu'dye tsim'tacsi vóshi'vun tsun jiquej, judyeya' ji'dayacsi mu'in in, mu'ĉan shashdyi in yoctyisĉan bä'yedye' Egiptoĉan. Aty me'si' därsi'ya' ferdye' mu' Jen' ji'shupcacsi Egiptoĉantyi' in. 18Cäjyasĉan qui jac bä'yi in, vạjpedye' qui'tac yómodye' mu'ĉan dyichjeyacsebi a'c̣his dyijyedye' mu'in. 19Tasjeyacsi jị'motsacsi Canaánĉantyi' muntyi' in, yävätidye' ñuru' jị'motsacsi in. So'macseban jac vóshi'vunsi' tsun mu'ĉan qui bä'ban in. 20Anic dai' yómodye' vóshi'vun tsun jiquej, vạjpedye' qui' cien ĉanam' qui'tac yómodye' jun' qui' chuc aty Canaánĉan jäm' bä'yi in, chat qui mu' Jen' q̂uin'dyem' yụ'tyeyacsi jị'cäts yụ'tacsity muntyi' in, mu'in qui ayo'bu'yi in. Cächquejĉoij mu'in in jun' qui' chuc na'i mu' Samuel, mu' chime' jaso'mitity p̂eyacdye' Jen'. 21Aty me'si' mu'in muntyi' in cọdyete in mu' Samuel paj qui mu' yụ'tyeyacsi yirity anictyity ayo' jacchety, me' cọdyete in. Jụjyi mu' Jen', me'dye jayu'ti Saúl, Cistyi' ạva' mu', Benjamíntyi' vóshi' mu'. Vạjpedye' qui'tac yómodye' me'qui' ayo'bu'yi mu' Saúl. 22Aty me'si' jaji'shupjun Jen' mu' Saúl, David qui mu' jayu'ti mu' qui ayo' bu'yi mu'indyes in. Jama'jotyiti mu' Jen' yi jap̂iijti: “Uts David, Isaítyi' ạva' mu', cạvete yụ anic ma'jotyete yụ, mu' ra' chäquibun yụ räj dyijyedye' yụ”, yi Jen'. 23Chime'dye mu' Jesús vóshi' mu' Davidtyi', mu' Jen' jayu'ti paj qui mu' ji'c̣honacsi Israeltyi' vóshi' in. Jesúsya' mu' Jen' jị'cätsaqui p̂eyacdye' mu' yụ'tyeyacsis jiquej. 24Jambi'dyem' tiyacchui' voro'tacsi mu' Jesús, tashche' mu' Juan atsij, voro'tacsi mu' räj Israeltyi' vóshi' in, jéyacsi mu': “Dyijyevac juchajche' mi'in judyeya' ji'chojtiĉam'.” 25Aty c̣hẹi'yai' tupudye' mu' Juansi' sän'dyes ra' mu', yi jéyacsi: “Yụ jam Ji'c̣honacsity muntyi', jam me' yojdyem' ĉútiĉa' yụ mi'in, jábiya'dye ra' atsij mu'. Anic muju'chaty mu', uya'ya' yụ, mijam yụ tupuj c̣hacjepte yujches co'sis mu'”, yi jiquej mu' Juan —jéyacsi mu' Pablo—. 26Chätidye', Abrahamtyi' vóshi' mi'in judyeya' yoctyi' muntyi' chime' mi'in irijyity Jen'che' mi'in, se'vaĉam'. Mi'indyes chime' ọij ji'c̣honacsis p̂eyacdye'. 27Mu'in na Jerusalénĉantyi' muntyi' in ayo'tumdye mu'in mijam méqui' chị́yete mu'in in, mu' nash Jesús Ji'c̣honacsity muntyi', mijam méqui' chique' in mọ' sánacdye' jaso'mititysi' p̂eyacdye' Jen' jiquej in. Me' tsan' räjĉan mạyedye' jị'jutyitidyesĉan in p̂eye' in mọ' sánacdye', jam qui nam' chique' in mọ' p̂eye'si' in, jätäjyi' ra' mọ'. Mọ'dyem' sánacdye' jị'cätse' in aty ji'ijateya' in Jesús. 28Me' tsan' jam dạcbite sän'dyedyes juchaj in cọdyete qui nam' in mu' Pilato paj qui mu' sän'dye' so'mete. 29Me'dye jị'ñibe'cate in ijate in, me'dye räj jị'cätse' Jen'si' sánacdye' mu' p̂eijtes mu' Jesús. Aty ji'me'siyaqui chat jị'chabajte croshchety in judyeya' qui nạ́te in. 30Jen' qui nam' mu' jaji'tsa'ibun, 31dai' mạyedye' bä'yetaqui úche' jacche' judyeya' ji'caviti mu'inya' in cäc̣hä'chu-tetyya' in, mu'in jịjcatety in mu' Jesús yạjqui'ya' jiquej in mọ' Galilea, mu'tum in Jerusalénĉan qui jịjcaij in. Mu'in cạvete in judyeya' jị'chiqueyacsity muntyi' in p̂eijte in mu' Jesús. 32Mọ'dyes atsij tsun úya', jäm'si' p̂eyacdye' tui' tsun mi'indyes, ĉaĉaij na mọ' p̂eyacdye' Jen' yụ'tyeyacsis vóshi'vun tsun jiquej, p̂eijtes mu' Ji'c̣honacsity muntyi'. 33Mọ'dye p̂eyacdye' jị'cätse' mu' Jen' tsundyes q̂uin', ĉaĉaij na mu' jaji'tsa'ibun Jesús. Mu'dye p̂eijte mọ' sánacdye' Salmosĉansi' pärä', mọ' yi': “Mi nash Ạva' yụ, q̂uin' aty jị'tsa'ebadyeye mi.” 34Chime'dye sánacdye'ĉan mu' yi jun' chuc mu' ra' jaji'tsa'ibun mu' Jesús, mijam ra' cuvij sänjan mijam ra' focoi' a' mu'. Yi sánacdye'ĉan mu': “Yụ ra' jị'cätse' mi'indyes mọ' jäm'si' p̂eyacdye' ĉụi'si' yụ, mọ' yụ'tyeyetes jiquej yụ David, mi'indyes ra' cạ̈tsi' mọ'.” 35Yocsi' sánacdye' yi': “Mi ra' jam jun' farajjibuti' mi a' yụ paj jam focoi', ĉaĉaij nash yụ jutactyi' ĉụi'tyi' mi, tsim'tactyi' mi”, yi' mọ' sánacdye'. 36Chätidye', ọij sánacdye' jam David p̂eijte. Tsạ'dyem' jiquej mu' chiquete Jen', jäqui've qui nam' mu' säñi, nạ́te in vóshi'vuntum mu', mu'si' qui nam' a' mu' räj focoi', meij mọmo' jịjcai' mu'. 37Mu' na jaji'tsa'ibuntyi' Jen' jam mu' me', jam mus focoi' a' mu'. 38Chätidye', jemoñe' mi'in räj chị́yetiñe' jäm' ọij p̂eyacdye', jun' chuc mu' Jen' vayacjibunac ra' juchaj mi'in Jesúsya', anicjetinte jụijya' mi'in. 39Me' tsan' mọ' yụ'tacdye' Jen'si' jaso'mitis Moisés jiquej, mọ' jam tupuj ji'c̣honsin' juchajya' tsun, Jesús qui nam' tupuj ji'c̣honacsi jụ'ñity chuc anicjetety in. 40Are'ĉa mi'inche' tŝọi' jun' chuc yi' ọij sánacdye', jaso'mititysi' p̂eyacdye' Jen' jiquej in, yi': 41“Mi'in äcäijjebitintety Jen'si' p̂eyacdye' mu', jäm' se'vevac q̂uin' mi'in. Äjyi ra' mi'in säñi mi'in, yụ ra' jị'caveyeyac därsi' tsäqui'sis, me' ra' tsan' chap jínac in mijam ra' tupuj anicyi mi'in, tsạ'dyem' mi'in q̂uin' yụ ra' me'jeyac”, yi' sánacdye'. Jäm' ra' dyijyi mi'in paj qui jam me' mi'in —jéyacsi Pablo. 42Pablo judyeya' mu' Bernabé aty ra' shupjan in vajmu'yaijĉan judío in, chat qui mu'in muntyi' in jam judío in cọdacsi in paj qui quivij ca'ñibun in yocsi' mạyedye' jị'jutyiti-dyesĉan, paj qui chịmo'dye ji'se'veyacseban in. 43Aty ji'me'siyaqui tsudyujñitidye' in, dai' judío in judyeya' yoctyi' chime' muntyi' in jụjjeyacsebity in judíos ji'chäyitidye' mu'in, dam' mọmo' cäc̣hä'chucsi in mu' Pablo judyeya' mu' Bernabé. Mu'in jéyacsi in: “Räjĉan ra' cäc̣hä'chutinte Jen', mu' ñịbe'jisin'tyi' tsun”, jéyacsi in. 44Cuvij cha'sheban' in mọ' mạyedye' jị'jutyitidyes, arajdye tas mu'in bä'yedye'ĉantyi' muntyi' in tsudyujñiti in, mạ'je' se'vepte Ayo'si' p̂eyacdye' in. 45Mu'in na judíoty ayo' mu'in, aty me' cạvacsi in dai' muntyi' se'vete in mu' Pablo, mọ'jete jị'fajqueyete in. Vorjiti mu'tum in ñiñete in. 46Mu' na Pablo judyeya' Bernabé mijam mu'in quijnacsi in, jéyacsi mọmo' in: —Tupuj tsan' tsun tashche' jéyac judío mi'in Jen'si' p̂eyacdye' mu'. Mi'in na ĉụi' va'quecbitinte p̂eyacdye' mu', mijam mạ'je' Jen'yadyety mi'in. ̣Q̂uin' ra' chat tsun farajjeyac mi'in, mu'in qui ra' jam judío in voro'tacsi tsun. 47Me' ra' ĉaĉaij na jị'cätsepte tsun Jen'si' p̂eyacdye' so'minsi' tsun, me' yi' sánacdye' mu': “Yụ yụ'tyeye paj qui mạijchucsebim ĉojtyi' mu'in jam judío in, cạyacsi ram ji'c̣honacdyedyes p̂eyacdye', voro'tacsi ram räj pai'tyity úchety in, me' tsan' dyụ́tsedye'vety in”, yi' sánacdye' —jéyacsi Pablo. 48Mu'in na jam judío in aty se'vepte p̂eyacdye' in, ma'jotyepte in Ayo'si' p̂eyacdye' mu', judyeya' anicjete Ayo' in, jụ'ñity chuc tsim'tactyi' in, mu'in ra' Jen'yadyety in. 49Me'dye pai' bä'yedye' bä'yity in yejĉoij ji'tse'epte in Ayo'si' p̂eyacdye' mu'. 50Mu'in na judío in yocve mu'in dyijyi in, sac ja'yacsi mu'ĉantyi' fer bu'yity muntyi' in judyeya' mọ'in jedye'tumsi' p̂en in dyijyis tsan' Jen'che' in, mu'in judío yi in paj qui fạ́cacsi in mu' Pablo judyeya' Bernabé. Tiyacchui' jị'ñibe'cacsi in ji'ĉav'cacsi in. 51Mu' na Pablo Bernabétum chischisjeyactaqui in yujches jac mu'in, mọ' mu'insi' jị'ĉocdyes mu'in va'cac bä'yi mu'ĉantyi' in. Iconioĉan qui roi'je' in. 52Mu'in na Antioquíaĉantyi' anicjetety Jesucristo in jäm' mu'in ma'joij in, Jen'si'tum Ạ'edye' bä'yi in.

will be added

X\