2 Timothy 2

1Timoteo, mi jeñej bu'yi ĉụi'tyi' ạva' yụ, yụ jéye sóñi'yeva Jesucristostum ferdye' mu', mọ' ñịbe'jitidyes so'minsi'. 2Ji'chäyitidye' jéyes yụ jiquej muntyisya' vej mu'in, mọ'dye jị'chiyacseva jụ'ñity chuc jị'cätse'tyi' in mọ' ji'chäyitidye', tupuj qui mu'in jị'chiyacsi yoctyi' muntyi' chime' in. 3Me' ra' tsan' ñịbedyes jị'ĉojtye' mi p̂eyacdyedyes, dyichchuti qui na ra' mọmo' mi. Me' ra' mi jeñej chiquetety väc̣hä'tyity Jesucristoty mu', me' bu'yi ra' mi. 4Yirity väc̣hä'tyity chucsi jụijya' mu', jam ĉụi'si' dyijyedye' dyijtuqui, ayos mọmo' dyijyedye' dyijtupte, mu'dyes mọmo' carijtaqui, me' bu'yi mu' paj qui ayo' jama'jotyiti. 5Chime'dye mu' majmaijtyi' muntyi' jemoñe' me' mu' majmaij cäc̣hä'chui' jun' chuc mọ' majmadyes p̂eyacdye' mọ' majmadye'ĉan, jam me' jụijya' mu', jam ra' jun' mu' bíjoij, peñi ra'. 6Me'dye chime' mu' quịjoijtyi' muntyi', fer carijtaqui jụijya' mu' quịjodye'ĉan, mu' tashche' jebei' quịjodye'ĉansi' sicdye' mu'. 7Dyijtuva' jäm' ọij p̂eyacdye' q̂uin', chat qui ra' Ayo' tsun so'min dyijyedyedyes mi, me' ra' chat chicacsi mi. 8Dyijtume räjĉan mu' Jesucristo, vóshi' Davidvuntyi' mu', mu' vañinyebantyi' säñityi' jiquej, mu' p̂eijte mọ' p̂eyacdye' voro'tacsis yụ. 9P̂eyacdyedyes ñịbe' ji'cavin yụ in, mọ'dyes q̂uin' ĉä'räij yụ, jeñej bu'yi ac̣hi'yity muntyi' yụ, me' bu'yi shupqui yụ. Me' tsan' me' ĉä'räij yụ, judyeya' saptac cadenaya' yụ, Jen'si' qui nam' p̂eyacdye' mu' jam jun' ĉä'räi' mu', yejĉoi' mọ' carijtaqui'. 10Mọ'dyes yụ me' tsan' ñịbe' ji'cavin yụ in p̂eyacdyedyes, yejĉoij qui nam' yụ dyichchutidye'tum voro'tacsi mu'in tsim'tactyi' Jen'tyi' mu', paj qui mu'in chime' c̣hoñi in Jesucristoya' in, paj qui Jen'ya' bä'yi in, räjĉan pen'dyetute in mu'che' mạijquedye'ĉan mu'. 11Anic rụijsis ọij p̂eyacdye' yi': Sänja' tsun Cristotum jiquej, chimu'tumdye qui ra' bä'ja' tsun. 12Dyichchutiĉa' bä'ja' jụijya' tsun, ayo'bu'ja' ra' mu'tum. Ticameja jụijya' mu', jam ji'jäcja jụijya', me'dye ra' mu' chime' ticamisin'.194 13Me' tsan' jam chiqueja jụijya' tsun, mu' na ra' yejĉoij jị'cätsaqui ĉụi'si' p̂eyacdye' mu', mu'si' jam jun' yocve shupqui' dyijyedye' mu', yi' sánacdye'. 14Quivij jéyacsebada mu'in anicjetety Jen' in ọij ji'chäyitidye', jéyacseva Ayo'si'ya' vej mu' paj qui jam chutidyeij in urucyasya' p̂eyacdye' mu'in. Me' jụijya' in mọ' ra' jam dam' nọ́tacsi', dadam' ra' ac̣hi'tacsi' Jen'dyes in mu'in se've'tyi' in. 15Yụ'tyeva' ferdye' mi paj qui ma'jotyin mi mu' Jen' jun' chuc bä'yi mi. Jäm' carijtaca mu'dyes, rụij jị'chiyacseva rụijsis p̂eyacdye' Jen'si' mu', me' ra' jam tsị́cataqui carijtacdye' mi. 16Meijyeva fibis mọ' p̂eyacdye' mọ' mochas mu'in, mọ' shọijtacdye' mọmo' jam jedyedyes, mọ' ji'yacchuyacsis Jen'ya' mu'in se've'tyi' in, dadam' qui ac̣hi' bä'ban in. 17Mọ' nash p̂eyacdye' mu'in dai' ac̣hi'tacsi' muntyi' in, jeñej bu'yi' yäm'dyis japacjodye', ac̣hi'tacsi' mu'in se've'tyi' in, me' bu'yi' shupqui' mọ'. Jo'mes p̂eyacdye' jị'chiyacsi in mu' Himeneo judyeya' mu' Fileto, 18mu'in aty va've jịjcaij in, farajje' in mọ' rụijsis p̂eyacdye'. Cäj qui jị'chiyacsi in, yi in: “A nash tsạ'ebajsha' ạ'edye'ĉan tsun, aty ra' jam vañinyeban' a' tsun sänja'ya'”, yi in. Pạrej se'vacsebi p̂eyacdye' mu'in mọ'dyes qui anicjeyacsebi in ọij va'ves p̂eyacdye' mu'in. 19Mu' Jen' yụ'tye' jeñej bu'yi' yiris jäm'chuquis anicjetetydyes in, mu'che' bu'yi in aty jam yäcänyi in mijam yocve dyijyeban in. Mọ' jäm'chuquis me'chui' cachtacdye' p̂eyacdye', mọ' yi': “Mu' Ayo' tsun anic jäm' chị́yaqui ĉụi'tyi' muntyi' mu'”, judyeya' yi' chime': “Tyi chuc cạpte in Jesucristos tịj mu' jemoñe' räj farajjeyaqui a'c̣his dyijyedye' mu'in”, yi' p̂eyacdye'. 20Därsi'ĉan aca' mọ'ya' yịjyi jedye' yu'tidyes in. Pạrej oro jäm'tye' in judyeya' plata in, chime' mọ'ĉan son jäm'tye' in, judyeya' pirij chime'. Pạrej mọ'ĉan jäjämunsi' yụ'taquis jäm'si' jedye' in. Yocsi' na jam me' in, pạrej a'c̣hisdyes mọ'in in. 21Me'dye tsun chime', farajjeja' jụijya' räj a'c̣his dyijyedye' tsun, yojdyem' jäm'si' yụ'tidyes o anic jäm' c̣hicon'tacsi', me' bu'ja' ra' shupqueja' tsun. Me' ra' chat Ayodyes shupqueja' tupuj tsun úñeja' mu'dyes, jụ'ñis ĉụi' mọmo' carijtacdye' so'misin' jụijya'. 22Ĉa'joyeva' a'c̣his dyijyedye' nanamuntyis in. Ferdye' yụ'taca paj qui rụij bä'yi mi, paj qui yejĉoij cäc̣hä'chute Jen' mi, judyeya' paj qui yoctyi' mạ'jeyacsi mi, judyeya' paj qui räjtum jäm'jiti bä'yi mi mu'intum in rụijtyitytum ĉojtyi' cäc̣hä'chutety Ayo' in. 23Jam qui na ram' cäc̣hä'chucsebim mọ' fibis p̂eyacdye' chutidyes muntyis mu'in, mọ' nash jam dyijyedye'-tumsi' p̂eyacdye', jị'fajcacsis mọmo' muntyi' shupqui'. 24Jesha' mu' yirity úñity jụijya' Ayoty tsun jam jemoñe' chuti yoctyi'tum. Dam'dye jäm', jäm'yedye' jị'caveyacsi räjtumdye mu'in in. Jemoñe' rụij chịj jị'chiyacsi p̂eyacdye' in judyeya' ra' dyichyedye'tum chime' jị'chiyacsi, paj me' me' bä'yi yụ'tactyi' Ayo'tyi' in. 25Chime'dye jemoñe' jäjäm'tum vortacsi mi'in mu'in fạ́quety ji'chäyitidye' in, vatyquej ra' mu' Jen' so'macsi dyijyedye' paj qui dyijyeban juchajche' in paj qui jụjjeban' in rụijsis p̂eyacdye' Jen'si' mu', 26paj qui tsạ'i ĉojtyi'ĉan in, judyeya' paj qui shupqui in Sọyosĉantyi' jibej in, ĉaĉaij na mọ' Sọyo' tạ'bai' jiquej judyeya' bächäcsi' jun' chuc mạ'je' mu', me' bu'yi' dyijyedye' yụ'tyeyacsi.

will be added

X\