1 ̣Q̂uin' ra' yụ jéyac paj qui dam' tyum'chutidye'tum se'vibutiĉa' mi'in ọij va'bunyedye' p̂eyacdye' ĉúbutiĉas yụs mi'in. 2 Yụ fer ạ̈räjjeyac mi'in, yódyem' Jen' ạ̈räjjinac u, me'dye yụ chime' ạ̈räjjeyac mi'in. Jesha' yụ ji'sisyac Cristoya', aty qui ra' atsijbanya' mu', mu'si'ya' qui ra' vej mu' yụ'tyeyac, mi'in ra' p̂en bu'yi shupqui. Mọ'dyes q̂uin' mum' yirity cäc̣hä'chumac, mijam ra' yocsi' dyijyedye' cäc̣hä'chutiñe', jeñej yiris p̂en p̂eyacsi' atsvun jambi' tyushte son' jun' qui' chuc vämi' mọ', me' bu'yi ra' mi'in chime'. 3 Anic ạ̈räjjeyac yụ vatyquej ra' yocve dyijyi mi'in, vatyquej ra' se' ja'yinac väñädye'ya' mu'in, yódyem' Eva jiquej o jụjbite nassi' väñädye' mu',153 vatyquej ra' me' mi'in chime'. Are'ĉa farajjetiñe' mi'in mọ' rụijsis cäc̣hä'chucdye' Cristos mu'. 4 Me' atsij jụijya' in cäj jị'chiyacsity in, jam jeñej tsunsi' ji'chäyitidye', mu'in qui nam' in mi'in cavin tiĉunacsi. Mu'in yocve ji'jäctety Jesús in, mijam Jen'si' Ạ'edye' p̂eijbite in, yocsim' p̂eye' in. Me' tsan' me' cäjsis p̂eyacdye' tui' in, mọ' jam jéyacsi' tsun jiquej mi'in, mi'in qui nam' jujtacsebi mọ' ji'chäyitidye' tui'si' in. 5 Jeñej aty muju'cha' Jen'tyi' jutactyi' ĉọcsi u mi'in, jam na me'. Yụ na jam jun' uya'ya'tacsi uts me'tyity in. 6 Me' tsan' yụ jam jäm' ji'shupqueyeyac voro'tacdye' ĉúbutiĉa' yụ mi'in, rụij qui nam' jéyac yụ, chị́yepte yụ Jen'si' p̂eyacdye' mu', mọ' jorojĉanyi' mi'inya' ĉaĉaij na mi'in räjĉan se'vibutiĉa' mi'in rụijsis ji'chäyitidye' yụ, judyeya' chime' mi'in räjĉan cavibutiĉa' carijtacdye' yụs mi'in. 7 Mi'inĉandyem' jiquej yụ, yoqui'dyem' voro'tyeyacya' jäm'si' p̂eyacdye' Jen'si' mu', mijam yiris jedye' cọdyetyeyac carijtacdye'ya' yụ. Yụ ñịbe' yu'ti paj qui me' tupuj so'meyac Jen'dyes mi'in. ¿Chäcdyis buty juchaj so'meyac yụ jam cọdyetyeyacya' yụ, me' ĉútiĉa' yụ mi'in? 8 Mi'inĉandyem' jiquej yụ, mu'in yocve bä'yity anicjetety Jen' in mu'in jutiyin yụ in querec̣ha, mu' tsạ' bu'yedyety yụ. Jeñej bu'yi mu'in chutacsity querec̣ha in, me' bu'yi mu'in in, paj qui yụ tupuj voro'tyeyac mi'in. 9 Mi'inĉandyem' yụ jiquej, jun'si' chuc jayejjotaquiya' yụ jedye', yụ jam dam' cọdyeyac mi'in, mu'in vojity Macedoniaĉantyi' atsij in, mu'in so'mitin yụ in tsạ' bu'yedyety yụ. Yụ jam mạ'je' cọdyeyac tsạ' bu'yedyety yụ, yejĉoij ra' me' yụ, yụ ra' jam cọdyeyac. 10 Yódyem' Cristo u rụij p̂eyaquity, me'dye yụ chime' rụij p̂eyaqui. Yụ ra' jéyac yụ ra' jam jun' farajje' ọij dyijyedye' yụ jun' chuc jam cọdyetaqui jedye' yụ voro'tacdyedyes yụ, pai' ra' jéyacsi yụ Acayaĉantyi' in jun' chuc me' jam cọdaqui yụ. 11 Jam me' cọdyeyac mi'in, jeñej aty jam mạ'jeyac ĉútiĉa' u mi'in. Jam nash me', mu' Jen' chịj yụ fer mạ'jeyac mi'in. 12 Me' tsan' me', yejĉoij qui na ram' me' yụ jam cọdyeyac jedye' voro'tacdyedyes yụ. Yụ jam jeñej mu'in me' cäj jị'chiyacsity in, mu'in jam me' fibi'ya' voro'yi in, jam jun' tupuj me' yi in, “Tsun jam cọdaqui jedye' voro'tacdyedyes yojdyem' Pablo u”, jam tupuj yi in. 13 Mu'in jam anictyity jutactyi' Cristoty in, väñädye'yam' se' ja'yacsity muntyi' in, jeñej jutactyi' tsan' Cristoty, me' bu'yi tsan' yu'ti in. 14 Jam ra' äjjeja' mọ', ĉaĉaij na mu'dye Satanás itŝij chä'teij ji'caviti mu', jeñej mạijquedye'tumtyi' anjer, me' bu'yi yu'ti chime' mu'. 15 Mọ'dyes qui jam carij Sọyotydyes úñity in paj qui mu'in jeñej jutactyi' Jen'tyi' mu', mu' rụijtyity, me' bu'yi yu'ti in, mu'in cäj jị'chiyacsity in. Mu'in me'tyity in va'tacdye' ra' so'mac in jun' chuc ac̣hi' bä'yi in. 16 Quivij yụ ra' jéyac: jam ra' itŝity dyijyedye' ĉútiĉa' yụ mi'in. Me' tsan' me' ĉútiĉa' yụ jụijya' mi'in, se'vitiĉam', me' ra' jéyac yụ paj qui chäyitiĉa' yụ mi'in, jun' chuc yụ anictyity jutactyi' Jen'tyi' mu'. Yụ ra' p̂eye' carijtacdye' yụ, jun' a ĉa va'bunje' yụ, are'ĉa me' bu'yi' jeñej mu'in cäj jị'chiyacsity in. 17 Ọij jeñej bu'yi' va'bunyedyes p̂eyacdye' yụ, jam Ayos mu', jeñej itŝity dyijyedye' yu'ti ĉụi' yụ, me' shupqui' mọ'. 18 Jesha' mu'ya' dai' cäj jị'chiyacsity in ĉụi'si'che' fer bu'yedye' mu'in, me' va'bunyi in, are'ĉa yụ me' chime', paj qui chị́yacsi mi'in mu'in cäj jị'chiyacsity in. 19 Me' tsan' mu'in itŝity dyijyedye' in, mi'in qui nam' ma'jodye'tum dyichchucsebi dyijyedye' mu'in, dadam' dyijyedye'tum me' ĉọcsi mi'in. 20 Me' mi'in dyichjeyacsi mu'in jị'ñibe'canactyi' in, judyeya' mu'in son' bu'yi mi'indyes in, judyeya' chutyinac jedye' in, judyeya' väñätunac in, judyeya' äcäijjinac in, me' tsan' fạra'ñinac in judyeya' ñäñinac in, uts na yejĉoij mọmo' dyichchuti mi'in. 21 Tsun na jam me'jeyac mi'in, tsunsi' na jayej sóñi'yedye' paj qui me' tsun jị'ñibe'cayac mi'in, me' aty ĉútiĉa' tsun u mi'in. Mu'in cäj jị'chiyacsity in anic ĉụi' va'bunyi in, yụ ra' me' chime'. Paj tsan' ọij jụijya' yiris va'bunyedye', me'dye ra' itŝity dyijyedye' yu'ti yụ yíya' yụ. 22 ¿Anictyity buty hebreo mu'in in? Anictyity in, yojdyem' yụ hebreo u. ¿Israeltyi' buty vóshi' mu'in in? Israeltyi' vóshi' mu'in, mu'tyi'dye vóshi' yụ chime'. ¿Abrahamtyi' buty vóshi' mu'in in? Abrahamtyi' in mu'tyi'dye yụ vóshi' chime'. 23 ¿Uñity buty Cristoty mu'in in? Dadam' yụ muju'cha' úñity mu'dyes. (Me' yíya' yụ q̂uin', mọ' va'bunyedye' shupqui' yụ, mọ'dyes itŝity dyijyedye' yụ, me' ĉụi' tima'quiti yụ.) Jesha' yụ chat dadam' muju'cha' fer carijtaqui Cristodyes yụ, uya'ya' carijtaqui mu'in cäj jị'chiyacsity in. Dadam' yụ dai' qui' ĉär'tac mu'dyes,154 si'bacdye' mọjo'cha' jị'ĉojtye' yụ mu'dyes, arajmun pạrej ujan yụ in, räj jo'mes jị'ĉojtye' yụ. 24 Mu'in judíoty ayo' mu'in ĉanam' qui' si'bin yụ in, cäts chibin qui'tac arajtac jiyi' qui' sip cại' yụ. 25 Chime'dye mu'in Romaĉantyi' ayo' in chibin qui' pa'quin mu'in yụ in,155 yiri' qui' chime' farajñin mijya' yụ in.156 Chime'dye chibin qui' pechtaqui marĉantyi' covamba yụ, yiri' jị'ĉojtye' ojñi'ĉan yụ, yiris tsedyedye' yiris mạijsi', me'qui' dujru' bu'yi ojñi'ĉan yụ. 26 Anic tsäqui'sis jị'ĉojtye' yụ mi'edye'ya' yụ cạyacsedye'ya' Jen'si' p̂eyacdye' mu', anic tsäqui' cojiro, jäm' tsäqui'taqui yụ shishi'atyya' in, judyeya' ĉụi'tyi'ya' chätidye' yụ judío in, judyeya' mu'inya' jam judíoya' chime' in. Tsäqui'sis jị'ĉojtye' yụ bä'yedye'ĉan judyeya' cäjya' judyeya' marĉan chime'. Chime'dye mu'inya' väñäijtyi'ya' in anicyity Jen'che' yu'tityya' in, mu'in chime' tsäqui' bu'yi yụ́dyes in. 27 Chime'dye därsi' no'bis jị'ĉojtye' yụ, judyeya' ĉushche' bä'yi yụ, judyeya' dáquische', judyeya' jajrische' yụ judyeya' tsịvu'vudye'che' yụ, judyeya' cädädye'che' chime', me' me' jị'ĉojtye' ñịbedyes yụ, carijtacdye'ĉan yụ Ayodyes. 28 Jam mọ' mọmo' jị'ĉojtye' yụ, chime'dye räj mạyedye' fer dyijtucsi yụ mu'in anicjetety Jen' in, pai' junanaj ĉụi' bä'yity in, jun' chuc mu'in bä'yi in. 29 Chime'dye fer dyijtucsi yụ mu'in itŝitydyem' ferdye' in, yụ́mun qui chime' me' yu'ti jeñej itŝity ferdye' yụ, me' bu'yi shupqui yụ. Mu'ya' juchaijtyi' jụijya' in, mọ' yụ jị'fajqueyacsi mu'in ji'juchayacsity in. 30 Yụ jam va'bunyi yụ, jam jeñej mu'in in cäj jị'chiyacsity in, mọ' mọmo' va'bunje' yụ, mọ' ñịbedyes jị'ĉojtye'si' yụ, jun' chuc itŝi' ferdye' ĉụi'si' yụ. 31 Anic rụij p̂eyaqui yụ, Jen' chịj jam väñäij yụ. Mum' tima'queja Jen', mu' Jesucristoty Jen' mu' Ayo' tsun. ¡Jam ra' yirisĉan mạyedye' mọtsi' tima'cacdye' mu'! 32 Chime'dye yụ ra' jéyac jun' chuc ji'caviti Damascoĉan jiquej yụ, yoqui'dyem' Areta ayo'bu'yi jiquej u. Mu' yụ'tactyi' mu' Aretaty Damascoĉantyi', mu' jéyacsi jutacsi muntyi' in paj qui ĉọjcacsebi in bä'yedye'ĉansi' chụi'dye' mu'in, dyijyi mạ'je' tsan' tapjin yụ in. 33 Tsun na bä'yedyes na'ru bojvebi' tsun, mu'che' bu'yi tsun, mu'in anicjetety Jen' in därtyi'ĉan je'ñety ụ́bu' mu'ĉan bijtyin yụ in, chat qui ventanaya' ji'shupquin yụ in, jorojya' jijicayin yụ in, me' bu'yi ji'c̣hoñin ayo'ya' yụ in.157
