1 Corinthians 6

1Mọ'ya' jụijya' carijsis mi'in anicjetintety Jen' mi'in, jam jäm'jiti jụijya' mi'in, ¿jun' dash me' cavin ji'me'ti mi'in jacchetyya' ayo' in? Jeñejquiya' itŝij ĉọcsi mi'in anicjetety Jen' in mu'ya' mu'in in tupuj mu'in jị'cäts yu'bunac in. 2¿Jam chịj u mi'in aty ayijya' tupudye' tsun anicjejatyi' Jen', tsun ra' yụ'tac paj qui jị'cäts yụ'tacseja' jacche' bä'yity muntyi' in? Yoj na jị'cäts yụ'tacsi ra' mi'in jacchety muntyi' in, ¿jun' qui dash jam tupuj mi'in jị'cäts yụ'bajtiñe' miquis jedye' q̂uin'? 3¿Jam chịj u mi'in aty ayijya' tupudye', tsun ra' yụ'tac paj qui jị'cäts yụ'tacseja' anjer chime' in? Dam'dye jäm' jị'cäts yụ'tacsebijam' q̂uin'sis vojitysi' jedye' mi'in. 4Mọ'ya' carijsis jụijya' mi'in, ¿jäm' buty ĉúti mi'in paj qui ji'me'ti mi'in ayo'ya' jam anicjetetyya' Jen'? Jam jun'. 5Anic därsi' mọ' tsị́cadye' shupqui' mi'indyes. ¿Jam adac ĉaĉaij mi'inĉan mu'ya' yirity dyijyedye'tumtyi', paj qui mu' jị'cäts yụ'tacsi carijsisya' ĉụi'tyi' vojity mi'in? 6Mi'in na jam me', ĉụi'tyi'tum vojity mi'in ji'me'ti mi'in dadam' mu'inche' in jam anicjetetyche' Jen' in. 7Anic där cäj cạtiñe' dyijyedye' mi'in vaj meij ji'me'ti mi'in. Aty me' jụijya' mi'in därsi' ji'penacdye' mọ' shupqui'. Me' tsan' yoctyi' me'tyinac jụijya', dam'dye jäm' dyich bu'yi mọmo' mi'in. Vojity jụijya' shi'atunac mi'in dam'dye jäm' jam ra' ji'me'tinte ayo'ya' mi'in, paj mọ'ya' mọmo'. 8Mi'in na jam yi mi'in, yejĉoij juchatucsi vojity mi'in, judyeya' shi'atucsi chime' mi'in. 9¿Jam chịj mi'in, mu'in ac̣hi'yity in jam nash ra' Jen'yadyety mu'in in, ayo'bu'yedye'ĉan mu'? Jam ra' ĉụi' väñätuti mi'in. Jesha', mu'in vo'voijtyi' in judyeya' mu'in jäm'tacdye'che' cudyitity in, judyeya' mu'in vaj son' me'tity in, 10judyeya' mu'in shi'aijtyi' in, judyeya' mu'in fer mạ'jetety querec̣ha in, judyeya' mu'in tyeijtyi' in, judyeya' ñinaquity in, mu'in jo'mestum bä'yity in jam nash ra' Jen'yadyety mu'in in ayo'bu'yedye'ĉan mu'. 11Me' mi'in chime' pạrej jiquej bä'yi mi'in, q̂uin' qui nam' aty c̣hicon'tac ĉojtyi' mi'in, aty Jen'dyety q̂uin' mi'in ĉaĉaij na Jesucristoya' mu' Jen' rụij yu'tyinac mi'in, mu'si'ya' Ạ'edye' mu'. 12Pạrej mu'ya' yi mi'in: “Aty q̂uin' faraj yụ, jam yiris jedye' tapchun yụ, jun' chuc mạ'je' ĉụi' jụijya' yụ, tupuj me' jäm'taqui yụ”, yi pạrej mi'in. Anic tsan' me', aty faraj tsun. Me' tsan' me', me' qui nam' bä'ja' jụijya' tsun, jam mọ' ñútyisin' Jen'dyes. Me' tsan' jam yiris jedye' tapchun yụ, are'ĉa yiris jedye' bächän yụ. 13Yi pạrej mu'ya' in: “Tupuj jụ'ñis ĉụi' mọmo' säcsedye' jebeja' ĉaĉaij na me'dyes vo'co tsun”, yi in. Anic tsan' me', Jen' qui na ram' jị'motse' mọ' säcsedye' judyeya' vo'co tsun chime'. Chime'dye yi in: “Mọ' a' tsun me'tacdyes mọmo', tupuj tyi ĉụi' mọmo' jäcja'”, yi pạrej mu'ya' in. Jam nash me'dyety tsun, a' tsun Ayodyes, mu' bächäbusin' judyeya' ĉujcasin'. 14Mu'dye ra' Jen' ji'tsa'ibubujsin' a' tsun ferdye'ya' mu', yoj jibusin'dyem' ji'tsa'ibubujsin' Ayo' u tsun jiquej. 15¿Jam chịj u mi'in, yojdyem' Cristos a' u mu', me' bu'yi' a' mi'in? Mọ'dyes jam jun' tupuj p̂en jäcja' tsun me'taquis, me' jụijya' tsun jeñej cafon bu'yi' Cristostum a' mu' me' yụ'bija, me' bu'yi' shupqui' mọ'. 16¿Jam chịj u mi'in, yirity muntyi' jäque' p̂en me'sis jụijya', mọ'tum yiris mọmo' shupqui' a' mu'? Ĉaĉaij na me'dye yi' sánacdye': “Aty qui jam pärä' muntyi' shupqui in, yirity bu'yi quim' cạvacsi mu' Jen'.”130 17Me'dye mu'in chime' Cristoty in, yirity mu'tum shupqui in ạ'edye'ya' mu'in. 18Ĉa'joyevac mọ' vo'vodye', ĉaĉaij na mọ'in yocsi' juchaj in jam ja'ac̣hi'buti a' muntyis mu', vo'voij na jụijya' mu', mọ' chat ja'ac̣hi'buti a' mu'. 19¿Jam chịj u mi'in mọ' a' mi'in mọ' nash aca' Jen'si' mu'? Me' bu'yi' mọ', ĉaĉaij na mọ'ĉan bä'yi' mọ' Jen'si' Ạ'edye' mu', mọ' so'minacsi' Jen'. ̣Q̂uin' aty jam ĉụi'si' a' mi'in, 20Jen'tyi' qui mi'in, därsi'ya' ya'idye' jicnac. Mọ'dyes Jen'dyes bä'jam' mi'in räjtumdye a' mi'in, jam ra' yocve bä'yi mi'in, paj qui mu'in cavinactyi' in tima'quete Jen' in mi'indyes.

will be added

X\