1 Corinthians 9

1Mi'in aty chịj jun' chuc aty faraj muntyi'ya' yụ, ĉaĉaij na yụ nash anictyity jutactyi' Jen'tyi' mu', ĉụi'si'ya' vej yụ cạvete yụ mu' Jesús Ayo' tsun, judyeya' yụ́dye jụj ja'yeyac mi'in, mọ' jorojĉanyi' yụ anictyity jutactyi' Jen'tyi' mu'. 2Me' tsan' pạrej mu'ya' in jam jụjtyin yụ in, jeñej aty jam jutactyi' Jen'tyi' ĉun u yụ in, mi'in qui nam' jam me', mi'in jụjtiĉa' yụ mi'in jun' chuc Jen' jutin yụ, mọ'dyes yụ́dye jụj ja'yeyac Jen'che' mi'in, mọ' jorojĉanyi' anictyity yụ jutactyi' Jen'tyi' mu'. 3̣Q̂uin' yụ ra' vorjeyacsi mu'in ñäñibuntyi' yụ in jutacdye' yụ. 4Tupuj yụ paj qui carijtacdyedyes Jen'dyes yụ so'mac yụ tsạ' bu'yedyes yụ. 5Chime'dye mọ'ya' jụijya' p̂en yụ anicjetes Jen', a vuty tupuj cạqui u yụ cạyacsiya' yụ Jen'si' p̂eyacdye' mu', yojdyem' vojity u tsun mu'in cạyacsity p̂eyacdye' in, judyeya' ĉụi'tyi' vojity mu' Ayo'tyi' tsun, judyeya' Pedro chime', mu'in cạqui p̂en mu'in. 6Yụ judyeya' mu' Bernabé ¿tsun adac mọmo' me' carijtaqui tsạ' bu'yedyes ĉútiĉa' mi'in? ¿Tsun adac mọmo' jam tupuj so'mac tsạ' bu'yedyes tsun, me' ĉútiĉa' tsun mi'in, jam jeñej yoctyi' cạyacsity p̂eyacdye' in? Jam, tsun chime' tupuj so'mac, ĉaĉaij na tsun Jen'tyi' jutactyi' chime'. 7Jesha', mu'in väc̣hä'tyity in jam ĉụi'si' säcsedye' ya'ij in. Me'dye mu'in chime' quịjoijtyi' in tupuj jebei' in quịjodye'ĉansi' sacacdye' mu'in. Chime'dye mu'in ĉọjcacsity cu'dye' in tupuj tyébi' reche in. 8- 9Me' yụ jéyac ọij jị'ĉocdyes p̂eyacdye' paj qui chịj mi'in mu'in carijtaquity Jen'dyes in tupuj ya'itac in. Ọij jam muntyis mọmo' dyijyedye' tsun, chime'dye mọ'dye yi' Jen'si' yụ'tacdye' mu', mọ' jaso'mitis Moisés jiquej, yi': “Jam ra' sapbitinte vóyes chụ' mu' yútyeva'caquity trivo, paj dam'jete chime'”, yi' yụ'tacdye'. Jen' jam dyijtucsi vóye, 10tsun dyijtun Jen', tsundyes mọmo' ọij sánacdye' Jen'si' mu', yi' ya'itac ca ra' tsun carijtaquity Jen'dyes tsun, yoj yi'dyem' sánacdye' o: “Mu' quịjoijtyi' judyeya' mu' vädaquity vaj me' mọ' bise' in sacacdye', vaj me' ra' so'mac in”, yi' sánacdye'. 11Tsun aty cäti mọ' vej ĉojtyi'ĉan mi'in, mọ'dyes q̂uin' tupuj so'mitiĉa' mi'in dam' jedye' a'dyes tsun. 12Pạrej mu'ya' yoctyi' cạyacsity in Jen'si' p̂eyacdye' mu', mu'in so'macsi jedye' mi'in, dadam'dye tsun jemoñe' paj qui so'mitiĉa' jedye' mi'in. Tupuj tsan' tsun cọdyetyeyac tsạ' bu'yedyes tsun, jam qui nam' me' cọdyetyeyac tsun. Me' tsan' ñịbe' bä'yi tsun, dyichchuti qui nam' tsun paj qui jam cọdyetyeyac mi'in, paj qui jam yi mi'in, “Jam ra' se'vepja tsun jäm'si' p̂eyacdye' Cristos mu' tui'si' mu' Pablo, ĉaĉaij na mu' mọ'ya' querec̣haveij”, paj jam yi mi'in. 13¿Jam chịj u mi'in jun' chuc mu'in carijtaquity in Jen'si'ĉan aca' mu'in tsạ' bu'yi in mọ'ĉansi'ĉan säcsedye'? Chime'dye mu'in yụ'tactyi' in ji'co'shaye'tyi' Jen'dyes in, chet so'mac in mọ' shush ji'co'shayacdyedyes mu'in. 14Mọ'dye mọmo' yi' Ayo'si' p̂eyacdye' mu', yi': “Mu'in voro'tacsity in p̂eyacdye' mu', mu'in ra' so'mac in tsạ' bu'yedyes in.”132 15Tupuj yụ me' chime' so'mac, jam qui nam' me' mạ'je' so'mac yụ. Chime'dye jam me'dyes ọij q̂uin' sánacdye' mi'indyes, jam yụ cọdyetyeyac jedye' mi'in. Mọ'dyes jam ra' yụ cọdaqui tsạ' bu'yedyes yụ, dam'dye jäm' säñi ĉúti yụ, paj qui jam yi in: “Me' tsan' yi mu' Pablo, jam querec̣haya' voro'tacsi muntyi' in, mu'dye qui nam' cọdyetacsi jedye'”, paj qui jam me' yi muntyi' in. 16Me' tsan' jäm'si' p̂eyacdye' voro'tacsi yụ, jam qui nam' mọ' va'bunje' yụ, ĉaĉaij na Jen'dye jiquej me' yu'tyin yụ paj qui me' voro'tacsi yụ. Jam me' chiquete jụijya' yụ, a vuty tári bä'yi u yụ. 17Ĉụi' mọmo' ji'säsdyi jụijya' yụ voro'tacsi yụ, a vuty tupuj ya'itac u yụ. Jam qui nam' ĉụi'si'ya' dyijyedye' siti yụ, Jen'dye me' yu'tyin yụ paj qui voro'tacsi yụ. 18¿Jedye' buty bijodye' yụ? Yocsi'dye bijodye' yụ, jam jedye' cọdaqui yụ voro'tacsiya' yụ jäm'si' p̂eyacdye' Jen'si' mu', mọ' nash bijodyedyes yụ shupqui'. Tupuj tsan' cọdaqui yụ tsạ' bu'yedyes yụ, jam qui nam' me' cọdaqui yụ. 19Anic faraj yụ, jam úñedye'ĉan bä'yi yụ, me' tsan' me' ĉụi' qui nam' yu'ti yụ paj qui räjdyes úñi yụ. Me' yi yụ paj qui dai' muntyi' jụj ja'yacsi yụ. 20Me' jajbu'yacsi yụ judío in, cäc̣hä'chucsebi yụ yicdye' mu'insi' in, paj qui me' jụj ja'yacsi yụ. Me' tsan' mọ' yụ'tacdye' aty jam bächän yụ, jajbu'yacsi qui nam' yụ judío in, yụ́mun taca' chime' chique' mọ' yụ'tacdye' paj qui me' jụj ja'yacsi yụ. 21Mu'in qui jajbu'yacsity yụ mu'in jam judío in jam me'chuptety yụ'tacdye' in, me' bu'yidye yụ chime' yu'ti je'ñei'tyi jam me'chui'tyi' yụ'tacdye' yụ, me' bu'yi yu'ti yụ paj qui mu'in jụj ja'yacsi yụ. Mijam qui nam' méqui' mọ' farajje' yụ Jen'si' p̂eyacdye' mu', yejĉoi' mọmo' mọ' bächän yụ Cristos p̂eyacdye' mu'. 22Mu'in qui jajbu'yacsi yụ mu'in jambi' fer bu'yity Jen'che' in, chime' bu'yidye yu'ti bä'yi yụ, paj qui jam jị'fajcacsi yụ, me'ĉandye jụj ja'yacsi yụ. Yojyojdyem' mu'in u in, me' me' jịjcatacsi yụ, paj qui me' jụj ja'yacsi yụ, tupuj jụijya' yụ. 23Voro'yedyes p̂eyacdye' me' bä'yi yụ, paj qui yụ tupuj räj ji'se'veyacsi jäm'si' p̂eyacdye' Jen'si' mu'. 24¿Jam chịj u mi'in majmaij jụijya' muntyi' in, me' tsan' räj p̂iqui in, mu'ya' qui nam' yirity chụi'tyi' mọ' bíjodye'? Me'dye ra' mi'in chime', fer bu'yi bä'yi Jen'dyes jụijya' mi'in, yojdyem' mu'in majmaijtyi' u in shuj tyeij in, me'dye ra' mi'in chime', paj qui chutiñe've mi'in mọ' bíjodye'. 25Jesha', mu'in majmaijtyi' in anic jäm' ĉujcati in judyeya' ji'fercaqui a' mu'in paj qui tupuj bíjoij in. Mọ' bijodye' mu'in ĉästacdye' q̂uebe'nacsi' shan, mọ' cavin mọtsis. Tsunsi' na ra' bíjodye', mọ' so'misin'si' ra' mu' Jen' yocsi'dye, mọ' ra' jam yirisĉan mạyedye' mọtsi'. 26Me' bu'yi yụ Jen'dyes, yojdyem' p̂iquity muntyi' u in, jam yocsi' jedye' dyijtui' yụ, chime'dye jeñej majmadye' ĉa'titidye' muntyis mu'in jam fibi' ĉa'titi in, paj qui bijoij in, me'dye yụ chime', jam yocve dyijyi yụ, jam fibi' bä'yi yụ, mu'dyes mọmo' fer carijtaqui yụ. 27Fer ĉọjcaqui ĉụi'si' a' yụ, ji'ferdyiyiti yụ paj qui rụij cäc̣hä'chute Jen' yụ. Jam jụijya' me' yụ, a vuty jam so'mac bíjodye' u yụ. Me' tsan' yụ yoctyi' jị'chiyacsi yụ vatyquej ra' jam jun' so'mac bijodye' yụ voro'tacdye'yas yụ.

will be added

X\