2 Corinthians 3

1Aty me' p̂eyaquiya' tsun mi'in, tsun ĉútiĉa' mi'in jeñej ĉụi' tima'quiti tsun. Tsun na jam me'. Chime'dye tsun jam jemoñe' tuyeyac yiris sánacdye' p̂eye'si' yụ'tacdye' tsun paj qui jụjjitiĉa' tsun mi'in. Pạrej yoctyi' jemoñe' jo'mes sánacdye' in paj qui jụjjeyac in, tsun na jam me'. Chime'dye tsun jam jemoñe' cọdyetyeyac jo'mes sánacdye' paj qui jị'caveyacsi tsun yoctyi' in paj qui jụjtyin tsun in. 2Mi'indyem' jeñej bu'yi mọ' sánacdye', p̂eye'si' yụ'tacdye' tsun, mọ' jeñej sánac ĉojtyi'ĉan tsun, ĉaĉaij na räj muntyi' cavinac in aty rụij bä'yi mi'in, mọ'ya' jị'caveyacsi mi'in anicsis mọ' p̂eyacdye' tui'si' tsun. 3Anic jorojĉan mi'in jeñej bu'yi sánacdye' mi'in, sáñe'si' Cristo judyeya' tui'si' tsun ĉaĉaij na tsun chijäm' jụj ja'yeyac mi'in. Jam qui nam' sánaquisya' sánac, mijam paperche' sánac, mijam mijche' chime'.146 Me'dye mu'sim' Ạ'edye' tsạ'tyi' Jen' mọ' sáñe' muntyityĉan ĉojtyi' mu'in, me' bu'yi mi'in jeñej bu'yi sánacdye' sáñe'si' Cristo muntyidyes in. 4Me' tupuj yi tsun ĉaĉaij na Jen'che' ĉúti tsun, mu' Cristo ñútyin tsun paj qui mu'che' ĉúti tsun. 5Tsun jam ĉúti ĉụi'si'che' ferdye', jam mọ'ya' carijtaqui Jen'dyes tsun, Jen'si'yam' ferdye' carijtaqui tsun. 6Mu'dye so'min ferdye' tsun paj qui tupuj voro'tacsi tsun jéyacsi tsun mọ' mụi'sis p̂eyacdye' Jen'si' mu', mọ' cäc̣hä'chujas tsun. ̣Q̂uin' aty jam cäc̣hä'chupja urucyas yụ'tacdye' Jen'si' mu', mọ' sáñacsi' mijche' jiquej mu'. ̣Q̂uin' Jen'si' qui Ạ'edye' cäc̣hä'chupja, ĉaĉaij na mọ' urucyas yụ'tacdye' jiquej mọ' ji'sänsin', mọ' qui nam' Jen'si' Ạ'edye' mu' tsạ'chusin'. 7Mọ' jiquej yụ'tacdye' mijche' sánacsi'. Jen'si' mạijquedyem' ji'caviti' yoqui'dyem' jaso'mitiya' jiquej u mu' Moisés mọ' yụ'tacdye', mọ'dyes qui muntyi' in jam mạ'je' cạvete vejya' in ĉaĉaij na anic jiyi pashyi mu'.147 Jam qui nam' men me' bu'yi' mọ' pashquedyem', cavin tyum'joban' mu'. Me' bu'yi mu' Jen' yụ'tye' mọ' yụ'tacdye', me' tsan' mọ' ji'sänsin'si' tsun, anic qui nam' jäm'si'tum mạijquedye' yụ'tac. 8Mọ' na mụi'sis Jen'si' p̂eyacdye' mu', dadam' mọ' mọjo'cha' jäm'si', mijam ra' jụ'ñisĉan mạyedye' tyum'joi', mọ' p̂eyes Jen'si' Ạ'edye' mu', mọ' so'misin'si' tsun. 9Anic där jäm'si' mọ' yụ'tacdye' jiquej mu', me' tsan' mọ' me' bu'yi' ji'sänsin' tsun jäm'si' qui nam', mọ' na mụi'sis p̂eyacdye' dadam' mọjo'cha' jäm'si' che'sis, mọ' qui rụij yu'sin' Jen'si'ya' vej mu'. 10Me' tsan' fer bu'yi' mọ' urucyas yụ'tacdye', mọ' qui nam' mụi'sis p̂eyacdye' dadam' mọ' mọjo'cha' fer bu'yi', ọya'ya' mọ' yụ'tacdye' jiquej. 11Me' tsan' fer bu'yi' mọ' urucyas yụ'tacdye', jị'motsac qui nam', q̂uin' qui nam' mọ' dadam' mọjo'cha' mọ' mụi'sis p̂eyacdye', mọ' ra' chat jam jụ'ñisĉan mạyedye' jị'motsac. 12̣Q̂uin' chị́ye' tsun jam ra' jụ'ñisĉan mạyedye' mọtsi' mọ' mụi'sis p̂eyacdye', mọ'dyes jam jun' noi'yedye'tum voro'tacsi tsun mọ' p̂eyacdye' mu'. 13Tsun jam jeñej Moisésvun jiquej. Mu' busjiti vejya' paj qui mu'in Israeltyi' vóshi' in jam cạvete vejya' in, jun' chuc mọ' pashquedye' ọya'yas, mọ' tyum'joban'sim'.148 14Mu'in na Israeltyi' vóshi' in tofej mu'insi' dyijyedye' in, jam chịj in jedye' buty cại' mọ' ji'cavitis. Taca'dye q̂uin' me', jäm'dyeya' p̂eye' in mọ' tashches yụ'tacdye' Jen'si' mu', taca' qui nam' bus bu'yi' dyijyedye' mu'in, mọ'dyes jam jun' chique' in jätäjyi' chuc mọ'. Aty jụjjeteya' in mu' Cristo, chat q̂uin'dyem' meijjetyetac in mu' buschucsebity dyijyedye' mu'in. 15Anicdye me', taca'dye q̂uin' mu'in Israeltyi' vóshi' in p̂eyepte jụijya' in Moiséssi' sánacdye' in, taca' bus bu'yi' dyijyedye' mu'in. 16A qui nam' jụjjeteya' in mu' Ayo' tsun, chat q̂uin'dyem' meijjetyetac in mu' buschucsebity dyijyedye' mu'in. 17Ọij p̂eyacdye' yi' ji'jäcte: Ayo', Jen'si' Ạ'edye' ji'jäque'. Pen'dyetusin' tsun Ayo'si' Ạ'edye' jụijya' mu', aty faraj tsun. 18Mọ'dyes q̂uin' räj tsun aty jam bus bu'ja' vejya' tsun, Ayos quim' mạijquedyem' me'chupja vejya' tsun, mọ' qui jị'caveyacseja'. Me'dye mu'si' ferdye' mu' jäm' yu'tyiyicasin' tsun, me' me' yejĉoja' yojdyem' mu' u. Me' mu' Ayo', mọ' nash Jen'si' Ạ'edyem'.

will be added

X\