1 John 1

1Tsun sáñe' ọij mi'indyes p̂eijte tsun mu' P̂eyacdye' bu'yity judyeya' Tsạ'chucsity. Itŝi'dyem' jedye' mọ'yam' jiquej, aty mu' tạ'caty mu'ya'.228 Tsun se'vepte p̂eyacdye' mu', judyeya' cạvete tsun ĉụi'si'ya' vej tsun, judyeya' unya' toco'jete chime' tsun. 2Atsijya' jiquej mu' Tsạ'chucsity, tsun cạvete,229 mọ'dyes qui tsun jéyacsi muntyi' in judyeya' mi'in chime' jị'chiqueyeyac jun' chuc mu' Tsạ'chucsity muntyi', mu' yụ'tacsi paj qui Jen'ya' bä'yi in. Mu' Jen'yaty atsij ji'caviti tsunya', Jen' ji'caviyin tsun. 3Tsun qui jị'chiqueyeyac mi'in ĉaĉaij na cạvete tsun judyeya' se'vete tsun, paj qui Cristoty mi'in paj qui vaj cäts yiri'ya' cäc̣hä'chupja Jen'si' dyijyedye' mu', mu' Ạvatusin'tyi' tsun judyeya' Jesucristosmun dyijyedye' chime', Jen'tyi' Ạva' mu'. 4Mọ'dyes tsun q̂uin' ọij jéyac mi'in sánacdye'che' paj qui cätssistum ma'jodye' bä'yi tsun. 5Ọij nash p̂eyacdye' jin tsun mu' Jesucristo, mọ'dye p̂eyacdye' ji'jiyeyac tsun, mọ' yi': Jen' mạij bu'yity, mu'ya' itŝi' méquis tojmas. 6Me' tsan' yéja' tsun: “Yụ cäc̣hä'chuptety Jen'si' dyijyedye' mu'”, yéja' jụijya', yejĉoja' qui nam' tojmadye'ĉan bä'ja' jụijya' tsun, väñädye' shupqui' mọ' p̂eyacdye' tsun, mijam rụij bä'ja' chime'. 7Cäc̣hä'chuja' jụijya' mọ' mạijquedye' mu', yojdyem' mu' Jen' u mạijquedye'ĉan bä'yi, me' ra' chat vaj cäts cäc̣hä'chupja Jen'si' dyijyedye' mu', judyeya' ra' mu'si' chäsh mu' Jesucristos, Jen'tyi' Ạva' mu', mọ' ra' c̣hicon'jityisin' räj juchaj tsun. 8Chime'dye yéja' jụijya' tsun: “Itŝi' juchaj yụ”, yéja', ĉụi' väñätutiĉa', mijam méquis rụijsis dyijyedye' me'chuja'. 9P̂eijja' na juchaj jụijya' tsun chat qui ra' mu' Jen' vayacjibusin' juchaj tsun, judyeya' ra' c̣hicon'jibusin' räj a'c̣his dyijyedye' ĉojtyi'ĉansi' tsun, ĉaĉaij na mu' Jen' anic rụijtyity judyeya' jị'cätsety p̂eyacdye' mu'. 10Tsun yéja' jụijya': “Itŝi' juchaj yụ”, yéja', jeñej väñäijtyi' Jen', me' shupqui' p̂eyacdye' tsun, mijam chime' me'chupja p̂eyacdye' mu' yoj yi'dyem' sánacdye' um' räj muntyi' juchajtum tsun.

will be added

X\