1 Thessalonians 4

1Vojity, q̂uin' tsun ferche' jéyac Jesucristosche' tịj mu', paj qui yejĉoij rụij bä'yi mi'in, ĉaĉaij na aty me' bä'yi mi'in. Tsun me' jị'chiyeyac jiquej mi'in, jun' chuc ra' rụij bä'yi mi'in, q̂uin' tsun ra' jéyac paj qui mi'in dadam' yejĉoij Jen'dyes bä'yi mi'in paj qui ma'jotyinac mu' Jen'. 2Chịj tyu' u mi'in mọ' p̂eyacdye' so'meyacsi' jiquej tsun, yi' mọ'ĉan jun' chuc ra' bä'yi mi'in, mọ' so'minsi' tsun Jesús Ayo' tsun, paj qui tsun ji'jiyeyac mi'in. 3Mu' Jen' mạ'je' paj qui mu'dyes rụij bä'yi mi'in ĉaĉaij na aty mu'tyi' mi'in, judyeya' mu' chime' mạ'je' paj qui jam méqui' vo'vodye'che' dyijyi mi'in. 4Mu' na mạ'je' paj qui rụij bä'yi p̂entum mi'in, jäm'si'tum dyijyedye' mọ'tum bä'yi mi'in, jäm'jeyaĉam' ĉụi'si' p̂en mi'in. 5Jam ra' a'c̣his a'si' dyijyedye' cạtiñe' mọ'tum mi'in, jam ra' jeñej mu'in mi'in jam chị́yetety Jen' in. 6Mọ'dyes jam ra' méqui' juchatubitinte chätidyes p̂en mu', mijam ra' jun'bitinte. Aty jéyac jiquej ferche' mi'in, mu' ra' Ayo' tsun mu' ra' fersi' va'tacdye' so'macsi jụ'ñity chuc me'tyity in. 7Mu' Jen' jam mu' yu'sin' me' paj qui a'c̣his bä'ja', mijam vo'voyedye'che' chime', mu' yu'sin' paj qui rụij bä'ja' cäc̣hä'chuc-dye'ya', ĉaĉaij na mu'tyi' aty tsun. 8Mọ'dyes yụ ra' jéyac, tyi chuc äcäijjety ọij ji'chäyitidye' jeñej aty muntyi' äcäijte ĉúti u, Jen' na mu' äcäijte, mu' so'minactyi' Ạ'edye' mu'. 9A nash jam tupuj jéyac mi'in paj qui vaj meij mạ'jitidyeij mi'in anicjetintety Jen' mi'in, mu'dye Jen' ji'chäyinac jiquej mi'in jun' chuc ra' vaj meij mạ'jitidyeij mi'in. 10Anic jäm' me' bu'yi mi'in, mạ'jeyacsi mi'in mu'in pai' bä'yity in Macedoniaĉantyi' in, räj mu'in anicjetety Jen' in. Tsun fer jéyac vojity, paj dadam' yejĉoij mạ'jitidyestum bä'yi mi'in. 11Dyijyejam' jäm' paj qui jäm'yedye'tum bä'yi mi'in, jam ra' ji'c̣ham'dyi mi'in yoctyisĉan jedye' mu'in, ĉụi'si'tum ram' un carijtaqui mi'in tsạ' bu'yedyes mi'in, me' ra' bä'yi mi'in yoj jeyacdyem' ca' jiquej u. 12Me' jụijya' bä'yi mi'in, chat qui ra' jam jayejjotaqui tsạ' bu'yedyes mi'in judyeya' mu'in chime' jorojyaty in jäm'jinac ra' in cavibunacya' in mọ' rụijsis dyijyedye' mi'in. 13Vojity, tsun mạ'je' jị'chiqueyeyac paj qui chịj mi'in jun' chuc ra' yirisĉan mạyedye' shupqui mu'in säñity in, paj qui jam táracsi mi'in, jam jeñej mu'in in jam anicjetety Jen' in, ĉaĉaij na mu'in in jam bise' in paj qui Jen'ya' bä'yi in. 14Tsun na anicjejaty p̂eyacdye' yi'si': mu' Jesús säñi jiquej judyeya' vañinyeban mu', chime'dye chị́ja' tsun aty atsijbanya' ra' mu' Jesús, mu' ra' Jen' räj vañinjeyac-seban mu'in säñity in anicjetety Jesús in. Jen' ra' yụ'tacsi paj qui pen'dyetute in mu' Jesús. 15Ọij ji'chäyitidye' q̂uin' Ayo' so'min tsun, atsijbanya' ra' mu' Ayo', tsun jambi' sänja'tyi' jam ra' tashja', säñity chum ra' tashche' cạc in, jäqui've ra' tsun jambi' sänjaty cabusin'. 16Atsijbanya' ra' mu', mạ'i' ra' fersi' äjquedye' jutacdye', yirity anjertyi' ayo' äjyi ra', chime' ra' mạ'i' tujquedye' Jen'si' mu', tujyedye'ĉandye ram' chạij Ayo' tsun mạyedye'che' jijtuij. Mu'in säñity in anicjetety Cristo jiquej in, mu'in ra' tashche' vañinyeban in. 17Tsun qui ra' jambi' sänjaty cä'c̣häja'dye ra' cabusin' tsun, tsunmun ra' tai'ya' ji'rebeja Ayo' tsun dyicba'ba-dye'ĉan, chat ra' räjĉan bu'ja' mu'tum. 18Dyijtujam' an'dyem' ọij p̂eyacdye', mọ'ya' ra' ji'jiijbuti táredye' mi'in säntaqui chätidye' jụijya' mi'in.

will be added

X\