1 Peter 1

1Yụ nash Pedro jutactyi' Jesucristoty mu', yụ vorjeyac räj mi'in tsim'tactyi' Jen'tyi' mi'in, pai' bä'yity mi'in yocsi'ĉaĉan bä'yedye' jam ĉụi'si' mi'in: Pontoĉan bä'yity mi'in judyeya' Galaciaĉan, judyeya' Capadocia-ĉan, judyeya' Asiaĉan judyeya' Bitiniaĉantyi' chime' mi'in, mu'ĉaĉan bä'yi mi'in. Ọij sánacdye' mi'indyes junanaj ĉụi' bä'yity mi'in. 2Jen' Ạvatusin'tyi' tsun, mu' ĉụi'si'ya' dyijyedye' mu' jä'miij tsim'tyinac jiquej mi'in. Ĉụi'si' Ạ'edye' mu' yu'tyinac mi'in paj qui mu'dyety Jen'dyety mi'in. Yu'tyinac chime' paj qui chiquetinte mu' Jesucristo judyeya' chime' paj qui c̣hicon'jibunac ĉojtyi' mi'in ĉụi'si'ya' chäsh mu' Jesucristos. Yụ cọdyete Jen' paj qui ñịbe'jitidyes mu' so'minac mi'in, paj qui chime' so'minac ma'jodye' ĉojtyi'ĉandyes mi'in, paj qui jam quijadye'tum so'minac. 3Tima'queja mu' Jen', mu' Jesucristoty Jen' mu', Ayo' tsun. Mu' där ñịbe' ĉúsin'tyi' tsun, mọ'dyes qui tsun ji'na'ibusin' cuvij, aty vañinjebajteya' mu' Jesucristo, tsun chime' tsạ'chusin' Jen'dyes. ̣Q̂uin' aty jam mọ' fibis anicyedye' tsun, Jen' ra' so'misin' mọ' bisva'quejas tsun. 4Mọ' so'misin'si' ra' tsun mu' Jen' anic där jäm'si' mọ', mạyedye'ches, mọ' ra' jam jun' tạbai'si' mijam ra' mọtsis, mijam ra' jụ'ñisĉan mạyedye' jadyic mọ', mu' Jen' jäm' yu'tyiyinacsi', mu' ji'bisiyinacsi' mi'in. 5Anicye-dye'ya' mi'in mu' Jen' ferdye'ya' ra' mu' yejĉoij ĉujcanac mi'in jun' qui' chuc ayijban'ya' jadyiquisĉan tupudye', chat qui ra' so'minac c̣hon'dyedyes mạyedye'ches. 6Dyijtutiñe' jụijya' mọ' q̂uin', tupuj ma'jodye'tum ra' bä'yi mi'in. Me' tsan' q̂uin' ñịbe' cạvetiñe' mi'in, me' tsan' yịjyi ñịbedyes jị'ĉojtiñe'ya' mi'in, jemoñe' qui nam' mọ' jị'ĉojtacdye' jị'ĉojtiñe' mi'in. 7Mọ' ra' jorojĉanyi' chị́yac jam fibis mọ' anicyedye' mi'in, mọ' anicsis mọ'. Jesha', mu' mọtsity oro, tŝijya' qui nam' jämi, paj qui yedyej mu' shupqui, me' bu'yi'dye mọ' chime' anicyedye' tsun, mọ' chị́yac ñịbedyesya'. Jam farajjeja' anicyedye' Jen'che' jụijya' tsun aty ji'jiija'ya' ñịbedyes, mọ' jorojĉan ji'ĉuyisin' jam fibis mọ' anicyedye' shupqui' tsun, anicsis mọ'. Me' shupqui' anicyedye' jụijya' tsun, Jen' ra' ma'jotyisin' judyeya' ra' tima'quisin' tsun aty atsijbanya' mu' Jesucristo, chat qui ra' mu'che' bä'ja' tsun mu'si'ĉan mạijquedye' mu'. 8Mi'in me' tsan' jambi' cạvetinte mu' Jesucristo q̂uin', mạ'jetinte qui nam'. Me' tsan' jam cạvetinte mi'in, anicjetinte qui nam' mi'in, judyeya' därsi'tum ma'jodye' cäc̣hä'chutinte mi'in, aty jam ọ́ya' jun'dyem' tupuj cha'sheja' mọ' ma'jodye' mi'in, 9ĉaĉaij na aty ji'c̣honnac Jen', anicyedye'ya' Jesucristoche' mi'in, so'mac mi'in c̣hon'dyedyes mi'in. 10Mu'in jaso'mitity p̂eyacdye' Jen' jiquej in jä'miij tashche' p̂iijbusin' in c̣hon'dyedyes tsun, jun' chuc ra' ji'c̣honsin' tsun q̂uin' mu'. Mu'in fer tsan' dyijtui' in, judyeya' ji'chäyiti in ọij p̂eyacdye' mu', mạ'je' tsan' chị́ye' in jun' bu'yi' chuc ra' mọ' c̣hon'dyedyes ñịbe'jisin'si' ra' tsun q̂uin' mu' Jen'. 11Mọ' qui nam' Ạ'edye' mu' Cristos ĉojtyi'ĉansi' mu'in jaso'mititysi' p̂eyacdye' Jen' jiquej in, mọ' jị'chiqueyacsi' tashche' jun' chuc ra' ñịbe' cạve' mu' Ji'c̣honacsity muntyi', aty ra' me'si' chat q̂uin'dyem' ra' muju'cha' fer bu'yi yụ'tac mu', judyeya' ra' tima'cac juban. Mu'indye jaso'mitity p̂eyacdye' Jen' in mạ'je' tsan' chị́ye' jäm' in tyi buty ra' mu', chime'dye jun'si' buty ra' tupudye' ayij mu'. 12Jam qui nam' jun' tupuj chị́ye' in, Jen' qui nam' jéyacsi jun' chuc mọ' p̂eyacdye' sáñe'si' in, mọ' jam mu'indyes in, jambi' ra' mu'indyes in cạ̈tsi', tsundyes qui nam' mọ' p̂eyacdye'. Anicdye me', mi'in q̂uin' aty se'vacsebi mi'in p̂eyacdye' mu'in voro'tacsity in jäm'si' Jen'si' p̂eyacdye' mu'. Mu'in so'mac in Jen'si' Ạ'edye' mu', mạyedye'che' jijtui'si' mu', mọ'si'ya' ferdye' voro'tacsi in. Mu'in na anjer in mạ'je' tsan' chäyibusin' in mọ' c̣hon'dyedyes tsun muntyis tsun. 13Mọ'dyes jemoñe' ji'fercaqui dyijyedye' mi'in, judyeya' ra' jäm' ĉujcati mi'in. Dyijtuvac jä'mij ñịbe'yedyes ra' mi'in, mọ' so'minacsi' ra' Jen' aty atsijbanya' mu' Jesucristo, mọ' bisvac. 14Chiquemac Jen', mu' Ạvatunactyi' mi'in. Yacchuvac tashches dyijyedye' mi'in, jam ra' jeñej jiquej bä'yi mi'in jambi'dyem' chị́yetiñe'ya' mi'in mọ' p̂eyacdye', q̂uin' aty yocdye. 15Mu' Jen' fayinactyi' mi'in, anic rụijtyity mu', jemoñe' mi'in chime' räjĉan rụij bä'jam', mijam ra' täjtiñe' a'c̣his jedye', 16ĉaĉaij na yi' sánacdye': “Rụij bä'jam' ĉaĉaij nash yụ rụijtyity”, yi mu' Jen'. 17Jun'si' chuc cọdyetinteya' mu' Jen', me' jétinte mi'in: “Tsuntyi' Jen'”, jétinte. Mu' jị'cäts yụ'tacsity juchadye'ya' räj jacchety muntyi' in, anic cäts cạvacsi mu', jun' chuc bä'yi in. Mọ'dyes jemoñe' yejĉoij irijjetinte mu', jun' qui' chuc farajjetiñe'ya' ọij jac. 18Chịj mi'in mu' Jen' aty ji'c̣honnac mi'in judyeya' meijjityinac a'c̣his dyijyedye' mi'in, mọ' ji'chäyinacsi' vóshi'vun mi'in. Chịj tyu' u mi'in mọ' mọtsis jedye' jacches, querec̣ha, oro judyeya' plata, jam jo'mesya' ji'c̣honnac mu' Jen', 19me'dye Cristosya' chäsh mu', mọ' mọjo'cha' ya'i'si', mọ'ya' ji'c̣honnac mu' Jen'. Ĉụi'si' chäsh mu' yụ'taqui mu' Cristo, ji'ijatiya' jiquej muntyidyes juchaj, jeñej jam jụ'ñis oveca, me' bu'yi mu'. 20Jambi'dyem' jäm'tacya' ọij jac jiquej, aty mu' tạ'caty jatsim'taque mu' Cristo paj qui ijac tsundyes. Jadyiquisĉan qui nam' tupudye', q̂uin'dyem' ji'caviti mu' paj qui ji'c̣honnac mi'in. 21̣Q̂uin' aty Cristoya' mi'in anicjetinte Jen' mi'in, mu' vañinjebajtety judyeya' muju'cha' qui fer bu'yi yụ'te. ̣Q̂uin' chat mi'in anicjetinte Jen', chịj mi'in mu' ra' jị'cätse' p̂eyacdye' mu'. 22̣Q̂uin' chat aty chiquebitinte rụijsis p̂eyacdye' Jen'si' mu', chicacdye'ya' mi'in c̣hicon'jibunac ĉojtyi' mi'in. ̣Q̂uin' aty rụijsisya' dyijyedye' vaj meij mạ'jiti mi'in vaj vojity mi'in. Me' bä'jam' mạ'jitiĉam' räj ĉojtyi' mi'in. 23Mi'in aty quivij na'ebantyi' mi'in, aty jam jacchetyche' jen' mi'in sän'dyedyety. ̣Q̂uin' tsạ'tyi'che' Jen' na'eban mi'in, mu' jam jụ'ñisĉan mạyedye' säñity, mu' ạvatunactyi' p̂eyacdye'ya' mu'. Mọ' p̂eyacdye' mu' tsạ'chucsis, mọ' ra' jam jụ'ñisĉan mạyedye' mọtsis. 24Mọ'dye yi' sánacdye': “Jacchety muntyi' in jeñej bu'yi därä' in, mọ' fer bu'yedye' mu'in mọ' jeñej bu'yi' därä'si' jáme mọ'in. Mọ' därä' jam men me' bu'yi' chat qui sacñi' mọ', mọ' na jáme mọ' vai'joi'. 25Ayo'si' na p̂eyacdye' mu', jam ra' jụ'ñisĉan mạyedye' mọtsim'”, yi' sánacdyem'. Mọ'dye mọmo' jäm'si' p̂eyacdye', mọ' voro'tyinacsi' jiquej in.

will be added

X\