1 Corinthians 7

1̣Q̂uin' ra' yụ vorjebiyac cọdacdyes p̂eyacdye' mi'in, mọ' jítiĉas baja' mi'in sánacdye'che' jiquej mi'in. Yụ ra' jéyac, jäm' tsan' paj qui mu'in son' in jam jäque' p̂en in. 2Me' tsan' me', mọ' qui nam' ĉaĉaij me'taqui' vo'vodye', mọ'dyes dam'dye jäm' cäts yirityityij muntyi' in me'chui' ĉụi'si' p̂en mu'in, judyeya' mọ'in p̂en in dam'dye jäm' me'chute ĉụi'tyi' vämtyi' mọ'in. 3Mu' vämtyi' judyeya' mọ' p̂en, paj vaj cäts jị'cätsipti dyijyedye' mọ'in, jun' chuc cọdaqui' a' mọ'in. 4Mọ' vämtyi'tumsi' p̂en mọ'si' a' mọ' aty vämtyidyes mọ', judyeya' mọ' vämtyis a' mu' aty p̂endyes shupqui' mu'. 5Jam ra' vaj me' quijatutyiti a' mi'in, yejĉoij ra' me'taqui mọ'tum mi'in. Cäts dyijyi jụijya' mi'in, tupuj farajjetiñe' chum mọ' me'tacdye' mi'in paj qui mọ' chum dyijtutiñe' dam' cọdacdye' Jen'che' mi'in. A ra' me'si', quivij me'bun mi'in, jam ra' yejĉoij quijatutyitidyeij a' mi'in paj qui jam ji'pennac Satanás vo'vodye'ya' mi'in. 6Jam me' yi yụ paj qui räj mi'in vämi, me'dye mọmo' yi yụ, tyi chuc mạ'je' tupuj vämi in. 7Yụ dyijyi tsan' dam'dye jäm' jam vämi mi'in, yojdyem' yụ u. Jam mọ' dyijyedye' Jen'si' mu', ĉaĉaij na mu' Jen' jam cäts so'misin' ferdye' mu'. Pạrej so'misin' dyich bu'yedye' mu' paj qui jam jemonja' vämedye' tsun. Yoctyi' na jam me' so'misin' Jen'. 8Mọ'dyes yụ jä'mij jéyacsi mu'in yiritydyem' bä'yity in judyeya' mọ'in chime' muñemunsi' in, jäm' tsan' paj qui vaj me' bä'yi in yojdyem' yụ u. 9Jam qui nam' tupuj dyich bu'yi jụijya' mi'in, dam'dye jäm' vämi mi'in. Jam ĉọjcaqui a' jụijya' mi'in, mọ' jiyi' fer jụijya', dam'dye jäm' vämi mi'in. 10Chime'dye mọ'ya' p̂eyacdye' vämitydyes in, mọ' jam yụ́si' p̂eyacdye', Ayo'si' mu', mọ' yi' paj qui mọ' p̂en jam yacchuqui' vämtyi' mọ'. 11Yacchuqui' vämtyi' jụijya' mọ' p̂en, jemoñe' yiris quim' bä'ban', jam na jụijya' me', jemoñe' cuvij chimu'dye jäĉajte vämtyi' mọ'. Chime'dye mu' son' paj jam yacchuqui p̂en mu'.131 12Ọij ra' p̂eyacdye' me' tsan' jam mu' jị'chiyacsi Ayo' tsun jiquej, yụ qui na ram' jéyac: mu' son' anicjetety Jen' jụijya', mọ' na p̂en mu' jam anicjetes Jen' jụijya' mọ', mạ'je' qui nam' yejĉoi' mu'tum bä'yi' jụijya', paj mu' jam yacchui'. 13Chime'dye mọ'ya' jụijya' yiris p̂en anicjetes Jen', mu' na vämtyi' mọ' jam anicjetety Jen' jụijya' mu', mạ'je' mọ'tum yejĉoij bä'yi jụijya', paj mọ' jam yacchute. 14Me' tsan' jam anicjetety Jen' vämtyi' mọ', Jen' qui na ram' jañutyibuti' vämtyi' mọ' ĉaĉaij na anicyis Jen'che' p̂en mu'. Chime'dye mọ'ya' yiris p̂en jam anicjetes Jen' jụijya' mọ', Jen' ra' nọ́tye' ĉaĉaij na anicyity Jen'che' vämtyi' mọ'. Vaj me' bä'yi jụijya' in, mu'in ra' ạva' mọ'in chị́yepte Jen'si' p̂eyacdye' in. Yacchutidyei' jụijya' in, mu'in ra' ạva' mọ'in mijam ra' chị́yepte in Jen'si' p̂eyacdye' mu'. 15Me' tsan' me', vämtyi' mọ' jam anicjetety Jen' mạ'je' yacchui' jụijya' mu', paj yacchui' mọmo'. Me'dye chime', yiris p̂en jam anicjetes Jen' jụijya' mọ', mạ'je' yacchute vämtyi' jụijyam', paj yacchute mọmo'. Mu'in ra' anicjetety Jen' in tupuj farajjeyacsi in, jam ra' ferche' nọcsi in, ĉaĉaij na mu' Jen' fayinac mi'in paj qui jam chutidye'tum bä'yi mi'in. 16Mi p̂en, me' tsan' yejĉoi' vämtyi'tum bä'yi' jụijya' mi, jam qui nam' chị' mi vatyquej jụj ja'yaqui' vämtyim, vatyquej jam. Mi chime' son', me' tsan' p̂entum yejĉoij bä'yi jụijya' mi, jam qui nam' chịj mi vatyquej jụj ja'yem Jen'che' mọ' p̂en, vatyquej jam. 17Yụ ra' jéyac mi'in, jemoñe' me' yejĉoij bä'yi mi'in jun' chuc mu' Jen' yu'tyiyinac mi'in judyeya' jun' chuc jiquej mi'in, yoqui'dyem' fayinacya' Jen' jiquej u, yejĉojam' me' mi'in. 18Mu'in tạ'caty sei'tactyi' a' mu'in, yoqui'dyem' fayacsiya' Jen' jiquej u, paj jam tsị́catye' mọ' sei'tacdye' mu'in. Mu'in na jam sei'tactyi' a' mu'in yoqui'dyem' fayacsiya' Jen' jiquej u, paj jam ji'sei'taqui a' mu'in. 19Me' tsan' sei'tactyi' a' tsun judyeya' jam sei'tactyi' tsun, jam mọ' jedye' yi' Jen'si'ya' vej mu', mom' jemonja' paj qui chiquepja p̂eyacdye' Jen'si' mu'. 20Mọ'dyes yejĉojam' mi'in jun' chuc mi'in jiquej fayinacya' jiquej mu' Jen'. 21Uñity jụijya' jiquej mi yoqui'dyem' Jen' fayin u, jam ra' yoqui mọ'dyes mi. Tupuj qui nam' shupqui úñedye'ĉan ĉúti jụijya' mi, shupjada mọmo', jam mọ' jedye' yi'. 22Jesha', mu'in fayactyi' Jen'ya' in, me' tsan' úñity bä'yi in, ji'c̣honactyi' qui nam' in Ayo'ya', me' shupqui in, aty mu'tyi' qui in. Me'dye chime', mu'in fayactyi' Jen'ya' in, me' tsan' jam úñity bä'yi in, Cristoty qui nam' úñity bu'yi in. 23Jen' därsi'ya' ya'idye' jicnac mi'in, mọ'dyes aty ra' jam ji'säsdyi mi'in úñedye'ĉan mu'in. 24Vojity, yejĉojam' mi'in jun' chuc mi'in jiquej, yoqui'dyem' fayinacya' mu' Jen' u, me' ra' cäc̣hä'chutinte yejĉoij Jen' mi'in. 25̣Q̂uin' ra' yụ vorjebiyac p̂eyacdye' mi'in, mọ' jítiĉas sánacdye'che' baja' yụ mi'in, yi': ¿Tupuj buty vämi in mu'in muñety in, yiritydyem' bä'yity in? Ọij ra' p̂eyacdye' me' tsan' jam mu' jị'chiyacsi Ayo' tsun jiquej, yụ qui na ram' jéyac dyijyedye'ya' yụ, anic rụijsis mọ' p̂eyacdye' ĉaĉaij na mu' Jen' ñịbe' ĉun yụ judyeya' ñútyin yụ paj qui rụij p̂eyaqui yụ. 26Jesha' q̂uin'sis tupudye' carijsistum bä'ja' tsun, mọ'dyes dam'dye jäm' yi yụ paj qui yejĉoij mi'in jun' chuc mi'in q̂uin'. 27Aty p̂enya' jụijyam, jam ra' yacchutidye' dyijtui' mi. Jambi' p̂enya' jụijyam, jam ra' dyijyi mi quevaqui p̂en mi. 28Me' tsan' me' yi yụ, vämi qui nam' jụijyam jam mọ' juchaj shupqui'. Chime'dye yiris nanas vämi' jụijya' mọ' jam mọ' juchai'. Me' tsan' me' vämi jụijya' in, carij qui na ram' bä'yi in úche' jacche' in. Yụ na jam mạ'je' me' paj qui jam carij bä'yi mi'in. 29Vojity, yụ yi, aty c̣hẹi'ya' jadyiquisĉan tupudye', jemoñe' Jen'dyes mọmo' dyijtuja' tsun. Mu'in p̂enyaty in, paj me' bu'yi yu'bun in jeñej itŝity p̂en in, paj Jen' mọmo' dyijtute in. 30Tyi chuc tárity in, paj me' bu'yi yu'ti in jeñej ma'joijtyi' bä'yi in, tyi chuc ma'joijtyi' in, paj me' bu'yi' yu'ti in jeñej tárity bä'yi in, tyi chuc ya'ijtyi' jedye' in, paj yu'ti in jeñej qui itŝi' jedye' jụijya' mu'in, jemoñe' Jen' mọmo' dyijtute in. 31Me' tsan' úche' jacche' bíjoij carijtaqui mi'in, jam qui na ram' dyijtutiñe' jacches jedye', mọtsi' nash ra' ọij jac cạvejas q̂uin'. 32Mọ' chat mạ'je' yụ paj qui faraj bä'yi mi'in, paj qui jam ọ́ches jedye' dyijtutiñe' mi'in. Jesha', mu'in yiritydyem' bä'yity in, Ayos mọmo' carijtacdye' dyijtupte in, paj qui mu' Ayo' ma'jotacsi. 33Mu'in na p̂enyaty in, yoc mu'in dyijyi in, jacches jedye' dyijtui' in, jedye' chuc jemoñe' p̂en mu'in, 34mọ'dyes pärä' cại' dyijyedye' mu'in, Jen'dyes judyeya' p̂endyes mu'in. Me'dye chime' mọ'in p̂en in, yirisdyem' bä'yis in, Ayos mọmo' carijtacdye' dyijtupte in, jun' chuc tupuj Jen'dyes yu'ti' in, räj a' mọ'in judyeya' ạ'edye' chime' mọ'in. Mọ'in na aty vämtyi'yas in, yoc mọ'in atsvun dyijyi' in, jacches jedye' dyijtui' in jedye' chuc jemoñe' vämtyi' mọ'in. 35Mọ' mạ'je' yụ jéyac nọ́tyeyac mi'in, paj qui mum' dyijtutinte Ayo' tsun, jam mọ' mạ'je' nọ́biyac dyijyedye' mi'in, mạ'je' vämi jụijya' mi'in. 36Mu'ya' yirity muntyi' jụijya' aty mọ'ya' p̂eyeyac p̂endyes jụijya' mu', judyeya' mọ' nanas aty cha'she' jụijya' p̂an'dye' mọ' vämedyedyes mọ', mu' son' fer mạ'je' vämi jụijya', paj jicdyi' mọmo' in, jam mọ' juchaj shupqui'. 37Jam na vämi jụijya', fer bu'yi ĉojtyi'ĉan jụijya' mu', jäm' ĉụi' ĉọjcaqui a' jụijya' mu', judyeya' dyijyi ĉojtyi'ĉan mu' jam ra' vämi mu', mu' me' dyijyity, mu'si' ya'i' dyijyedye' mu'. 38Mọ'dyes tyi chuc vämi p̂eyeyacche' p̂en jụijya' mu', jäm'si' dyijyedye' mu', mu'in na dyich bu'yity in jam vämi jụijya' in, mu'si' dyijyedye' mu'in dadam' ya'i' mu'in. 39Mọ' p̂en jam jun' tupuj yacchute vämtyi' mọ' tsạ'dyem' jụijya' mu'. Säñi na jụijya' mu' q̂uin'dyem' faraj bu'ban' mọ', q̂uin' chat tupuj yoctyi'che' vämeban' mạ'je' jụijya' mọ', jemoñe' qui na ram' anicjetetyche' Jen' vämeban'. 40Jam tyi jäĉajte jụijya' mọ', dadam' ram' ma'jodye'tum bä'yi' mọ' p̂en säntaquis vämtyi'. Mọ' dyijyedye' yụ, chime'dye jadac me' yi' Jen'si' Ạ'edye' mu', mọ' me'chui'si' q̂uin' yụ.

will be added

X\