2 Corinthians 2

1Mọ'dyes dyijyi yụ jiquej, jambi' ra' ĉọcyac cuvij ĉaĉaij na yụ jam mạ'je' ji'tareyac mi'in fạra'jeĉun'yacya' a'c̣hisya' dyijyedye' mi'in. 2Ji'tareyac jụijya' yụ, ¿tyi qui bu ra' ma'joij yu'tyin yụ? Aty itŝij mu'ya' in, me' tári jụijya' mi'in, mijam ra' tupuj ma'joij yu'tiĉa' yụ mi'in. 3Mọ'dyes yụ jiquej tashche' sánaqui mi'indyes p̂eyacdye' ĉaĉaij na jambi'dyem' mạ'je' cạvecyac mi'in. Dyijyi yụ vatyquej ra' tári shupqui yụ nạijbiyacya' a'c̣his dyijyedye' jụijya' mi'in. Mọ' jam mạ'je' yụ jemoñe' mi'in ma'joij yu'tiĉa' mi'in. Yụ mạ'je' jiquej paj qui jä'mii'tyi' dyijyedye' mi'in paj qui ma'jodye'tum dạquicyac yụ, mi'inmundye ra' chime' ma'joij. 4Sánaqui yụ jiquej mi'indyes anic táristum sánaqui yụ, anic där táreyac ĉojtyi'ĉan dyijtucdye'ya' yụ mi'inche', aty p̂eijbiyacya' juchaj mi'in. Me' tsan' me' jam qui nam' mạ'je' ji'tareyac, mọm' mạ'je' jị'caveyeyac anicsis mạ'jitidyes yụ. 5Juchaijtyi' muntyi' chị́yetintety mi'in, jam yụm' ji'tarin, mi'inmun chime' ji'tarinac, araj räj ji'tarinac. Yi yụ: “Araj räj me' ji'tarinac mu'”, jam yụ yi: “Räj ji'tarinac”, ĉaĉaij na jam mạ'je' cächje' mọ'che' p̂eyacdye' yụ. 6̣Q̂uin', aty tupuj jun'jeyetinte mi'in, ĉaĉaij na araj vaj cäts dyijyi mi'in jun'jetinte mu' juchaijtyi' muntyi', tupuj q̂uin' tiĉun'bajtinte. 7̣Q̂uin' chat jemoñe' farajjetiñe' dyijtuptinte juchaj mu', jemoñe' jiĉun yụ'bajtinte paj qui jam tyum'yi ĉojtyi' mu' táredye'ya' mu'. 8Mọ'dyes yụ ferche' jéyac paj qui jị'caveyebajtinte mạ'jitidyes mu'. 9Mọ'jeyac yụ jiquej sáñe' yụ mọ' tashches sánacdye' mi'indyes, mọ' dyijyedye' yụ mạ'je' jị'ĉojtyeyac mi'in vátyequej ra' chäquibutiĉa' mi'in sánacdye'ches p̂eyacdye' yụ, jun'jetinte chuc ra' mu' juchaijtyi' muntyi'. 10̣Q̂uin' chat tupuj farajjetiñe' dyijtuptinte juchaj mu', me'dye yụ chime' aty farajje' yụ dyijtucdye' juchaj mu'. Mọ'ya' jụijya' juchaj mu' juchatuntyi' yụ, yụ chime' aty jam dyijtupte juchaj mu', me' yi yụ Cristosya' vej mu' paj qui vaj cäts dyijyeban mi'in. 11Me' ra' vaj cäts tsun farajjeja' dyijtucdye' juchaj mu' paj qui mu' Satanás Sọyo' jam ji'pensin' tsun, ĉaĉaij na tsun anic jäm' chị́yepja dyijyedye' mu'. 12Troasĉan jịjcaij yụ cạyacsi yụ jäm'si' p̂eyacdye' Cristos mu'. Aty venjoij yụ mu'ĉan, mu' Ayo' tsun vanacjiyin yụ paj qui tupuj mu'ĉan carijtaqui yụ. 13Me' tsan' me' taca' qui nam' tári ĉojtyi'ĉan yụ ĉaĉaij na jam dạcte yụ mu'ĉan vojity tsun Tito. Mọ'dyes qui yụ vorjeyacsetaqui mu'ĉantyi' in, yạjquicseban qui yụ, Macedoniaĉan qui jịjcaij yụ. 14Yoshoropaij an mu' Jen' tsun, aty Cristoty tsun. Jen' jayu'ti mu' Cristo paj qui ji'penacsi räj sọyo' in, tsunmun chime' yu'sin' paj qui tsun chime' räj ji'penacsebija' a'c̣his dyijyedye' mu'in. P̂eyacdye' mu' cạyacsejas tsun där jäm'sim', jeñej yiris jäm'si' jẹrejres, pai' jịjcai'si' p̂oquedyem', me' bu'yi' mọ'. 15Tsun voro'tacseja' tsun jeñej jäm'si' jẹrejres yụ'tyes mu' Cristo so'metes Jen', me' bu'ja' shupqueja' tsun. Mọ' cha'shacsi' räj muntyi' in Jen'yadyety in judyeya' tsäqui'sisĉandyety in. 16Mu'indyes in mu'in tsäqui'sisĉandyety in mọ' p̂eyacdye' jeñej yiris jebacdye' säñi'si' topjoi', me' shupqui' mọ' mu'indyes in mọ' p̂eyacdye' cạyacsejas tsun, mọ' ji'sänacsi'. Mu'in na Jen'yadyety in jeñej yiris jäm'si' jẹrejres tsạ'chucsis, me' bu'yi' mu'indyes in. ¿Tyi buty me' tupuj carijtaqui Jen'dyes in? 17Tsun tupuj me' carijtaqui ĉaĉaij na rụijsisya' dyijyedye' me' carijtaqui tsun, mijam querec̣hadyes voro'tacsi tsun, jam jeñej mu'in yoctyi' in. Jen' yu'tyin tsun me', mu'si'ya' vej voro'yi tsun ĉaĉaij na Cristoty úñity tsun.

will be added

X\