2 Timothy 1

1Yụ Pablo jutactyi' Jesucristoty mu', mu' Jen' ĉụi'si'ya' dyijyedye' mu' me' yu'tyin jiquej yụ paj qui me' voro'tacsi yụ muntyi' in judyeya' jéyacsi yụ jun' chuc ra' Jen'ya' bä'yi in mu'in Jesucristoty in, ĉaĉaij na me' yi' Jen'si' p̂eyacdye' mu'. 2Mídyes sáñe' yụ ọij p̂eyacdye' Timoteo,193a mi jeñej bu'yi mạ'jeyacdyety ạva' yụ. Yụ cọdyete Jen' mu' Ạvatusin'tyi' tsun judyeya' mu' Cristo Jesús Ayo' tsun, paj qui mu' ñịbe'jitidyes so'min mi, paj qui ñịbe' ĉun mi judyeya' paj qui chime' so'min ma'jodye' ĉojtyi'ĉandyes mi. 3Räjĉan cọdaqui Jen'che' yụ mídyes, mạij judyeya' tsedyedye', judyeya' jäm'tyi'tum ĉojtyi' yụ carijtaqui yụ Jen'dyes, yojdyem' vóshi'vun jiquej u yụ in. Cọdaqui Jen'che' jụijya' yụ, mídyesmun yoshoropaij jéte Jen' yụ. 4Yụ dyijtubadyeye jun' chuc mi táristum vorjitactim jiquej, mọ'dyes anic fer mạ'je' cạvebadyeye paj qui ma'jobanve yụ. 5Chime'dye fer dyijtuye jun' chuc mi rụij anicyi Jen'che', yojdyem' jäye' um Loida, tashche' anicyi', judyeya' tse' chime' mi Eunice. Me'dye mi chime' chị́yeye anicyi mi Jen'che'. 6Mọ'dyes yụ jéye, ji'fercaca ĉụi'si' ĉojtyi'ĉansi' ferdye' mi, mọ' carijtacdyedyes so'minsi' mi mu' Jen', yoqui'dyem' yụ toco'jeyeya' mi jiquej u unya' yụ. 7Jesha', mu' Jen' jam yu'sin' paj qui quijnacdye'tum bä'ja' tsun. Mu' so'misin' paj qui ferdye'tum bä'ja' tsun, judyeya' paj qui mạ'jeyac-sejaty bä'ja' chime' judyeya' jäm' ĉujcatiĉa' chime' tsun, me' me' yu'sin'. 8Jam ra' tsị́cadye'tum ji'jäctem Ayo' tsun, mijam ra' tsị́cadye'tum ji'jicdyi' yụ mi. Me' tsan' ĉä'räij yụ Ayodyes tsun, jam ra' mọ' tsícatyibutim. Yejĉova carijtaca Jen'dyes, me' ra' tsan' mímun chime' ñịbe' cạve' voro'yedye'yam, jam qui na ram' farajje' mi. Mu' qui ra' Jen' so'min ferdye' mi tupuj qui dyichchuti mi. 9Mu' nash ji'c̣honsin' tsun judyeya' fayisin' tsun paj qui yu'sin' mu'dyety tsun. Mu' ji'c̣honsin' tsun, jam qui nam' ĉụi'si'ya' jäm'yedye' tsun, jun' chuc jäm' bä'ja', mu' ji'c̣honsin' ñịbe'jitidyesya' mu' ĉaĉaij na mọ' mạ'je' mu' ĉụi'si'ya' dyijyedye' mu'. Jambi'dyem' jäm'se ọij jac jiquej, mu' Jen' aty tạ'caty dyijyi jun' chuc ra' ñịbe'jisin' Jesucristoya'. 10̣Q̂uin' chat aty ji'caviyisin' ñịbe'jitidyes mu', yoqui'dyem' atsijya' mu' Cristo Jesús jiquej u, mu' Ji'c̣honsin'tyi' tsun. Mu' ji'peñe' mọ' sän'dye' paj qui aty jam mọ' me'taqui', judyeya' chime' mu' ji'caviyisin' jun' chuc tupuj räjĉan Jen'ya' bä'ja' tsun, aty ra' jam quivij sänjajsha'. Jäm'si' p̂eyacdye' mu' mọ' jísin' tsun. 11Mu'dye Jen' yu'tyin yụ paj qui jutactyi' yụ judyeya' jutin yụ paj qui yụ voro'tacsi ọij jäm'si' p̂eyacdye' mu', paj qui yụ jị'chiyacsi muntyi' in. 12Mọ'dyes yụ ñịbe' ji'cavin yụ in mu'sidyes p̂eyacdyedyes mu'. Me' tsan' me' cạve' yụ, jam qui nam' otejjiti yụ, ĉaĉaij na yụ chị́yete mu' Jesucristo, mu'che' ĉúti yụ. Chị́yete yụ mu' nash ferdye'-tumtyi', mu' tupuj ñutsje' mọ' p̂eyacdye' so'minsi' yụ, mọ' ra' jam tätsi' yejĉoi' ra' jun' qui' chuc ayij jadyiquis tupudye'. 13Jäm' ra' cäc̣hä'chui' mi ọij rụijsis p̂eyacdye', jam ra' cäj jị'chiyacsi mi mọ' ji'chäyitidye' jị'chiyeyes yụ. Jam ra' farajje' anicyedye' mi, yejĉova mạ'jeyacseva chime', me' yu'sin' tsun ĉaĉaij na Jesucristoty tsun. 14Nọ́tacdye'ya' ra' Jen'si' Ạ'edye' mu', mọ' ĉojtyi'ĉan bä'yis tsun, mọ' jäm' ĉọjcava' mọjo'chas jäm'si' p̂eyacdye' so'minsi' Jen', mọ' jeñej bu'yi' yiris ya'i'si' jedye'. Mu'si'ya' ferdye' ĉọjcava' paj jam yocve shupqui'. 15Chịj mi jun' chuc mu'in anicjetety Jen' in Asiaĉan bä'yity in, räj mu'in yacchun yụ in, aty jam cạ̈nä'ñibun yụ in. Me'dye mu' chime' Figelo judyeya' Hermógenes aty yacchun yụ in, aty jam pen'dyetun yụ in. 16Mu' na Onesíforo jam mu' me', pucmun jiĉun yu'tyin yụ. Me' tsan' ĉä'räij yụ, mu' qui nam' jam dam' tsị́catyin yụ. Mọ'dyes yụ cọdyete Ayo' tsun mu'dyes, judyeya' mu'si'yaty aca' in, paj qui mu' Jen' ñịbe' jaĉuti. 17Venchuij úĉan Romaĉan jiquej, mu' quivva'quin yụ jun' qui' chuc daquin yụ. 18Yụ cọdyete Ayo' tsun paj qui mu' ñịbe' ĉọ́te, aty ayijya' mọ' tupudye' aty mu' jị'cäts yụ'tacsiya' juchadye'ya' muntyis in. Chịj tyu' um jun'tum qui' mu' Onesíforo ñútyin yụ jiquej Efesoĉandyem' bä'yiya' jiquej yụ.

will be added

X\