1 Thessalonians 2

1Vojity, aty chịj mi'in jam mọ' fibis shupqui' mọ' sóbacdye' tsunsi' jiquej mi'inya', yoqui'dyem' voro'tyeyacya' jiquej u. 2Chime'dye chịj mi'in jun' chuc tsun jambi'dyem' ventyec-yacya' mi'in jiquej, Filiposĉan jiquej anic chäcdyis ñịbedyes ji'caviyin tsun in, cächje' dam'dye mọ'che' ñinacdye' mu'in tsunche'.183 Me'dye chime' aty mi'inya' tsun, aty voro'tyeyacya' tsun jiquej, pạrej mu'ya' fer fáquibun tsunsi' p̂eyacdye' in mọ' cại'si' tsun. Me' tsan' me' mu' qui nam' Jen' räjĉan ñútyin tsun paj qui sóñi'yedye'tum jéyac mi'in mọ' jäm'si' p̂eyacdye' Jen'si' mu'. 3Tsun jam méqui' cäjsis ji'chäyitidye' jéyac tsun, mijam a'c̣histum dyijyedye' jéyac tsun, mijam väñädye'ya' chime' se' ja'yeyac tsun. 4Mu' Jen' ji'ĉujtyintyi' tsun mu' yu'tyin tsun paj qui tsun voro'tacsity jäm'si' p̂eyacdye' mu'. Mu' mọmo' chiquete tsun voro'yedye'ya' tsun, jam tsun dyijyi paj qui muntyi' ma'jotyin tsun in, jam. Mum' Jen' dyijtute tsun, mu' chäyi-buntyi' ĉojtyi' tsun, paj qui mu' ma'jotyin tsun. 5Chịj mi'in, yoqui'dyem' voro'tyeyacya' tsun jiquej u, jam ji'shupqueyeyac tsun mọ' ji'ma'jotacdyes p̂eyacdye' paj qui mọ' ma'jodye'tum yu'nac, mijam querec̣ha chime' dyijtute tsun voro'yedye'ya' tsun, chịj mu' Jen' jam mọ' dyijtui' tsun. 6Jam mọ' dam' dyijtui' tsun paj qui muntyi' tima'quin tsun in, mijam dyijtui' tsun paj qui mi'in tima'quitiĉa' tsun mi'in. 7Tsun tupuj tsan' cọdyetyeyac jedye' mi'in tsạ' bu'yedyes tsun, ĉaĉaij na mọ'ya' yụ'tacdye' tsun, tsun nash jutactyi' Cristoty mu', tsun qui nam' jam mạ'je' me' cọdye-tye-yac. Tsun jäm'yedye'tum dyijtuyac mi'in, jeñej yiris p̂en jäm'yedye-'tum ĉọjcaqui' ạva' mọ', me' bu'yidye tsun jiquej mi'intum. 8Tsun anic fer mạ'jeyac mi'in, jam Jen'sim' p̂eyacdye' jéyac, chime'dye jeñej úñity tsun mi'intyi', me' shupqui tsun, me' fer tsun ñọ́tyeyac carijtaqui mi'indyes. 9Chịj tyu' u mi'in jun' chuc tsun fer carijtaqui tsạ' bu'yedyes tsun jiquej. Mạij judyeya' tsedyedye', me' bu'yi carijtaqui tsun, tsun jam jedye' cọdyetyeyac tsạ' bu'yedyes tsun voro'yedye'ya' tsun mi'in Jen'si' p̂eyacdye' mu'. 10Chime'dye jäm' chäyibutiĉa' tsunsi' dyijyedye' mi'in, judyeya' jun' chuc bä'yi tsun, me'dye chime' mu' Jen' chäyibun tsun jun' chuc rụij bä'yi tsun mi'inya' jiquej. Anic jäm'yi tsun mi'intum anicje-tintety Jen', jam jụ'ñiij tsun mi'insi'ya' vej jiquej. 11Dyijyeban tyu' u mi'in jun' chuc tsun jiĉun yụ'badyeyac jiquej mi'in judyeya' ji'ma'yeba-dyeyac ma'jodye'tum jiquej, yoj jeyaquidyem' yirity muntyi' u ĉụi'tyi' ạva' um', me' jéyac tsun. 12Tsun ferche' jéyac jiquej: “Rụij ra' bä'yi mi'in yojdyem' mạ'je' Jen' u, mu' fayinactyi' jiquej paj qui mu'yadyety mi'in ayo'bu'yedyedyety mu', yóĉandyem' ferdye'tum ayo'bu'yi mu'”, jéyac jiquej. 13Mọ'dyes tsun räjĉan yoshoropaij jéte Jen' mi'indyes ĉaĉaij na mi'in jụjjebitinte Jen'si' p̂eyacdye' mu', mọ' voro'tyeyacsi' tsun jiquej. Yi jiquej mi'in: “Mọ' jam muntyis p̂eyacdye' mu'in, me'dye Jen'si' p̂eyacdye' mu'.” Anicdye me', anic Jen'si' p̂eyacdye' mu', mọ' ferdye'tum carijtaquis ĉojtyi'ĉan mi'in anicjetiñety mi'in, mọ' ñútyinac paj qui rụij bä'yi mi'in. 14Vojity, ñịbe' ji'cavinac jiquej in ĉụi'tyi' chätidye' mi'in mu'ĉan-tyi'-dye in, me'dye chime' mu'in Judeaĉantyi' judío in jị'ñibe'cacsi jiquej in ĉụi'tyi' chätidye' mu'in anicjetety Jen' in, mu'in Jesucristoty in. 15Mu'indye mọmo' judío jiquej in ijate in mu' Jesús Ayo' tsun, yódyem' vóshi'vun u mu'in ijacsi mu'in jaso'mitity p̂eyacdye' Jen' jiquej in. Me'dye q̂uin' mu'indye mọmo' jị'ñibe'can tsun in, mu'in jam ma'jotacsebity Jen' dyijyedye' mu'in, mu'indye mọmo' in räj fáquiti muntyi'tum in. 16Mu'indye mọmo' judío in mạ'je' ji'dyäquibun p̂eyacdye' tsunsi' in mọ' ji'c̣honacsis, paj jam jéyacsi tsun mu'in jam judío in mọ' p̂eyacdye' Jen'si' mu'. Me' mu'in in jam ọ́ya' shupqui' juchaj mu'in, chijäm' tŝọ́taqui in Jen'si' va'tacdye' mu'. 17Vojity, yạjquiyacya' bisha' tsun jiquej mi'in, me' tsan' aty jam cạveyac tsun, ĉojtyi'ĉan qui nam' tsun yejĉoij taca' dyijtuyac mi'in, me' tsan' me' tsun qui nam' ferche' dyijyi mạ'je' tsan' ĉọ́ĉadyeyac quivij. 18Dyijyi tsan' tsun mạ'je' ca'ñibun tsun mi'inya'. Dadam' yụ Pablo, dai' qui' tsan' dyijyi yụ, mạ'je' tsan' ĉọ́ĉadyeyac, Satanás qui nam' ñutschun yụ. 19Tsun fer dyijtuyac mi'in, judyeya' ma'jotyeyac jun' chuc bä'yi mi'in, tsun bise' bijodye' so'minsi' ra' tsun mu' Jesucristo Ayo' tsun jụj ja'yacdye'ya' mi'in. Chime'dye atsijbanya' ra' mu' Jesucristo Ayo' tsun, mi'in ra' jeñej bu'yi chäcdyis bijodye' tsun, me' bu'yi ra' shupqui mi'in mu'si'ya' vej mu' atsijbanya' mu' Jesucristo. 20Me' mi'in, anic ma'joij tsun mi'indyes, räj muntyi' in chäyibun in tsunsi' yụ'tacdye' voro'yedye' mi'indyes.

will be added

X\