1 Thessalonians 1

1Yụ Pablo, yiri'ya' mu'intum yụ Silvano judyeya' Timoteo, yụ sáñe' mi'indyes Tesalónicaĉan bä'yitydyes mi'in anicjetintety Jen'.182 Mi'in Jesucristoty mu' Ayo' tsun, judyeya' Jen'tyi' chime' mi'in, mu' Ạvatusin'tyi' tsun. Tsun cọdyete Jen' paj qui mu' ñịbe'jitidyes so'minac mi'in judyeya' paj qui chime' so'minac ma'jodye' ĉojtyi'ĉandyes mi'in. 2Tsun räjĉan cọdyete Jen' mi'indyes judyeya' yoshoropaij jéte tsun räjen'dyes mi'in. 3Cọdaquiya' Jen'che' tsun, tsun räjĉan dyijtuyac mi'in jun' chuc anicyedye'ya' mi'in cäc̣hä'chutinte Jen' judyeya' mi'in chime' carijtaqui mu'dyes ĉaĉaij na fer mạ'jetinte mi'in. Mi'indye tyum'chutidye'tum bistinte mu' Jesucristo Ayo' tsun, mọ'mun dyijtubiyac dyijyedye' mi'in judyeya' yoshoropaij jéte Jen' tsun mi'indyes. 4Vojity, mi'in anic mạ'jeyacdyety Jen'tyi' mu'. Tsun chị́yeyac mi'in jun' chuc mi'in tsim'tactyi' Jen'tyi' mu' paj qui mu'dyety mi'in. 5Voro'tyeyacya' jiquej jäm'si' p̂eyacdye' Jen'si' mu', jam p̂eyacdye'yam' jéyac tsun, mọ' Jen'si' Ạ'edye' mu' mọ'mun ji'caviyinac ferdye', paj qui chịjve mi'in anic rụijsis mọ' p̂eyacdye' se'vetiñes mi'in. Chime'dye chäyitiĉa' mi'in jun' chuc bä'yi tsun mi'intum jiquej, mọm' dyijtui' tsun mạ'je' nọ́tyeyac mi'in. 6Mi'in chime' tsunsi' jäm'si' dyijyedye' cäc̣hä'chubutiĉa' mi'in, judyeya' Ayo'si'mun dyijyedye' cäc̣hä'chubitinte mi'in chime', me' tsan' jị'ñibe'cac jiquej mi'in, tiĉuñetiñe' qui nam' p̂eyacdye' mu', judyeya' ma'jodye'tum, mọ' so'minacsi' Jen'si' Ạ'edye' mu'. 7Me'dye mu'in in anicjetety Jen' in, räj mu'in Macedoniaĉantyi' in judyeya' Acayaĉantyi' in cäc̣hä'chubunac in dyijyedye' mi'in jun' chuc mi'in cäc̣hä'-chutinte Jen'. 8Räj muntyi' in mi'inya' se'vepte in Ayo'si' p̂eyacdye' mu', jam mu'in mọmo' Macedoniaĉantyi' in judyeya' Acayaĉantyi' in se'vibunac in anicyedye' mi'insi', pai' junaty ĉụi' in chime' se've' in jun' chuc mi'in anicjebitinte Jen'si' p̂eyacdye' mu', mọ'dyes tsun aty jam jemoñe' jéyacsi, ĉaĉaij na aty chịj in. 9Mu'indye jin tsun in aty se've' in jun' chuc mi'in tiĉun'tiĉa' jiquej tsun mi'in, yoqui'dyem' voro'tyeyacya' jiquej tsun u. Chime' mu'in se'vaqui in jun' chuc mi'in yacchutiñe' jiquej jäm'tacdye' in, cäc̣hä'chutinte qui mu' anictyity Jen', mu' tsạ'tyi'. 10Chime'dye mu'in se've' in jun' chuc mi'in bisbitinte Jen'tyi' Ạva' mu', mu' Jesús, mu' jaji'tsa'i-buntyi' Jen', mạyedye'chety ra' jijtuban. Mu' ji'c̣honsin'tyi' tsun paj qui jam tsunche' tŝọi' mọ' tsäqui'sis va'tacdye' Jen'si' mu', me' me' jin tsun muntyi' in, mu'in se'veptety in Jen'si' p̂eyacdye' mu'.

will be added

X\