1 Timothy 6

1Mi'in úñedye'ĉan bä'yity mi'in jemoñe' jäm'jeĉúnacsi ra' ayo' mi'in, judyeya' chicacsi chime' mi'in. Jam jụijya' me' bä'yi mi'in, yoctyi' ra' muntyi' in cavibunac ra' in a'c̣his dyijyedye' mi'in chat qui ra' muntyi' in äcäijjete Jen' mi'indyesi', dam'dye jäm' jam me' mi'in paj qui jam äcäijjibusin' in ji'chäyitidye' tsun. 2Me' tsan' anicjetety Jen' ayo' jụijya' mi'in, jam qui na ram' äcäijjetinte ayo' mi'in. Mijam ra' yi mi'in: “Jam yụ jemoñe' chiquete uts ayo' yụ ĉaĉaij na mu' chime' anicjetety Jen'”, jam ra' yi mi'in. Mọ'dyes q̂uin' jemoñe' dadam' muju'cha' jäm' carijtaĉam', ĉaĉaij na mạ'jeyacdyety mi'in, mu'tumdye anicjetinte Jen', mu' nọ́tyetinte mi'in carijtacdye'ya' mi'in. Ọij ji'chäyitidye' jéyacseva judyeya' jị'chiyacseva. 3Pạrej mu'ya' cäjsis ji'chäyitidye' tui'tyi' in, mọ' jam mu'si' rụijsis p̂eyacdye' Jesucristos Ayo'si' tsun, mọ' jị'chiyacsejas tsun, mu'in jam mọ' jị'chiyacsi in, yocves ji'chäyitidye' mu'in. 4- 5Tyi chuc me' jị'chiyacsity in, itŝi' jety dyijyedye' in, va'bunyedye'tum bä'yi in. Anic va'ves dyijyedye' mu'in, mọm' dyijtui' in mạ'je' chuti in p̂eyacdye'ya' mu'in. Tyi chuc jịjcatacsebi p̂eyacdye' mu'in me'dye ra' mu'in shupqui in chuti p̂eyacdye'ya' in judyeya' ji'me'tyiyitidyeij dyijyedye' in, p̂iijtidyeij in, jam qui jäm'jitidyeij in ac̣hi' qui dyijtutidyeij in, mijam méqui' chịj in, ĉaĉaij na jam rụijsis jedye' me'chui' in. Va've dyijyi in, jeñej ra' ji'chäyitidye'ya' mọ'ya' querec̣haij in, jedye'tum yu'ti in, me' ĉúti in. 6Tsun na ma'jodye'tum bä'ja' jụijya' tsun, me' tsan' jayejjotaĉa'tyi' jedye' tsun, jeñej bu'yi qui nam' jedye'tumtyi' Jen'dyes shupqueja'. 7Jesha', na'eja'ya' tsun, mijam yiris jedye' tuja' ọ́che' jacche'. Me'dye ra' chime' sänja'ya', mijam ra' yiris jedye' cạja'. 8Mọ'dyes q̂uin' tsun mọ'ya' säcsedye' jụijya' tsun judyeya' quị'si' tsun, tupuj ma'jodye'tum bä'ja' tsun. 9Mu'in na mạ'je' úche' jacche' dụri'ñe'tyi' jedye' in, mu'in ra' me'tyity in ji'penacdye' ra' jị'ĉojtye' in, querec̣ham' dyijtute in, mọ'dyes qui a'c̣his dyijyedye' cại' in, chat qui Sọyosĉan jibej tŝọij in, chat qui ra' va'tacdye' cại' in tsäqui'sis-ĉan-dyety ra' in. 10Tyi chuc fer mạ'jetety querec̣ha in, mọ' ji'shupqueyacsi' jụ'ñis ĉụi' mọmo' juchaj. Pạrej mu'ya' dyijyi in fer mạ'jete querec̣ha in, mọ' ji'yacchuyacsi' Jen'si' p̂eyacdye' mu', anic qui där ñịbe' cạve' in. 11Mi Timoteo, jutactyi' Jen'tyi', jam ra' me' a'c̣his bä'yi mi, ĉa'joyacseva mu'in a'c̣his me'chui'tyi' dyijyedye' in, yụ'tyeva' ferdye' mi paj qui rụij bä'yi mi, räjĉan chiqueme Jen'. Jam ra' farajje' anicyedye' mi, mạ'jeyacsity ra' bä'yi mi, dyichchuta chime', judyeya' jäm'yedye'tum ra' chime' mi. 12Jeñej yirity majmaijtyi' muntyi' anic ji'fercatity majmadye'ĉan paj qui bijodye' so'mac, me' bu'va chime' jị'fercata Jen'dyes, me' ra' bijodye' so'min Jen', mu' ra' Jen'ya' yu'tyin, ĉaĉaij na me' mu' Jen' fayin, yoqui'dyem' p̂eijteya' jiquej um mu' Jesucristo muntyisya' vej mu'in, jam noi'yedye'tum jéyacsi mi jiquej. 13̣Q̂uin' chat yụ jéye Jen'si'ya' vej mu', mu' tsạ'chucsity räj, judyeya' Jesucristosya' vej chime' mu', mu' rụij p̂eyaquity Poncio Pilatoya', yoqui'dyem' ji'me'tacya' mu'si'ya' vej jiquej u.192 14Jen'si'ya' vej mu' yụ jéye paj qui yejĉoij chique' mi mọ' p̂eyacdye', yódyesdyem' so'minsi' jiquej u mi, jam ra' dam' farajjem, yejĉoij ra' me' bä'yim, paj qui jam jụ'ñiij mi muntyisya' vej mu'in, jun' qui' chuc atsijbanya' mu' Jesucristo Ayo' tsun. 15Jen'dye ra' yụ'tye' tupudye' jutacdyes mu' Jesucristodyes. Mu' Jen' muju'cha' jäm'yedye'tumtyi' Ayo', mum' yirity ferdye'tum ayo'bu'yity, ayo' mu'in räj ayoty in judyeya' fer bu'yitytyi' in. 16Mum' yirity me' bu'yi, mijam ra' jụ'ñisĉan mạyedye' säñi. Fersi'ĉan mạijquedye' bä'yi mu', mijam tyi c̣hẹi'ya'jete in, mijam tyi chime' nạijte in, mu' jam jorojĉan. ¡Mu' ram' tima'queja, paj jam mọtsi' tima'cacdyem' ferdye'tumtyi' Jen'! Paj me'. 17Jéyacseva mu'in jedye'tumtyi' in paj jam va'bunye-dye'tum bä'yi in. Jéyacseva chime' paj qui jam mọtsityche' querec̣ha ĉúti in, jemoñe' Jen'chem' ĉúti in, mu' so'misin'tyi' räj jedye' chuc jemonja'si', anic mọjo'cha' mọ'che' so'misin', paj qui ma'jodye'tum bä'ja' tsun. 18Jéyacseva chime' paj qui ñịbe'jitidyestum bä'yi in, paj qui ĉụi'si'ya' jedye' nọ́tacsi muntyi' in, paj jam quijatutacsi mu'in jayejjotaquity jedye' in. 19Me' ra' jụijya' bä'yi mu'in jedye'-tumtyi' in, mu'in ra' tapje' in mạyedye'ches bijodye' in, mọ' aty jä'mii'tyis mọ'che', mu'che' ra' ji'biseyacsi Jen' mu'in ra' tacchedyety in. 20Mi Timoteo, jäm' chiqueva' mọ' p̂eyacdye', rụij ra' voro'tacsi mi. Jam ra' fibis cäc̣hä'chucsebim p̂eyacdye' muntyis mu'in, mọ' je' in chị́dye'-tumsi' p̂eyacdye', je'si' in. Jam nam' me' rụijsis, anic cäjsis mọ' p̂eyacdye' muntyis mu'in. 21Pạrej mu'ya' in aty jụjtacsebi p̂eyacdye' mu'in, mu'in aty va've shupqui in, aty farajjepte in Jen'si' p̂eyacdye' mu'. Yụ cọdyete Jen' paj qui mu' räjĉan so'minac ñịbe'jitidyes.

will be added

X\