2 Corinthians 9

1Yụ aty jam jemoñe' yejĉoij jéyac mi'in sánacdye'che' paj qui mi'in dyimaqui vojitydyes tsun Judeaĉantyidyes in, 2ĉaĉaij na yụ aty chị́yebiyac dyijyedye' mi'in, mi'in aty mạ'je' dyimaqui mu'indyes in. Mọ'dyes yụ tima'queyac mu'insi'ya' vej mu'in Macedoniaĉantyisya' in, yụ jéyacsi jun' chuc mi'in mạ'je' dyimaqui. Yụ jéyacsi: “Jiyi'si' yómodye' jiquej mu'in Acayaĉantyi' vojity tsun aty jä'mii'tyi mạ'je' dyimaqui in”, jéyacsi yụ. Mọ'ya' dyijyedye'ya' mi'in ji'ma'yacsi mi'in mu'in Macedoniaĉantyi' in paj qui mu'in chime' dyimaqui mu'indyes in. 3Yụ ra' jä'mij jutacsi uts chibinyity vojity tsun paj qui mu'in jä'mij vajmu'ya'te in dyimacdye' mi'in. Mọ'dyes jemoñe' jä'mii'tyi' ji'bisaqui dyimacdye' mi'in, me' qui venjoijya' in jam qui fibi' shupqui' p̂eyacdye' tsun, tsun yi jiquej jun' chuc aty mạ'je' dyimaqui mi'in. 4Jäqui'vesya' qui na ram' ĉọcyac tsun Macedonia-ĉantyi'tum in. Jun' a ĉa venjoijya' tsun, dạquicyac mi'in, jun' bu ra' mọ' dyimacdye' mi'in. Me' jụijya' itŝi' mi'in, chäcdyis ra' mọ' tsị́cadye' shupqui' tsundyes, ĉaĉaij na tsun aty jéyacsi jiquej mu'in Macedoniaĉantyi' in jun' chuc mi'in fer mạ'je' dyimaqui mi'in. Itŝi' jụijya' mọ' dyimacdye' mi'in dadam' ra' muju'cha' tsị́cadye'tum shupqui mi'in. 5Jäm' ĉọi' yụ tashche' juteyeyac uts chibintyity vojity in paj qui mu'in jä'mij vajmu'ya'te in, me' qui tsan' ventyecyacya' yụ, aty ra' mọ' jä'mii'tyi' dyimacdye' mi'in, judyeya' ra' chịj in mọ' shupqui' ĉojtyi'ĉansi' mi'in, mijam dam' carij ĉọ́tiñe' mi'in mọ' dyimacdye', me' ra' cavinac in. 6Aty ra' yụ'taqui jụijya' mi'in, jemoñe' dyijtubajtiñe' p̂eyacdye' yi': Tyi chuc dam' cäti jụijya', chidam'dye ra' jäĉan', tyi chuc dai' cäti jụijya' chidai'dye ra' jäĉan', me' bu'yi' ra' cạ̈tsi' mi'indyes dyimacdye'. 7Cäts yirity jịjcaij mi'in jemoñe' dyimaqui mi'in jun' qui' chuc dyijyi ĉojtyi'ĉan mi'in. Jam ra' carij ĉọ́tiñe' mọ' dyimacdye', mijam ra' yoquedye'tum yụ'tiñe', ĉaĉaij na mu' Jen' ma'jotacsi mu'in ma'jodye'tum so'metety in. 8Mu' qui ra' Jen' där ra' muju'cha' ñịbe'jinac mi'in räj jedye' chuc jemontiñes mi'in, mu' ra' dadam' fajche' cächjiyinac mi'in paj qui jam jedye' jayejjotaqui mi'in, judyeya' ra' chime' paj qui tupuj yoctyi' ji'jiyeyacsi mi'in. 9Mọ'dye p̂eye' sánacdye' yi': “Tyi chuc ñịbe'yity jäm'yedye'tum so'macsi ñịbety in, mọ' bijodye' mu'in jam ra' yirisĉan mạyedye' mọtsi' mu'in.” 10Mu'dye Jen' so'macsi cätidyedyes, mu'dye chime' so'macsi jibitidyes säcsedyedyes mu'in. Me'dye ra' mu' Jen' dai' ra' so'minac jedye' chuc jemontiñe' mi'in, paj qui mọ'ya' yejĉoi' jäm'yedye' mi'in, paj qui tupuj yoctyi' in ji'jiyeyacsi mi'in mọ' so'minacsi' Jen'. Mọ' ra' jeñej bu'yi' Jen' yojdyem' so'minac dai' vej u, paj qui dai' shupqui' vädacdye' mi'in. 11Me' ra' mu' so'minac räj jedye', mi'indye ra' tupuj ji'jiyeyacsi dyimacdye' mi'in. Chat qui ra' tsun so'macsi mọ' dyimacdye' mi'in mu'in jayejjotaquity in, chat qui mu'in in yoshoropaij jéte ra' Jen' in. 12Mọ' dyimacdye' so'macsis ra' mi'in mu'in anicjetety Jen' in, jam ra' mọ' mọmo' nọ́tacsi' mu'in jayejjotaquity jedye' in, chime'dye ra' dai' ra' yoshoropaij jéte Jen' in, mọ' chui'ya' dyimacdye' in, 13judyeya' ra' tima'quete Jen' in mi'indyesi'. Mọ'ya' ra' chịj in mi'in anic cäc̣hä'chuptinte mọ' jäm'si' p̂eyacdye' Cristos mu'. Mu'in ra' tima'quete Jen' in mi'indyes ĉaĉaij na mi'in dai' so'macsi jedye' mi'in judyeya' yoctyi' chime' so'macsi mi'in. 14Me' ra' mu'in anic mạ'jinac in judyeya' cọdyete Jen' in mi'indyes, ĉaĉaij na aty cavityinac in mi'inche' bu'yi' mạ'jitidyes Jen'si' mu'. 15Mọ'dyes yoshoropaij jéja Jen', mu' yu'tyiyisin'tyi' mu' Cristo, mu' jeñej bu'yi ñịbe'yedyes tsundyes, anic chäcdyis ñịbe'yedyes jäm'si' so'misin' tsun, mijam ọ́ya' mọ' paj qui tupuj cha'sheja' p̂eijja'ya' mọ'.

will be added

X\