Acts 12

1Aty me'si' mu' ayo' Herodes Romaĉantyi' tiyacchui' jị'ñibe'cacsi pạrej mu'in anicjetety Jen' in.110 2Coc̣hinoya' ji'ijate mu' Santiago, Juantyi' vojity mu'. 3Chị́qui mu' ayo' mọ' anic ma'jotye' in mu'in judío in, mọ'dyes qui Pedromun tapyejoij, feshtaĉan jam ji'dujraquistumtyi' pan, mọ'ĉan tapjete in, 4ĉär'taquisĉan qui tacjete in. Yedyej väc̣hä'tyity ĉọjcate in, yiri'tac jäbän jiyi rụi'cu' in, vạjpedye' ñuru' yụ'tac in. Vạjpedye' väc̣hä'tyity in yirity ñuru' jịjcaij in. Dyijyi tsan' mu' ayo': “Jiyi'ya' ra' feshta chat qui ra' muntyisya' vej mu'in yụ'tyeyete va'tacdyes p̂eyacdye' in”, yi mu' ayo'. 5Mu' na taĉan ĉä'räij, jäm' ĉọjcate in. Mu'in na anicjetety Jen' in yejĉoij ferche' cọdyete Jen' in mu'dyes. 6Dyijyi tsan' mu' ayo' nojno ra' mạyedye' mu' ra' jayu'tyiyiti Pedro va'tacdyes p̂eyacdye' muntyisya' vej mu'in. Mọ'dye tsedyedye' mu' Pedro chidyi'ĉanya' yụ'te in väc̣hä'tyitytum, mu'intum ĉọshi, uvemun mu'in väc̣hä'tyity yụ'tac in, pärä' bu'yi' cadena sasa'baba' mu'. Yoctyi' na chụi'dye'ya' ĉọjcaqui in. 7Rụi'cujcuj vatyquej ji'caviti yirity anjer mu'ya' Ayo'tyi' mu', mạij tŝọi' mọ'ĉan ĉär'taquisĉan. Anjer toco'jajiti Pedro jaji'tsa'ibun. Jajiti: —¡Tsạ'eva, cavinyeva sacyeva! P̂eyacdye'ĉandye daj tyei' mọ' cadena unyas mu'. 8Jajiti anjer: —Cäbuda judyeya' yujches chime' mi quị́ĉada. Aty me' cäbun mu' Pedro, mu' qui anjer jajiti: —Jäm'chuĉada p̂ur'tyity chime' mi, cabu'tyum cäc̣hä'chuti'. 9Pedro cäc̣hä'chute mu' anjer, me' tsan' itŝi' dyijyedye' mu', jeñej tamiñity, me' ĉúti vatyquej ra' jam anictyity anjer me' ĉúti mu'. 10Me'dye mi'i in cajñeban' in tashches ĉọjcacdye' väc̣hä'tyitysi' in, yoctyi' qui muju'veya' cajñebajte in, me'dye chụi'dye'ya' venjoban in, fiyero na mọ' chụi'dye'. Ĉụi' vatyquej vanacyi' mọ' chụi'dye', shupjan in, jorojya' jịjtuban in, caye qui cäc̣hä'chuban' in. Aty muju'veya' in jayajcabun mu'ya' mu' anjer, jọban mu'. 11Chat q̂uin'dyem' ĉúbun mu' Pedro, yi ĉojtyi'ĉan mu': “̣Q̂uin' chat aty ĉúti yụ mu'dye Ayo' jutiyin yụ anjer mu', mu' qui ji'c̣hoñin yụ Herodesya' paj qui jam jị'ñibe'can yụ, paj qui jam cạ̈tsi' dyijyedye' judíos mu'in, mạ'je' tsan' me'jin yụ in jun' chuc mạ'je' mu'in in.” 12Me' dyijyeban mu' Pedro Maríasĉan qui aca' jịjcaij mu', mọ' tse' mu' Juansim', Marcos yocsi' tịj mu'. Aca'ĉan mọ' dai' mu'ĉan tsudyujñiti in cọdaqui Jen'che' in. 13Ventacsequi mu' Pedro, täjñe' jorojyas chụi'dye', paj qui vanacjeyete in. Yiris nanas, Rode tịj mọ', ĉọ́que' chụi'dye', tyi mu'ya' täjnacva'joij u. 14Chị́yepte mọ' p̂eyacdye' Pedros, judye'dye vanacjeyete chụi'dye', shuj tyeban' ma'jodye'tum jéyacseshan': “Mu'ya' nash chụi'dye'ya' mu' Pedro”, jéyacsi'. 15Mu'in na jam anicyi in, je' in: —Anic där shapui'sim —je' in. Mọ' na yejĉoi' jéyacsi': “¡Mu'dye nash mu'ya'!” Mu'in na yi vorje' in: —Jam nash Pedro, Pedroty u anjer mu' —yi in. 16Mu' na Pedro yejĉoij täjnacsebi chụi'dye'. Ĉụi'dye vanacjeyete in. Cạvete in mu'dye na jiquej, fer äjyi in. 17Che'jeyaqui un mu' paj qui c̣hu'c̣huij in, chat jéyacsi jun' chuc mu' Jen' jaji'c̣hondyi ĉär'taquisĉan jiquej. Chime'dye jéyacsi: —Me' ra' jétinte mu' Santiago räjtumdye anicjetety Jen' in. Shuban chat qui yocve jịjcaij. 18Aty nạijjoi'ya' mu'in ĉär'taquisĉantyi' väc̣hä'tyity in där noi'yi in, itŝi' dyijyedye' tyei' mu'in, mijam méqui' chịj in jun' buty jiquej Pedro. 19Mu' na ayo' Herodes jutacsi tsan' paj qui quevjajte in mu' Pedro, mijam qui jun' dạcajte in, me'dyes qui mu' cọdyetacsi p̂eyacdye' mu'in väc̣hä'tyity in, chat qui mu' ji'ijacsi räjdye in. Aty me'si' mu' Herodes yạjqui' mu' mọ' Judea, Cesareaĉan qui jịjcaij, mu'ĉan qui bä'yi mu'. 20Herodes jiquej anic fạ́cacsi Tiroĉantyi' muntyi' in judyeya' Sidónĉantyi' chime' in. Pären' bä'yedye' in dyijyi in mạ'je' cạvecte ayo' in paj qui quivij jäm'jibun mu'tum in, ĉaĉaij na taĉan ya'ij säcsedye' jiquej in Herodessi'ĉan jac. Tashche' chum yi in paj qui mu' Blasto jäm'jeyacsi judyeya' ma'jotacsi, mu' ayo'tyi' nọ́taquity, mu' qui ra' ji'ma'jotacsi Herodesya'. 21Me'dye mu' Herodes yụ'tye' tupudye', mọ' ra' mạyedye' mu' ra' cạvacsi muntyi' in. Cha'she' in mọ' mạyedye', chat qui mu' Herodes ayotyĉan quị'si' cäbun, ayosche' qui bä'yaquis bä'yi mu'insi'ya' vej in, chat qui p̂eyacdye' so'macsi muntyi' in. 22Mu'in na muntyi' in yi in: —Uts p̂eyaquity q̂uin' jam nash mu' muntyi', jen' nash mu' —yi in. 23Me'ĉandye yirity anjer Ayo'tyi' játŝuti chat qui mu' fersi' japacjodye' java'tyiyiti, ĉaĉaij na mu' jam dyäcjeĉunacsebi tima'cacdye' mu'in tima'quetety in, jam mu' jéyacsi: “Jen' tima'quemac.” Mọ'dyes qui mu' játŝuti mótoi' räj bu'yi a'ĉan mu', mu'dye ja'ujati. 24Mọ' na Jen'si' p̂eyacdye' mu' yejĉoi' ji'tse'e' in, pai' se've' in, cächjicacati anicjete in. 25Me'dye mu' Bernabé judyeya' mu' Saulo ujaij in carijtacdye' mu'in, mọ' dyimacdye' so'macsi in mu'in Jerusalénĉantyi' anicjetety Jen' in, chat qui ca'ñibun in, cạte in mu' Juan, Marcos yocsi' tịj mu'.

will be added

X\