1 John 2

1Chätidye', mạ'jeyacdyety ạva' yụ, q̂uin' yụ jéyac ọij sánacdye'che' paj qui jam juchayebanve mi'in. Me' qui tsan' juchaijya' mi'in, mu'ya' qui nam' yirity jäm' yu'sin'tyi' Jen'ya' tsun, mu' nash Jesucristo rụijtyity. 2Mu' ji'sän'dyity tsundyes, vayacjityisin' juchaj tsun, jam yiritydyes mọmo' säñi mu' räjtumdyes tsun, mu' vayacjetyetacsi räj muntyis juchaj mu'in, úche' bä'yitysi' in. 3Jesha' chiquepja jụijya' p̂eyacdye' Jen'si' mu', mọ'ya' tupuj chị́ja' anic chị́yeja Jen'. 4Tyi chuc yity: “Yụ nash chị́yete Jen'”, yi jụijya', jam qui nam' chiquepte p̂eyacdye' jụijya' mu', mu' me' yity väñädye' mọ' p̂eyacdye' mu'sim', mijam méqui' rụijsis dyijyedye' mu'. 5Tyi chuc chiqueptety p̂eyacdye' jụijya' mu', mu' chat rụij mạ'jitidyestum bä'yi, me' jụijya' tsun, tupuj chị́ja' Jen'tum yejĉoja' tsun. 6Tyi chuc yi: “Yụ yejĉoij Jen'tum”, mu' me' yity jemoñe' me' bä'yi yojdyem' bä'yaque jiquej u mu' Jesucristo. 7Chätidye', mạ'jeyacdyety yụ, jam mụi'sis ọij p̂eyacdye' jéyacsi' yụ mi'in q̂uin' sánacdye'che', mọ'dye tashches se'vetiñes jiquej, yi' paj qui mạ'jeyacsity bä'yi mi'in, mọ'dye yụ jéyac q̂uin'. 8Me' tsan' me', ọij p̂eyacdye' jéyacsi' yụ q̂uin' mi'in, mụi'sis bu'yi' qui nam' shupqui', mọ' jị'cätses mu' Cristoya', judyeya' mi'in chime' q̂uin', ĉaĉaij na mọ' tojmadye' aty ọya'ya'quejĉoi' q̂uin', mọ' na rụijsis mạijquedye' mạijyeban'. 9Yirity muntyi' me' tsan' yi: “Yụ cäc̣hä'chui'tyi' mạijquedye'”, yi jụijya' mu', yejĉoij qui nam' fạ́codye'tum cạvacsi vojity jụijya', mu' me'tyity yejĉoij taca' tojmadye'ĉan bä'yi. 10Mu' na mạ'jeyacsity vojity in, mu' chat yejĉoij mạijquedye'ĉan bä'yi, mu' ra' chat jam jedye' jajiva'chati juchajĉan. 11Mu' na fạ́codye'tum cạvacsity vojity mu', mu' tojmadye'ĉantyi', judyeya' tojmadye'ĉan chime' mi'i, mijam naijti juna' chuc tyeij ĉaĉaij na mọ' tojmas tyum'jajibuti vej mu'. 12Chätidye', mi'in mạ'jeyacdyety ạva' yụ, yụ jéyac ọij q̂uin' sánacdye'che' yi' jun' chuc mu' Jen' vayacjibunac juchaj mi'in, ĉaĉaij na mu' Jesucristo ji'sän'dyi tsundyes. 13Mi'in isho' muntyi' mi'in, yụ jéyac q̂uin' ọij ĉaĉaij na mi'in aty chị́yetinte mu' tạ'caty. Mi'in chime' nanamuntyi' mi'in, yụ jéyac q̂uin' ọij ĉaĉaij na aty ji'pentiñe' Sọyo'. 14Chime' mi'in ạva', yụ jéyac q̂uin' ọij, ĉaĉaij nash mi'in chị́yetinte mu' Jen' Ạvatusin'tyi' tsun. Mi'in isho'muntyi' mi'in, yụ jéyac q̂uin' ọij ĉaĉaij na mi'in chị́yetinte mu' tạ'caty. Mi'in nanamuntyi' mi'in, yụ jéyac q̂uin' ọij, ĉaĉaij na mi'in aty fer bu'yi, me'chuptinte Jen'si' p̂eyacdye' mu', judyeya' aty ji'pentiñe' mọ' Sọyo'. 15Jam ra' mạ'jetiñe' jacches jedye', mijam ra' chime' mạ'jebitiñe' dyijyedye' mọ'. Tyi chuc me'tyity jụijya' mạ'jety jacches jedye', mu' jam jun' mạ'jete Jen', mu' Ạvatusin'tyi' tsun, 16ĉaĉaij na ọ́ches jacches jedye' räjtumdye dyijyedye' mọ', mọ' jam jun' Jen'si', ọ́chesdye mọmo'. Me' fer dyijtuja' a'c̣his dyijyedye' a'si' jụijya' tsun, judyeya' chime' fer mạ'jeja' räj mọ' cạveja'si' ĉụi'si'ya' vej tsun, judyeya' va'bunnacdye'tum bä'ja'ya' tsun, mọ' nash dyijyedye' jacches, jam Jen'si' mu'. 17Ọij jac räjtumdye a'c̣his dyijyedye' mọ', räj ra' mọtsim', mu' na chiqueptety Jen'si' dyijyedye', mu' ra' jam jụ'ñisĉan mạyedye' mọtsi. 18Chätidye' ạva' yụ, q̂uin' aty c̣hẹi'ya' jadyiquis tupudye'. Mi'in se'vaqui jiquej atsij ra' mu' fạ́quetety Cristo. Me'dye q̂uin' aty mu'ya' dai' in fạ́quetety Cristo in, mọ'ya' tupuj chị́ja' aty c̣hẹi'ya' tupudye' ayiban'. 19Mu'in me'tyity in, me' tsan' tsuntumtyi' jiquej in, shubantyi' qui nam' in, ĉaĉaij na jam ĉojtyi'ĉan cäc̣hä'chute Jen' in, jam jeñej tsun. Jam me' jụijya' in, a vuty jam farajjisin' u in. Mu'in me'tyity in jam jẹjcai' cäc̣hä'chute Jen' in, mọ'ya' tupuj chị́ja' tsun mu'in jam ĉojtyi'ĉan cäc̣hä'chute Jen' in. 20Cristo aty so'minac Jen'si' Ạ'edye' mu', mọ'dyes mi'in aty chị́yetiñety mọ' rụijsis p̂eyacdye'. 21Me' tsan' yụ jéyac q̂uin' ọij sánacdye'che', jam qui nam' yi yụ mi'in jam chị́yetiñe' p̂eyacdye', yụ ọij jéyac ĉaĉaij na mi'in aty chị́yetiñe' judyeya' chịj mi'in mu' cại'tyi' rụijsis p̂eyacdye' mu' jam jun' väñädye' ji'shupque'. 22¿Tyi buty ĉaĉaij mu' väväjñity muntyi'? Mu' yity: “Mu' Jesús jam nash Ji'c̣honacsity muntyi'.” Tyi chuc me' yity, mu' nash fạ́quetety Cristo, mu' va'quectety Jen' Ạvatusin'tyi' tsun, chime'dye Ạva' mu' va'quecbite. 23Tyi chuc va'quecbitety Jen'tyi' Ạva' mu', chime'jajitidye ra' mu' Jen' java'quicdyi. Tyi chuc me'chubitety Jen'tyi' Ạva' mu', mu' ra' Jen' jame'chuti. 24Yejĉojam' me'chuvac mọ' ĉojtyi'ĉan mi'in mọ' p̂eyacdye' se'vetiñes tashches jiquej. Me' jụijya' mi'in, me' ra' chat yejĉoij Jen'tum mi'in judyeya' Ạva'tum mu' chime'. 25Mu' Jesucristo jísin' p̂eyacdye'ya' mu' jun' chuc ra' mu' tsạ'chusin' tsun paj qui Jen'ya' bä'ja' tsun. 26Ọij q̂uin' p̂eyacdye' yụ jéyacsi' mi'in sánacdye'che', mọ' p̂eyacsi' mu'in mạ'je' se' ja'yinactyi' in cäjsisya' ji'chäyiti-dye' mu'in. 27Mi'in na aty me'chubitinte Jen'si' Ạ'edye' mu' ĉaĉaij na mu' Cristo so'minac jiquej. Mọ'dye q̂uin' yejĉoi' mi'intum, aty jam jemontiñe' paj qui yoctyi' ji'chäyinac in, ĉaĉaij na mọ'dye mọmo' ji'chäyinac Jen'si' Ạ'edye' mu', räj jun' jun' chuc rụijsis p̂eyacdye' mọ' ji'chäyinac, mọ' jam väñädye' ji'chäyinac. Chiquebivac mọ' ji'chäyitidye' so'minacsi' Jen'si' Ạ'edye' mu', mọ' yi': yejĉojam' Cristotum. 28Chätidye' ạva' yụ, yejĉojam' Cristotum mi'in, me' qui atsijban jụijya' mu', chat qui ra' sóñi'yedye'tum tiĉun'bajtinte, mijam ra' tsị́cadye'tum mi'in mu'si'ya' vej mu'. 29A nash mi'in chị́yetinte mi'in mu' Jesucristo mu' nash rụijtyity, chị́vac chime' tyi chuc rụij bä'yity in mu'in nash Jen'tyi' ạva' in.

will be added

X\