2 Corinthians 5

1Tsunsi' a' q̂uin' jeñej bu'yi' va'cacsi' aca' ọ́ches, me' bu'yi' mọ' a' tsun. Aty chị́ja' tsun säñi' jụijya' a' tsun, mọ'ya' ra' yocsi' a' tsun mạyedye'chedyes, mọ' jam jäm'tyes muntyi' in, me'dye Jen' mọmo' jäm'tyiyisin'si' tsun, mọ' ra' jam jụ'ñisĉan mạyedye' mọtsis. 2̣Q̂uin' a'tum taca' q̂uin' tsun yoquedye'tum dyijtujijcaja', ĉaĉaij na fer mạ'jeja' jị'quija' tsun mụi'sisĉan a' tsun mạyedye'ches. 3Tsun mạ'jeja' jị'quija' mụi'sisĉan a' tsun, mọ' jeñej bu'yi' quị'si', paj qui jam itŝity a' tsun me' shupqueja' tsun. 4Mọ'dyes q̂uin' taca' rụi'cu'ĉan tsun, yoquedye'tum bä'ja' tsun. Jam mọ' mạ'jeja' sän'dye' a'si' tsun q̂uin', vatyquej ra' itŝi' a' shupqueja' tsun, me'dye mọm' dyijtuja' mụi'sis, mọ' ra' jam sän'dyes. 5Mu'dye Jen' yu'tyiyisin' tsun, mu' ra' so'misin' mụi'sis a' tsun, judyeya' mu'dye aty so'misin' ĉụi'si' Ạ'edye' mu', mọ' jị'ĉocdye' shupqui' me' ra' so'misin' tsun räj yoj jisin'dyem' q̂uin' u. 6Mọ'dyes sóñi'yedye'tum bä'ja' tsun. Chị́ja' tsun taca'dyem' rụi'cu'ĉandyem' úche' jacche' tsun, jambi'dyem' Ayo'ya' bä'ja' tsun. 7Me' tsan' jambi' cạvepja Jen'si' jedye' mu', yejĉoja' qui nam' mu'dyes bä'ja' ĉaĉaij na anicjeja tsun. 8Mọ'dyes tsun ma'jodye'tum bä'ja'. Dadam' jäm' ĉọ́ja' tsun farajjeyaĉa' tsun ọ́ches a' tsun q̂uin' paj qui Jen'ya' bä'bajsha' tsun Ayo'tum tsun. 9Yiris mọmo' dyijtuja' tsun paj qui mu' Jen' ma'jotyisin' tsun, me' tsan' tacche'dyem' úche' tsun, me' tsan' jam, mọ' qui nam' mạ'jeja' tsun paj qui mu' Jen' ma'jotyisin' tsun. 10Tsun ra' räj ji'cavitiĉa' Cristoya', mu' ra' räj jị'cäts yu'busin' dyijyedye' tsun jun' chuc bä'ja' úche' jacche' jiquej tsun, are' rụij bä'ja' jiquej, are' jam, me' bu'yi ra' mu' so'misin'. 11Tsun chị́yete Ayo' anic tsäqui' mu', mọ'dyes tsun ferche' dyijyi mạ'je' jụj ja'yacsi muntyi' in. Mu' Jen' chäyin tsun jun' chuc rụijsis dyijyedye' cại' tsun, faraj vu' ca' me' mi'in chime' rụij chäyitiĉa' tsun mi'in ĉojtyi'ĉan mi'in. 12Tsun jam mạ'je' me' ĉụi' tima'quiti. Tsun mạ'je' jéyac jun' chuc me' rụij bä'yi tsun paj qui mi'in tupuj ñutsjityitiĉa' tsun mi'in mu'insi'ya' vej mu'in cäj jị'chiyacsityya' in, mu'in va'bunyedye'tum ñäñintyi' tsun in. Mọm' chị́yacsebi in jäm'si' a' muntyis mu'in, mọ' qui nam' ĉojtyi'ĉansi' dyijyedye' mu'in, jam chị́yacsebi in. 13Pạrej aty jeñej shapuij ĉun tsun u in, jun' chuc Jen'dyes carijtaqui tsun. Tsun qui nam' rụijsisya' dyijyedye' nọ́tyeyac tsun mi'in. 14Tsun me', ĉaĉaij na mọ' mạ'jitidyes Cristos mu', mọ' bächän tsun paj qui mu'dyes bä'yi tsun, ĉaĉaij na chị́yeja tsun jun' chuc mu' yirity ijac räjdyes muntyi' in, judyeya' qui tsun chime' räj sänja' mu'tum. 15Räj muntyidyes in säñi mu', paj qui tsun aty jam ĉụi'si' dyijyedye' cạja', paj qui mu'dyes mọmo' bä'ja', mu' säñity tsundyes judyeya' vañinyebantyi'. 16̣Q̂uin' tsun yocve cạvacsi muntyi' in aty jam jeñej jacchety muntyi' cạvacsi tsun, jun' chuc dyijyi Jen', me' cạvacsi tsun. Tashche' jiquej tsun chime' jacches dyijyedye' cại' cạveteya' tsun mu' Cristo jiquej, jeñej muntyi' ĉọ́te tsun, q̂uin' aty jam me' cạvete tsun. 17Tyi chuc aty Cristoty yụ'tac, mu' mụi'tyity shupqui. Mọ' tashches dyijyedyem' aty mọtsim', yedyej qui mụi'sis mu'.150 18Jen'dye nash me' yu'tyiyisin'. Fáquitiĉa'dyem' Jen'tum jiquej tsun, mu' qui Cristo jutete, paj qui mu' jäm' yu'busin' Jen'ya'. Mu' qui yu'tyin tsun paj qui voro'tacsi muntyi' tsun, jéyacsi tsun jun' chuc tupuj jäm'jibun Jen'ya' in. 19Jéyacsi tsun: “Mu' Jen' jutete mu' Cristo, yụ'tacsi qui jacchety muntyi' in paj qui mu'in jäm'jibun Jen'tum in, mu' aty vayacjeyacsebi juchaj mu'in, judyeya' yu'tyin tsun paj qui voro'tacsi tsun ọij p̂eyacdye' mu'”, jéyacsi tsun. 20Tsun nash jutactyi' Cristoty mu', p̂eyacdye' tui'tyi' tsun, mu'dye Jen' so'min tsun p̂eyacdye' muntyidyes in. Mọ'dyes Cristosche' tịj mu' ferdye'tum jéyac tsun mi'in: “Me' ra' jäm'jibun Jen'ya' mi'in.” 21Cristo itŝity juchaj, Jen' qui nam' jeñej bu'yi juchajtumtyi' jacaviti tsundyes paj qui tsun Cristoty tsun rụij yụ'tac tsun Jen'si'ya' vej mu'.

will be added

X\