1 Timothy 4

1Jen'si' Ạ'edye' mu' jorojĉan jísin' yi' ayijya' jadyiquis tupudye', pạrej ra' mu'ya' in farajjebibajte in Jen'si' p̂eyacdye' mu', sọyos qui ra' ji'chäyitidye' se'vebiban' in judyeya' väñädye' se'veban' in. 2Mọ' ra' ji'chäyitidye' tuyacsi in mu'in fibi'naquity väväjñity in. Yäcäj bu'ban ra' ĉojtyi' mu'in, jeñej ra' muquety ĉojtyi' mu'in, mijam dam' ĉọ́qui juchaj mu'in. 3Mu'in me'tyity in mọ' ra' jị'chiyacsi in paj qui jam vämi in, judyeya' chime' paj qui jam jebei' in pạrej säcsedye' in. Mọ' anic va'ves ji'chäyitidye', mu' qui nam' Jen' jäm'tye' säcsedye' paj qui tsun tupuj jebeja' tsun anicjejaty Jen', chị́yepjaty tsun rụijsis p̂eyacdye' mu', judyeya' yoshoropaij jéja Jen' säcsedye-dyes tsun. 4Räj jäm'tacdye' Jen'si' mu' anic jäm'si' in, jam tupuj äcäijjepja, tupuj jebeja' mọmo', yoshoropaij jéja Jen' jụijya' jibitidyedyes tsun, 5ĉaĉaij na mu'dye Jen' p̂eyacdye'ya' mu' räj jäm' yụ'tye' jibitidyes tsundyes, räj jäm' shupqui' tsundyes cọdacdye'ya' Jen'che' tsun, yoshoropaij jéja jụijya' Jen' säcsedyedyes tsun. 6Mi jị'chiyacsi jụijya' ọij ji'chäyitidye' mu'in vojity in, me' ra' chat anic jäm'tyi' úñity Jesucristoty shupqui mi. Me' ra' yejĉoij p̂eye' mi ọij rụijsis p̂eyacdye' Jen'si' mu', mọ' cäc̣hä'chuptes mi, mọ' jeñej bu'yi' yiris säcsedye', paj qui me' p̂añi ĉojtyi'ĉan mi. 7Jam qui na ram' dyijtuc-sebiban mi urucyas p̂eyacdye' muntyis mu'in, mọ' nash fibis jacches dyijyedye' mọmo' p̂eye' in. Dam'dye jäm' ji'fercata ĉụi' paj qui Jen'dyes bä'yi mi. 8Ji'fercaĉa' a' jụijya' tsun, mọ' ra' ñútyisin' q̂uin' tsun. Ji'fercaĉa' ạ'edye' jụijya' tsun, mọ' nash dadam' mọjo'cha' ñútyisin' paj qui Jen'dyes bä'ja' q̂uin', jadyicve qui na ram' chime' Jen'ya' ra' bä'ja' tsun. 9Anic rụijsis ọij p̂eyacdye', q̂uin' tsun tupuj anicjeja'. 10Tsun Jen'che' ĉútiĉa', mu' jam jụ'ñisĉan mạyedye' säñity, mu' nash Ji'c̣honsin'tyi' räj muntyi' tsun, jụ'ñity chuc anicyejaty tsun. Mọ'dyes tsun ji'fercatiĉa' paj qui carijtaĉa' Jen'dyes. 11Jị'chiyacseva ọij ji'chäyitidye', jéyacseva paj qui jäm' se've' in judyeya' paj qui chique' chime' in. 12Me' tsan' me' nanaty mi, yi ra' mi paj qui jam äcäijjin in mu'in anicjetety Jen' in. Mi qui nam' jemoñe' rụij bä'yi mu'inya' in, paj qui tupuj cäc̣hä'chutyin in. Rụij ra' p̂eyaqui mi, mạ'jeyacseva bä'va, jam ra' farajje' anicyedye' mi, jäm'tujcava' mọmo', me' ra' bä'yi mi tupuj qui mu'in cäc̣hä'chutyin in. 13Jun' qui' chuc ventyecyeya' yụ, yejĉova p̂eyepme Jen'si' sánacdye' mu' mu'insi'ya' vej mu'in, me' ra' jị'chiyacsim, mijam ra' chime' farajje' voro'yedye' mi. 14Yejĉova dyijtuva' carijtacdye' Jen'dyes mi paj qui jam fibi' shupqui' mọ' carijtacdyedyes ferdye', mọ' so'minsi' Jen'. Mọ' so'minsi' jiquej yoqui'dyem' p̂eyaquiya' jiquej u in mu'in jaso'mitity p̂eyacdye' Jen' in, judyeya' toco'jinya' unya' jiquej in mu'in ĉọjcacsity anicjetety Jen' in. 15Yejĉova dyijtuva' carijtacdye' Jen'dyes, jam ra' méqui' farajjem, paj cavin yoctyi' in jun' chuc p̂añi Jen'dyes mi. 16Jäm' ra' ĉujcati ĉụi' mi, rụij ra' jị'chiyacsi mi. Me' ra' jụijya' mi, c̣hoñi ra' mi räjtumdye mu'intum in se'vibuntyi'tum ji'chäyitidye' mi.

will be added

X\