1 Timothy 5

1Isho'muntyi' in juchajĉan jụijya' bä'yi in, jam ra' fạra'nacdye'tum jéyacsi mi, jemoñe' jäm'yedye'tum jéyacsi mi, yojdyem' ĉụi'tyi' jen' u mi, me' ra' mi. Mu'in na nanamuntyi' in jéyacsi ram yojdyem' ĉụi'tyi' vojity u mi. 2Mọ'in na isho'munsi' in, jeñej ra' ĉụi'si' tse' mi, me' ra' jäm'jeyacsi mi. Mọ'in na nanamunsi' p̂en in jäm'jeyacsi ram yojdyem' ĉụi'si' voji' u mi, jäm'si'tum ra' dyijyedye' cạvacsi mi, me' ra' cạvacsi mi mu'in anicjetety Jen' in. 3Chime'dye mọ'in säntaquis vämtyi' in, dạ̈räs chätidye' jụijya' in, mọ'in ra' jemoñe' nọ́tacsi mi. 4Mu'ya' jụijya' ạva' mọ' judyeya' jäye' mọ', tupuj mu'in nọ́tyeban' in. Mọ' mọjo'cha' jemonac mu'indyes in paj qui mu'in nọ́taqui in ĉụi'tyi' jen' mu'in judyeya' tse' mu'in, me' ra' mu'in ji'ca'ñeban' in jun' chuc ji'p̂anac jiquej in. Mọ' ma'jotye' Jen' paj qui me' yụ'ban' in. 5Mọ'in na säntaquis vämtyi' in, dạ̈räs chätidye' jụijya', mọ'in ĉútis qui nam' Jen'che' jụijya' in judyeya' yejĉoi' cọdaquis in jedye' chuc jemoñe' in, mạij judyeya' tsedyedye' me' cọdaqui' Jen'che' in, mọ'in tupuj nọ́tac in. 6Ĉụi' qui nam' ma'jotyibun' jụijya' in, me'sis in jeñej säñis shupqui' in Jen'si'ya' vej mu'. 7Jéyacseva ọij ji'chäyitidye' mọ'in säntaquis vämtyi' in, räjtumdye chätidye' mọ'in, paj qui jam jụ'ñii' bä'yi' in muntyisya' vej mu'in. 8Mu'in anicjetety Jen' in jemoñe' nọ́taqui in ĉụi'tyi' chätidye' mọ'in, dadam' mu'in yirisya' aca' bä'yity in. Jam me' nọ́taqui jụijya' in, mu'in farajjebibajte in Jen'si' p̂eyacdye' mu', dadam' qui muju'cha' va've bä'yi in jam rụij, uya'ya' qui mu'in in jam anicjetety Jen' in. 9Jambi' chum ra' sánacsebim tịj mọ'in säntaqui'si' vämtyi' in, jemoñe' tashche' chum cạvacsi mi jun' chuc bä'yi' in, are' jäm' in, are' jam. Jụ'ñis chuc cha'she'si' jäbän qui'tac yómodye' tyiti'si' in, mọ'in mọmo' ra' tupuj ji'sañiti' in. Jemoñe' yirity mọmo' vämtyi' mọ' jiquej 10judyeya' chị́yacsi' in jäm' carijtaquis Jen'dyes in, judyeya' jäm' bä'yis jäm' ji'p̂anaquis ĉụi'tyi' ạva' mọ' judyeya' ji'dyäcacsis aca'ĉan, judyeya' chị' nọ́tacsis mu'in anicjetety Jen' in judyeya' mu'in ñịbe' bä'yity in, me' nọ́tacsi' jäm' bä'yi' mọ'. Tyi chuc me' carijtacaques jiquej in mọ'in tupuj ji'sañiti' in. 11Mọ'in na taca' nanamunsi' in säntaquis vämtyi' in, mọ'in ra' jam tupuj ji'sañiti' in. Vatyquej ra' fer cuvij mạ'je' vämeban' in. Me' jụijya' in aty farajjeyaqui' p̂eyacdye' mọ'in yụ'tyeyetes Cristo jiquej in. 12Me' jụijya' in juchaj ra' shupqui' mọ'in ĉaĉaij na jam jị'cätsaqui' in ĉụi'si' p̂eyacdye' mọ'in yụ'tyeyetes Cristo jiquej in. 13Jam mọ' mọmo', vatyquej itŝi' carijtacdye' bä'ban'ya' in, vatyquej ra' pai' sosobacjoban' in judyeya' pai' p̂eyacsi' muntyi' in yoctyisya' dyijyedye' in, juna' ĉụi' ji'c̣ham'dyi' in yoctyisĉan dyijyedye' in. Jam jäm' me' bä'yis in. 14Dam'dye jäm' yụ mạ'je' paj qui mọ'in taca' nanamunsi' p̂en in säntaquis vämtyi' in paj qui mọ'in vämeban' in, paj qui ạva'yeban' in judyeya' jäm' carijtaqui' in ĉụi'si'ĉan aca' mọ'in. Me' jam jụ'ñi' bä'yi' jụijya' in, mu'in fạ́queptety in Jen'si' p̂eyacdye' mu' jam qui tupuj ñinacsi in. 15Pạrej mọ'ya' säntaquis vämtyi' in penjan' in cäc̣hä'chubajte Satanás in. 16Mọ'ya' qui nam' ĉụi'si' chätidye' jụijya' mọ'in säntaqui'si' vämtyi' in, tupuj mọ'indye mọmo' nọ́tyeban' in, paj qui jam mu'in so'macsi in anicjetety Jen' in, mọ'in chat dạ̈räs chätidye' jụijya' in, mọ'in chat tupuj nọ́tacsi mi ĉaĉaij na itŝij tyi nọ́tacsi in. 17Jemoñe' mi'in jäm' ya'itacsi mu'in ĉọjcacsity anicjetety Jen' in, mu'in jäm' carijtaquity in. Mu'in dadam' feryaij me'chui'tyi' in Jen'si' p̂eyacdye' mu', voro'yi in judyeya' jị'chiyacsi in, mu'in ra' muju'cha' nọ́tacsi mi'in. 18Mọ'dye p̂eye' sánacdye' ya'itacdye' mu'in, yi': “Jam ra' sapbitinte vóyes chụ' mu', mu' yútyeva'caquity trivo, paj mu'mun dam'jete chime'”, yi'. Yocsi' sánacdye' chiyi'dye: “Mu'in carijtaquity in paj so'mac bíjodye' in”, yi' sánacdye'.191 19Chime'dye yirity mọmo' mu'ya' ji'me'te juchadye'ya' jụijya' mu' ĉọjcacsity anicjetety Jen', jam ra' chiquebitem p̂eyacdye' mu', vatyquej ra' jam anicsis jụijya' mọ' ji'me'tacdye'. Mu'ya' na jụijya' pärä' judyeya' chibin ji'me'tety in, q̂uin'dyem' ra' se'vepte p̂eyacdye' mi. 20Pạrej mu'ya' ĉọjcacsity anicjetety Jen' in juchaij jụijya' in, jemoñe' fạra'jeyacsim mu'insi'ya' vej mu'in anicjetetyya' Jen' in, paj qui räj yoctyi' ĉọjcacsity in cạvete in paj qui mu'in quijñe' juchaj in, paj qui jam me' bä'yi in. 21Ọij p̂eyacdye' yụ so'meye Jen'si'ya' vej mu' judyeya' Jesucristosya' chime', judyeya' mu'insi'ya' vej mu'in Jen'tyi'ya' anjer mu'. Mu'insi'ya' vej mu'in fer yụ jéye paj qui chäquibutim ọij p̂eyacdye' q̂uin' yụ. Cäts ra' cạvacsim räj muntyi' in, jam ra' yoc yoc cạvacsi mi, me' tsan' pen'dye' mi me' tsan' jam, cäts ra' cạvacsi mi. 22Chime'dye jam ra' cavintum yụ'tacsim mu'in carijtaquity ra' Jen'dyes in, tashche' chum ra' jäm' cạvacsi mi jun' chuc bä'yi in. Me' cavintum yụ'tacsi jụijya' mi, are'ĉa mi ji'me'tyin mu'si' juchaj mọ'ya' jụijya' mu'. Jäm' ĉujcata ĉụi' mi. 23Jam ra' ojñi' mọmo' tyeij mi, chime' ra' vino dam'je' mi, paj qui pịñituti vo'coĉan mi ĉaĉaij na yụ chị́yeye pucmun japacjoij mi. 24Pạrej mọ'ya' muntyis juchaj q̂uin' mu'in aty tashi' jorojĉanyi' mu'in, jambi'dyem' va'tacdye' so'mac in. Yoctyis na juchaj mu'in jam me' mu'in, jambi' tashi' jorojĉan joi' mu'in, jäqui've ra' chị́yac mu'in. 25Me'dye q̂uin' mu'in pạrej aty jorojĉanyi' jäm'si' dyijyedye' mu'in, pạrej na jambi', jäqui'vedye ra' räj nạijyi' mu'in, jam ra' yejĉoi' jumĉan mu'in.

will be added

X\