2 Corinthians 4

1Mọ'dyes tsun jam shọijtye' carijtaqui Jen'dyes tsun, ĉaĉaij na mu'dye Jen' jäm'yedye'ya' mu' so'min tsun carijtacdye' tsun. 2Tsun fạ́que' räj a'c̣his dyijyedye' caminsis mijam väñädye'tum voro'yi tsun. Anic rụij jéyacsi tsun Jen'si' p̂eyacdye' mu', mijam cäj jéyacsi tsun, tsun mạ'je' paj qui räj muntyi' chäyibun tsunsi' dyijyedye' in, jun' chuc rụijsis cại' tsun Jen'si'ya' vej mu'. 3Me' tsan' jorojĉan jéyacsi tsun mọ' jäm'si' p̂eyacdye' Jen'si' mu', mọ' voro'tacsis tsun, pạrej qui nam' mu'ya' in jam chique' in mọ' jätäjyi' chuc, mu'indyes mọmo' me' in mu'in tsäqui'sisĉandyety in. Caminve bu'yi' shupqui' mu'indyes in, 4ĉaĉaij na mọ' jacches ayo' tomajjeyacsebi' dyijyedye' mu'in jam anicjetety in, paj qui jam mạijchucsebi' ĉojtyi' mu'in mọ' jäm'si' mạijquedye' Cristos mu', mu' Jen' bu'yity, c̣hac yódyeijdyem' mu' u. 5Tsun jam ĉụi' tima'quiti tsun voro'yedye'ya' tsun, mu' mọmo' Jesucristo ji'jäcte tsun. Me'dye jéyacsi tsun, “Mu' nash Ayo' tsun.” Tsun nash úñi mi'indyes, so'meyac mọ' p̂eyacdye', me' bu'yi' carijtaqui tsun Jesúsdyesi' mu'. 6Tashche'dyem' jiquej, yoqui'dyem' jäm'tye'ya' jac jiquej u mu' Jen', me' yi p̂eyaqui paj qui tojmadye'ĉansi' shupqui' mọ' mạijquedye'.149 Mu'dye Jen' mạijchubusin' ĉojtyi' tsun, paj qui tupuj cạvepja mạijquedye' Jen'si' mu', mọ' cạvepjas tsun Jesucristosya' vejya' mu'. 7Me' tsan' va'cacsi' a' tsun, mọ'ya' qui nam' mọjo'chas jäm'si' jedye' me'chupte tsun, tsun jeñej bu'yi yiris va'cacsi' puñuj me'chui'si' ya'i'si' jedye', me' bu'yi tsun. Me' bu'yi mu' Jen' yu'tyin tsun paj qui chäyin tsun in mọ' ferdye' me'chui'si' tsun jam ĉụi'si' tsun, Jen'si' nash mọ' chäcdyis ferdye' mu', mọ' me'chuptes tsun. 8Pucmun därsi' ñịbedyes jị'ĉojtye' tsun, mijam qui nam' shọijtyejijcai' tsun. Pạrej itŝi' dyijyedye' tsun, mijam qui nam' tyum'yi ĉojtyi' tsun. 9Pạrej jị'ñibe'can tsun in, Jen' qui nam' jam jun' farajjin tsun, pạrej jiva'chan tsan' tsun in, jam qui nam' ujan tsun in. 10Aty juna' jịjcaijya' tsun, pạrej mu'ya' mạ'je' ijan tsun in, yoj jetedyem' Jesús jiquej u in. Me' tsan' me' mu'dye qui nam' yejĉoij tsạ'chubun a' tsun, mọ' jị'ĉoyacsi mu' chime' tsạ' bu'yi q̂uin'. 11Me' tsan' tsạ' bu'yi tsun, räjĉan mu'ya' mạ'je' ujan tsun in cäc̣hä'chucdye'ya' mu' Cristo. Mọ'ya' chäyin tsun in, mu'dye Cristo tsạ'chubun sän'dyedyes a' tsun paj qui mu'dyes bä'yi tsun. 12Anicdye me', araj ijac tsun, tsun na tsạ'chuyac mi'in p̂eyacdye'ya' mu'. 13Yi' yiris sánacdye', “Yụ anicjete Jen', mọ'dyes qui yụ p̂eijte yụ”, yi' sánacdye'. Me'dye tsun chime' cäc̣hä'chupte tsun anicyedye' mu' sáñe'tyis ọij sánacdye' jiquej, tsun chime' anicjete mọ'dyes qui mu' p̂eijte voro'yedye'ya' tsun. 14Tsun chịj jun' chuc mu' Jen' vañinjajibun mu' Jesús Ayo' tsun, me'dye ra' mu' chime' vañinjibusin' tsun yojdyem' vañinjajibun Jesús jiquej u. Chat qui ra' mu' Jen', räjtumdye ra' casin' yiri'ya' mi'intum in paj qui mu'si'ya' vej jịjcaja' tsun. 15Yojyodyem' jị'ĉojtyes u tsun q̂uin', mi'indyes nash mọ' jị'ĉojtye' tsun, paj qui tupuj mi'in se'veptinte Jen'si' p̂eyacdye' mu'. Aty dayi jụijya' in mu'in ji'c̣honacsity Jen' ñịbe'jitidyesya' mu', dadam' ra' dai' yoshoropaij jétety in cọdacdye'ĉan mu'in, judyeya' ra' tima'quete chime' in. 16Mọ'dyes jam ra' shọijtyejijcaja'. Me' tsan' ọij a' tsun meijquejĉoi' ishoyejĉoi', mọ' qui nam' ạ'edye' tsun meij mụi'sisquejĉoi' yu'busin' mu' Jen' räjĉan mạyedye'. 17Ọij q̂uin' ñịbedyes jị'ĉojtyejas tsun q̂uin' ọya'yas nash mọ', cavin jiyi'. Me' tsan' me' räj ọij jị'ĉojtyejas tsun, so'mac ra' tsun dadam' mọjo'chas chäcdyis jäm'si' Jen'ya', mọ' ra' jam jụ'ñisĉan mạyedye' mọtsi'. 18Mọ'dyes tsun jam dyijtuja' ọij jacches jedye' cạvejas q̂uin', mọ' ra' dyijtuja' yódyesdyem' jam cạvejas u, ĉaĉaij na mọ' jorojĉansi' jedye' cạvejas q̂uin' mọ' ra' cavin mọtsi'. Mọ' qui nam' jam jorojĉansi' jedye', mọ' ra' räjĉan bu'yi', mijam ra' jụ'ñisĉan mạyedye' mọtsi' mu'.

will be added

X\