2 Thessalonians 2

1Vojity, q̂uin' ra' tsun jéyac mi'in jun' chuc ra' ayidye' Jesucristos mu' Ayo' tsun, jun' chuc ra' vajmu'ya'jisin' tsun mu'si'ya' vej mu'. Vojity, tsun jä'mij jéyac mi'in, 2jam ra' cavin yocve dyijyi mi'in. Me' ra' tsan' se'vetiñe' mọ' p̂eyacdye' mi'in yi'si': “Aty ayij jadyiquis tupudye' Ayo'si' mu', yi mu' Pablo, jedac mu' jaso'miti p̂eyacdye' Jen', are' vatyquej sánacdye'che' yi mu',” vatyquej ra' yi pạrej jụijya' in. Se'vetiñe' jụijya' mọ' jo'mes p̂eyacdye', jam ra' cajotyiti mi'in, 3mijam ra' anicjeyacsebi väñädye' mi'in, ĉaĉaij na jambi' ra' mọ' ayij jadyiquis tupudye' Ayo'si' mu', mọ' chum ra' tashi' ayij mọ' yacchutidye' Jen'che' muntyi' in, ji'caviti ra' mu' fạ́quetety Jen' mu' tsäqui'sisĉandyety, jäqui've ra' mọ' ayij tupudye'. 4Mu' ra' räj fạ́cacsebi jen'tui'si' jedye' muntyi' in, Jen'mun ra' chime' fạ́quete. Mu' ra' mạ'je' paj qui mum' tima'cac, judyeya' ra' cächyi Jen'si'ĉan aca' bä'yi, “Yụ nash anictyity Jen'”, yi ra' mu' jéyacsi. 5Me'dye jéyac yụ taca'dyem' mi'intum jiquej yụ. ¿Jam dyijyeban u mi'in? 6Chime'dye mi'in aty chịj tyi chuc ñutschute mu' fạ́quetety Jen' jambi' chum ra' shupqui mu' ĉaĉaij na jambi'dyem' ayijya' tupudye' mu', aty jäqui've chat q̂uin'dyem' ra' ji'caviti mu'. 7Me' tsan' jambi' ji'caviti q̂uin' mu', mọ' qui nam' a'c̣his dyijyedye' mu', aty mọ' caminve tashi' carijtaqui' mu' ọ́che' jacchem'. A na ra' ayijya' tupudye' mu', Jen' ra' meijje' mọ' jañutschutis mu' fạ́quetety Jen', 8chat qui ra' ji'cavibun mu'. A na ra' atsijbanya' mu' Jesús Ayo' tsun, mu' ra' ja'ijati p̂ujquedye'-yam', mọ'ya' ra' me'jajiti atsij-banya' mu' Ayo' tsun mạijque-dye'tum mu'. 9Jambi'dyem' ijacya' mu' fạ́quetety Jen', mu' ra' me'chupte Satanássi' ferdye', yoc yoc ra' jị'caveyacsi ferdye' muntyi' in paj qui jo'mesya' se' ja'yacsi muntyi' in paj qui anicjepte in väñädye' mu'.187 10Yedyej ra' a'c̣his jị'cave-yacsi, me' bu'yi ra' väñätucsi muntyi' in tsäqui'sisĉandyety in. Mu'in ra' va'cac in ĉaĉaij na me' tsan' se've' tsan' jiquej in mọ' rụijsis p̂eyacdye', jam qui nam' tiĉuñe' in mijam anicje' in, meij mọmo' fạ́que' jiquej in, mọ'dyes qui ra' jam jun' c̣hoñi in. 11Mu'dye ra' Jen' yụ'tyeyacsi cäjsis dyijye-dyedyes mu'in, paj qui dam'dye anicjejcacai' väñädye' in. 12Me' bu'yi ra' räj in, mu'in jam mạ'je' anicjety in rụijsis p̂eyacdye', mọ' mọmo' ma'jotyety in a'c̣his juchaj, mu'in ra' tsäqui'sis-ĉandyety in. 13Vojity, mạ'jeyacdyety Ayoty tsun, tsun yoshoropaij jéte Jen' räjĉan mi'indyes, ĉaĉaij na tạ'caty jiquej mu' Jen' tsim'tyinac paj qui mi'in c̣hon'dyety. Ĉụi'si'ya' Ạ'edye' mu' yu'nac paj qui mu'tyi' mi'in, anicyedye'ya' mi'in rụijsisya' p̂eyacdye' Jen'si' mu'. 14Me' mu' fayinac mi'in paj qui me' yụ'tac mi'in, yoqui'dyem' se'vebitinteya' jiquej u Jen'si' p̂eyacdye' mu', mọ' voro'tyeyacsi' tsun jiquej. Me' mu' yu'nac paj qui Jen'yadyety mi'in mạijquedye'ĉan bä'yi mi'in Jesucristos, Ayos tsun. 15Mọ'dyes vojity, fer bu'jam' bä'jam', jäm' ra' cäc̣hä'chutiñe' mi'in mọ' ji'chäyitidye' jéyacsi' tsun jiquej, mọ' voro'yedye'ĉansi' tsun judyeya' sánacdye'ches tsun chime'. 16Yụ cọdaqui Jesucristoche' Ayo' tsun judyeya' Jen'che' chime', mu' Ạvatusin'tyi', mu' mạ'jisin'tyi' tsun, judyeya' ñịbe'jitidyesya' mu' so'misin' sóñi'yedyes ĉojtyi'ĉan tsun, paj qui yejĉoja' bisaĉa' Jen'dyes tsun, jun' chuc ra' so'misin' mu'. 17Me' cọdyete yụ paj qui räjĉan so'minac sóñi'yedye' ĉojtyi'-ĉandyes mi'in, paj qui fer bu'yi bä'yi mi'in, me' ra' yejĉoij rụij bä'yi mi'in judyeya' rụij p̂eyaqui chime' mi'in.

will be added

X\