1 Timothy 1

1Yụ nash Pablo Jesucristotyi' jutactyi' mu', mu' Jen' Ji'c̣honsin'tyi' tsun, mu' me' yu'tyin yụ judyeya' mu' Jesucristo Ayo' tsun mu' bisva'quejaty. 2Yụ nash sáñe' ọij q̂uin' p̂eyacdye' mídyes Timoteo,189 mi jeñej bu'yi anictyity ạva' yụ ĉaĉaij na vaj me' shupqui' anicyedye' tsun. Yụ cọdyete Jen' mu' Ạvatusin'tyi' tsun judyeya' mu' Cristo Jesús Ayo' tsun paj qui mu' so'min ñịbe'jitidyes mi, judyeya' paj qui ñịbe' ĉun mi judyeya' chime' paj qui so'min ma'jodye' ĉojtyi'ĉandyes mi. 3Yejĉova Efesoĉan mi yoj jeyedyem' ca' jiquej u aty ra' sactiya' yụ, mu'ĉan jịjcaij yụ Macedoniaĉan. Mu'ĉantyi' in pạrej cäjsis ji'chäyitidye' jị'chiyacsity in. Jemoñe' jéyacsi mi mu'in me' jị'chiyacsity in, paj qui jam me' jị'chiyacsi cäjsis dyijyedye' in. 4Jéyacseva paj qui jam mọ' dyijtucsebi in urucyas p̂eyacdye' muntyis mu'in, paj jam chime' dyijtucsebi in vóshi'vunsi' tịj jiquej mu'in, tyessi'che' paper sánacsi'. Tyi chuc jo'mes dyijtui'tyi' jụijya' in, vaj ĉụi' fáquiti in p̂eyacdye'ya' mu'in, me' bu'yi' shupqui' mọ' mu'in. Mọ' jam dam' nọ́tacsi' paj qui anicyedye'ya' mu'in cäc̣hä'chupte in Jen'si' dyijyedye' mu'. 5Mọ'si' dyijyedye' ji'chäyiti-dyes yụ, mọ' jísin' paj qui anic mạ'jeyacseja' bä'ja' tsun. Jemoñe' jäm'tyi'tum ĉojtyi' bä'ja' tsun, judyeya' rụijsistum dyijyedye' judyeya' fer anicjeja Jen', me' ra' chat anic mạ'jeyacsejaty bä'ja'. 6Pạrej mu'ya' jam me' cại' dyijyedye' in, yocve bä'yi in, fibis p̂eyacdye' muntyis in, mom' dyijtui' in. 7Mu'in me'tyity in mạ'je' tsan' jị'chiyacsi in Jen'si' yụ'tacdye' mu', jam qui nam' méqui' chiquepte in, jedye' buty cại' mọ'. Me' tsan' yi in, “Anic rụijsis ọij ji'chäyitidye' yụ”, mijam qui nam' méqui' chịj in jedye' buty cại' mọ' ji'chäyitidye'. 8Chị́ja' jäm'si' nash mọ' Jen'si' yụ'tacdye' mu', me' tsan' me' jemoñe' qui nam' tsun tashche' jäm' chị́ja' tyídyes buty mọ' yụ'tacdye'. 9Dyijyeva, mọ' yụ'tacdye' yụ'tac jam rụijtyitydyes muntyi' in, mọ' nash yụ'tac ac̣hi'yitydyes in. Mu'indyes mọmo' in tyi chuc jam chicacsity in jacchety ayo' in judyeya' mu'in ac̣hi' bä'yity in jam dyijtutety Jen' in, mijam chiquetety in, judyeya' ijacsity in, judyeya' ijaquity jen' in judyeya' tse' mu'in, 10judyeya' vo'voijtyi' in, judyeya' vaj son' me'tity in, judyeya' ji'mincacsity muntyi' in, judyeya' väväjñity in, judyeya' väñädye'ya' ji'me'tacsity ayo'ya' in, räj mu'in me'tyity in, va'quec-bitety in rụijsis ji'chäyitidye' Jen'si' mu', mu'indyes in mọ' yụ'tacdye' Jen'si' mu'. 11Ọij rụijsis ji'chäyitidye', mọ' me'chui' mọ' jäm'si' p̂eyacdye' Jen'si' mu' voro'tacsis yụ, ĉaĉaij na mu' muju'cha' jäm'yedye'tumtyi' Jen', mu' yu'tyin yụ paj qui me' voro'tacsi yụ. 12Yụ yoshoropaij jéte Jesucristo Ayo' tsun, mu' so'mintyi' ferdyedyes yụ paj qui yụ carijtaqui mu'dyes. Yụ yoshoropaij jéte ĉaĉaij na mu' cavin yụ anic chiquetety ra' yụ judyeya' mu'dye tsim'tyin yụ paj qui úñi mu'dyes yụ. 13Me' tsan' a'c̣his p̂eyacdye' ji'shupqueyete yụ jiquej judyeya' jị'ñibe'cacsi yụ mu'in cäc̣hä'chutety in, anic fer ñịbe'tacsi jiquej yụ. Me' tsan' me', Jen' qui nam' ñịbe' ĉun yụ ĉaĉaij na yụ jambi'dyem' anicjete Jesús yụ, jambi'dyem' chị́yete jiquej yụ mu'dye Jesús me'se yụ. 14Mu' na Ayo' tsun därsi' ñịbe'jitidyes so'min yụ judyeya' chime' ñútyin yụ paj qui muju'cha' anicjete yụ judyeya' paj qui mạ'jeyacsi yụ, mọ' anicyedye' tsun judyeya' mọ' mạ'jitidye' tsun mọ' Jesucristoya' jijtui'si'. 15Anic rụijsis ọij p̂eyacdye' tupuj tsun anicjeja', yi': Mu' Cristo Jesús atsij úche' jacche' jijtuij paj qui ji'c̣honsin' tsun juchajtumtyi' muntyi' tsun. Yụ anic muju'cha' juchajtumtyi', me' bu'yi' shupqui yụ, uya'ya' yoctyi' in. 16Me' tsan' me' yụ, Jen' qui nam' ñịbe' ĉun yụ paj qui räj muntyi' in cạvepte yụ́ya' in Jesucristos mạ'jitidyes mu', jun' chuc vayacjibun juchaj yụ judyeya' ji'c̣hoñin yụ, paj qui me' tupuj yoctyi' muntyi' in yụ́ya' cạvepte in Jen'si' ñịbe'jitidyes mu', paj qui mu'in chime' me' in, yódyem' yụ u vayacjibun yụ mọ' därsi' juchaj yụ, me'dye ra' mu'in chime' in vayacjeyacsebi juchaj mu'in, anicjete jụijya' in, chat qui ra' Jen'yadyety in. 17Tima'queja Jen', mum' yirity tạ'caty anictyity Jen', mu' jam jorojĉantyi', tạ'caty mu' ayo'bu'yi, räjĉan ra' me'. Mu' ra' jam jụ'ñisĉan mạyedye' mọtsity. Irijyeja' ra' mu'che' judyeya' ra' yejĉoja' tima'queja, ¡paj jam mọtsi' tima'cacdyem'! 18- 19Mi Timoteo, mi jeñej bu'yi ạva' yụ, yụ́dye so'meye q̂uin' ọij yụ'tacdye'. Fer ra' carijtaqui Jen'dyes mi, mọ' jeñej bu'yi' chutidye' Jen'dyes, me' ra' jam farajje' mi anicyedye' Jen'che', me'chuvam' rụijsis dyijyedye' mọ' ĉojtyi'ĉansim. Me' ra' chat cạ̈tsi' míya' mọ' p̂eyacdye' so'macsis Jen' vojity tsun jiquej, mọ' se'ves jiquej mi, mi ji'jäquintyi' jiquej in, mi tsim'tactyi' Jen'tyi', yi in. Pạrej qui nam' jam me' dyijyi in, jam cäc̣hä'chuqui in rụijsis dyijyedye' ĉojtyi'ĉansi' mu'in, chat qui me'ĉandye penjan Jen'dyes in. 20Me'dye mu'in chime' in mu' Himeneo judyeya' Alejandro. Yụ va'tacdye' so'macsi, so'mete yụ Sọyo' Satanás paj qui mu' jị'ñibe'cacsi mu'in in paj qui quivij dyijyeban juchajche' in, aty me' jụijya' in aty qui ra' jam me' a'c̣his p̂eyacdye' ji'shupqueyebajte Jen' in.

will be added

X\