2 Peter 2

1Urucya' jiquej pạrej mu'ya' in Israeltyi' vóshi' in väñädye'ya' p̂eyaqui jiquej in, jeñej bu'yi jaso'mitity p̂eyacdye' Jen' in, me' bu'yi yu'ti in. Me'dye ra' q̂uin' chime' mi'inya' in pạrej ra' mu'ya' väñädye'ya' p̂eyaquity in. Mọ' ji'chäyitidye' mu'in väñädye' ra' mọmo' ji'se'veyacsi in, jo'mesya' ra' ji'ac̣hi'tacsi in mu'in se'vacsebity p̂eyacdye' mu'in. Mu'indye ra' va'quecte Jesucristo in, Ayo' tsun, mu' ya'itacsebity c̣hon'dye' mu'in. Mọ' ra' ji'me'tacsi' va'tacdye'ya' mu'in, vatyquej ra' mọmo' tŝọ́tacsi'. 2Dai' ra' anicjetety Jen' in jịjcatacsebiban in a'c̣his dyijyedye' mu'in, judyeya' ra' mu'in jorojyaty in cạvacsebi ra' a'c̣his dyijyedye' mu'in, mọ'dyes qui ra' ñiñepte in rụijsis p̂eyacdye' Jen'si' mu'. 3Mu'in väñädye'ya' jị'chiyacsity in querec̣havedye'ya' ra' mọmo' ji'chäyinac in cäjsisya' dyijyedye' mu'in. Jen' aty dyijyi va'tacdye' ra' so'macsi mu'in me'tyity in, mu'in ra' jam jun' c̣honchuc in, ĉaĉaij na tạ'caty aty yụ'tac in tsäqui'sisĉandyety in. 4Jen' jiquej jam jun' c̣honchucsi mu'in juchaijtyi' anjer jiquej in, va'cacsequi tŝijĉan in, mu'ĉan taĉan c̣họ'coij tojmadye'ĉan in, jun' qui' chuc ra' ayijya' tupudye' aty ra' Jen' jị'cäts yụ'tacsiya' juchadye'ya' muntyi' in. 5Me'dye chime' mu' jam c̣honchucsi mu'in ac̣hi'yity muntyi' jiquej in mu' tas ji'tomacsi bänedye'ya' jiquej. Me'dye Noé yirity mọmo' ji'c̣honte judyeya' chime' räjtumdye ạva' mu', yävätidye' rụi'cu' in, mu'in mọmo' ji'c̣honacsi. Mu' Noé voro'tacsity tsan' rụijsis p̂eyacdye', jun' chuc ra' rụij bä'yi in. 6Chime'dye mu' Jen' so'macsi va'tacdye' jiquej mu'in Sodomaĉantyi' in judyeya' Gomorraĉantyi' in, bä'yedye'-tumdye p̂udaij co'shaij in.227 Mọ' dyijtucdyes shupqui' muntyidyes in, paj qui jam me' a'c̣his bä'yi in. 7Me'dye yirity mọmo' ji'c̣honte Lot, mum' yirity rụijtyity muntyi', mu' cạvacsebity a'c̣his dyijyedye' mu'in, vo'vodye'ya' jiquej mu'in, jo'mesya' ji'yoquete in. 8Mu' rụijtyity Lot räj mạyedye' jịjcaij cạvacsebi a'c̣his dyijyedye' mu'in, mu'in jajbu'yetety in, judyeya' se'vacsebi a'c̣his p̂eyacdye' mu'in chime'. Mọ' mu' fer jaji'tariti ĉojtyi'ĉan mu' Lot. 9Anicdye me', mu' Ayo' tupuj ji'c̣honacsi ñịbedyesya' mu'in cäc̣hä'chuptety Jen'si' dyijyedye' jụijya' in, mu'in na ac̣hi'yity in mu' tupuj yụ'tacsi va'tacdye'ĉandyety in, mu'in ra' yejĉoij ĉär'tac in jun' qui' chuc ra' ayij tupudye' aty ra' Jen' jị'cäts yụ'tacsi juchadye'ya' muntyi' in. 10Dadam' mu'in a'c̣his dyijyedye' a'si' cạquity in judyeya' äcäijjetety Ayo' in judyeya' jam chiquetety in, mu'in me'tyity in mu'in ra' muju'cha' cại' va'tacdye' in. Me' bu'yi ra' mu'in väñädye' jị'chiyacsity in, mu'in me'me'yity in judyeya' tyucjety chun in, mijam ạ̈räjjeyacsi mu'in fer bu'yity che'vety in, meij mọmo' ñinacsi in. 11Mu'in na anjer in jam me' in, mu'in muju'cha' fer bu'yi in, jam jeñej muntyi' in, me' tsan' me', mu'in qui nam' jam ñinacsi in mu'in fer bu'yity che've bä'yity in, Jen'si'ya' vej mu' jam jun' ñinacsi in. 12Mu'in na väñädye' jị'chiyacsity in mu'in jeñej jebacdye' in, me' in, anic jayej dyijyedye' mu'in, jeñej jebacdye' me' dyijyi in. Mọ' jebacdye' na'i' paj qui jibejĉan tŝọi've judyeya' ujai' in, me' bu'yidye chime' mu'in me'tyity q̂uin' in. Jụ'ñis chuc jam chique'si' in jedye' chuc cại' mọ', mọ' ñiñe' mọmo' in, yódyem' jebacdye' o, me' ra' ijac in, 13me'dye ra' va'tacdye' cại' in. Jun' chuc ñịbe' jị'cavacsaque in, me'dye ra' mu'in chime' ñịbe' jị'cavac in. Mom' dyijtui' in ĉụi' ma'jotyiti in a'c̣hisya' dyijyedye' a'si' mu'in, itŝi' tsị́cadye' mu'in, me' tsan' mạij, där a'c̣his jäm'taqui in. Anic där tsịca' shupqui mi'inya', me' tsan' a'c̣his bä'yi in, uts na me' väñädye'ya' ji'c̣ham'dyi mi'inya' in judyeya' pen'dyetunac in jäm'dyeya' Jen'dyes säcsi mi'in, mu'in chime' jibityinac in, mọ' ma'jotye' in. 14Jam mem' cạve' in yiris p̂en, aty cạve'ya' in mạ'je' q̂uin'dyem' me'tye' in, mijam no'bi juchajĉan in, jam mạ'je' farajje' juchaj mu'in. Chime'dye se' ja'yacsi in a'c̣hisya' dyijyedye' mu'in jambi' fer bu'yity Jen'dyes bä'yity in, jeñej jibej me' jịva'chacsi in. Anic fer mạ'jete querec̣ha in, mu' mọmo' dyijtute in. Mu'in me'tyity in tsäqui'sisĉandyety yụ'tac in. 15Farajje' in mọ' rụijsis majmi, mon'dye'ĉan bä'ban in, cäc̣hä'chubibajte dyijyedye' in mu'si' Balaamsi' jiquej, Beortyi' ạva' mu'. Dyijyi querec̣have-dye'ya' a'c̣hisya' carijtacdye' mu', 16mọ'dyes qui mu' fạra'jeyac juchadye'ya' jiquej mu', ĉụi'tyi'-dye bórico mu' fạra'jajiĉun'dyi, jeñej muntyi' me' p̂eyaqui mu' jebacdye' yédye'ĉandye, jaji'dyäquibiti shapudye' mu'. 17Mu'in q̂uin' väñädye' jị'chiyacsity in jeñej bu'yi noria itŝis ojñi' in, chime'dye jeñej bu'yi dyicba'badye' in, jeñej itŝis añej, va'queques tyi'mu, me' bu'yi fibi' bä'yi in va'cac ra' in. Mu'in tsäqui'sisĉandyety in, Jen' ra' va'cacsequi mọjo'chasĉan tojmas. 18Fibi'nacdye'tum p̂eyaqui in ani' ani'yi in, itŝi' je' dyijyedye' p̂eyaqui in. Mu'in cäj jị'chiyacsi mu'in in q̂uin'dyem' c̣hoñity in mu'inya' in cäjsis dyijyedye' cại'tyi' jiquej in, jéyacsi in jun' chuc a'c̣his mạ'je' a' mu'in, me' tupuj bä'yi in, me' a'c̣hisya' dyijyedye' se' ja'yacsi in, quivij ji'ca'nacseban caman' in ji'penacseban in. 19Väñädye'ya' jéyacsi in, yi in: “Cäc̣hä'chutiñe' jụijya' mi'in ọij ji'chäyitidye' tsun, mọ'ya' ra' c̣hoñi mi'in carijsisya' ji'chäyitidye'”, yi in. Me' tsan' me' yi in, mu'indye qui nam' me' úñedye'ĉan bä'yi in, ĉaĉaij na mọ' a'c̣his dyijyedye' mu'in, mọ' mọmo' bächäcsebi' a' mu'in. Jesha' yirity muntyi' jedye' chuc jabächäti, mọ'dyem' ja'ayotuti, úñity shupquim'. 20Tyi chuc chị́yetety in mu' Ayo' tsun Jesucristo, Ji'c̣honsin'tyi' tsun, c̣hoñi jụijya' in mọ'ya' ac̣hi'tacsisya' dyijyedye' jacches, quivij qui nam' caman' dyijyeban jụijya' in, mọ'dyem' bächäcseban', me' caman' jụijya' in, dadam' qui ra' muju'cha' ñịbe' cạve' in jam jeñej jiquej jambi'dyem' chị́yete jiquej in. 21Dadam' ra' va'tacdye' so'mac in mu'in chị́yety tsan' in mọ' rụijsis p̂eyacdye' Jen'si' mu' judyeya' va'quequety in. Dam'dye jäm' jam se'vepte in Jen'si' p̂eyacdye' in mọ' so'macsis jiquej in. 22Mu'in me'tyity in mu'in jị'cätse' in mọ' rụijsis p̂eyacdye' yi': “Jeñej yiris ac̣huj chại' chum judyeya' quivij jebaĉan' chash mọ'”, yocsi' chime' yi': “Jeñej yiris cochij, me' tsan' ji'dyuc jäm'si'ĉan ojñi', me' tsan' me' quivij qui nam' bọjca'ĉan jịjcaban' rätsä'ñibun'”, me' bu'yi mu'in shupqui in farajje'tyi' Jen'dyes in.

will be added

X\