2 Timothy 4

1Yụ ra' so'meye ọij p̂eyacdye' Jen'si'ya' vej mu' judyeya' Jesucristosya' chime' mu', mu' ra' jị'cäts yụ'tacsity juchadye'ya' räj muntyi' in, säñity in judyeya' jam säñity in. Me' ra' mu' atsijbanya' ayo'bu'banya'. Mọ'dyes yụ ferche' jéye 2paj qui jam farajje' mi voro'tacsi mi Jen'si' p̂eyacdye' mu', me' ra' tsan' carij bu'yi mídyes, me' ra' tsan' jam, yejĉoij qui na ram' voro'tacsi mi. Jị'chiyacseva, chime' voro'tacseva, jụj ja'yacseva, fạra'jeĉunacseva cäjsisya' dyijyedye' mu'in, ji'ma'yacseva chime' paj qui Jen'dyes bä'yi in, tyum'chuti ram voro'tacsiyam. 3Ayijban' ra' tupudye', muntyi' ra' in aty ra' jam mạ'je' se'veban' in mọ' rụijsis p̂eyacdye', mu'in qui ram' quevacsi in yoc yoc jị'chiyacsity in, cäjsis ji'chäyitidye' tui'tyi' in, mu'in jéyacsity in mọ' mạ'jes se've' in, ĉaĉaij na ra' jam mạ'je' rụijsis p̂eyacdye' se've' in. 4Murujrutyeban' qui ra' in mọ' rụijsis p̂eyacdye' Jen'si' mu', urucyas qui ram' se'veban' in mọ' muntyis dyijyedye' jiquej in. 5Jam ra' mi me', rụij ra' dyijyim. Me' ra' tsan' ñịbe' cạviya' mi, dyichchuti qui na ram' mi. Yejĉova voro'yeva mi, ĉaĉaij na mọ' carijtacdye' mi, jị'cätseva' mọ' yụ'tacdye' so'minsi' mu' Jen'. 6Aty ra' c̣hẹi'ya' cha'she' sän'dye' yụ, ujan nash ra' yụ in, jeñej ji'co'shayacdyes Jen'dyes, me' ra' shupqui' sän'dye' yụ. 7Jeñej yirity majmaijtyi' muntyi' anic ji'ferety majmadye', me' yụ chime' Jen'dyes jiquej, jam farajje' yụ, chijäm' jị'cätse' yụ mọ' yụ'tacdye' so'minsi' yụ mu' Jen'. 8Mọ'dyes aty jä'mii'tyi' yiris bíjodye' yụ́dyes, mọ' rụij yụ'tacdye' yụ. Mu' Ayo', mu' rụij jị'cäts yụ'tacsity muntyi', mu' ra' so'min yụ bijodye' ayijya' mọ' jadyiquis tupudye'. Jam ra' yụm' yirity so'mac bijodye', mu' ra' so'macsi räj mu'in in tyi chuc fer mạ'jetety in mu'in bisva'tety räjĉan in. 9Yụ'tyeva' ferdye' mi paj qui cavin ĉushdyi' mi. 10Mu' na Demas mọjo'cha' dyijtui' jacches jedye', farajjitaquin yụ, Tesalónicaĉan qui jịjcaban mu'. Mu' na Crescente Galaciaves jac mu've jịjcaban mu', mu' na Tito Dalmaciaves jac jịjcaij mu' chime'. 11Mu'dyety yirity Lucas pen'dyetun yụ. Aty ra' atsijya' mi quevimtute ram mu' Marcos, tujtume paj mu' ñútyin yụ carijtacdye' yụ. 12A nash jutete yụ mu' Tíquico Efesoĉan. 13Chime'dye atsijya' mi tujtubuti' ra' mi fajchety quị'si' yụ chime', mu' yạjtuquity jiquej yụ Troasĉan, Carposi'ĉan aca' mu'. Chime'dye ra' tucsim quirca in, judyeya' ra' mọ'in sho'pa'ches in, dadam' ra' mọjo'cha' mọ' tui' ra' mi. 14Mu' carijtyety fiyero, Alejandro, anic ñịbe' ji'cavin yụ fáquin yụ, Ayo'dye ra' chịj, mu' ra' me'jete jun'jin chuc yụ jiquej. 15Are'ĉa mímun tyejoij ĉaĉaij na mu' anic fer fạ́que' ọij p̂eyacdye' rụijsis mọ' voro'yejas tsun. 16Tashche' jiquej ji'cavitiya' yụ ayo'ya' in, mijam tyi ñutsjityin yụ in, räj farajjitaquin yụ in. Yụ qui nam' cọdyete Jen' paj qui jam dyijtucsebi juchaj mu'in. 17Mu' qui nam' Ayo' tsun pen'dyetun yụ ji'me'tacdye'ya', mu' so'min ferdye' yụ paj qui tupuj yụ voro'tacsi Jen'si' p̂eyacdye' mu' mu'in jam judío in, mọ'dyes qui yụ räj jéyacsi Jen'si' p̂eyacdye' mu'. Mu' qui nam' Ayo' tsun ji'c̣hoñin yụ paj qui jam ujanve yụ in, mu'in jeñej bu'yi tsäqui'yity pupujri' in, me' bu'yi shupqui' mu'in in. 18Jen'dye ra' yejĉoij ñutsjityin yụ räj a'c̣hisya' jedye', chat qui ra' me'si' mu'dye ra' yu'tyin yụ mu'si'ĉandyety bä'yedye' mạyedye'che' yụ, yóche'dyem' ayo'bu'yi u. ¡Paj jam mọtsi' tima'cacdyem'! Paj me'. 19Vorjeva' mọ' Prisca judyeya' mu' Aquila judyeya' mu' Onesíforo chime', räjtumdye chätidye' mu'. 20Erasto ji'yajcatity Corintoĉan, mu' na Trófimo yạjquite yụ Miletoĉan, japacjoij mu'. 21Ferjita cavin ra' ĉushdyim jambi'dyem' ayij tupudye' tsịvu'vudyes. Uts Eubulo vorjin mi judyeya' uts Pudente, Lino judyeya' Claudia, räjtumdye mu'in anicjetety Jen' úyaty in vorjin mi chime' in. 22Yụ cọdyete mu' Jesucristo Ayo' tsun paj qui mu'dye pen'dyetun ĉojtyi'ĉan mi. Chime'dye cọdyeteij paj qui so'minac ñịbe'jitidyes räj mi'in.

will be added

X\