Acts 11

1Mu'in qui in Jen'tyi' jutactyi' mu', räjtumdye Judeaĉantyi' anicjetety Jesucristo in chị́qui in mu'in jam judío in aty mu'in jụjyaque Jen'che' in. 2Pedro Jerusalénĉan jịjcaij. Aty venjoij mu'ĉan, mu'in judío anicjetety Jesucristo in fạra'jeĉun'te in. 3Pedro jéte in: —¿Jun' dash cạ̈nä'nacsim mu'in jam judío in? ¿Jun' dash jebetacsim chime' mi? —jéte in. 4Chat qui mu' Pedro räj jéyacsi jun' chuc cạ̈nä'nacsi mu', jéyacsi: 5—Jopeĉan nash yụ cọdaqui Jen'che', mu' qui Jen' ji'caviyin yụ yiris jị'cavacdye'. Cạve' vatyquej yụ yiris jedye' jị'ĉojtuye' yụ mạyedye'ches jịjtuij, jeñej bu'yi yirity tyä'väty, sababa bu'yi quipdyivevej, jo'mety chạij yụ́ya' tŝọij. 6Anic jäm' cạvi yụ, mọ'ĉan yoc yoc jebacdye' ayij in, vajru vajedyedye' in judyeya' jaijtyi' chime' in. 7Chat qui yiris se've' p̂eyacdye' yụ, jin yụ: “Tạij mi Pedro, ujacseva mọ'in in, chat qui ra' jebacsim”, jin yụ. 8Yụ qui vorjete: “Jam ra' yụ jun' me' Ayo', jam yụ jäm'dyeya' jebei' jo'mes jam jebacsis tsun judío tsun”, yi yụ. 9Quivij se've' yụ p̂eyacdye' yi' jin yụ: “Jam ra' äcäijjeyacsim jebacdye' mi, a nash yi Jen' paj qui tupuj jebacsi mi'in”, yi jin yụ. 10Chibin quim' ji'caviyin yụ, chat qui cạc juban mạyedye'che' jịjcaban. 11Ĉụi'dye vátyequej shupqueti in chibin Cesareaĉantyi' muntyi' in, jutactyi' Cornelioty paj qui yụ́ya' atsij in, aca'ĉan venchuij in. 12Jen'si' Ạ'edye' jin yụ paj qui jịjcacsi yụ: “Mijam ra' yocve dyijyi mi”, jin yụ. Cesareaĉan qui roi'je' yụ, pen'dyetucsi yụ uts in jäbäntyity rụi'cu' in anicjetety Jesucristo chime' in. Venjoij mu'ĉan tsun, chụi' bu'yi siti tsun Corneliosĉan aca' mu'. 13Jin mu' tsun jun' chuc mu' cạvete yirity anjer rụi'cujcuij aca'ĉan mu', jajiti ca: “Jutacseva muntyi' in paj qui Jopeve jịjcaij in, paj jäcte in mu' Simón, Pedro yocsi' tịj mu'. 14Mu' ra' jin mi jun' bu'yi chuc ra' tupuj c̣hoñi mi räjtumdye chätidye' mi”, yi ca mu' anjer jajiti Cornelio. 15Tiyacchui' yụ voro'tacsi aca'ĉantyi' in, jị'tŝocsi' vatyquej Jen'si' Ạ'edye' mu', yojdyem' tsun tashche' jiquej u ji'tŝusin' judío tsun jiquej. 16Yụ qui dyijtupte Ayos p̂eyacdye' mu', yi mu': “Juan ojñi'ya' chojtyinac mi'in, q̂uin' ra' chat ji'tŝunac Jen'si' Ạ'edye' mu'”, yi mu'. 17Anic jorojĉanjisin' Jen' so'macsi Ạ'edye' mu' mu'in jam judío in, yojdyem' so'misin' tsun jiquej u, yoqui'dyem' anicjejaya' Jesucristo u. Mọ'dyes yụ jam jun' dyäcjeĉun'bite Jen'si' dyijyedye' mu' —yi mu' Pedro jéyacsi. 18Se'veptem' p̂eyacdye' in mu'in Jerusalénĉantyi' anicjetety Jesucristo in, tyäpä' tyeij mu'in in, aty jam jätäjyeban quivij in. Tima'quete quim' Jen' in, yi in: —Jaij me', mu' Jen' so'macsi mu'in jam judío in paj qui mu'in chime' dyijyi juchajche' in paj qui räjĉan Jen'ya' bä'yi in —yi in. 19Aty ijateya' in mu' Esteban chat tiyacchui' jị'ñibe'cacsi in mu'in anicjetety Jesucristo in. Me'dyes qui ĉa'joij in, yạjqui' in Jerusalén, pai' junanaj ĉụi' jịjcaij yocsi'ĉan bä'yedye' in, pạrej Feniciaĉan jịjcaij in, judyeya' pạrej Chipreĉan jịjcaij in, pạrej na Antioquíaĉan jịjcaij in. Me' me' jịjcaij in voro'tacsi Jen'si' p̂eyacdye' in, judío qui na mọmo' jéyacsi in, mu'in na jam judío in jam jéyacsi in. 20Me' tsan' me' atsij qui nam' pạrej Chipreĉantyi' anicjetety Jesucristo in judyeya' Cireneĉantyi' chime' in, mu'in Antioquíaĉan jịjcaij in, mu'inmun voro'tacsi in jam judío in jéyacsi in mọ' p̂eyacdye' p̂eijtes mu' Jesús, Ayo' tsun. 21Jen' nọ́tacsi ferdye'ya' mu', dai' mu'ya' caman'yeban in dyijyeban Jen'che' in, jụjjebajte in Ayo' tsun. 22Mu'in Jerusalénĉantyi' anicjetety Jesucristo in chị́qui in aty me' mu'in in Antioquíaĉan in, jutete qui in mu' Bernabé paj qui mu've cạvacsequi. 23- 24Anic na mu' jäm'yity muntyi', fer anicjetety Jen' chime' judyeya' Jen'si'tum Ạ'edye' bä'yity mu'. Dạcacsequi mu' anicjetety Jen' in, cạvacsi mu' Jen' anic nọ́tacsi mu'in, mọ'dyes qui där ma'joij mu'. Yi jéyacsi: “Jam ra' méqui' mi'in farajjetinte Ayo' tsun, yejĉoij ram' ĉojtyi'ĉan mi'in cäc̣hä'chutinte mu'”, jéyacsi. Me'dye qui mu'in yejĉoij cächquejĉoij in jụjjete Jesucristo in. 25Sacjeban' mu' Bernabé, Tarsove qui jịjcaij mu' queviĉajte mu'ĉan Saulo. 26Mu'ĉan dạcajte, Antioquíaĉan jijtuban Saulotum. Pären'dye mu'in in jị'chiyacsi mu'ĉantyi' anicjetety Jesucristo in, yiris yómodye'mun mu'ĉan me' bu'yi in, dai' muntyi' jị'chiyacsi in. Mu'ĉan Antioquíaĉan yóĉandyem' tiyacchuti tịj so'macsi mu'in anicjetety Jesucristo in jéyacsi in Cristoty in, jéyacsi in. 27Aty me'si' pạrej jaso'mitity p̂eyacdye' Jen' in atsij in, Jerusalénĉantyi' mu'in in, Antioquíaĉan venjoij in. 28Yirity Agabo tịj mu', mu' so'mactyi' p̂eyacdye' Jen'si'ya' Ạ'edye' mu'. Sacyi mu' mọ' jị'chiqueyacsi p̂eyacdye', jéyacsi: “Räj bu'yi' ra' jac chique' ra' dáquis in.” Anicdye me', aty mu' ayo'bu'yi mu' Claudio jiquej, mu' muju'chaty ayo' Romaĉantyi', cạ̈tsi' mọ' p̂eyacdye'. 29Mọ'dyes mu'in Antioquíaĉantyi' anicjetety Jen' in dyijyi in dyim'te querec̣ha in anicjetetydyety Jen' in Judeaĉantyi'. Me'dye räj anicyity Jen'che' in yụ'te in jun' quiquij chuc tupuj yụ'te in, me' me' vajmu'ya'jete querec̣ha in. 30Chat qui juteyacsi in mu'in ĉọjcacsity anicjetety Jen' in Judeaĉantyi' in. Bernabé judyeya' Saulo mu'in cạyacsi in.

will be added

X\