1 John 4

1Chätidye' mạ'jeyacdyety yụ, jam ra' cäc̣hä'chucsebi mi'in mu'insi' ji'chäyitidye' jụ'ñity chuc yity in: “Yụ so'mintyi' p̂eyacdye' Jen'.” Tashche' chum ra' jäm' se'vebitinte p̂eyacdye', vatyquej Jen'si' Ạ'edye' jaso'miti jụijya', vátyequej ra' yoctyis. Ĉaĉaij na q̂uin' dai' cäjsis ji'chäyitidye' cại'tyi' in, jeñej bu'yi jaso'mitity p̂eyacdye' Jen' in, me' bu'yi yu'ti in. 2Mọ'ya' ra' tupuj chị́yacsi mi'in mu'in rụij p̂eyaquity in, tyi chuc yity in: “Mu' Jesucristo rụi'cu'ĉan ji'caviti úche' jacche' jiquej”, yi in, mu'in me' ji'jäctety in, mu'in me'chupte in Jen'si' Ạ'edye' mu'. 3Tyi chuc jam me' yity in, yi mọmo' in: “Jam rụi'cu'ĉan ji'caviti jiquej mu' úche'”, yi in, mu'in me' ji'jäctety in mu'in jam me'chupte in Jen'si' Ạ'edye' mu', mọm' dyijyedye' cạpte in mu' fạ́quetetysi' Cristo, mu' se'vetintety atsij ra' mu'. Yụ na jéyac q̂uin', aty q̂uin' shupqui' dyijyedye' mu'si', aty mọ'yam' ọ́che' jacche'. 4Chätidye' ạva' yụ, mi'in nash Jen'tyi', aty ji'penacsebi mi'in dyijyedye' mu'in cäj jị'chiyacsitysi' in, ĉaĉaij na Jen'si' Ạ'edye' mu', mọ' me'chuptintes mi'in anic muju'cha' bu'yi' mọ', ọya'ya' mọ' Sọyo' me'chucsis tsan' jacchety muntyi' in. 5Mu'in na jacches mọmo' dyijyedye' p̂eye' in, mu'in jacchety in se'vacsebi p̂eyacdye' mu'in, ĉaĉaij na jacchety mọmo' mu'in in. 6Tsun qui nam' Jen'tyi' tsun, mu'in chị́yetety Jen' in mu'in se'vibusin' p̂eyacdye' tsun, mu'in na jam Jen'tyi' in mu'in jam se'vibusin' p̂eyacdye' tsunsi' in. Chị́ja' tsun tyi chuc se'vibusin' p̂eyacdye' in, mu'in me'chupte in Jen'si' Ạ'edye' mu', mọ' p̂eye'si' rụijsis p̂eyacdye', judyeya' chime' chị́ja' tsun tyi chuc jam se'vibusin' p̂eyacdye' in, mu'in me'chubi' sọyos dyijyedye' in, mọ' p̂eyes cäjsis p̂eyacdye'. 7Chätidye' mạ'jeyacdyety yụty mi'in, jemoñe' vaj meij mạ'jitiĉa' tsun, ĉaĉaij na mu' Jen' yụ'tyety mạ'jitidyes. Tyi chuc mạ'jeyacsity, mu' nash Jen'tyi' ạva' mu', mu' chị́yete Jen'. 8Tyi chuc jam mạ'jeyacsity, mu' jam chị́yete Jen' ĉaĉaij na mu' Jen' mạ'jeyacsity bu'yi. 9Jen' ji'caviyisin' mạ'jitidyes tsundyes, jun' chuc fer mạ'jisin' tsun, jutaqui qui yiritytyity Ạva' mu', úche' quim' atsij mu' jacche', paj qui mu' tsạ'chusin' judyeya' Jen'yadyety yu'sin' chime' tsun, me' mu' Jen' ji'caviyisin' mạ'jitidyes mu'. 10Mọ' anicsis mạ'jitidyes jam mọ' tsunsi', jun' chuc tsun mạ'jeja Jen', mọ' anicsis mạ'jitidyes Jen'si' mu', jun' chuc mu' mạ'jisin' tsun, mọ'dyes mu' jutaqui Ạva' mu', paj qui mu' ijac tsunsidyes juchaj, mu'tyi'ya' Ạvam' vayac juchaj tsun. 11Chätidye' mạ'jeyacdyety yụty mi'in, cạveja' jun' qui' fer mạ'jisin' Jen' u, me'dye ra' tsun chime' vaj meij mạ'jitiĉa'. 12Mijam yirity muntyi' cạvete Jen' in. Me' ra' chat vaj mạ'jitiĉa' bä'ja' tsun, mu' ra' Jen' yejĉoij tsuntum judyeya' ra' mu' rụijsistum mạ'jitidyes mạ'jisin' tsun. 13¿Jun' buty tupuj chị́ja' me' q̂uin' tsun Jen'tum yejĉoja' judyeya' mu' yejĉoij tsuntum? Ĉaĉaij na mu' so'misin' ĉụi'si' Ạ'edye' mu', mọ' me'chupja tsun. 14Jen' jutaqui Ạva' mu' jiquej paj qui ji'c̣honacsi jacchety muntyi' in. Tsun nash cạvepte, mọ'dyes qui tsun jị'chiqueyacsi muntyi' in. 15Tyi chuc me' yity in: “Mu' Jesús Jen'tyi' Ạva' mu'”, mu' me' yity jụijya', Jen' yejĉoij mu'tum judyeya' mu' yejĉoij Jen'tum chime'. 16Me' tsun chị́yepja mạ'jitidyes Jen'si' mu' jun' chuc mu' mạ'jisin' tsun, mọ' anicjepja tsun, ĉaĉaij na mu' Jen' mạ'jeyacsity bu'yi. Tyi chuc yejĉoij mạ'jeyacsity, mu' nash yejĉoij Jen'tum judyeya' mu' Jen' yejĉoij mu'tum chime'. 17Mu' Jen' cätssistum dyijyedye' mạ'jisin' tsun mọ'dyes qui ra' sóñi'yeja' tsun aty cạveja'ya' mọ' tupudye' Jen'si' mu', aty ra' jị'cäts yụ'tacsiya' muntyi' in, me' ra' chat aty jam quijnacdye'tum cạveja tsun. Jesha', yojdyem' Cristo u, me' bu'ja'dyem' úche' jacche'. 18Tyi chuc mạ'jeyactyi' Jen'ya', mu' jam noi'yedye'tum bä'yi atsvun, chị́yepja mạ'jitidyes mu' jun' chuc mu' cätssistum dyijyedye' mạ'jisin', mọ' ra' meijjityisin' quijnacdye' tsun. Tyi chuc quijnacdye'tum bä'yity, mọ' mu' dyijtui' va'tacdye' ra' mu'. Tyi chuc noi'yedye'tum bä'yi mu' jambi' rụij mạ'jiti-dyestum bä'yi. 19Tsun mạ'jeyacsejaty ĉaĉaij na mu' Jen' tashche' mạ'jisin' tsun jiquej. 20Tyi chuc yity: “Yụ mạ'jetety Jen'”, me' tsan' yi mu', fạ́codye'tum qui nam' cạvacsiya' vojity jụijya' mu', mu' me' yity väñädye' shupqui' mọ' p̂eyacdye' mu'sim'. Jam mạ'jeja mu' cạvejaty vojity jụijya' tsun, dadam' ra' jam mạ'jeja mu' Jen', mu' jam cạvejaty. 21Jesucristo so'misin' ọij p̂eyacdye' mu', yi': “Tyi chuc mạ'jete Jen' jemoñe' mạ'jeyacsi vojity chime' mu'.”

will be added

X\