2 Corinthians 6

1Tsun nash carijtaquity Jen'dyes mọ'dyes tsun ferche' jéyac mi'in paj qui jam fibi' se'veptinte Jen'si' p̂eyacdye' mu', mọ' p̂eijbites ñịbe'jitidyes mu'. 2Yi' sánacdye'che' mu': “Aty ayijya' tupudye' yụ'tyes jiquej yụ, yụ se'vebiye cọdacdye' mi, aty ayijya' c̣hon'dyedyes tupudye' yụ nọ́tyeye”, yi' sánacdye'. Se'vaĉam', q̂uin' aty ayij tupudye' yụ'tyes mu' Jen', aty ayij tupudye' paj qui c̣hoñi mi'in. 3Tsun räjĉan yụ'tye' ferdye' paj qui rụij bä'yi tsun muntyisya' vej mu'in paj qui jam tyi tupuj ñäñibun carijtacdye' Jen'dyes tsun. 4Räjĉan me' bä'yi tsun, paj qui muntyi' in chäyin tsun in anic me' jutactyi' Jen'tyi' tsun. Dyichchuti tsun me' tsan' chäcdyis ñịbedyes jị'ĉojtye' tsun, me' tsan' jayejjotaqui jedye' tsun. 5Pạrej si'bacdye' dam'je' tsun, judyeya' ĉär'tacdye', pạrej siscajcan tsun in a'c̣hisya' dyijyedye' mu'in. Chime'dye jiyi' chäcdyis carijtacdye' jị'ĉojtye' tsun, judyeya' ĉush jị'ĉojtye' tsun, judyeya' dáquische' bä'yi chime' tsun. 6Mọ'ya' muntyi' in tupuj chäyin tsun in anic Jen'tyi' jutactyi' tsun ĉaĉaij na rụij bä'yi tsun mu'intum in, mọ' jam jayej chị́yepte Jen'si' p̂eyacdye' mu', judyeya' tyum'chutidye'tum bä'yi tsun, judyeya' jäm'yedye'tum bä'yi muntyi'tum chime' tsun. Mọ'dye Jen'si' Ạ'edye' bächän tsun, mạ'jeyacsity qui bä'yi tsun. 7Mọ' mọmo' voro'tacsi tsun rụijsis p̂eyacdye' Jen'si' mu', mu'si' ferdye' me'chupte tsun, me' bä'yi tsun. Tsun rụij bä'yi, mọ' jeñej bu'yi' ñutsjitidyes tsundyes. Mọ'ya' tsun ĉụi' ñutsjiti a'c̣hisya', mọ'ya' chime' chutidyedyes Jen'dyes tsun, me' carijtaqui Jen'dyes tsun. 8Pạrej tiĉuñin tsun in, pạrej na va'quiĉuñin tsun in, pạrej tima'quin tsun in, pạrej na mu'ya' ñäñin tsun in. Me' tsan' räjĉan rụij p̂eyaqui tsun, jeñej väväjñity ĉun tsun in. 9Me' tsan' tsun chị́yactyi' muntyi'ya' in, mu'in qui nam' p̂iyin tsun in: “Jam tyi chị́yacsi in”, yi in. Me' tsan' aty ra' säñi tsun, yejĉoij qui nam' tsạ' bu'yi tsun, me' tsan' jị'ñibe'can tsun in jam qui nam' ijac tsun. 10Me' tsan' tári, räjĉan qui nam' ma'jodye'tum bä'yi tsun. Me' tsan' ñịbety tsun, dai' qui nam' muntyi' so'macsi jedye' tsun. Me' tsan' itŝi' jedye' me'chui' tsun, mọ'ya' qui nam' räj jedye' me'chui' tsun. 11Vojity Corintoĉan bä'yity mi'in, tsun q̂uin' anic jorojĉan ji'shupqueyeyac mọ' ĉojtyi'ĉansi' dyijyedye' tsun, jam jumjetyeyac mọ' ĉaĉaij na anic fer mạ'jeyac tsun. 12Tsun jam farajje' dyijtu-yac, yejĉoij mạ'jeyac mi'in, mi'in qui nam' farajjitiĉa' tsun mi'in. 13Mi'in nash jeñej bu'yi ĉụi'tyi' ạva' yụ, me' cạveyac yụ. Yụ jéyac q̂uin', paj qui me'dye chime' mi'in me' mạ'jitiĉa' tsun mi'in. 14Jam ra' noĉo'ñiti mi'in mu'intum in jam anicjetetytum Jen' in. ¿Jam chịj u mi'in mọ' rụijsis dyijyedye' jam jun' tupuj pen'dyetuti' a'c̣histum dyijyedye'? Chime'dye mọ' mạijquedye' jam tupuj pen'dyetuti' tojmastum. 15Mu' Cristo chime' jam jun' vaj cäts dyijyi Sọyo'tum, me'dye mu'in chime' anicjetety Jen' in jam jun' vaj cäts dyijyi in mu'intum in jam anicjetetytum Jen' in. 16Chime'dye Jen'si' aca' mu' jam vaj cäts shupqui' mọ'tum jäm'tacdye'tum cudyitiche' muntyi' in, jam ọ́ya' va've. Tsun anicjejaty Jen' jeñej bu'ja' Jen'si' aca' mu', mu' tsạ'tyi' Jen', ĉaĉaij na mu'dye yi jiquej: “Yụ ra' mu'intum bä'yi, yụ ra' jajbu'yacsi ĉojtyi'ĉan mu'in, yụ ra' Jen' mu'in, mu'in ra' ĉụi'tyi' muntyi' yụ in.” 17Ayo' tsun chime' yi: “Farajjeyacsejam' mu'in in, meijyejam' mu'inya' in, jam ra' jịjcatacsebiban mi'in a'c̣his dyijyedye' mu'in, chat ra' yụ tiĉuñeyac. 18Yụ ra' ạvatuyac mi'in, mi'in qui ra' ạva' yụ, yi mu' ferdye'tumtyi' Jen'.”151

will be added

X\