2 Timothy 3

1Jemoñe' jäm' chịj mi jun' chuc ra' muntyi' in bä'ban aty ayijya' jadyicves tupudye'. Me' ra' carij bä'bajsha' Jen'dyes, ĉaĉaij na ra' muntyi' in ac̣hi' ra' bä'ban in. 2Mu'in ra' ĉụi' mạ'jibun in, querec̣ha ra' mọmo' ma'jotyebajte in, judyeya' ra' fibi'naĉan in chime' ra' va'bunnaĉan in. Mu'in ra' jam dam' dyijtubajte Jen' in, ñinaquity qui ram' bä'yi in, mijam ra' chicaĉan jen' mu'in judyeya' tse' mu'in, mijam ra' yoshoropaij yi chime' in. 3Chime'dye ra' jam ñịbe' ĉọcsi yoctyi' in, där ra' a'c̣his jäm'taqui in, judyeya' ra' mistacsity in, mijam ra' dam' ĉujcabun in, chuchucsaty qui ram' in. Anic ra' räj fạ́queban' in jụ'ñis chuc jäm'si' dyijyedye' in. 4Chime'dye ra' ji'mincaĉan ĉụi'tyi' chätidye' mu'in, judyeya' ra' ĉụi'si' va'bunyedye' cạqui in, yedyej qui ra' va'bunyedye'tum bä'yi in. Mọ' qui ram' dyijtui' in ĉụi' qui ram' mạ'jiti in, uya'ya' qui ra' mạ'jebajte Jen' in. 5Me' tsan' jeñej bu'yi qui ra' anicjetety Jen' in, me' bu'yi qui ra' yu'bun in, jeñej qui itŝi' ferdye' Jen'si' mu' me' ĉọ́bite in, anic qui ra' yocve bä'ban in. Me'tyity ra' in mijam ra' jun' pen'dyetucsi mi. 6Me'tyity q̂uin' in sitacsebi aca' muntyis mu'in, va'ves ji'chäyitidye' jéyacsi mu'ĉantyi' in. Pạrej se' ja'yacsi p̂en in, jam dyijyedye'tumsi' in, ĉụi'si' juchaj mọ'in cajotaqui' in, mọ' mọmo' bächäcsi' in yịjyi a'c̣his dyijyedye' ĉụi'si' mọ'in. 7Mọ'in p̂en in, me' tsan' meijquejĉoi' ji'chäyiti' tsan' ĉúti' in, judyeya' yoc yoc ji'chäyitidye' se've' tsan' in, mijam qui nam' méqui' chị́yeban' in rụijsis p̂eyacdye' Jen'si' mu'. 8Yojdyem' mu'in cọcojsi' jiquej u in, Janesvun judyeya' Jambresvun,195 mu'in fạ́queptety in p̂eyacdye' Moiséssi'vun jiquej mu', me'dye chime' q̂uin' uts cäj jị'chiyacsity in fạ́quepte in rụijsis Jen'si' p̂eyacdye' mu'. Anic va've dyijyi in, penjan Jen'dyes in. 9Jam qui na ram' jun' yejĉoij ji'tse'e' in ji'chäyitidye' mu'in, ĉaĉaij na ra' muntyi' in cạvacsebi itŝi' dyijyedye' mu'in, yojdyem' mu'in muntyi' jiquej u in cạvacsebi in itŝi' dyijyedye' mu'insi' in Janessi' judyeya' mu' Jambressi' jiquej. 10Anic chäyibutim ji'chäyiti-dye' yụ, chime'dye chäyitim jun' chuc bä'yi yụ, Jen'dyes bä'yi yụ, judyeya' mum' dyijtute yụ, mijam farajje' anicyedye' yụ, judyeya' dyich bu'yi bä'yi yụ, judyeya' mạ'jeyacsi muntyi' yụ, me' bä'yi yụ, mijam méqui' farajjepte yụ Jen'si' dyijyedye' mu'. 11Chime'-dye chịj mi jun' chuc jiquej ñịbe' ji'cavin yụ in mu'in Antioquía-ĉantyi' in judyeya' mu'in Iconioĉantyi' in judyeya' mu'in Listraĉantyi' chime' in.196 Me' tsan' fersi' ñịbedyes jị'ĉojtye' yụ mu'inya' in, mu' qui nam' Ayo' tsun räjĉan ji'c̣hoñin yụ carijsisya'. 12Anicdye me', räj mu'in mạ'je' chiquetety Cristo Jesús in, me'tumdye ra' ñịbedyes jị'ĉojtye' in. 13Me'dye q̂uin' meij mọmo' ra' jịjcaij ac̣hi' bä'yi in, mu'indye cäjsis ra' p̂eyacdye' jị'chiyacsity in, dadam' ra' väñätucseban muntyi' in, ĉụi'si' ram' väñädye' cäc̣hä'chui' in. 14Mi qui na ram' jam me', jam ra' dam' farajje' mi ọij ji'chäyitidye' se'ves jiquej mi, yódyesdyem' anicje'si' um. Mi nash chị́yacsi anic rụijtyity in mu'in ji'chäyintyi' jiquej in. 15Ịtsucdyem' jiquej mi aty se've' mi sánacdye' Jen'si' mu', mọ' so'min dyijyedyes paj qui c̣hoñi mi anicyedye'ya' Jesucristoche' mi. 16Ọij sánacdye' Jen'si' mu' räj so'macsi Ạ'edye'ya' mu', räj mọ' ji'chäyisin' tsun judyeya' jị'chui' yu'sin' tsun judyeya' fạra'jiĉun'sin' cäjsisya' jedye', judyeya' jísin' jun' chuc ra' rụij bä'ja' tsun. Me' me' jísin' Jen'si' sánacdye' mu'. 17Me' mu' yụ'tactyi' Jen'tyi' mu' tupuj rụij carijtaqui Jen'dyes, me' ra' chat mijam ra' yiris jedye' jayej, dyijyedye'tum ra' carijtaqui Jen'dyes.

will be added

X\