2 Thessalonians 3

1Vojity yụ q̂uin' jéyac: cọdyemac Jen' tsundyes paj qui mọ' tse'ejĉoi' Jen'si' p̂eyacdye' mu', paj qui pai' tiĉun'bite muntyi' in yojdyem' mi'in jiquej u tiĉun'bitinte. 2Chime'dye cọdyemac Jen' paj qui mu' ñutsjityin tsun mu'inya' ac̣hi'yityya' muntyi' in, ĉaĉaij na jam räj muntyi' in anicjetety Ayo' in. 3Ayo' tsun anic jị'cätsaquity p̂eyacdye', mu' ra' so'minac ferdye' judyeya' ra' ñutsjityinac Sọyo'. 4Tsun anic chị́yete Ayo', mu' nash ñútyinactyi' paj qui yejĉoij mi'in chäquibutiĉa' mi'in tsunsi' p̂eyacdye' so'meyacsi' jiquej. 5Yụ cọdyete mu' Ayo' paj qui ñútyinac paj qui mạ'jitidyes-tum bä'yi mi'in, yódyem' mu' Jen' ma'jisin' u, me'dye ra' mi'in chime' mạ'jeyacsi. Chime'dye cọdyete yụ paj qui dyichyedye'-tum bä'yi mi'in, yódyem' mu' Cristo dyich bu'yi u, me'dye ra' mi'in chime' dyich bu'yi bä'yi. 6Vojity, Jesucristosche' tịj mu' Ayos tsun, tsun jéyac paj qui mi'in jam pen'dyetucsi mu'in vojity in to'omuntyi' in, mu'in jam dam' mạ'je' carijtaquity in, mijam chäquibuntyi' in mọ' ji'chäyitidye' tsun, mọ' so'meyacsi' jiquej tsun, jam ra' pen'dyetucsi mi'in mu'in me'tyity in. 7Mi'in chịj jun' chuc tupuj bä'yi mi'in, jemoñe' cäc̣hä'chubutiĉa' tsunsi' dyijyedye' mi'in, yojdyem' tsun bä'yi jiquej u, me'dye ra' mi'in chime'. Tsun jam to'oj bä'yi mi'intum jiquej, 8mijam fibi'ya' säcsi tsun, ya'ij tsun mọ' tsạ' bu'yedyes. Fer carijtaqui tsun mạij judyeya' tsedyedye' paj qui jam cọdyetyeyac mọ' tsạ' bu'yedyedyes tsun.188 9Me' jiquej tsun, tupuj tsan' tsun cọdyetyeyac tsạ' bu'yedyes tsun, ĉaĉaij na me' yụ'tac tsun Jen'ya', jam qui nam' cọdyetyeyac. Me' bu'yi carijtaqui tsun tsạ' bu'yedyes tsun, paj qui mi'in chime' cäc̣hä'chubutiĉa' dyijyedye' tsunsi' mi'in, paj qui me' bä'yi mi'in. 10Mi'intumdyem' jiquej tsun, tsun baja' jéyac: “Tyi chuc jam mạ'je' carijtaquity in paj jam säcsi chime' in”, jéyac jiquej tsun. 11̣Q̂uin' na se'vaqui tsun pạrej ca mu'ya' in mi'inĉantyi' in to'omuntyi' in, ĉụi' ca mọmo' bä'yi in, mijam ca mạ'je' carij-taqui in, me' cam' mạ'je' in ji'c̣ham'dyi mi'inĉan in. 12Jesucristosche' tịj mu' Ayos tsun, tsun ferche' jéyacsi mu'in me'tyity in paj qui jam me' bä'yi in, jemoñe' jäm' bä'yi in paj jäm' carijtaqui in tsạ' bu'yedyedyes mu'in. 13Vojity, jam ra' shọijtiñe' mi'in rụij bu'yedye'. 14Mu'ya' jụijya' mi'inĉantyi' in jam mạ'je' chiquety p̂eyacdye' tsunsi' in, jam ra' pen'dyetucsi mi'in paj qui tsị́caijve in. 15Jam qui na ram' fạ́cacsi mi'in mu'in me'tyity in, me' ram' fạra'jeyacsi mọmo' mi'in jäm'si'tum p̂eyacdye', jeñej ĉụi'tyi' vojity mi'in. 16Yụ cọdyete Ayo' tsun, mu' so'misin'tyi' ma'jodye' ĉojtyi'ĉan-dyes tsun, paj qui mu' räjĉan so'minac ma'jodye' ĉojtyi'ĉandyes mi'in, me' tsan' ñịbedyes jị'ĉojtiñe' jụijya' mi'in, me' tsan' jam. Paj mu' Jesucristo Ayo' tsun pen'dyetunac räj mi'in. 17Yụ Pablo ọij q̂uin' voryetacdye' sáñe' yụ ĉụi'si'ya' un yụ. Me' yiqui sánaqui yụ ĉụi'si' voryetacdye' yụ räj sánacdye'che' yụ. 18Yụ cọdyete Jen' paj qui mu' Jesucristo Ayo' tsun so'minac ñịbe'jitidyes mu' räj mi'in.

will be added

X\