1 Corinthians 5

1Yụ chịj mi'inĉan mu'ya' yirity vo'voijtyi' muntyi', mọ'tum ca bä'yi jen'si'tum p̂en mu'. Anic mọ' där a'c̣his juchaj, uya'ya'dye qui mu'in in jam anicjetety Jen' in jam me' jäm'taqui in. 2Mi'in na va'bunyi mọmo'. Dam'dye jäm' yoquejam' ĉojtyi'ĉan mi'in. Va'quecmac mi'in mu' me' bä'yity juchajtumtyi'. 3Me' tsan' moch mi'inya' yụ, ĉojtyi'ĉan qui nam' yụ pen'dyetuyac mi'in. Me' tsan' yụ itŝij mi'inya', Jesucristosche' tịj mu', Ayos tsun, aty yụ yụ'tyeyete va'tacdye' mu' vo'voijtyi' muntyi'. 4Vajmu'ya'yevac mi'in Jesucristosche' tịj mu', Ayos tsun, mu'si' ra' ferdye' so'minac ra' mi'in, judyeya' yụ ra' pen'dyetuyac ĉojtyi'ĉan yụ. 5Vaj yiri'ya' yi ra' mi'in meijjebajtinte ra' mi'in, paj qui aty jam pen'dyetubunac, paj qui mu' Satanás jạñibe'buti a' mu' judyeya' qui ra' c̣hoñi' ạ'edye' mu' aty ayijya' tupudye' Jesússi' Ayos tsun. 6Jemoñe' jam me' va'bunyi mi'in, jun' chuc rụij bä'yi mi'in. ¿Jam adac chị́yetiñe' mi'in ọij p̂eyacdye' yi': “Dam' mọmo' bijtac mọ' ji'dujraquis, uts na tas ji'dujrete mu' pan” yi'? 7Jesha', jiquej tas va'queque' in mọ' ji'dujraquis, yedyej qui mọmo' pan jäm'te in, me'dye ra' mi'in chime' me'jetiñe' ra' mọ' juchaj, va'quectiñe' ra' räj paj yedyej jäm'tyi' shupqui mi'in, ĉaĉaij na aty me' yu'nac mu' Jen'. Me'dye mu' Cristo, aty ijac tsundyes, jeñej bu'yi oveca ji'co'shayes jiquej in feshtaya' Ji'c̣honac-dyedyes. 8Jam ji'dujraquistum jiquej feshtaij in, räj va'queque' in,129 me'dye tsun chime' farajjeja'ya' a'c̣his dyijyedye' tsun judyeya' juchaj tsun. Jäm'si' qui ra' dyijyedye' rụijsis cạja', paj qui me' shupqui' yojdyem' jiquej feshtaij u in jam ji'dujraquistum. 9Yocsi'che' sánacdye' jiquej yụ, yụ jéyac paj qui mi'in jam pen'dyetucsi mu'in vo'voijtyi' in. 10Me' jéyac yụ jiquej, jam mu'in p̂eyacsi yụ, mu'in ac̣hi'yity in jam anicjetety Jen' in, mu'in me'tyity in tupuj tsan' pen'dyetucsi mi'in, ĉaĉaij na úche' jacche' yedyejyaij mu'in ac̣hi' bä'yity in, vo'voijtyi' in, fer mạ'jetety querec̣ha in, shu'aijtyi' in, judyeya' jäm'tacdye'che' cudyitity chime' in. Jam me'tyity mạ'je' pen'dyetucseja' jụijya' tsun, jemoñe' qui ọij jac yacchuja' tsun. 11Yụ yi p̂eyacsi jam ra' pen'dyetucsi mi'in mijam ra' jebetacsi mi'in mu'in yity in: “Yụ nash anicjetety Jen'”, ac̣hi' qui nam' bä'yity in, chivo'voty in, fer mạ'jetety querec̣ha in, jäm'tacdye'che' cudyitity in, ñinaquity in, tyeijtyi' in, judyeya' shi'aijtyi' chime' in, jam ra' me'tyity pen'dyetucsi mi'in. 12- 13Jesha', yụ jam yụ'tac paj qui yụ jị'cäts yụ'tacsi juchadye'ya' mu'in jam anicjetety Jen' in. Jen'dye ra' jị'cäts yụ'tacsi juchadye'ya' mu'in. Mi'in tupuj jị'cäts yụ'tacsi juchadye'ya' mu'in anicjetety Jen' in Cristoty ñuru'tyity mu', mọ' nash mi'insi' carijtacdye'. Va'quecmac yiristum mu' juchajtumtyi' muntyi' vo'voijtyi' mu' mi'inĉantyi' paj qui aty jam mi'intum bä'yi.

will be added

X\