1 Thessalonians 3

1- 2Dyijtucdye'ya' fer mi'in, aty jam jun' dyichchutiya' yụ chat qui dyijyi yụ ji'yajcati taĉan yụ Atenasĉan.184 Mu'ĉan qui jutete yụ mi'inya' mu' vojity tsun Timoteo, mu' carijtaquity Jen'dyes tsuntum yiri'ya'. Me' tsan' yụ yirity ji'yajcati Atenasĉan, dyijtuyac qui nam' yụ paj qui mu' ĉucnac mi'in paj qui mu' quivij fer bu'yi yu'bunac anicyedye'ya' mi'in judyeya' ji'ma'yibunac Jen'dyes chime'. 3Me' ra' mu' paj qui jam peñi mi'in, jị'ĉojtiñe'ya' mọ' ñịbedyes q̂uin'. Chịj nash mi'in, mu'dye me' Jen' yu'sin' tsun paj qui me' jị'ĉojtyeja' ñịbedyes. 4Mi'intum-dyem' jiquej tsun, jä'mij jéyac jiquej tsun mi'in jun' chuc ra' me' jị'ĉojtyeja' ñịbedyes tsun. Anicdye me' cạ̈tsi' mọ' p̂eyacdye', aty cạvetiñe' mi'in. 5Mọ'dyes yụ fer dyijtuyac mi'in jiquej, vatyquej ra' peñi mi'in, vatyquej ra' Sọyo' ji'ĉujtyinac, vatyquej ra' fibi' mọmo' voro'tyeyac tsun, me' bu'yi dyijyi yụ. Mọ'dyes yụ jiquej jutete mu' Timoteo mi'inya' chat mu' qui ĉucnac paj qui chị́yebiyac anicyedye' mi'in vatyquej ra' yejĉoij taca' cäc̣hä'chutinte Jen' mi'in. 6Aty atsijbanya' mu' Timoteo mi'insi'ĉantyi' bä'yedye', tsun tiĉun'bite p̂eyacdye' mu' tuyibunsi' tsun, yi' jụ'ñij chuc mi'in. Jíbun tsun yejĉoij ca mi'in anicjetinte Jen', judyeya' ca yejĉoij vaj meij mạ'jitidyeij mi'in. Mu' jin tsun jun' chuc mi'in yejĉoij ma'jodye'tum dyijtutiĉa' tsun mi'in, judyeya' ca fer mạ'je' cavitiĉa' tsun mi'in, yojdyem' tsun u mạ'je' cạveyac chime' mi'in. 7Vojity, aty se'vaqui tsun jun' chuc bä'yi mi'in judyeya' yejĉoij anicyi mi'in, mọ' ji'jiijbubun táredye' tsun. Me' tsan' därsi' ñịbedyes jị'ĉojtye' tsun, me' tsan' fersi' ñịbedyes ji'caviyin tsun in, jiĉun qui nam' yu'tyin tsun ĉaĉaij na se'vaqui tsun jun' chuc bä'yi mi'in. 8Fer bu'yi Jen'dyes bä'yi jụijya' mi'in, mọ' dadam' fer bu'yi ĉojtyi'ĉan yu'bun tsun. 9Mọ'dyes q̂uin' tsun dadam' muju'cha'ya' yoshoropaij jéte Jen' tsun mi'indyes, ĉaĉaij na mi'in rụij cäc̣hä'chutinte mu' Jen', mọ'dyes tsun ma'joij yu'tiĉa' tsun mi'in, me' ma'joij tsun mi'indyes Jen'si'ya' vej mu'. 10Räjĉan yejĉoij tsun ferche' cọdyete Jen' tsun, mạij judyeya' tsedyedye', paj qui tsun tupuj cạveĉadyeyac mi'in, Jen' yi jụijya', paj qui tupuj chime' nọ́tyeĉadyeyac mi'in, jụ'ñis chuc jayej mi'in Jen'dyes. 11Mọ'dyes tsun cọdyete Jen' mu' Ạvatusin'tyi' tsun, judyeya' mu' Jesucristo Ayo' tsun paj qui mu' yi paj qui tsun mu've ĉọcyac. 12Chime'dye tsun cọdyete Jen' paj qui mu' ñútyinac paj qui mi'in dadam' yejĉoij vaj meij mạ'jiti-dyeij mi'in, judyeya' chime' paj qui dadam' räj mạ'jeyacsi muntyi' mi'in, yojdyem' tsun u fer mạ'jeyac mi'in, me'dye ra' mi'in chime' mạ'jeyacsi muntyi' in. 13Chime'dye cọdyete Jen' tsun paj qui ferdye' so'minac ĉojtyi'ĉan mi'in q̂uin', paj qui jam jụ'ñiij mi'in Jen'si'ya' vej mu', mu' Ạvatusin'tyi' tsun, aty atsijbanya' mu' Jesús Ayo' tsun, räj tucse-banya' muntyi' mu'.

will be added

X\