2 John 1

1Yụ nash ĉọjcacsity anicjetety Jen' in, yụ vorjeyac mi'in anicjetintety Jen' mi'in vajmu'yaijtyi' yiri'ya' mi'in, tsim'tactyi' Jen'tyi' mi'in. Yụ rụij mạ'jeyac mi'in, jam yụm' mạ'jeyac, tyi chuc chị́yety in mọ' rụijsis p̂eyacdye' Jen'si' mu', räj mu'in mạ'jinac chime' in. 2Yụ me' mạ'jeyac mi'in ĉaĉaij na vaj me' me'chuja' ĉojtyi'ĉan tsun mọ' rụijsis p̂eyacdye' Jen'si' mu', mọ' ra' yejĉoi' tsuntum. 3Yụ cọdyete Jen' mu' Ạvatusin'tyi' tsun judyeya' mu' Jesucristo, Jen'tyi' Ạva' mu' paj qui so'minac ñịbe'jitidyes mu' judyeya' paj qui ñịbe' ĉúnac, paj qui so'minac ma'jodye' ĉojtyi'ĉandyes mi'in. Mu' ra' me' so'minac dyijyedye' paj qui me' mạ'jeyacsity bä'yi mi'in judyeya' chime' paj qui me'chubitinte rụijsis p̂eyacdye' mu'. 4Anic där ma'joij yụ, dạcacsequi jiquej yụ pạrej mi'intum bä'yity in, mu'in cäc̣hä'chui'tyi' in rụijsis p̂eyacdye', ĉaĉaij na me' jísin' Jen' paj qui cäc̣hä'chuja' tsun. 5̣Q̂uin' mi'in vojity yụ, yụ ferche' jéyac jemoñe' vaj meij mạ'jitiĉa' tsun. Ọij p̂eyacdye' so'meyacsi' q̂uin', mọ' jam mụi'sis, mọ'dye mọmo' se'vetiñes tashche' jiquej. 6Me'chuja' jụijya' mạ'jitidyes, chat qui ra' tupuj chiquepja Jen'si' p̂eyacdye' mu'. Mọ' p̂eyacdye' se'vetiñes tashche' jiquej mọ' yi': “Jemoñe' räjĉan mạ'jeyacsi bä'yi mi'in”, yi' mọ' p̂eyacdye' jiquej. 7̣Q̂uin' úche' jacche' dai' mu'ya' jị'chiyacsity in cäjsis p̂eyacdye' ji'se'veyacsi in. Pạrej yi in: “Mu' Jesucristo jam rụi'cu'ĉan ji'caviti úche' jacche' jiquej”, yi in. Mu'in me' yity in anic mu'in cäjsis dyijyedye' cại'tyi' in, judyeya' fạ́quetety Cristo chime' in. 8Are'ĉa mi'in jam ra' yocve dyijyi mi'in mijam ra' se'vacsebi mi'in ji'chäyitidye' mu'in, are'ĉa fibis shupqui' carijtacdye' Jen'dyes mi'in. Dam'dye jäm' yejĉoij cäc̣hä'chutinte Jen' mi'in paj qui so'mac bíjodye' Jen'ya' mi'in. 9Tyi chuc jam yejĉoij cäc̣hä'chui' Cristos ji'chäyitidye' jụijya' in, yocsi' qui dam'dye mọ'che' cächje' jụijya' in, yódyesya'dyem' jam jị'chiyacsi Cristo u, mu'in me'tyity in jam me'chute Jen' in. Tyi chuc yejĉoijtyi' cäc̣hä'chupte in Cristos ji'chäyitidye' mu', mu'in chat aty me'chute Jen' in, judyeya' Jen'tyi' Ạva' mu' me'chupte chime' in. 10Jäm'dyeya' mu'ya' jụijya' in yocsi' ji'chäyitidye' jam rụijsis tui'tyi' in, mu'in me'tyity in mijam ra' ji'dyäcac aca'ĉan in, mijam ra' tiĉunacdye'tum vorjetinte mi'in. 11Tyi chuc me' vorjeyacsi tiĉunacsi mu'in me'tyity in, mu' jeñej bu'yi nọ́tacsity a'c̣hisya' ji'chäyitidye' mu'in, me' shupqui mu'. 12Taca'dye tsan' dai' mọ'ya' p̂eyacdye' yụ mạ'je' tsan' jéyac, jam qui nam' mạ'je' sánacdye'che' jéyac. Dam'dye jäm' a'dye mi'in jébiyac, yụ mạ'je' paj qui vaj vejtiĉa' p̂eyaĉa' paj qui anic vaj me' ma'jotyitiĉa'. 13Uĉantyi' anicjetety Jen' in tsim'tactyi' mu'tyi' mu', mu'in vaj me' vojity mi'in, mu'inmun chime' vorjinac in.

will be added

X\