1 John 5

1Tyi chuc anicje' mọ' p̂eyacdye' yi'si': “Mu' Jesús mu' nash Ji'c̣honacsity muntyi' mu' bistety jiquej in”, mu' nash Jen'tyi' ạva' mu'. Jesha', tsun muntyi' tsun mạ'jeja yirity muntyi' jụijya', chime'dye mạ'jepja ạva' mu'. 2Anic mạ'jeja Jen' jụijya' judyeya' chiquepja p̂eyacdye' mu', mu'inmun chime' mạ'jeyacseja' mu'in Jen'tyi' ạva' mu'. 3Mọ'ya' tupuj chị́ja' tsun rụij mạ'jeja Jen', ĉaĉaij na chiquepja p̂eyacdye' mu'. Mọ' p̂eyacdye' mu' mijam carij chicac, 4ĉaĉaij na mu'in Jen'tyi' ạva' in ji'peñe' in mọ' jacches dyijyedye'. ¿Jedye'ya' buty tupuj ji'penja' mọ' jacches dyijyedye'? Anicyedye'ya' mọmo' Jen'che', mọ'yam' tupuj ji'penja' mọ' jacches dyijyedye'. 5¿Tyi buty tupuj ji'peñe' mọ' jacches dyijyedye'? Mu'in anicjety in mọ' p̂eyacdye' yi': “Mu' Jesús, mu' nash Jen'tyi' Ạva' mu'”, mu'in mọmo' ji'peñe' in. 6Jesús atsij jiquej ojñi'ya' ji'chojti, judyeya' ĉụi'si' chäsh yụ'taqui chime' mu'. Jam ojñi' mọmo' jị'ĉoi', ĉụi'si' chäsh yụ'taqui chime' mu'. Chime'dye mọ' Jen'si' Ạ'edye' mu' mọ' rụij p̂eyaquis, chimu'dye mọ' p̂eijte. 7Chibin mọ'ya' p̂eijtes in mu' Jesucristo jun' chuc mu' Jen'tyi' Ạva' mu': 8Jen'si' Ạ'edye' mu', judyeya' mọ' ji'chojtidye' ojñi'ĉansi' mu', judyeya' ĉụi'si' chäsh chime' mu'. Ọij chibindye dyijyedye' in vaj cäts bu'yi' in. 9Jesha' tsun muntyi' tsun vatyquej anicjeyacsebija' muntyis jị'chicacdyes p̂eyacdye', mọ' qui nam' Jen'si' p̂eyacdye' mu' dadam' mọjo'cha' ferdye'tumsi' mu', mọ'ya' mu' jị'chiqueyacsi mu' Jesucristo mu' nash Jen'tyi' Ạva' mu'. 10Tyi chuc anicjeptety Jen'tyi' Ạva' mu', mu'in me'chui' in ọij p̂eyacdye' Jen'si' mu' ĉojtyi'ĉan mu'in, mọ' p̂eyes mu' Jesucristo. Tyi chuc jam anicjete Jen' in, mu'in jeñej väñäijtyi' Jen' yụ'te in, ĉaĉaij na mu'in jam mạ'je' anicjepte p̂eyacdye' in, mọ' p̂eijtes Ạva' mu'. 11Ọij p̂eyacdye' ji'chäquiyisin' jun' chuc mu' Jen' tsạ'chusin' tsun paj qui Jen'yadyety tsun, chịmo'dye ji'chäquiyisin' tsun jun' chuc mu'dye Ạva' mu' tsạ'chusin' tsun. 12Mu'in me'chuptety in Jen'tyi' Ạva' mu', mu'in Jen'yadyety in, tyi chuc jam me'chuptety in mu'in jam Jen'yadyety in. 13Ọij q̂uin' sáñe' yụ mi'indyes anicjeptintety Jen'tyi' Ạva' mu', yụ jéyac ọij paj qui jäm' chịj mi'in, mi'in aty Jen'yadyety mi'in. 14Tsun jam noi'yedye'tum cọdyeja Jen', chị́yeja mu' jụjjibusin'tyi' cọdacdye' tsun jedye' chuc cọdyejaya' mu' jun' chuc mu'si' dyijyedye' jụijya' mu', mu' ra' se'vibusin' cọdacdye' tsun. 15Chime'dye chị́ja' mu' Jen' se'vibusin' cọdacdye' jụijya' tsun, me'dye ra' chime' chị́ja' tsun mu' ra' jụjjibusin' cọdacdye' tsun cọdyejaya' mu'. 16Cạveptinte jụijya' vojitysi' juchaj mu', jam qui nam' tui'si' sän'dye' jụijya' mu', tupuj cọdyetinte Jen' mu'dyes, chat qui ra' mu' jạtsa'chuti, jam ra' sän'dye' jaso'miti. Mọ'ya' juchaj ji'sänsin'si'. Yụ jéyac jam ra' cọdyetinte Jen' mu' me'tyitydyes juchaijtyidyes. 17Räj a'c̣his jedye' mọ' nash juchaj shupqui', mọ'ya' qui nam' juchaj jam ji'sänsin'si' tsun. 18Chị́ja' tsun, mu'in Jen'tyi' ạva' in jam yejĉoij juchaij in, ĉaĉaij na Jen'tyi' Ạva' mu' ñutsjeyacsi, mọ'dyes qui mọ' Sọyo' jam jun' täjtacsi'. 19Chime'dye chị́ja', tsun nash Jen'tyi' tsun, chị́ja' chime' mọ' Sọyo' räj bächäcsi' jacchety muntyi' in. 20Chime'dye chị́ja' tsun aty atsij Jen'tyi' Ạva' mu', mu' so'misin' ĉojtyi'ĉandyes dyijyedye' paj qui tupuj chị́yeja mu' anictyity Jen'. Tsun anictyitytum bu'ja' Jen' judyeya' Jesucristotum bu'ja' chime', Jen'tyi'tum Ạva' mu'. Mu' Jesucristo anictyity Jen' mu' tsạ'chusin' tsun judyeya' yu'sin' paj qui Jen'yadyety tsun. 21Chätidye' ạva' yụ, jam ra' jacches jedye' jen'tutiñe' mi'in.

will be added

X\