Acts 10

1Mu'ya' jiquej yirity muntyi' Romaĉantyi', Cesareaĉan bä'yity, Cornelio tịj mu', ayo' yiritytyity ñuru' väc̣hä'tyity Romaĉantyi' in. Italiaĉantyi' in, jéyacsi in. 2Cornelio dyijyity tsan' Jen'che' räjtumdye chätidye' mu' tima'quete Jen' in. Nọ́tyetacsi mu'in judío jayejjotaquity jedye' in, räjĉan cọdaqui Jen'che'. 3Yirisĉan mạyedye' aty yómo'qui've tsun, yirity Jen'tyi' anjer mu' ji'caviti Cornelioya', jafaijti: —Cornelio —jajiti. 4Jäm' itŝijyi mu' cạvete mu' anjer, jéte: —¿Jedye'veij tyu' um? Vorjajiti anjer: —Jen' se'vibun mísi' cọdacdye', judyeya' cavibun nọ́tacdye' mi jayejjotaquityya' jedye' in. 5Jutacseva muntyi' in paj qui Jopeve jịjcaij in, paj jäcte in mu' Simón, Pedro yocsi' tịj mu'. 6Yoctyi'ya' Simón q̂uin' dyäqui, carijtyety sho'pa', tsävche' bä'yity mar —jajiti anjer. 7Jọban qui mu' anjer jap̂iyitity. Cornelio fayaqui pärä' úñity mu' judyeya' yirity väc̣hä'tyity mu', mu' chị́yetety judyeya' chiqueptety p̂eyacdye', judyeya' dyijyity tsan' Jen'che' chime'. 8Mu' Cornelio jéyacsi räj jätäjjajishdyi chuc mu' anjer, chat qui jutacsi paj qui Jopeĉan jịjcaij in, quevicte in mu' Pedro. 9Nojno mạyedye' quichĉan tsun aty majmiya' in c̣hẹi'ya' tyiti Jope atsvun in. Mọ'dye hora mu' Pedro fajche' jịjcaij aca' bojvi, yóche'dyem' jị'jutyitidyesche' muntyis u mu'in, mu'che' cọdaqui Jen'che'. 10Dáquis mu'che' játŝuti Pedro mạ'je' tsan' säcsi, jambi' qui nam' jejmucsi' in, chat qui mu' Jen' jaji'caviyiti yiris jị'cavacdye'. 11Vanacyi' vatyquej mạyedye'che' cạve', mọ'ches yiris jedye' jị'ĉojtuyeĉuñe' mu' jeñej yirity tyä'väty cạvete, jo'mety chạij, sababa bu'yi quipdyivevej. 12Yóĉandyem' jä'chäi' o, mọ'ĉan yoc yoc jebacdye' ayij in, vajedyedye' in judyeya' jaijtyi' chime' in. 13Pedro qui yiris se've' p̂eyacdye' jajiti: —Tạij Pedro, ijacseva judyeya' jebacsi ram. 14Vorjete Pedro: —Jam yụ tupuj ujacsi jo'mes in, Ayo', jam yụ jäm'dyeya' jebei' jo'mes jam jebacsis tsun judío tsun —yi Pedro jéte. 15Quivij se've' p̂eyacdye', yi': —Jam ra' äcäijjeyacsi jebacdye' mi, a nash yi Jen' tupuj jebacsi mi'in —jajiti. 16Chibin qui' jaji'caviyiti mu' Pedro chat qui bojban mu', mạyedye'che' jịjcaban. 17- 18Pedro ji'dyijviva'bun jedye' chuc cại' mọ' jị'cavacdye' cạves mu', mu'in na jutactyi' Cornelioty mu' venjoij in. Quequevcapte in Simónsi' aca' mu'. Ĉụi'dye dạcbite in, chat qui chụi'dye'ya' fayacsi in jéyacsi in: “¿Uya' ca' dyäqui mu' Simón, Pedro chime' yocsi' tịj mu'?” 19Mu' na Pedro yejĉoij dyijtuva'ban' mọ' jị'cavacdye' cạves jiquej. Chat qui Jen'si' Ạ'edye' mu' yi' jajiti: —Chibin muntyi' quivintyi' in. 20Sacyebada chạbada, me' tsan' jam judío in jịjcacseva, jam ra' yocve dyijyi mi, ĉaĉaij nash yụ jutacsi —yi' Jen'si' Ạ'edye' mu' jajiti. 21Me'dye mu' Pedro chạban mu'chety, jéyacsi muntyi' in: —¿Yụ ca' quivdyiĉa' mi'in? ¿Jedye'veij tyu' u mi'in? —jéyacsi mu' Pedro. 22Vorjete in: —Tsun atsij jutactyi' Cornelioty mu' väc̣hä'tyitytyi' ayo' mu'in Romaĉantyi' in. Mu' nash anic jäm'yity muntyi', tima'quetety Jen', räjen'dye mu'in judío in jäm'yity ĉọte in. Yirity ca anjer jajiti mu', mi ca ra' fayin, mu'si'ĉan ca ra' aca' jịjcaij mi, mu' ca ra' se'vibun p̂eyacdye' mi, yi jajiti mu' anjer —jéte in mu' Pedro. 23Me'dye mu' ji'sitacsi aca'ĉan ji'dyäcacsi, mu'ĉan qui ĉọshi in. Aty nojno mạyedye' sacjeban' in, chat quivij ca'ñibun in, Pedro jịjcacseban judyeya' Jopeĉantyi' muntyi' in anicjetety Jesucristo in. 24Nojno mạyedye' in venjoij mu'ya' in Cesareaĉan in, yóĉandyem' bä'yi Cornelio u, mu' aty jä'mij jabisva'ti aca'ya' mu'. Aty vajmu'ya'jeyacsi chime' pạrej chätidye' mu' judyeya' pen'dye' mu'. 25Mu' Pedro aty ra' siti aca'ĉan, dyụtsyi mu' Cornelio Pedrosya' vej mu', mạ'je' tsan' tima'quete. 26Pedro jam mạ'je', sacjebajte, jéte: —Sacyebada, jam ra' me' mi, muntyi' nash mọmo' yụ —jéte. 27P̂eyacdye'tum siti aca'ĉan in, a na mu'in dai' mu'ĉan bisacva'joij in. 28Pedro jéyacsi: —Mi'in anic chäyibutiĉa' mi'in tsunsi' ji'chäyitidye' judíos tsun, tsun jam tupuj cạ̈nä'nacsi yoctyi' muntyi' tsun, mijam chime' tupuj yoctyis sitacsebi aca' tsun. Me' tsan' me' yicdye' tsun, Jen' qui nam' ji'chäquiyin yụ jị'cavacdye'ya' mu', yụ ca ra' jam yirity muntyi' äcäijjete, paj tsan' jam judío jụijya' in. 29Mọ'dyes aty fayitiĉa' yụ mi'in, cavintum mọmo' atsij yụ jam mọ' jedye' yi'. ̣Q̂uin' chat jítiĉam' ¿jedye' jítiĉa' tyu' ca' ra' mi'in? —jéyacsi mu' Pedro. 30Vorjete Cornelio: —Me' yụ, aty vạjpedye' mạyedye' jiyi', yoqui'dyem' q̂uin' tsun u, yụ úĉan cọdaqui Jen'che' yụ yịñijdye'tum Jen'si'ya' vej mu' cọdaqui yụ, yómos cọdacdye' tsun. Me'ĉandye yirity muntyi' ji'caviti yụ́ya', anic pashyity quị'sim'. 31Mu' jin yụ: “Cornelio, mu' Jen' aty se'vibun cọdacdye' mi, judyeya' cạvepye nọ́tacdye' mi mu'in jayejjotaquitydyes jedye' in so'macsi mi. 32Jutacseva muntyi' in paj Jopeve jịjcaij in, paj Simón jäcte in, Pedro yocsi' tịj mu'. Yoctyi'ya' Simón dyäqui, carijtyetyya' sho'pa', tsävche' mar bä'yity”, mu' jin yụ. 33Anicdye me' jutacsiij paj qui jiquin in. Ñịbe'jitim atsij úyam. ̣Q̂uin' chat aty úya' tsun Jen'si'ya' vej mu', mạ'je' tsun se'vebiyac p̂eyacdye' mi, jätäjjin chuc mu' Jen' —yi Cornelio jéte mu' Pedro. 34Pedro tiyacchui' voro'tacsi: —̣Q̂uin' chat aty ĉúti yụ jun' chuc mu' Jen' vaj cäts cạvacsi räj muntyi' in, 35me' tsan' judío in, me' tsan' yoctyi' chime' in, tyi chuc irijyity mu'che' in judyeya' rụij bä'yity in, räj mu' jụjjeyac Jen'ya' in. 36Jäm' chị́yetiñe' mi'in mọ' p̂eyacdye' so'minsi' tsun Israeltyi' vóshi' tsun, mu' Jesucristo jäm' yu'bun tsun Jen'ya', mu'dye Jesucristo ayo'bu'yi räjdyes in, judío in judyeya' jam judío in. 37Chime'dye chịj mi'in jun' chuc carijtaqui mu' Jesucristo räj bu'yi' ọ́ĉan jac Israelĉan carijtaqui mu'. Aty jäqui've voro'tacsiya' mu' Juan chojtacsity muntyi' jiquej, mu' Jesucristo mu'ĉan tiyacchui' carijtaqui mu' Galileaĉan. 38Chịj mi'in jun' chuc mu' Jen' jaso'miti Jen'si' ĉụi'si' Ạ'edye' mu', jaji'tŝuti ferdye' mu'. Mu'dye Jesús Nazaretĉantyi' pai' nati nọ́tacsi muntyi' in judyeya' ji'chäcacseban mu'in jame'tity sọyo' in . Me' tupuj mu' ĉaĉaij na Jen'dye japen'dyetuti. 39Tsun nash cạvepte räj carijtacdye' mu', jị'caveyacsis Jerusalénĉan judyeya' pai' judíosĉan jac. Aty me'si' ijate qui in croshche' pacte in. 40Chibin mạyedye' me' bu'yi säñi, chat qui Jen' mu' jaji'tsa'ibun. Aty me'si' jajutiti qui ji'caviti qui tsunya'. 41Jam qui nam' ji'caviti yoctyi'ya' in, me'dye tsunyam' ji'caviti, ĉaĉaij na mu' tashche' tsim'tyin tsun paj qui jị'chiqueyacsi muntyi' tsun úchety in. Aty vañinyebanya' mu' tsuntum qui säcseban. 42Mu' jutin tsun paj qui voro'tacsi muntyi' tsun, judyeya' jị'chiqueyacsi tsun jun' chuc mu' Jen' aty jayu'ti mu' Jesucristo, mu' qui yụ'tac paj qui jị'cäts yụ'tacsi muntyi' in juchadye'ya' mu'in räj muntyi' in, tsạ'tyi' in judyeya' säñity in. 43Chimu'dye mu' p̂eijte jiquej in räj mu'in jaso'mitity p̂eyacdye' Jen' jiquej in yi in, tyi chuc ra' anicjete Jesús, mu' ra' Jen' vayacjepte juchaj, Jesússi'che' ra' tịj mu' —jéyacsi mu' Pedro. 44Taca' p̂eyacva'joij mu' Pedro me'ĉandye jị'tŝocsi' mọ' Jen'si' Ạ'edyem' mu', mu'in se'vacva'joijtyi' in mọ' p̂eyacdye'. 45Mu'in jụjjetety Jesucristo judío in, mu' pen'dyetucsity Pedro, mu'in chime' cạve' in, anic äjyi in, ĉaĉaij na mu' Jen' jutaqui Ạ'edye' mu' paj qui mọ' jị'tŝocsi' mu'in jam judío chime' in. 46Mu'ĉantyi' judío in mọ' chịj in ĉaĉaij na se'vaqui in yocsi'ĉan p̂eyacdye' p̂eyaqui in judyeya' tima'quete Jen' in. 47Chat qui yi mu' Pedro: —Jam tyi tupuj uts nọ́csi in, tupuj mu'in ji'chojtac q̂uin' in, ĉaĉaij na uts q̂uin' in aty so'mac in Jen'si' Ạ'edye' mu', yojdyem' tsun jiquej u —jéyacsi mu' Pedro. 48Chat qui jutacsi paj qui ji'chojti in Jesucristosche' tịj mu'. Mu'ĉan bä'yity in nọ́te in mu' Pedro: “Taĉan chum ra' úĉan mi paj tsan' juñucsi' mạyedye'”, jéte in.

will be added

X\