2 Thessalonians 1

1- 2Yụ Pablo, yiri'ya' mu'intum yụ Silvano judyeya' Timoteo, yụ sáñe' mi'indyes Tesalónicaĉan bä'yity mi'in anicjetintety Jen' mi'in.186 Mi'in aty Jesucristoty mi'in mu' Ayo' tsun, judyeya' Jen'tyi' chime' mi'in, mu' Ạvatusin'tyi' tsun. Tsun cọdyete mu' Jen' paj qui mu' so'minac ñịbe'jitidyes mi'in, judyeya' paj qui chime' mu' so'minac ma'jodye' ĉojtyi'ĉandyes mi'in. 3Vojity, räjĉan jemoñe' tsun yoshoropaij jéte Jen' mi'indyes. Tupuj me' tsun ĉaĉaij na mi'in dadam' muju'cha' yejĉoij anicjetinte Jen' mi'in judyeya' dadam' vaj meij yejĉoij mạ'jiti-dyeij chime' mi'in. 4Mọ'dyes tsun tima'queyac mi'in, jéyacsi tsun mu'in anicjetety Jen' in pai' bä'yity in jun' chuc mi'in yejĉoij anicjetinte Jen'. Me' tsan' där jị'ñibe'cac mi'in, judyeya' me' tsan' där ñịbedyes jị'ĉojtiñe' mi'in, yejĉoij qui nam' dyichchuti mi'in Jen'dyes, chime'dye yejĉoij anicyi mi'in. 5Mọ' ji'ĉuyisin' tsun jun' chuc mu' Jen' anic rụij dyijyity, rụijsisya' dyijyedye' mu' aty yu'nac Jen'yadyety mi'in ayo'bu'yedye'ĉan mu', ĉaĉaij na me' tsan' chäcdyis ñịbedyes jị'ĉojtiñe' mi'in p̂eyacdyedyes, yejĉoij qui nam' anicjetinte Jen', mijam dam' farajjetiñe' anicyedye'. 6Anic rụijtyity mu' Jen', mu' ra' so'macsi va'tacdye' tyi chuc jị'ñibe'canactyi' in, 7pacaj ra' mi'in yiri'ya' tsuntum chime', jun'si' chuc atsijbanya' mu' mạyedye'chety Ayo' tsun Jesús, tuqui ra' ferdye'tumtyi' anjer mu', yenamyistum ra' tŝij chạij mu'. 8Mu' ra' va'tyeyeyacsi jụ'ñity chuc va'quectety Jen' in, mu'in jam chiquety in jäm'si' p̂eyacdye' p̂eijtes mu' Jesús Ayo' tsun. 9Mu'in ra' va'cac tsäqui'sisĉan in, mijam ra' jụ'ñisĉan mạyedye' shupĉan mu'ĉantyi' in, anic ra' moch bu'yi Ayo'ya' in, mijam ra' jun' cạvete in mu' muju'chaty Ayo' ferdye'tumtyi', mijam ra' chime' cạvepte in mạijquedye' mu'. 10Me' ra' mọ' jiyi' jun'si' chuc atsijbanya' mu' jadyiquisĉan tupudye'. Ĉụi'tyi' ra' muntyi' mu' räj tima'quete in, jäm'jete ra' in mu'in anicjetety in. Mi'inmun ra' chime' ma'jotyetinte ĉaĉaij na anicjebitinte mi'in Jen'si' p̂eyacdye' mu', mọ' so'meyacsi' tsun jiquej. 11Mọ'dyes tsun yejĉoij cọdyete Jen' mi'indyes. Tsun cọdyete Jen' paj qui mu' ñútyinac mi'in paj qui jam fibi' shupqui mi'in Jen'si'ya' vej mu', mu' fayinactyi' mi'in. Chime'dye tsun cọdyete Jen' paj qui ĉụi'si'ya' ferdye' mu' ñútyinac paj qui mi'in tupuj jị'cätsetiñe' mi'in mọ' jäm'si' dyijyedye' mi'in, jun' chuc ra' rụij bä'yi mi'in judyeya' carijtaqui Jen'dyes mi'in anicyedye'ya' mi'in. 12Me' jụijya' mi'in, yoctyi' qui ra' muntyi' chime' in mi'indyes ra' tima'quete Jesús in Ayo' tsun. Mu' ra' chime' tima'quinac mi'in, me' ra' mu' Jen' so'minac ñịbe'jitidyes mu' judyeya' Jesucristos Ayo' tsun.

will be added

X\