2 Corinthians 10

1Yụ Pablo yụ ra' ferche' jéyac ọij p̂eyacdye' yụ, se'vibutiĉam' mi'in. Jesha' pạrej mu'ya' p̂iyin yụ in yi in: “Pablo jun'si' ĉụi' pen'dyetusin' tsun ĉụi'si' tsị́cadye' mu' uya'ya'jajiti, a qui nam' va've jụijya' mu' anic son' bu'yi yu'ti, fạra'yi' jäm'tye' sánacdye'che' mu'”, me' yi pạrej mi'in. Me' tsan' me' yi mi'in, yụ qui nam' mạ'je' jäm'yedye'tum bä'yi, judyeya' tyum'chuti chime' yụ, yojdyem' mu' Cristo u, me'dye yụ chime' mạ'je'. 2Mọ'dyes yụ jéyac mi'in ñäñitiĉaty mi'in paj qui jä'mij farajjeyaqui a'c̣his dyijyedye' mi'in jambi'dyem' ĉọcyac yụ. Jam me' jụijya' mi'in son' bu'yi ra' yu'ti yụ fạra'jeĉun'yac ra' a'c̣hisya' dyijyedye' mu'in aty dạquicyacya'. Tupuj yụ́dye fạra'jeĉúnacsi mu'in ñäñintyi' tsun in. Mu'in yi in: “Pablo jacches mọmo' dyijyedye' cại'tyi'”, yi in. 3Tsun jam me', me' tsan' úche' jacche' bä'yi tsun jam qui nam' jacchesya' dyijyedye' cại' tsun, chuti tsun carijtacdye' Jen'dyes mu'. 4- 5Me' chutidyeijya' tsun jam jacches ñutsjitidyes bächäi' tsun, jam jo'mesya' ñutsjiti tsun, Jen'si'ya' ferdye' chuti tsun, mọ' nash mọjo'cha' ferdye'tumsi', mọ' tupuj ji'peñe' räj a'c̣his jacches dyijyedye' in. Tsun ji'penacsebi räj cäjsis p̂eyacdye' mu'in väväjñitysi' in. Chime'jeyac-sebidye tsun dyijyedye' mu'in va'bunyitysi' in, mu'in jam mạ'je'tyi' in paj qui muntyi' chị́yepte in Jen'si' p̂eyacdye' mu'. Chime'dye tsun ferche' jéyacsi muntyi' in paj qui va'queque' in mọ' cäjsis dyijyedye' mu'in, paj qui mu' Cristo bächäcsebi dyijyedye' mu'in. 6Mọ'dyes mi'in jemoñe' chäquibutiĉa' p̂eyacdye' tsunsi' mi'in, aty me' jụijya' mi'in, chat tsun qui ra' va'tacdye' so'macsi tsun mu'in jam chäquintyi' tsun in. 7Mi'in anic cäj chị́yacsi muntyi' mi'in, mọ' qui nam' ĉojtyi'ĉansi' dyijyedye' mu'in jam jun' chị́yacsebi mi'in. Jesha' pạrej mu'ya' mi'inĉantyi' in va'bunyedye'tum yi in: “Me'dye tsun mọmo' muju'chaty jutactyi' Cristoty mu'”, yi in. Mu'in me' yity in, jemoñe' tashche' rụijsisya' dyijyedye' chäyin tsun in jun' chuc tsun rụijtyity jutactyi' Cristoty chime' mu'. 8Me' tsan' yụ va'bunjeyaqui ĉụi'si' yụ'tacdye' so'minsi' yụ mu' Ayo' tsun, jam qui nam' mọ' ji'tsicayin yụ, mọ' yụ'tacdye' tsun Ayo' so'minsi' tsun paj qui ji'ma'yeyac Jen'ya', mu' jam yu'tyin tsun paj qui ji'penyac yụ. 9Jam yụ mạ'je' jiquijñeyac p̂eyacdye'ya' yụ sánacdye'ches yụ. 10Pạrej p̂iyin yụ in, yi in: “Anic tsäqui'yis p̂eyacdye' jutiyisin' tsun sánacdye'chem', tsuntum qui nam' jam me', uya'ya' tsunsi'ya' vej shupqui, mijam méqui' jäm' ji'shupquiyin tsun voro'yedyem',” yi in. 11Tyi chuc me' yity yụ ra' jéte: jesha' tsun jam fibi' p̂eyaqui tsun, jätäjjeyac chuc tsun sánacdye'che', me'dye ra' jị'cätse' tsun aty ventyecyacya' tsun mu'ĉan. 12Tsun jam cäc̣hä'chucsebi dyijyedye' mu'in cäj jị'chiyacsity in, mu'in ĉụi' tima'quititysi' in. Anic cäj cạqui dyijyedye' mu'in ĉaĉaij na vaj meij cavitidyeij in judyeya' vaj meij chäyitidyeij in, jeñej rụij bä'yi ĉúti in ĉaĉaij na jam cạvepte Jen'si' p̂eyacdye' in, ĉụi'sim' dyijyedye' cäc̣hä'chutyiti in, me' mọmo' bä'yi in. 13Tsun jam ĉụi' va'bunnacdye'tum yu'ti tsun, mijam ĉụi'si'ya' dyijyedye' carijtaqui Jen'dyes tsun, mijam ĉụi' cächjeyaqui carijtacdye' tsun. Jun' chuc Jen' yu'tyin tsun, me'dyem' carijtaqui tsun. Tsun voro'tyeyac mi'in Corintoĉantyi' mi'in ĉaĉaij na mu'dye Jen' me' yu'tyin tsun. 14Me'dye qui tsun jam ĉụi' cächjeyaqui yụ'tacdye' tsun aty voro'tyecyacya' tsun jäm'si' p̂eyacdye' Cristos mu', tsun tashche' voro'tyeyac mi'in ĉaĉaij na mu'dye Jen' me' so'min mọ' yụ'tacdye' tsun. 15Tsun jam va'bunyedye'tum carijtaqui tsun mijam ĉụi'dyes tucsebi tsun voro'yedye' yoctyis mu'in, mọ' jam so'minsi' tsun mu' Jen'. Ĉụi'dyes tsunsi' so'min tsun Jen' paj qui voro'tyeyac mi'in, mọ' mạ'je' tsun paj qui p̂añi Jen'dyes mi'in, chat qui ra' tupuj mu'veya' jịjcaij tsun cạyacsi Jen'si' p̂eyacdye' mu', ĉaĉaij na me' yu'tyin tsun mu' Jen'. 16A ra' me'si' yocve qui ra' jịjcaij tsun yocsi've qui ra' jac voro'tacsequi tsun mọ' jäm'si' p̂eyacdye' Jen'si' mu'. Mijam ra' va'bunyi tsun mijam ra' ĉụi'dyes tucsebi tsun yoctyis voro'tacdye' mu'in mu'ĉantyis in. 17Tsunche' ca ra' cạ̈tsi' sánacdye' yi': “Jam ra' ĉụi' tima'quiti mi'in, Ayo' mọmo' tima'quemac”, yi' sánacdye'. 18Jesha' mu' Ayo' jam jun' jama'jotyiti mu' ĉụi' tima'quitity, mu' jama'jotyiti tyi chuc tima'cactyi' Ayo'ya'.

will be added

X\