2 Corinthians 8

1Vojity tsun, tsun mạ'je' jị'chiqueyeyac jun' chuc mu' Jen' ñịbe'jitidyesya' mu' nọ́tacsi mu'in Macedoniaĉantyi' anicjetety Jen' in. 2Me' tsan' därsi' ñịbedyes jị'ĉojtye' in, cätssistum qui nam' ma'jodye' bä'yi in, me' tsan' anic där ñịbety in, jäm'si' qui nam' dyimacdye' so'mete Jen' in. 3- 4Yụ chị́yacsi anic jäm'si' dyimacdye' so'mete in, jam cäts mọmo' so'mete in, dadam' cäch ji'jiyeyete in dyimacdye' mu'in. Ĉụi'si'ya' dyijyedye' mu'in fer cudyin tsun in paj qui tsun jụjjeyacsebi dyimacdye' mu'in. Mu'inmun chime' fer mạ'je' nọ́tacsi in mu'in jayejjotaquity jedye' in Judeaĉantyi' anicjetety Jen' in. 5Chime'dye mu'in in jam dyimacdyem' dyijtui' in, yojdyem' dyijyi u tsun, mu'in dadam' cächjibun tsunsi' dyijyedye' in, dadam' mu'in tashche' Ayo'ya' ji'säsdyi in, judyeya' mu'in chime' dyijyi in mạ'je' chäquibun tsunsi' p̂eyacdye' in ĉaĉaij na me' mạ'je' mu' Jen'. 6Tito aty tiyacchui' ji'chäquiyinac mi'in, paj qui ñịbe'jitidyesya' yụ'tiñe' mọ' dyimacdye' mu'indyes in. Mọ'dyes tsun fer jéte paj qui mu' q̂uin' yejĉoij ji'dyijvinac jun' qui' chuc mọ' jị'cätsetiñe' mi'in. 7Jesha' mi'in anic muju'cha' so'mac Jen'ya' mi'in, jam jayej anicyedye' Jen'che' mi'in, mijam jayej chime' dyijyedye' mi'in, muju'cha' chịj voro'tacsi mi'in, fer carijtaqui Jen'dyes mi'in, judyeya' chime' fer mạ'jitiĉa' tsun mi'in, me' me' muju'cha' bä'yi Jen'dyes mi'in. Mọ'dyety o jayej mi'in mọ' dyimacdye', paj qui anic jäm'yejoij mi'in. 8Yụ me' jéyacya' mi'in, jam qui nam' yụ juteyac mi'in jeñej yirity ayo' jutacsiya'. Me'dye mọmo' jéyac jun' chuc mu'in in Macedoniaĉantyi' anicjetety Jen' in fer mạ'je' dyimaqui in, me' yụ jéyac mi'in yụ mạ'je' paj qui mi'in chime' cäc̣hä'chucsebi dyijyedye' mu'in, jun' chuc dyijyedye' mu'insi' in. Me' dyimaqui jụijya' mi'in chime', mọ' ra' jorojĉanje' anic mạ'jeyacsity bä'yi mi'in. 9Mi'in anic chị́yebitinte Jesucristos mạ'jitidyes mu', mu' Ayo' tsun. Me' tsan' mu' me'chui' räj mạyedye'ches jiquej, ọ́che' qui nam' mijam jedye' me'chui' shupqui mu', paj qui me' shupqui mi'in räj me'chutiñe' mạyedye'ches jedye'. 10Jiyi'si' yómodye' mi'in jäm' tashche' yi mi'in dyijtutiñe' dyimacdye' jiquej, ĉụi' mạ'je' fer dyimaqui mi'in. Ọij q̂uin' dyijyedye' yụs: Jemoñe' jị'cätsetiñe' mọ' dyijyedye' jiquej mi'in jun' chuc dyijyaque mi'in. 11̣Q̂uin' chat yódyem' fer dyijtutiñe' dyimacdye' jiquej u, q̂uin' jị'cätsevac. Chime' jemoñe' jäm' yụ'tinte, juñucsi' chuc me'chutinte mi'in, jemoñe' me' yụ'tinte mi'in. 12Mạ'jetiñe' dyimaqui jụijya' mi'in ĉụi'si'tum dyijyedye' ĉojtyi'ĉansi' mi'in, mọ' ma'jotye' Jen', judyeya' mạ'je' juñucsi' chuc mu' muntyi' tupuj yụ'tye' paj me' yụ'tye'. Mu' jam cudyisin' jedye' chuc jam me'chuja'ya' tsun. 13Me' yíya' yụ, jam yụ, mọ' mạ'je' paj qui jayejjotaquive mi'in jedye' dyimacdye'ya' yoctyidyes in, jam. 14Dyijyedye' yụ paj qui vaj cäts me'chutiñe' chätidye'tum mi'in. ̣Q̂uin' aty jam jayejjotaqui mi'in, mọ'dyes q̂uin' mi'in tupuj so'macsi mi'in mu'in jayejjotaquity in. Yirisĉan ra' mạyedye' me'dye ra' mi'in chime' jayejjotaqui jedye' mi'in, mu'in jayejjotaquity q̂uin' in vatyquej ra' mu'in qui me'chuban' jedye' in jäqui've, mu'in qui ra' tupuj caman' so'minac in. 15Me' ra' cạ̈tsi' mọ' sánacdye' yi': “Tyi chuc dai' dyime'tyi' in, mu'in jam ji'shucdyi mu'in, mu'in na uya'ya' dyime'tyi' in, mu'insi' jam jayej mu'in.”152 16Tsun yoshoropaij jéte Jen' ĉaĉaij na mu' jaso'miti dyijyedye' mu' Tito paj qui mu' fer dyijtunac mi'in, yojdyem' yụ dyijtuyac u, me'dye mu' chime' dyijtunac. 17Aty yụ cọdyeteya' jiquej paj qui ĉucnac mi'in, mu' jụjyi. Mạ'je' ĉụi'si'ya' dyijyedye' chime' paj qui mu've jịjcaij ĉucnac mi'in sóbinac. 18Titotum ra' jutete tsun yoctyi' vojity tsun, paj qui mu' pen'dyetute. Uts vojity tsun anic ma'jotyetety in räj anicjetety Jen' in, junanaj ĉụi' bä'yity in, ĉaĉaij na mu' fer carijtaqui voro'tacsi jäm'si' p̂eyacdye' Jen'si' mu'. 19Chime'dye mu' tsim'te in anicjetety Jen' in paj qui pen'dyetun tsun in judyeya' mu'mun qui ra' ñútyityin tsun, jiquique'ya' ra' tsun mọ' dyimacdye' jayejjotaquitydyes in vojitydyes atsun. Mọ'ya' ra' tima'quete Ayo' in, dyimacdye'ya' tsun, mọ' ra' jị'caveyacsi tsun, tsun mạ'je' nọ́tacsi mu'in jayejjotaquity vojity tsun in. 20Tsun jäm' dyijyi paj qui rụijsisya' dyijyedye' cạte tsun mu' dai'tyi' querec̣ha, paj qui jam tupuj ñäñin tsun in mu'dyes querec̣hadyes. 21Tsun mạ'je' paj qui räj cavin tsun in rụijsisya' dyijyedye' tsun, paj qui rụij mọ' shupqui' tsun Jen'si'ya' vej mu' judyeya' muntyisya' chime' in. 22Chime'dye ra' tsun jutete Titotum yoctyi' vojity tsun chibinyity, mu' ra' chime' jịjcate Tito judyeya' pen'dye' mu'. Uts chị́yete tsun, mu' nash nọ́tacsity muntyi' dạcte tsun, q̂uin' mu' fer mạ'je' nọ́taqui ọijya' dyimacdye'ya', ĉaĉaij na mu' aty se'vaqui jun' chuc mi'in aty mạ'jetiñe' dyimacdye'. 23Chime'dye yụ jéyac, Tito nash pen'dye' yụ, mu' carijtaquity yụ́tum yiri'ya' mi'indyes. Mu'in na yoctyi' in pen'dyetutety ra' Tito in, mu'in chime' jutactyi' in anicjetety Jen' in, judyeya' mu'indyes chime' muntyi' in tima'quete Cristo in ĉaĉaij na rụij bä'yi in. 24Jemoñe' mi'in jị'caveyacsi mạ'jitidyes mi'in pen'dye'tumdye Tito. Me' jụijya' mi'in mu'in anicjetety Jen' in jutacsity in cavibunac ra' in mạ'jitidyes mi'in, chäyinac ra' in jam mọ' fibis shupqui' tima'cacdye' tsunsi' tima'queyacya' mi'in Corintoĉantyi' mi'in mu'insi'ya' vej jiquej mu'in.

will be added

X\