1 Peter 2

1Mọ'dyes yacchuvac mọ' yoc yoc dyijyedye' a'c̣his mi'in, judyeya' väñädye' chime' mi'in, mijam ra' ac̣hi' dyijyity mi'in jäm' yu'ti mi'in, mijam ra' ji'fajquiyitidyeij dyijyedye' mi'in judyeya' mijam ra' p̂iijtidyeij bä'yi mi'in. 2Yojdyem' joijno' u fer mạ'jebi' tse'si' tashin mọ', me'dye mi'in chime' fer mạ'jebimac anicsis p̂eyacdye' Jen'si' mu', mọ' jeñej bu'yi' säcsedye' paj qui p̂añi Jen'dyes mi'in c̣hon'dye'ĉan mi'in. 3Me' ra' mi'in ĉaĉaij na aty chị́yetinte mu' Ayo' där jäm'yity mu'. 4C̣hẹi'ya'jemac mu' Ayo', mu' jeñej bu'yity mij tsạ'chucsity. Yódyem' mu'in acaijtyi' jiquej u in va'quecte yirity acadyety mij in, me'dye chime' muntyi' in me'jetedye mu'in va'quecte Ayo' in. Mu' qui nam' Jen' jatsim'ti, anic ya'ity Jen'si'ya' vej mu'. 5Me' bu'yidye mi'in chime' jeñej bu'yi tsạ'tyi' mij acadyety jäm'tyes Jen', yóĉandyem' bä'yi' Ạ'edye' um'. Me' bu'ja' tsun Jen'si' bu'ja' aca' mu', mọ'dyes bä'jam' Jen'dyes mi'in jun' chuc mu' mạ'je'. Jen'si'ya' vej mu' carijtaqui ra' mi'in, jeñej bu'yi cudyitity jiquej in mu'che', jam qui nam' cu'dye' so'metinte, yocsi'dye tuyetinte mi'in ĉojtyi'ĉansi', mọ' ma'jotyes Jen'. Jesucristosche' tịj mu', me' so'metinte. 6Mọ'dyes yi' sánacdye': “Yụ nash tsim'te yirity mij, mu' muju'chaty tapchuquity acadyety, anic ya'ijtyi' mu' mij, Jerusalénĉan yụ'te yụ . Tyi chuc anicjetety in mu' mij bu'yity mu'in ra' jam jun' fibidyes shupqui in.” 7Mi'in na anicjetintety Jen' anic ya'ij mi'indyety shupqui, yoctyi' na in va'quecte mọmo' in, yi' ọij sánacdye': “Mu' mij va'quectety acaijtyi' jiquej in, mu'dye q̂uin' muju'cha' yụ'tac acadyety”, yi' sánacdye'. 8Chime'dye yocsi' sánacdye' yi': “Uts mij me'dyety yụ'tac ta'chitidyety muntyity in paj qui mu'che' tach tŝọij in”, yi' sánacdye'. Mu'in me' tach tŝọijtyi' in ĉaĉaij na mu'in va'quequety mọ' p̂eyacdye' in, mu'dye Jen' jä'miij me' bu'yi yụ'tacsi mu'in me'tyity in. 9Mi'in qui nam' tsim'tactyi' Jen'ya', anic Jen'dyety mi'in, jeñej bu'yi cudyitity Jen'che' mi'in, me' carijtaqui Ayodyes mi'in, judyeya' chime' ĉụi'tyi' muntyi' mu', me' bu'yi pạrejjinac mi'in. Mu' fayinac mi'in judyeya' yu'nac mi'in paj qui jị'chiqueyacsi muntyi' mi'in mọ' därsi' mạ'jitidyes mu', jun' chuc mu' ji'c̣honnac mi'in tojmadye'ĉan bä'yity jiquej mi'in, q̂uin' qui nam' yu'tyinac mạij bu'yedye'ĉan mi'in. 10Tashche'dyem' jiquej mi'in jam Jen'tyi' mi'in, q̂uin' qui nam' aty Jen'tyi' muntyi' mi'in. Tashche' jiquej jam ñịbe' ĉúnac mi'in, q̂uin' qui nam' aty ñịbe' ĉúbunac mi'in. 11Chätidye' mạ'jeyacdyety yụ, mi'in jam úĉandyety mi'in, ọij jam ĉụi'si' bä'yedye' mi'in. Mọ'dyes yụ ferdye'ya' jéyac mi'in, yacchuvac a'c̣his dyijyedye' a'si' mi'in, mọ' räjĉan fáquitis jäm'si'tum dyijyedye' ạ'edyes mi'in. 12Jemoñe' rụij bä'yi mi'in mu'insi'ya' vej mu'in jam anicjetetyya' Jen' in. Me' rụij bä'yi jụijya' mi'in, me' ra' tsan' ñäñinac in, väñädye'ya' ji'me'tyinac in, mu'in qui na ra' cavibunac in jäm'si' dyijyedye' mi'in, chat qui ra' aty ayijya' tupudye', jị'cäts yụ'tacsi ra' mu' Jen' mu'in ra' chime' tima'quete in mi'indyes. 13Cäc̣hä'chucdye'ya' Ayo' mi'in, jemoñe' mu'in chicacsi räj jacchety ayo' mi'in. Chiquemac mu' muju'chaty ayo', 14judyeya' mu'in uya'yaty chime' in, ĉaĉaij na mu'in yụ'tac in muju'chatyya' ayo' paj qui mu'in so'macsi va'tacdye' in mu'in ac̣hi' bä'yity in, judyeya' paj qui tima'cacsi in mu'in rụij bä'yity in. 15Jen' mạ'je' paj qui rụij bä'yi mi'in, paj qui me' ji'c̣hu'c̣huyacsebi p̂eyacdye' mu'in itŝi' jety dyijyedye' in. 16Aty c̣hon'dye'ĉan Jen'dyes mi'in, aty jam úñedye'ĉan mi'in. Me' tsan' me' jam qui na ram' cäj dyijyi mi'in judyeya' yi mi'in: “Jesha', tsun aty c̣honja', q̂uin' jun' chuc mạ'jeja' bä'ja' tsun tupuj me' jäm'taĉa'”, jam ra' me' yi mi'in. Dam'dye jäm' rụij bä'yi mi'in, yojdyem' Jen'tyi' úñity um', me' bä'jam'. 17Âräjjeyac-sevac räj muntyi' in, mạ'jeyacsejam' mu'in chime' anicjetety Jen' in, irijyevac Jen'che' chime', chiquemac mu' muju'chaty ayo' Romaĉantyi'. 18Mi'in úñity jäm'yedye'tum chiquemac ĉụi'tyi' ayo' mi'in, jam ra' mu'in mọmo' chicacsi mi'in, mu'in jäm'yity in judyeya' jam ashyity in, chiquemac chime' mu'in voro'shaquity ayo' mi'in. 19Jesha', jị'ñibe'cac jụijya' mi'in, me' tsan' itŝity juchaj mi'in, jemoñe' dyijyim' Jen'che' mi'in, mọ' mu' ma'jotye' Jen'. 20Ĉụi'si' juchaj ji'me'tyinac va'tacdye'ya' jụijya' mi'in, me' tsan' tyum'chuti-dye'tum ji'cajñetiñe' jụijya' mi'in, mọ' jam jäm' shupqui' mi'indyes. Rụij chat bä'yi jụijya' mi'in, me' tsan' me' jị'ñibe'canac jụijya' in, tyum'chutidye'tum ji'cajñetiñe' jụijya' mi'in, mọ' ma'jotye' Jen'. 21Mọ' nash dyijyedye' Jen'si' mu' fayinacya' jiquej, mu' mạ'je' paj qui mi'in cäc̣hä'chubitinte Jesucristos dyijyedye' mu', jun' chuc mu' tyum'chutidye'tum ji'cajñise ñịbedyes mu', yoqui'dyem' ñịbe' cạvise tsundyes jiquej u. 22Mu'si' jam méquis juchaj mu' mijam väñädye' mu'. 23Me' tsan' fạra'ñete jiquej in, mu' qui nam' jam vortacsi, me' tsan' jị'ñibe'cate in, jam qui nam' jun' c̣hojvacsi, Jen'chem' ĉúti mu' paj qui ñutsjajiti, mu'dye Jen' rụij jị'cäts yụ'tacsity juchadye'ya' muntyis mu'in. 24Mu'dye Cristo ĉụi'si'ĉan a' mu' cabusin' juchaj tsun, croshche' ijac mu', mu'tum sänja' tsun paj qui aty jam jun'sin' juchaj tsun, paj qui rụij bä'ja' Jen'dyes. Mu' nash jị'ĉojtye' are'redye' tsundyesi' paj qui tsạ' bu'ja' Jen'dyes. 25Mi'in jiquej yojdyem' moñis oveca o, me' jiquej mon'dye'ĉan bä'yi mi'in, q̂uin' qui nam' aty caman'yeban mi'in Ayo'ya', q̂uin' aty cäc̣hä'chutinte, mu' nash ĉujcanac mi'in judyeya' ñutsjinac chime'.

will be added

X\