2 Corinthians 13

1Ọij ra' q̂uin' chibinyisĉan ĉọcyac mi'in. Jị'cäts yụ'tacya' mu'in juchaijtyi' in, jam tupuj yirity mọmo' chị́yacsebity juchaj mu'in, jemoñe' mu'ya' pärä' judyeya' chibin in, q̂uin'dyem' ra' tupuj c̣họco'tac juchadyesyam', yi' yụ'tacdye'. 2Yoqui'dyem' ĉọcyacya' jiquej u, pärä'yisĉan jiquej, yụ fạra'jeĉúnacsi mu'in tashche' juchaijtyi' jiquej in. ̣Q̂uin' cuvij ọ́che' sánacdye'che' yụ ra' jä'mij jéyacsi räj mu'in me'tyity in, aty ventyecyac jụijya' yụ cuvij yụ ra' jam jun' c̣honchucsi mu'in yejĉoij juchaijtyi' in. 3Mi'in pạrej dyijyi mi'in jeñej yụ jam anictyity so'mactyi' p̂eyacdye' Cristos mu' ĉútiĉa' yụ mi'in, aty qui ra' me'si' yụ ferche' fạra'jeĉun'yacya' juchajya' mi'in, me' ra' chat chäyibutiĉa' mi'in. Jam jayej Cristos ferdye' mu' mi'inya', mu' fer carijtaqui mi'inya'. 4Aty pactacya' croshche' jiquej mu', itŝi' ferdye' yụ'taqui, Jen'si' qui nam' ferdye' mu' jaji'tsa'ibun. Me'dye chime' tsun Cristoty jutactyi' tsun, jam fer bu'yi ji'caviti tsun mi'inya', me' tsan' me', aty qui na ram' dạquicyacya' tsun, mu'dye Cristo tsạ'chuntyi' tsun, mu' ra' so'min tsun Jen'si' ferdye' mu' paj qui mu'si'ya' ferdye' jị'cäts yụ'tacsi tsun mu'in juchaijtyi' in. 5Dyijtutiĉam' ĉụi', cạvaĉam' ĉụi'tyi' ĉojtyi' mi'in, paj qui chäyiti mi'in are' aty anicjetinte Jen', ji'ĉujtiĉam' ĉụi'. ¿Jam chịj u mi'in mu' Jesucristo ĉojtyi'ĉan bä'yi mi'in, rụij anicjetinte jụijya' mi'in? 6Faraj vu' ca' me' chäyibutiĉa' dyijyedye' tsunsi' mi'in, tsun nash anictyity jutactyi' Jen'tyi' mu'. 7Me' tsan' jam rụij carijtaqui Jen'dyes ĉútiĉa' tsun mi'in, jam mọ' ji'tarin tsun. Me'dye mọm' dyijyi tsun cọdyete Jen' tsun mi'indyes paj qui jam dam' ac̣hi' bä'yi mi'in. Mọ' mạ'je' tsun paj qui rụij bä'yi mi'in, me' tsan' ñäñibutiĉa' mi'in mọ' carijtacdye' Jen'dyes yụ, mọ' jam ji'tarin tsun . 8Me'dye mọ' mọmo' dyijtui' tsun mạ'je' ji'tse'e' tsun mọ' rụijsis p̂eyacdye' Jen'si' mu', mijam tsun dam' ñiñe' mọ'. 9Mi'in jụijya' ferdye'tum, mọ' ra' tsun ma'jotye', me' tsan' itŝi' ĉụi'si' ferdye' tsun, ma'joij qui nam' tsun. Mọ' mọmo' cọdyete Jen' tsun paj qui jam jụ'ñij bä'yi mi'in mu'si'ya' vej mu'. 10Yụ jä'mij jéyac mi'in ọ́che' sánacdye'che' jambi'dyem' ĉọcyac mi'in, paj qui mi'in tupuj jä'mij farajjetiñe' mọ' a'c̣his dyijyedye' mi'in, me' qui ra' tsan' dạquicyacya' yụ, aty qui ra' jam jun' jätäjjeyac mi'in. Anicdye me' mu' Ayo' tsun me' so'min yụ yụ'tacdye' paj qui ji'ma'yeyac Jen'ya', mu' jam yu'tyin yụ paj qui ji'penyac yụ. 11Vojity, yụ ra' jadyic jéyac paj qui ma'jodye'tum bä'yi mi'in. Jam ra' jụ'ñij bä'yi mi'in, vaj meij ra' ji'ma'yiti Jen'dyes mi'in, jam ra' yoc yoc dyijyi mi'in, jäm'jitidyeij ra' bä'yi mi'in. Chat ra' mu' Jen' mạ'jisin'tyi' tsun, mu' so'misin'tyi' ma'jodye' ĉojtyi'ĉandyes tsun, mu' ra' pen'dyetunac. 12Vorjitac vaj meij voryedye' pụ'sitidye' Jen'dyes. 13Räj úyaty anicjetety Jen' in chime' mu'in vorjinac in. 14Yụ cọdyete Jen' paj qui mu' Jesucristo Ayo' tsun ñịbe'jitidyes so'minac mi'in, judyeya' paj qui mạ'jitidyes Jen'si' mu' mi'inche' bu'yi', judyeya' paj qui Jen'si' Ạ'edye' mu' ñútyinac paj qui vaj cäts dyijyi mi'in.

will be added

X\